Kaat Yôhanes

13 Yésu a bé yi i bisu bi ngand Pasa le ngeñ yé i nkola+ le a yék nkoñ ’isi, a kee yak Isañ.+ Kiki a bi gwés banigil bé ba ba bé hana nkoñ ’isi, a kônde gwés bo letee ni lisuk.+ 2 I ngéda ba bé je kôkôa, Nsohop a bé a ma mal ha ikété ñem u Yuda Iskariôt,+ man Simôn, le a liibana nye.+ 3 Ndi kiki Yésu a bé yi le Isañ a bi bii mam momasôna i moo mé, ni le a bi lôl yak Nyambe, a kenek ki yak Nyambe,+ 4 a telep i ngéda ba bé je, a bii mambot mé ma ngii ipañ. A yoñ wédé, a téñba yo i bôbôk.*+ 5 I mbus, a ha malép i séya, a bôdôl jôwa makôô ma banigil, a sahak mo ni wédé i bé ntéñék i bôbôk yé.* 6 I ngéda a bi pam yak Simôn Pétrô, Pétrô a kal nye le: “A Nwet, baa wen u njôwa me makôô?” 7 Yésu a timbhe nye le: “I jam me yé i boñ, u nla bé nok jo nano, ndi w’a nok jo i mbus ngéda.” 8 Pétrô a kal nye le: “Kekikel, m’a neebe bé le u jôwa me makôô.” Yésu a timbhe nye le: “Ibale me jôwa bé we makôô,+ u ta bé le u bana ngaba lôñni me.” 9 Simôn Pétrô a timbhe nye le: “A Nwet, u jôwa ndik bañ me makôô motama, ndi yak moo mem ni ño wem.” 10 Yésu a kal nye le: “Nu ni nu a mal nogop, a gwé ndik ngôñ le ba jôwa nye makôô inyu boñ le nyensôna a ba mapubi. Bé ni yé mapubi, ndi bébobasôna bé.” 11 Inyule a bé yi i mut a nlama liibana nye.+ Inyu hala nyen a bi kal le: “Bébobasôna bé bon ni yé mapubi.”

12 Ndi i ngéda a bi mal jôwa bo makôô, a haba mambot mé ma ngii, a témb a yén i téblé,* a kal bo le: “Baa ni nok jam me mboñ bé? 13 Ni nsébél me le ‘Malét’ ni ‘Nwet,’ ni kôli ki sébél me hala inyule maliga ma.+ 14 Jon ibale me nu me yé Nwet ni Malét me njôwa bé makôô,+ yak bé ni nlama* jôôna makôô bé ni bé.+ 15 Inyule me nti bé ndémbél le kiki me mboñ inyu nan, yak bé ni boñ nlélém.+ 16 Me nkal yaga bé maliga le, nkol u nloo bé nwet wé, to mut ba ñep a nloo bé nu a bi ep nye. 17 Ibale ni nyi i mam mana, maséé ma yé ni bé ibale ni mboñ mo.+ 18 Me ta bé i pôdôl bébobasôna; me nyi i bôt me bi pohol. Ndi hala a mbôña le i tilna ini i yon:+ ‘Nu me ni nye di bé je ntôñ* a mpa tindi yé ikolba me.’*+ 19 Ibôdôl nano, me ñañle bé jo ilole li mbôña, le i ngéda li mbôña toi, ni hémle le men me yé nye.+ 20 Me nkal yaga bé maliga le, nu ni nu a nleege i mut me ñep, wee a nleege yak me;+ nu ni nu a nleege me, wee a nleege yak Nu a bi om me.”+

21 Kiki Yésu a mal pot i mam mana, ñem u siida* nye, a bok mbôgi, a kal le: “Me nkal yaga bé maliga le, wada ikété nan a’ liibana me.”+ 22 Banigil ba bôdôl nun-na bo ni bo, ba bak nhelek, ba yik bé njee a yé i pôdôl.+ 23 Wada ikété banigil, nu Yésu a bé gwés,+ a bé a nigi bebee ni* Yésu. 24 Jon Simôn Pétrô a bi nik i nnigil nu, a kal nye le: “Kal bés njee a yé i pôdôl.” 25 I nnigil nunu a sedep ni mbus, a nigip i tôl* Yésu, a bat nye le: “A Nwet, njee nu?”+ 26 Yésu a timbhe le: “Nu m’a ti két bret me nyube ikété séya.”+ I mbus, kiki a nyube bret, a yoñ yo a ti yo Yuda, man Simôn Iskariôt. 27 I ngéda Yuda a bi yoñ két bret, Satan a jôp ikété yé.+ Ha nyen Yésu a bi kal nye le: “I jam u yé i boñ, pala boñ jo.” 28 Ndi ikété bôt ba bé ba yii i téblé,* to wada a bi yi bé inyuki a bi kal nye hala. 29 Bahogi ba bé hoñol le kiki Yuda nyen a bééna nkuu moni,+ Yésu a bé kal nye le: “Somb i gwom bi mbéda bés inyu ngand,” tole a ti ndék jam inyu diyeyeba. 30 Jon kiki a yoñ ndik két bret, a pam i nlélém ngéda. U u bé nsudge.+

31 Ndi i ngéda a bi pam, Yésu a kal le: “Nano Man mut a nkôhna lipém,+ yak Nyambe a nkôhna lipém ni njel Man. 32 Nyambe nyemede a’ ti nye lipém,+ a’ ti ki nye lipém kunda yada. 33 A boñge batitigi, me ngi yii lôñni bé inyu ndék ngéda. N’a yéñ me; ndik kiki me bi kal Lôk Yuda le: ‘I het me nke, ni nla bé lo nyoo,’+ nano me nkal yak bé hala. 34 Me yé i ti bé mbén mondo, le ni gwéhna bé ni bé; ndik kiki me bi gwés bé,+ yak bé ni gwéhna hala bé ni bé.+ 35 Hala nyen bôt bobasôna b’a yi le ni yé banigil bem, ibale ni ngwéhna bé ni bé.”+

36 Simôn Pétrô a bat nye le: “A Nwet, hee u nke?” Yésu a timbhe le: “I het me nke, u nla bé noñ me nano; ndi w’a yik noñ me i mbus ngéda.”+ 37 Pétrô a bat nye le: “A Nwet, inyuki me nla bé noñ we nano? Me yé bebee i ti niñ* yem inyu yoñ.”+ 38 Yésu a timbhe nye le: “Baa u yé toi bebee i ti niñ* yoñ inyu yem? Me nkal yaga we maliga le, nlôm kôp a yé mbén i oñ, we ngi tañba me ngélé aa.”+