Minson mi baôma

18 I mbus ha, Paul a nyodi i Atén, a ke i Korintô. 2 A boma man Lôk Yuda wada le Akila,+ mut pes mbok Pôntôs, nu a bi tip lôl i Italia ni nwaa le Priskila, inyule Klaudiô a bi ti oda le Lôk Yuda yosôna i nyodi i Rôma. Jon a bi ke i boni, 3 inyule ba bé sal nlélém bôlô, a yén i ndap yap, a salak lôñni bo, hala kiki ba bé sal bôlô+ i kôñôl mandap ma mabadô. 4 Paul a bé ti nkwel* i ndap bibégés+ hiki kel sabat,+ a tindge Lôk Yuda lôñni bôt ba Grikia i hémle.

5 Ndi kiki Silas+ bo Timôtéô+ ba bi lôl i Makédônia, Paul a bôdôl gwélél ngéda yé yosôna inyu añal bañga i Nyambe, a bogok mbôgi inyu unda Lôk Yuda le Yésu nyen a yé Kristô.+ 6 Ndi kiki ba nai ni kolba nye, ba leñek nye bibuk bibe, a sugde mambot mé,+ a kal le: “Bé bon n’a ba njom i nyemb nan.*+ Me yé nginsohi. Ibôdôl nano,+ m’a ke yak bôt ba matén.”+ 7 Ha nyen a bi nyodi nyoo,* a jôp ikété ndap mut wada ba nsébél le Titô Yustô; a bé mut a mbégés Nyambe, ndap yé i bak i édi ni ndap bibégés. 8 Ndi ñane ndap bibégés le Krispô+ a bôdôl hémle Nwet, nye ni ndap yé lihaa yosôna. Yak ngandak bôt ba Korintô ba ba bi nok, ba bôdôl hémle, ba sôblana ki. 9 Handugi hala, Nwet a kal Paul ni juu ikété yiinda le: “U kon bañ woñi, ndi kee ni bisu i pot, u mom bañ nwee, 10 inyule me yé lôñni we,+ mut to wada a’ boñ bé we béba; inyule me ngi gwé ngandak bôt munu tison ini.” 11 Jon a bi yén ha nwii wada ni sôñ isamal, a niigaga bo bañga i Nyambe.

12 I ngéda Galiô a bé ngomin i pes mbok* Akaya, Lôk Yuda i ôô jimb inyu kolba Paul, i kena nye i homa bikééhene, 13 i kalak le: “I mut nunu a ntinde bôt i bégés Nyambe i nya i nkolba mbén.” 14 Ndi i ngéda Paul a bé bebee ni pot, Galiô a kal Lôk Yuda le: “A Lôk Yuda, ibale i mut nunu a boñ jam libe tole béba ikeñi, ki me nsédi ôô inyu emble bé. 15 Ndi ibale a yé pééna inyu bibuk, inyu môl ni inyu mbén nan,+ hala a mbéñge bébomede. Me gwé bé ngôñ i kéés i mam ma.” 16 Ha nyen a luhul bo le ba nyodi i homa bikééhene. 17 Jon bobasôna ba bi gwel ñane ndap bibégés le Sôsténés,+ ba bôdôl bép nye i bisu bi homa bikééhene. Ndi Galiô a bi ha yaga bé nyo wé mu mam ma.

18 Paul a kônde yén ha jôga li dilo; i mbus, a tjôla lôk kéé, a yoñ sitima lôñni Priskila bo Akila, ba ke i Siria. I Kenkréa,+ a kit tjôñ inyule a bi ti likak. 19 Kiki ba mpam i Éfésô, a yék bo ha; ndi a jôp i ndap bibégés, a tinde Lôk Yuda i hek pék.+ 20 To hala kiki ba bi waa bé soohe nye le a kônde yén lôñni bo, a bi neebe bé, 21 ndi a tjôla bo, a kal bo le: “M’a tiimba lo i bééni, ibale Yéhôva* a ngwés.” I mbus, a yoñ njel tuye, a nyodi i Éfésô, 22 a sôs i Kaisaréa. Ha nyen a bet,* a yéga likoda; i mbus, a sôs i Antiôkia.+

23 Kiki a mal tégbaha ndék ngéda nyoo, a nyodi, a tagbene i ngandak bahoma mu loñ Galatia ni i Frigia,+ a lédhak banigil bobasôna.+

24 Nano, man Lôk Yuda wada nu jôl jé le Apôlô,+ mut tison Aléksandria, a lo i Éfésô; a bé yi nkwel kiyaga, a yik Bitilna ngandak. 25 Ba bi niiga* i mut nunu njel Yéhôva;* kiki a bé loñ ni mbuu mpubi, a podok, a niigaga ki mam inyu Yésu ni maliga, ndi a bé yi ndigi sôble i Yôhanes. 26 A bôdôl pot ni makénd ikété ndap bibégés, ndi kiki Priskila bo Akila+ ba ñemble nye, ba yoñ nye i boni, ba tibil toñle nye njel Nyambe. 27 Ndi kiki a bé gwés ke i Akaya, lôk kéé i tilna banigil inyu ti bo makénd le ba leege nye loñge. Jon i ngéda a bi pam nyoo, i bôt ba bi yila bahémle ni njel konangoo i mbuma ñañ i Nyambe, a hôla bo ngandak; 28 inyule a bé tibil yaga unda i mbamba lôñni makénd le biniigana bi Lôk Yuda bi ta bé maliga, a undga bo ni njel Bitilna le Yésu nyen a yé Kristô.+