Ñañal

11 Leñ bret yoñ i malép,+ inyule i mbus ngandak dilo w’a témb u léba yo.+ 2 Ti bôt basaambok, to bôt juem ngaba,+ inyule u nyi bé i béba jam i ga kwo hana ’isi.

3 Ibale ond i nyon ni malép, nop a ga no hana ’isi; ibale e i nkwo i pes nwelmbok tole i pes ñombok, i ga yégle ha i homa i nkwél.

4 I mut a mbéñge kiki mbebi i nhôñ, a ga nwes bé mbôô; yak nu a nun ond a ga bumbul bé.+

5 Kiki u nyi bé lelaa mbuu u mboñ i bihés bi man nu a yé ikété libum li* muda jém,+ hala nyen u nyi bé to nson u bañga Nyambe nu a mboñ mam momasôna.+

6 Nwes mbôô yoñ kegla, u nôyôs bañ woo woñ letee ni kôkôa;+ inyule u nyi bé imbe i ga o, too ini, too ii tole yo iba.

7 Mapubi ma yé loñge, i yé ki loñge le mis ma tehe hiañgaa. 8 Ibale mut a niñ ngandak nwii, a kon maséé mu nwii mi nwominsôna.+ Ndi a nlama bé hôya le yak dilo di jiibe di nla ba ngandak; i mam momasôna ma nlama lo ma yé yañga.+

9 Kon maséé a mañge wanda hala kiki u ngi yii njohok, yak ñem woñ u kon maséé i dilo di binéñél gwoñ. Boñ kiki ñem woñ u nkal we, noñ mam malam mis moñ ma ntehe; ndi yi le bañga Nyambe a ga pémhene we mbagi* inyu mam ma momasôna.+ 10 Jon héya mam ma nlona we nduña ñem, kee ki haa ni mam mabe,* inyule libak li mañge wanda ni ngui mañge wanda bi yé yañga.+