Yésaya
37 Ndik kiki Kiñe Hézékia a bi nok hala, a was mambot mé, a haba nsugut, a jôp i ndap Yéhôva.+ 2 I mbus, a kal ñane ndap* kiñe le Éliakim, ni mut matila le Sebna, lôñni baéga biprisi, le ba haba minsugut, ba kee yak Yésaya,+ man Amôz. 3 Ba kal Yésaya le: “Hézékia a nkal le: ‘I hilo hini hi yé hilo hi njiiha, hilo hi nôgôs,* ni hilo hi wonyuu; inyule di yé kiki muda nu a yé bebee ni gwal,* ndi ngui i gwal i ta bé.+ 4 Bebek le Yéhôva Nyambe woñ a’ nok bibañga bi rabsaké gwobisôna, bibañga nwet wé le kiñe Asiria i ñep nye i pot inyu nyumbla Nyambe nu a niñ.+ Bebek ki le Yéhôva Nyambe woñ a’ kogse nye inyu bibañga a nok. Jon soohe+ inyu bôt ba litén ba ba nyégle, hala wee ba ba bi pei.’”+
5 Kiki balegelnwin ba Kiñe Hézékia ba bi kal Yésaya+ hala, 6 Yésaya a kal bo le: “Kena, kala nwet nan le: ‘Lana nyen Yéhôva a mpot: “Bibañga u nok, bi kônha bañ we woñi,+ ñ, bibañga bagwélél ba kiñe Asiria+ ba mpot inyu ôbôs me jôl. 7 M’a héñha mahoñol mé,* a’ nok ngim nwin, a témb i loñ yé;+ m’a boñ ki le a nôla ni pansoñ nyoo i loñ yé.”’”+
8 I ngéda rabsaké a bi nok le kiñe Asiria i nhéya ntôñ wé gwét i Lakis, a ke i tehe nye, a koba nye a yé i jôs tison Libna.+ 9 Kiki kiñe Asiria i nok le Tiraka, kiñe Étiôpia, a yé i lo i jôs nye gwét, a témb a ep balegelnwin yak Hézékia+ i kal nye le: 10 “Lana nyen ni nlama kal Hézékia, kiñe Yuda: ‘Nyambe nu u mbôdôl ñem a lôk bañ we, i ngéda a nkal we le: “Kiñe Asiria+ i ga la bé yoñ Yérusalem.” 11 Emble ki! U bi nok i yom bikiñe bi Asiria bi bi boñ biloñ gwobisôna, bi tjé ki gwo.+ Baa u nhoñol le wen u ga pei? 12 I biloñ basôgôlsôgôl bem ba bi tjé, baa banyambe bap ba bi la sôñ bo?+ Gôzan, Haran,+ Rétsef ni bôt ba Éden ba ba bé yééne i Tél-Asar, ba yé hee? 13 Bikiñe bi Hamat ni Arpad bi yé hee? Yak bikiñe bi bitison bi Séfarvaim,+ bi Héna ni bi Iva bi yé hee?’”
14 Hézékia a yoñ bikaat i moo ma balegelnwin. I mbus, a bet i ndap Yéhôva, a hudul gwo* i bisu bi Yéhôva.+ 15 Hézékia a kahal soohe Yéhôva,+ a kal le: 16 “Éé a Yéhôva nu mintôñ mi gwét,+ Nyambe nu Israel, we nu yééne yoñ ane i yé i ngii* bikérubim, wetama nyen u yé bañga Nyambe inyu biane bi nkoñ ’isi wonsôna. Wen u bi hek ngii ni ’isi. 17 Éé a Yéhôva, sédi ôô,+ u emble! Éé a Yéhôva, yibil mis moñ, u béñge!+ Emble ki bibañga Sénakérib a mpot inyu nyumbla we, a Nyambe nu a niñ.+ 18 Éé a Yéhôva, i yé maliga le bikiñe bi Asiria bi bi tjé biloñ gwobisôna,+ yak loñ yap yomede. 19 Ba leñ ki banyambe ba biloñ bi i hié,+ inyule ba bé toi bé banyambe; ba bé ndik gwom bôt ba binam ba bi bañ+ ni kék, ni ngok. Inyu hala nyen ba bi tjé bo. 20 A Yéhôva Nyambe wés, nano ni, tohol bés i moo ma kiñe Asiria. Éé a Yéhôva,+ boñ hala le ndi biane bi nkoñ ’isi bi yi le wetama nyen u yé Nyambe.”
21 Ha nyen Yésaya, man Amôz, a bi éble Hézékia i nwin unu le: “Lana nyen Yéhôva, Nyambe nu Israel a nkal: ‘Kiki u nsoohe me inyu jam Sénakérib, kiñe Asiria,+ a mpot, 22 i bibañga bini gwon Yéhôva a mpot inyu Sénakérib:
“Ngond Siôn ngi yi munlôm i nyan we, i nolok ki we hiol.
Ngond Yérusalem i mek ño, i yanak we.
23 U nyumbla njee?+ U ñôbôs jôl li njee?
U mbédhene njee kiñ?+
U mpa mis moñ ma ngôk inyu béñge njee?
Ngo Numpubi nu Israel nyen u nkolba!+
24 U bi om bagwélél boñ i nyumbla Yéhôva,+ u kal le:
M’a kit bie gwé bi sidar bikeñi ni bie gwé bilam bi junipa.*
M’a jôp i masolbene mé ma ma nyôgi ni i mapan mé.
25 M’a tém bibee bi malép, me nyo ki malép;
ni mabal mem, m’a boñ le balom* ba Égiptô bobasôna ba sa.’
26 Baa u bi nok bé le me bi yoñ i makidik* ma ibôdôl behee?
Me bi kôôba* i jam li ibôdôl kôba.+
Nano m’a boñ jo.+
I bitison bi bi gwé mapénd ma ngui, u ga yilha gwo nwind mi binan.+
27 I bôt ba nyééne nyoo, ngui i ga mal bo;
ba ga kon woñi, ba wo ki nyuu.
Ba ga yila kiki bikai bi wom, ni kiki bikai bi bi yé yômi,
kiki bikai bi minyôl le mbebi i nlôl i pes likôl i nkudus.
Jon m’a som nlop wem mu mben yoñ môl, me som yak hikoba+ hiem mu bibép gwoñ,
me boñ ki le u timbil mu njel u bi lôl.”
30 “‘I yimbne ini yon m’a ti we:* i nwii unu n’a je bijek bi bi ño gwotama;* i nwii mi nyônôs ima, n’a je ki bijek bi bi ga yik o gwotama; ndi i nwii mi nyônôs maa, n’a nwes mbôô, ni bumbul ki, n’a sal nwom mi minkôô mi wai, ni je ki matam+ map. 31 Bôt ba Lôk Yuda ba ba ga pei ni ba ba ga yégle,+ ba ga ba kiki bie bi bi ñôm minkañ ’isi, bi numuk ki matam nyoo i ngii. 32 Inyule i bôt ba nyégle, ba ga pémél i Yérusalem; i bôt ba mpei, ba ga pémél i hikôa Siôn.+ Yéhôva nu mintôñ mi gwét nyen a ga boñ hala ni makénd.+
33 “‘Lana nyen Yéhôva a nkal inyu kiñe Asiria:+
“A’ jôp bé munu tison ini,+
a’ leñ bé likoñ to jada mu,
a’ lona bé to ben inyu jôs yo,
a’ kéña bé tison ni mangund ma biték inyu jôs yo.”’+
34 ‘A’ timbil mu njel a bi lôl;
a’ jôp bé munu tison ini,’ hala nyen Yéhôva a mpot.
36 Añgel i Yéhôva i ke i homa bôt ba gwét ba Asiria ba bééne, i nol 185 000 bôt ba gwét ba Asiria. I ngéda bôt ba bi telep kegla tutu, ba koba mim mi béhi ’isi.+ 37 Jon Sénakérib, kiñe Asiria, a bi ke ngwéé; a témb i Ninivé,+ a yén nyoo.+ 38 Kel yada, Sénakérib a bé ôôp i ndap* nyambe wé le Nisrôk, bon bé le Adramélek bo Sarézer ba nol nye ni pansoñ;+ ba ke ngwéé i nkoñ u Ararat.+ I mbus, man wé Ésar-Hadôn+ a yoñ tel yé kiñe.