Minson mi baôma

19 I mbus mam mana, i ngéda Apôlô+ a bé i Korintô, Paul a tagbene ikété nkoñ u Asia, a sôs i Éfésô.+ A koba banigil bahogi nyoo, 2 a kal bo le: “Baa ni bi kôhna mbuu mpubi i ngéda ni bi yila bahémle?”+ Ba timbhe nye le: “Ngo di yé ngi to nok le mbuu mpubi u yé.” 3 Ha nyen a bi kal le: “Imbe sôble ni bi kôhna ni?” Ba kal le: “Sôble i Yôhanes.”+ 4 Paul a kal le: “Yôhanes a bi sôble bôt le hala a ba yimbne le ba nhiel miñem,+ a kalak bôt le ba hémle nu a nlo i mbus yé,+ hala wee Yésu.” 5 Kiki ba nok hala, ba sôblana i jôl li Nwet le Yésu. 6 I ngéda Paul a bi kéhi moo i ngii yap, mbuu mpubi u lo i ngii yap,+ ba bôdôl pot dilémb dipe, ba podok yak mbañ.+ 7 Bobasôna ba bé jam kiki bo jôm li bôt ni iba.

8 Inyu sôñ aa, Paul a bé pot ni makénd i ndap bibégés,+ a tinak minkwel, a noodege tinde bo i hémle Ane Nyambe.+ 9 Ndi i ngéda bôt bahogi ba bi nai ni nledek ñem, ba tjél hémle,* ba bôdôl ôbôs jôl li Njel*+ i bisu bi limut, a bagla ni bo,+ a bagal yak banigil le ba nyodi mu lôñ yap, a kahal ti minkwel hiki kel i ndap suklu i Tiranô. 10 Hala a bi nom nwii ima kayéle i bôt bobasôna ba bé yééne i pes mbok Asia ba nok bañga i Nwet, Lôk Yuda ni bôt ba Grikia.

11 Nyambe a kônde ki boñ bihélha bi mam bi mbuma ñañ ni njel Paul,+ 12 i nya i yé le bôt ba bé yoñ yak mabadô lôñni mambot ma bôlô ma ma bi tihba nyuu Paul inyu kena mo yak bakokon;+ makon map ma malak, yak mimbuu mimbe mi pamak ikété yap.+ 13 Ndi Lôk Yuda ihogi i i bé hiôm, i pémhak mimbuu mimbe, i bi noode gwélél jôl li Nwet le Yésu i ngii bôt ba bééna mimbuu mimbe, i kalak le: “Me nti yaga we oda ni njel Yésu nu Paul a ñañal.”+ 14 Ñéga biprisi wada le Skéva, nu a bé man Lôk Yuda, a bééna bon bôlôm basaambok ba ba bé boñ hala. 15 Ndi mbuu mbe u timbhe bo le: “Me nyi Yésu,+ me nyi yak Paul,+ ndi bé ni yé bonjee?” 16 Ha nyen i mut a bééna mbuu mbe a kwél bo i nyuu, a loo bo ngui, a yémbél bo wada i mbus wada, kayéle ba pam mu ndap i, ba ke ngwéé ba bak nso,* ba ban-ga ki mambabaa. 17 Bôt bobasôna ba ba bé yééne i Éfésô ba yi i jam li, Lôk Yuda ni bôt ba Grikia; bobasôna ba kon woñi, yak jôl li Nwet le Yésu li kônde kôhna lipém. 18 Yak ngandak bôt ikété ba ba bi yila bahémle i bé lo inyu pahal ni pot i mbamba i mam ba bé boñ. 19 Hodo, jôga li bôt li li bi boñ makañ, li kot bikaat gwap, li lona gwo, li ligis gwo i bisu bi bôt bobasôna.+ Kiki ba ñôt ndamba i bikaat bi, ba léba le i yé 50 000 ma batjañtjañ ba silba. 20 Hala nyen bañga i Yéhôva* i bi kônde tjama lôñni lipémba, yak ngandak bôt i kôndba mu nsoñgi u bahémle.*+

21 I mbus mam mana, Paul a yoñ makidik mu ñem wé le i ngéda a mal tagbe i Makédônia+ ni i Akaya, a ga ke i Yérusalem.+ A bé kal le: “I ngéda m’a kee i Yérusalem, y’a béda ki le me kee i Rôma.”+ 22 Jon ikété ba ba bé gwélél nye nson, a ep bôt iba i Makédônia, Timôtéô+ bo Érastô,+ ndi nyemede a yégle inyu ndék ngéda i pes mbok Asia.

23 Ha ngéda i nyen yubda ikeñi+ i bi bôdôl inyu Njel.+ 24 Inyule mut wada le Démétriô, ñôô silba, nu a bé bañ dimagaa di témpel di silba di Artémis, a tinak baôô gwom ngandak yéñe.+ 25 A kot bo lôñni bôt bape ba ba ñôô minlélém mi gwom, a kal le: “A bôt, ni nyi yaga le munu bôlô ini nyen lingwañ jés li nlôl. 26 Nano ni yé i tehe, ni nogok le i Éfésô+ nyetama bé, ndi bebee le i pes mbok Asia yosôna, i mut nunu le Paul a mal tinde limut li bôt likeñi i hémle biniigana bipe, a kalak le banyambe di ñôô ni moo ba ta toi bé banyambe.+ 27 Handugi le bôt ba nla bôdôl yan bôlô yés, ndi ba nla yak tehe témpel i nyambemuda nunkeñi le Artémis kiki yañga jam, kayéle a nimis lipém jé, nye nu bôt ba mbégés ni pes mbok i Asia yosôna, yak ni nkoñ ’isi wonsôna.” 28 Kiki bôt ba nok hala, ba yon ni hiun, ba bôdôl lond le: “Artémis nu bôt ba Éfésô a yé nunkeñi!”

29 Ha nyen tison i bi yon ni yubda, bôt bobasôna ba pala ke i homa mintuk, ba ôdôk Gayô bo Aristarkô+ ni ngui, bon ba bé bôt ba Makédônia ba ba bé kiha lôñni Paul. 30 Paul a bé yéñ jôp inyu telep i bisu bi limut, ndi banigil ba bi neebe bé le a boñ hala. 31 Yak bakena mangand ni mintuk ba ba bé mawanda mé, ba ep nwin inyu soohe nye le a noode bañ téé kôô i homa mintuk. 32 Ni maliga, bahogi ba bé lond, ba kalak jam jada, ndi bape ba kalak jam lipe; inyule limut li bé ikété yubda, ngandak ikété yap i bé yi bé to inyuki ba bi kodba. 33 Ha nyen ba bi pémés Aléksandrô ikété limut, Lôk Yuda i nyuge nye le a telep i bisu, Aléksandrô a unda bo woo le ba yén nwee, a yéñék pot inyu sôñ nyemede i bisu bi limut. 34 Ndi i ngéda ba bi yimbe le a yé man Lôk Yuda, bobasôna ba bôdôl lond ni kiñ yada, ba tégbaha jam kiki bo ngeñ iba, ba kalak le: “Artémis nu bôt ba Éfésô a yé nunkeñi!”

35 I ngéda mut matila* nu tison a bi sôk a mômôs limut nwee, a kal le: “A bôt ba Éfésô, njee yaga ikété bôt ba binam a nyi bé le tison i bôt ba Éfésô yon i ntat témpel Artémis nunkeñi, i tadak ki ôñgba yé i i bi lôl i ngii? 36 Hala kiki pééna i ta bé mu jam li, ni nlama mom nwee, ni publa bañ. 37 Inyule ni nlona i bôt bana hana, ba ta bé bôt ba nip i bitémpel, to baôbôs nyambe wés nu muda jôl. 38 Jon ibale Démétriô+ ni baôô gwom ba gwé ndañ ni ngim mut, dilo di minkaa di yé, yak bangomin ba bipes bi mbok* ba yé, ba kena mindañ ba gwééna i bisu gwap. 39 Ndi ibale ni yé i yéñ jam lipe iloo li, wee makidik ma nlama yôña i ngeñ likoda inoñnaga ni mbén. 40 Inyule i jam li yé bôña len, li nla boñ le ba soman bés le di nkolba ngomin, hala kiki di gwé bé njom yo ki yo i nti bés kunde i neebe i yubda ini.” 41 I mbus, kiki a mal pot hala, a huuha limut.