Kaat Yôhanes
16 “Me ñañle bé i mam mana le ndi ni baage bañ. 2 Bôt b’a pémés bé i ndap bibégés.*+ Ni maliga, ngeñ i yé i lo le i ngéda mut a’ nol bé,+ a’ hoñol le a ngwel nson mpubhaga inyu Nyambe. 3 Ndi b’a boñ i mam mana inyule ba bi pam bé i yi to Tata, to me.+ 4 Ndi me bi añle bé i mam mana kayéle i ngéda ngeñ i nkola le ma bôña, ni bigda le me bi añle bé mo.+
“Me bi bôk bé ndugi me añle bé mo, inyule me bé lôñni bé. 5 Ndi hanano me nke yak Nu a bi ep me;+ ndi to wada ikété nan a mbat bé me le: ‘Hee u nke?’ 6 Ndi inyule me ñañle bé i mam mana, ndutu i nyon bé i miñem.+ 7 Ndi me nkal bé maliga le, i yé loñge inyu nan le me kee. Inyule ibale me nke bé, ki nhôla+ a’ lo bé i bééni; ndi ibale me nke, m’a ômle bé nye. 8 Ndi i ngéda a’ lo, a’ tibil unda bôt bobasôna kii i yé béba, kii i yé telepsép, ni kii i yé bikééhene bi Nyambe: 9 Inyu béba,+ inyule ba ñunda bé le ba nhémle me;+ 10 inyu telepsép, inyule me nke yak Tata, ni le n’a tehe ha bé ki me; 11 ni inyu bikééhene, inyule ñane nkoñ ’isi unu a mal kôhna mbagi yé.+
12 “Me ngi gwé ngandak mam i kal bé, ndi ni nla bé begee mo nano. 13 Ndi i ngéda a’* lo, hala wee mbuu u maliga,+ a’ éga bé ikété maliga momasôna, inyule a’ pot bé ni nyemede, ndi i jam a nok jon a’ pot, a’ kal ki bé i mam ma nlo.+ 14 Nyen a’ ti me lipém+ inyule a’ añle bé i mam a nôgôl i meeni.+ 15 I mam momasôna Tata a gwé ma yé mem.+ Inyu hala nyen me bi kal bé le a’ añle bé i mam a nôgôl i meeni. 16 Ndék ngéda n’a tehe ha bé me,+ ndi ndék ngéda ki n’a témb ni tehe me.”
17 Ha nyen bahogi ikété banigil bé ba bi kalna le: “Kii a nyéñ kal i ngéda a nkal bés le: ‘Ndék ngéda n’a tehe ha bé me, ndi ndék ngéda ki n’a témb ni tehe me,’ ni i ngéda a nkal bés le: ‘Inyule me nke yak Tata’?” 18 Jon ba bé kal le: “Kii a nyéñ kal i ngéda a mpot le: ‘Ndék ngéda’? Di nok bé i jam a mpot.” 19 Yésu a bi yi le ba nsômbôl bat nye mbadga, jon a bi kal bo le: “Baa ni mbadna mambadga munu jam lini inyule me nkal le: ‘Ndék ngéda n’a tehe ha bé ki me, ndi ndék ngéda n’a témb ki ni tehe me’? 20 Me nkal yaga bé maliga le, n’a ee, ni bégél ki, ndi nkoñ ’isi w’a kon maséé; n’a nok ndutu, ndi ndutu nan y’a yila maséé.+ 21 I ngéda muda a nkôôga, a nok ndutu inyule ngéda yé i nkola, ndi i ngéda a mal gwal man, a nhoñol ha bé njiiha yé, inyule a yé maséé le man a ngwéé i nkoñ ’isi. 22 Nlélém ni bé, nano ni gwé ndutu; ndi d’a témb di tehna, ha nyen miñem minan nw’a kon maséé,+ mut to wada a’ kadal bé bé maséé manan. 23 I kel i, n’a bat bé me mbadga yo ki yo. Me nkal yaga bé maliga le, to kinje jam ni mbat Tata,+ a’ ti bé jo i jôl jem.+ 24 Letee ni nano, ni mbadak bé jam to jada i jôl jem. Ni bat, ndi n’a kôhna, le ndi maséé manan ma ba nyonok.
25 “Me bi gwélél ngén inyu kal bé i mam mana. Ngeñ i nlo le m’a gwélél ha bé ngén inyu pôdôs bé, ndi m’a tibil yaga toñle bé njee a yé Tata. 26 I kel i, n’a bat Tata mam i jôl jem; i ngéda me mpot hala, me nsômbôl bé kal le men m’a bat Tata mam inyu nan. 27 Inyule Tata nyemede a ngwés bé, inyule ni bi gwés me,+ ni hémle ki le me yé nlegelnwin nu a bi lôl yak Nyambe.+ 28 Me bi lo munu nkoñ ’isi kiki nlegelnwin nu Tata. Nano me yé i nyodi i nkoñ ’isi, me nke yak Tata.”+
29 Banigil bé ba kal le: “Nun-ki, nano u yé yaga i tibil toñle bés mam, u ngwélél ha bé ngén. 30 Nano di nyi le u nyi mam momasôna, u gwé bé to ngôñ le mut a bat we mbadga. Inyu hala nyen di nhémle le u bi lôl yak Nyambe.” 31 Yésu a timbhe bo le: “Baa nano nyen ni nhémle? 32 Nuna-ki, ngeñ i yé i lo, yak lo i mal lo, le b’a sand bé, hiki wada nan a ôt ngwéé i mbai yé, ni yék ki me metama.+ Ndi me ta bé metama, inyule Tata a yé lôñni me.+ 33 Me nkal bé i mam mana inyu boñ le ni njel yem ni bana nsañ.+ N’a bana njiiha ikété nkoñ ’isi, ndi ni bana ñem ngui! Me bi yémbél nkoñ ’isi.”+