Kaat Matéô
3 I mbus ngéda, Yôhanes+ Nsôble a bôdôl añal+ bañga i Nyambe i ñoñ u Yudéa, 2 a kalak le: “Tama bibéba binan inyule Ane ngii i nkôôge bebee.”+ 3 Nye yaga nyen mpôdôl+ Yésaya a bé pôdôl ni bini bibañga le: “Mut a nlond i ñoñ le: ‘Kôôbana njel i Yéhôva,* sañlana ki minloñ nwé!’”+ 4 Yôhanes a bé haba mbot mahuu ma kamél, a ban-ga ngôli i kôgôô nuga i bôbôk.+ Bijek gwé bi bé bitandi ni wéi bikai.+ 5 Ha ngéda i, bôt ba Yérusalem ni ba Yudéa yosôna ni ba nkoñ wonsôna u u nkéña Yordan ba bé ke i boma nye.+ 6 A bé sôble* bo ikété lom Yordan,+ ba pahlak bibéba gwap.
7 I ngéda a bi tehe ngandak Farisai ni Sadukai+ i nlo i homa sôble, a kal bo le: “A bé bon ba péé,+ njee a mbéhe bé le ni kee hiun hi nlo ngwéé?+ 8 Jon, numa matam ma ma ñunda le ni ntam bibéba binan. 9 Ni hoñol bañ ikété miñem minan le: ‘Abraham a yé isañ wés.’+ Inyule me nkal bé le Nyambe a nla pémhene Abraham bon munu ngok ini. 10 Ngo nkuleñ nunu a niñi i tén bie. Jon hiki e i i num bé matam malam, ba nlama kit yo, ba leñ yo ikété hié.+ 11 Me, me nsôble bé ni malép inyule ni ntam+ bibéba binan, ndi nu a nlo me i mbus a nloo me ngui, me kôli bé to tiñil minkai mi bitamb gwé.+ Nyen a’ sôble bé ni mbuu mpubi,+ yak ni hié.+ 12 Soble ba mpébél* i yé nye i woo, a’ tibil yaga pubus homa wé litidil, a tééda blé yé ikété ndugi, ndi a’ ligis bikôgôô ikété hié+ hi hi nlém bé.”
13 Ha nyen Yésu a lôl i Galiléa, a ke i boma Yôhanes i Yordan le Yôhanes a sôble nye.+ 14 Ndi Yôhanes a yéñ tjél, a kal le: “Wen u kôli sôble me, ndi lelaa wen u nlo i meeni?” 15 Yésu a timbhe nye le: “Neebe hala inyu lini lisañ, inyule hala nyen i yé loñge inyu yés le di yônôs mam momasôna ma téé sép.” Ha nyen Yôhanes a neebe. 16 Kiki a mal kôhna sôble, i nlélém ngéda Yésu a pam ikété malép; ha nyen ngii i yibla,+ a tehe ki mbuu u Nyambe u nsôs kiki hibeñ, u lo i ngii yé.+ 17 Handugi hala, yak kiñ i lôl i ngii,+ i kal le: “Man wem nunu,+ Man wem nu gwéha, a nlémél me.”+