Kaat Tésalônika bisu
2 A lôk kéé, bébomede ni nyi yaga le mayuuga més i bééni ma bi ba bé yañga.+ 2 Inyule to hala kiki di bi bôk ndugi di nok njôghe, ba wéha ki bés nyuu i Filipi,+ kiki ni nyi, Nyambe a bi ti bés makénd* i añle bé ñañ nlam+ ikété ngandak ngolba.* 3 Inyule maéba di bi ti bé ma nlôl bé ni hihôha, to ni nyega, to ni malôga, 4 ndi kiki i bi lémél Nyambe i bôdôl bés ñem inyu ti bés ñañ nlam, jon di mpot bé inyu lémél bôt, ndi inyu lémél Nyambe, nu a nwan miñem nwés.+
5 Ni maliga, ni nyi le kekikel di bi lo bé i bééni, di gwéélak nkwel u dipôha, tole di bak bôt ba bihéñba+ inyu sôô hép nkus; Nyambe a yé mbôgi! 6 Di bi yéñ bé to lipém li nlôl ni bôt ba binam, to ni bé, to ni bôt bape; to hala kiki di bé le di yilna bé mbegee ikeñi* inyule di yé baôma ba Kristô.+ 7 Di bi yila ipôla nan kiki bôt ba ntôñ bé ni loñgeñem, ndik kiki nyañ bon a ntôñgôl* bon bé ni gwéha. 8 Jon, kiki di gwé gwéha ikeñi inyu nan, di bi kit* le di nlama ndigi bé añle bé ñañ nlam u Nyambe, ndi le di ti yak bé biniñ gwés*+ gwomede, inyule ni bi yila bôt le di ngwés ngandak.+
9 A lôk kéé, ibabé pééna, ni hoñol nson wés nkeñi ni ndumbba yés. I ngéda di bi añle bé ñañ nlam u Nyambe, di bé sal juu ni njamuha inyu boñ le di bééga bañ mut to wada ikété nan+ mbegee ikeñi. 10 Bé bahémle ni yé mbôgi, yak Nyambe a yé mbôgi, le di bi ba bôt ba maliga, bôt ba téé sép, ni bôt ba ngi nsohi i bisu binan. 11 Bébomede ni nyi loñge le di bi téñbe i ti bé maéba ni hogbe, di béhge ki hiki wada nan,*+ ndik kiki isañ a mboñ inyu bon bé,+ 12 le ndi ni kee ni bisu i hiôm i nya i kôli ni Nyambe,+ nu a yé i sébél bé i Ane+ yé ni i lipém jé.+
13 Inyu hala yaga nyen yak bés di nwaa bé+ ti Nyambe mayéga, inyule i ngéda ni bi leege bañga i Nyambe di bi añle bé, ni bi leege bé yo kiki bañga i bôt ba binam, ndi kiki i yé toi, hala wee bañga i Nyambe; i bañga ini yon i nsal ikété nan, a bé bahémle. 14 Inyule a lôk kéé, ni bi yila bôt ba noñ ndémbél i makoda ma Nyambe ma ma yé ikété adna ni Kristô Yésu nyoo Yudéa, inyule ni bi nok ndutu i moo ma bôt ba loñ+ nan inyu minlélém mi mam kiki yak bo ba yé i nok ndutu i moo ma Lôk Yuda, 15 i i bi nol Nwet le Yésu+ ni bapôdôl, i tééñga ki bés.+ Ndi i bôt ba, ba nlémél bé Nyambe, ba nkolba yak gwéñe bi bôt bobasôna, 16 hala kiki ba noode kéñ bés njel i pôdôs bôt ba matén inyu boñ le ba kôhna tohi.+ Hala nyen ba nkônde mu bibéba gwap ngéda yosôna. Ndi i lisuk, hiun hié hi ga sôk hi loo i ngii yap.+
17 Ndi, a lôk kéé, i ngéda di bé mbaglak lôñni bé* inyu ndék ngéda (di bé ha bé lôñni bé, ndi di bé hoñol bé ikété miñem), inyule di bééna ngôñ ikeñi i tehe bé, jon di bi boñ biliya gwobisôna i tehe bé i mbombom.* 18 Inyu hala nyen di bééna ngôñ i lo nyoo bééni, ñ, memede Paul me bi noode lo nyoo, ha ngélé yada ndik bé, ndi ngélé iba; ndi Satan a bi kéñ bés njel. 19 Inyule bonjee ba yé botñem yés, tole maséé més, tole ntut wés u mahak i bisu bi Nwet le Yésu i ngéda a mba ha? Baa bé yaga bé?+ 20 Ibabé pééna, bé bon ni yé lipém jés ni maséé més.