Yésaya
5 Me nsômbôl tubul nugwéha wem hiémbi,
hiémbi inyu nugwéha wem ni wom wé u minkôô mi wai.+
Nugwéha wem a bééna wom u minkôô mi wai i ngii hikôa hi hi nha bijek.
2 A bi tém hisi, a héya ngok mu.
A bééna botñem le u ga ti nye matam malam,
ndi u bi ti ndik matam mabe.+
3 “Nano a bôt ba Yérusalem ni bôt ba Yuda,
baglana nkaa ipôla me ni wom wem u minkôô mi wai.+
4 Kii ipe me bé le me boñ inyu wom wem u minkôô mi wai
le me bi boñ bé?+
Inyuki me bé bem matam malam,
ndi u num ndik matam mabe?
5 Nano, soho nwaha me kal bé
i jam me ga boñ wom wem u minkôô mi wai:
me ga héya lipénd jé li biloo,
ba ligis jo.+
Me ga bôk lipénd jé li ngok,
ba tidbe jo.
6 Me ga tjôô i wom u;+
mut a ga kit ha bé bipom mu, ba ga kôs ha bé wo.
7 Inyule litén li Israel jon li yé wom u minkôô mi wai u Yéhôva nu mintôñ mi gwét;+
bôt ba Yuda bon ba yé wom u bijek u u bé kônha nye maséé.
A bééna botñem le bôt ba ga kéés ni mbagi i téé sép,+
ndi mbagi i téé bé sép yon a bi tehe;
a bé bem le a tehe bôt ba téé sép,
ndi minlondok mi njiiha nwon a bé nok.”+
8 Ngoo ni bôt ba nkônde ndap i mbus ndap,+
ba ba nkônde wom i mbus wom,+
letee homa a ba ha bé inyu bôt bape,
ba kahal yén botama i loñ!
9 Yéhôva nu mintôñ mi gwét a bi kum soñ i maôô mem
le ngandak mandap, to ibale ma yé makeñi, ma bak malam,
ma ga yila yom bilim,
mut a ga yééne ha bé mu.+
10 Wom u minkôô mi wai nkeñi* u ga ti ndik 22 lita,*
mut a ga nwes 160 kilô* i mbôô i blé, a bumbul ndik 16 kilô.*+
11 Ngoo ni bôt ba mpule telep kegla inyu nyo maok,+
ba nyén ikepam ni juu letee ba hiôô wai!
12 Ba gwé diluñ ni bikôkôda bi manganda,
dingoma, dikos, ni wai i mangand map;
ndi ba nyoñ bé ngéda ni mam Yéhôva a mboñ,
ba mbéñge bé to minson mi moo mé.
13 Litén li ga ke i minkôm
inyule li gwé bé yi;+
njal i ga gwel mintôô nwap mi bôt,+
nyus i ga gwel litén jap jolisôna.
14 Inyu hala nyen Soñ* i nkônde keñep,
i nahal nyo wé, nahal ni nahal;+
lipém* li Yérusalem, ni liyôgbe li bôt bé, ni bôt ba nke i mangand mé,
ba ga jôp mu ibabé set.
15 Mut a ga ôôp,
mut a ga suhlana,
yak mis ma bôt ba ngôk ma ga sôs.
16 Mbagi i téé sép i Yéhôva nu mintôñ mi gwét i ga boñ le a kôhna lipém;
17 Bon ba mintômba ba ga je bikai ibabé i kon woñi wengoñle ba yé i homa wap lijél;
bakén ba bôt ba ga jél i homa binuga bi mahoñ bi bé behee.
18 Ngoo ni bôt ba bitembee! Ba tiñi ni malôga ni bibéba gwap;
ba yé kiki nuga le ba ntéñ i kak, i ôdôk yo homa nyensôna;
19 ba nkal le: “Nyambe a pala gwel nson wé;
u pala bôña le ndi di tehe wo.
20 Ngoo ni bôt ba nkal le loñge i yé béba, béba i yé loñge,+
ba ba nkal le jiibe li yé mapubi, mapubi ma yé jiibe,
ba ba nkal le yom i nlol yon i ne, yom i ne yon i nlol!
21 Ngoo ni bôt ba ba nhoñol le ba gwé pék
ba ba ntehe le ba nyi jam!+
22 Ngoo ni bôt ba ba gwé ngui i nyo wai,
ni bôt ba ba yé balét inyu pôdna maok,+
23 i bôt ba nwéhél béba mut inyule i nti bo bitek,+
ba nkôde ki mbagi i mut a téé sép!+
24 Jon kiki hié hi nligis dikaha,
kiki minumuk mi bikai mi nloñ i hié,
hala nyen minkañ nwap mi ga bol,
yak bisem gwap bi ga tjama kiki lipum li biték,
inyule ba ntjôô mbén* Yéhôva nu mintôñ mi gwét,
ba nyan bañga i Numpubi nu Israel.+
25 Inyu hala nyen hiun hi Yéhôva hi nkalna litén jé,
a ga sambal woo wé inyu kogse bo.+
Dikôa di ga pôgha,
mim nwap mi ga ba mi umbi i minloñ kiki binan.+
Ndi to hala, hiun hié hi nsôs bé,
ndi woo wé u ngi yii nsamblak inyu kogse bo.
26 A ga téé yimbne* inyu sébél litén li li yé haa;+
a ga hem inyu sébél i bôt ba yé nyoo likas li hisi lipe;+
béñgnana ki! bo bana ba yé i lo ngwéé ngwéé.+
27 To wada wap a nwaa bé, a mbômda bé to.
To wada, ’ilo hi ntôñgôl bé nye, a nke bé to ’ilo.
Ngôli i i yé bo i bôbôk i nhohla bé.
To minkai nwap mi bitamb mi mpédi bé.
28 Makoñ map momasôna ma yé nhôlôk,
ba nimbil ki mimpihlôñgô nwap.*
Bipal bi bihosi gwap bi nlet kiki ngok,
makôô ma bikak gwap ma yé kiki mbuk mbebi.+
Ba nyai, ba ngwel ki nuga yap,
ba nkena yo, mut a mba bé inyu sôñ yo.
30 I kel i, i ngéda ba ngwel yo, ba ga bam
kiki mangudga ma tuye.+
I bôt bobasôna ba ga béñge loñ ba ga tehe ndik ngangañ jiibe;
ond i ga boñ le yak mapubi ma yila jiibe.+