Yérémia
35 Yéhôva a bi pôdôs ki Yérémia i dilo di Yéhôyakim,+ man Yôsia, kiñe Yuda, a kal nye le: 2 “Ke tehe Lôk Rékab,+ pôdôs bo, u kena ki bo i témpel Yéhôva, u jôbna bo i kumba yada ikété bikumba;* i mbus, u ti bo wai le ba nyo.”
3 Ha nyen me bi ke me yoñ Yaazania, man Yérémia, man Habasina, yak ni lôkisañ, bon bé bobasôna; ni bon ba Lôk Rékab bobasôna, 4 me kena bo i témpel Yéhôva. Me jôbna bo i kumba i bon ba Hanan, man Igdalia, mut bañga Nyambe. I kumba ini i bé ipañ kumba i baane ba litén, i i bé i ngii kumba i Maaséya, man Salum, nu a bé ntat nwemel. 5 I mbus, me bii bikop ni mabôndô ma wai i bisu bi Lôk Rékab, me kal bo le: “Nyona wai.”
6 Ndi ba kal me le: “Di nyo bé wai, inyule sôgôlsôgôl wés le Yônadab,*+ man Rékab, a bi ti bés i oda ini le: ‘Kekikel ni nyok bañ wai, to bé, to bon banan. 7 Ni oñ bañ to mandap, ni belek bañ mbôô, to bebela yo ki yo, ni salak bañ wom u minkôô mi wai, ni nlama bé to bana i nya wom i. Ndi ni nlama yééne i mandap ma mabadô, inyu boñ le ni niñ ntandaa ngéda mu loñ ni nyééne kiki bakén ba bôt.’ 8 Jon di ngi nôglak mambén momasôna Yônadab, man sôgôlsôgôl wés Rékab, a bi ti bés; d’a nyo bé wai kekikel, to bés, to baa bés, to bon bés bôlôm, to bingond gwés. 9 Di ga oñ bé to mandap le di yééne mu, di gwé bé to nwom mi minkôô mi wai, to nwom mi bijek, to mbôô yo ki yo. 10 Di ga yééne ndik i mandap ma mabadô inyu nôgôl mambén momasôna sôgôlsôgôl wés Yônadab a bi ti bés. 11 I ngéda Nébukadnézar,* kiñe Babilôn, a bi leñ loñ gwét,+ di kalna le: ‘Loga, di kenek i Yérusalem inyu pei ntôñ gwét u bôt ba Kaldéa ni u bôt ba Siria.’ Inyu hala nyen di nyééne nano i Yérusalem.”
12 Ha nyen Yéhôva a bi pôdôs ki Yérémia, a kal nye le: 13 “Haana nyen Yéhôva nu mintôñ mi gwét, Nyambe nu Israel a nkal: ‘Ke kal bôt ba litén li Yuda ni bôt ba nyééne i Yérusalem le: “Baa me bi kal bé bé le ni nôgôl bibañga gwem, me podok me tiimbaga?”+ Hala nyen Yéhôva a mpot. 14 “Yônadab, man Rékab, a bi ti mbôda yé oda le ba nyok bañ wai, ba bi nôgôl bibañga gwé, ba nyo bé wai letee ni i len ini; ba nôgôl mbén i sôgôlsôgôl+ wap. Ndi me, me bi pôdôs bé ngandak ngélé,* ndi ni nôgôl bé me.+ 15 Me bi ômle bé bagwélél bem bobasôna le bapôdôl, me omok, me tiimbaga,*+ inyu kal bé le: ‘Soho, hiki wada nan a kôm béba mbus,+ a boñ ki mam ma téé sép! Ni bégés bañ banyambe bape, ni gwélél bañ to bo; inyu boñ le ni yééne mu loñ me bi ti bé lôñni basôgôlsôgôl banan.’+ Ndi ni bi emble bé, ni bi nôgôl bé to me. 16 Mbôda Yônadab, man Rékab, i bi nôgôl oda sôgôlsôgôl wap a bi ti bo,+ ndi i litén lini li nôgôl bé me.”’”
17 “Inyu hala nyen Yéhôva Nyambe nu mintôñ mi gwét, Nyambe nu Israel a nkal le: ‘Me yé i boñ le bikuu bi kwél Yuda ni bôt bobasôna ba nyééne i Yérusalem, i bikuu gwobisôna me bi yis bo le me ga lona;+ inyule me bi pôdôs bo, ndi ba bi emble bé me, me bi sébél bo, ndi ba bi neebe bé me.’”+
18 Yérémia a kal Lôk Rékab le: “Haana nyen Yéhôva nu mintôñ mi gwét, Nyambe nu Israel, a mpot: ‘Kiki ni bi nôgôl oda i Yônadab, sôgôlsôgôl nan, ni ngi nôglak ki mambén mé momasôna, ni boñok mam momasôna kiki a bi kal bé, 19 jon Yéhôva nu mintôñ mi gwét, Nyambe nu Israel a nkal le: “Mut nu mbôda Yônadab, man Rékab, a ga hañ bé i bisu gwem inyu gwélél me.”’”