Kaat bisu i Miñañ
12 I bôt bana bon ba bi lo yak David i Ziklag+ i ngéda a bé bé le a hiôm i mbamba inyule Saulô+ man Kis a bé yéñ nol nye; ba bé ikété mimpémba mi bôt mi mi bi nit nye i gwét.+ 2 Ba bééna mimpihlôñgô, ba bé gwélél moo map mo ima, woo walôm ni woo waé+ inyu leñ ndamb+ yak makoñ ma mpihlôñgô. Ba bé bon ba Lôk Benyamin,+ lôkisañ i Saulô. 3 Ahiézer nyen a bé ñane wap, lôñni Yôas. Bo iba ba bé bon ba Sémaa mut Gibéa.+ Yéziel ni Pélet bon ba Azmavet+ ba bé mu lôñ i, yak ni Béraka, Yéhu mut Anatôt; 4 Ismaya mut Gibéôn,+ mpémba njogwét, a bé ikété nsoñgi u 30+ ma bôt, a bé loo ki bo; ni Yérémia, Yahaziel, Yôhanan, Yôzabad mut Gédéra; 5 Éluzai, Yérimôt, Béalia, Sémaria, Séfatia mut Harif; 6 Elkana, Isiya, Azarel, Yoézer, Yasôbéam, bon ba Lôk Kôra;+ 7 Yoéla ni Zébadia, bon ba Yérôham mut Gédôr.
8 Ngim bon ba litén li Gad i bi ke i pes i David i ngéda a bé i lisolbene jé i ñoñ;+ ba bé mimpémba mi bôt ba gwét, bisônda bi bi bé nkôôbaga inyu gwét, ba bééna likeñge inyu gwélél ben ni likoñ, masu map ma bé kiki masu ma mbondo njéé; ba bé pala ngwéé kiki sô titigi i ngii dikôa. 9 Ézer a bé ñane wap, nu yônôs iba le Ôbadia, nu yônôs aa le Éliab, 10 nu yônôs ina le Mismana, nu yônôs itan le Yérémia, 11 nu yônôs isamal le Atai, nu yônôs isaambok le Éliel, 12 nu yônôs juem le Yôhanan, nu yônôs bôô le Elzabad, 13 nu yônôs jôm le Yérémia, nu yônôs jôm ni yada le Makbanai. 14 I bon ba litén li Gad+ ba, ba bé baane ikété ntôñ gwét. Nuntitigi ikété yap a bé le a jôs 100 bôt, nunkeñi ikété yap a bé le a jôs 1 000+ hi bôt. 15 I bôt bana bon ba bi yap lom Yordan i sôñ bisu i ngéda a nhôl, a bet i nkoñngii; ba luhul i bôt bobasôna ba bé yééne i bitegep bi mambok, i likôl ni i hiôñg.
16 Ngim bôt i litén li Benyamin ni li Yuda i bi ke yak David i lisolbene+ jé. 17 David a bi pam i boma bo, a kal bo le: “Ibale ni nlo i meeni ni nsañ inyu hôla me, ñem wem w’a ba lôñni bé. Ndi ibale ni nlo i liibana me le baoo bem ba gwel me, to hala kiki me mboñ bé bé jam libe jo ki jo, Nyambe nu basôgôlsôgôl bés a ga tehe i jam li, a pémés ki mbagi.”+ 18 Ha nyen mbuu u Nyambe u bi tinde Amasai,+ ñéga 30 ma bôt, i pot le:
“A David, di yé bôt boñ, di yé lôñni we, a man Yésé.+
Nsañ, nsañ u ba ni we, nsañ u ba ki ni bôt ba nhôla we,
inyule Nyambe woñ a nhôla+ we.”
I mbus hala nyen David a bi leege bo, a téé bo baane ikété ntôñ wé gwét.
19 Yak ngim bôt i litén li Manasé i tjôô ntôñ gwét u Saulô, i ke i koba David i ngéda a bé ke i hôla bôt ba Filistia i jôs Saulô gwét. Sôk i nsôk, David a bi hôla ha bé bôt ba Filistia inyule baane ba bôt ba Filistia+ ba bi hek pék, ba huuha nye, ba kalak le: “A ga tjôô bés, a koba nwet wé Saulô, ba nol+ bés.” 20 I bôt ba litén li Manasé bana bon ba bi nyodi i ntôñ gwét u Saulô, ba koba David i ngéda a bi ke i Ziklag:+ Adnah, Yôzabad, Yédael, Mikael, Yôzabad, Élihu ni Zilétai, baane ba dikôô di bôt ba litén li Manasé.+ 21 Ba bi hôla David i jôs mintôñ mi mintonba inyule bobasôna ba bé mimpémba mi bôt, ba ban-ga makénd;+ ba bi yila baane ikété ntôñ gwét u David. 22 Hiki kel, bôt ba bé lo yak David+ inyu hôla nye, letee ntôñ wé gwét u yila nkeñi kiki ntôñ gwét u Nyambe.+
23 I bôt ba gwét ba bi lo yak David i Hébrôn+ inyu ti nye ane i Saulô kiki Yéhôva a bi pot,+ nsoñgi wap unu: 24 Bôt ba litén li Yuda ba ba bé begee biben ni makoñ ba bé 6 800, nkôôbaga inyu gwét. 25 Bôt ba litén li Siméôn ba ba bé ikété ntôñ gwét ba bé 7 100 mimpémba mi bôt mi mi bééna makénd.
26 Bôt ba litén li Lévi, ba bé 4 600. 27 Yéhôyada+ nyen a bé ane bon ba Arôn,+ 3 700 bôt i bé lôñni nye, 28 yak Zadok,+ mpémba mañge wanda u u bééna makénd, yak ni 22 baéga ba ba bé i ndap bikôkôa yada ni nye.
29 Bôt ba litén li Benyamin, lôkisañ i Saulô,+ ba bé 3 000; jôga likeñi mukété yap li bé nit lihaa li Saulô ngéda bisu. 30 Bôt ba litén li Éfraim ba bé 20 800 mimpémba mi bôt mi mi bééna makénd, ba bé yiba ikété mandap map ma bikôkôa.
31 Bôt ba pes litén i Manasé ba ba bi pohlana i ke i téé David kiñe ba bé 18 000. 32 Bôt ba litén li Isakar ba ba bé yi jam litén li Israel li nlama boñ ni imbe ngéda li nlama bôña, ba bé 200 baane; lôkisañ yap yosôna i bé isi énél yap. 33 Bôt ba litén li Zébulôn ba bé 50 000. Ba bé nkôôbaga i gwélél mintén mi bijôl bi gwét nwominsôna, bobasôna ba bi ke yak David ni ñem wap wonsôna.* 34 Litén li Naftali li bi om 1 000 hi baane lôñni 37 000 bôt ba ba bééna biben bikeñi ni makoñ. 35 Litén li Dan li bééna 28 600 bôt ba ba bé nkôôbaga inyu gwét. 36 Litén li Aser li bééna 40 000 bôt ba ba bé nkôôbaga inyu gwét.
37 Bôt ba litén li Ruben ni li Gad ni pes litén i Manasé ba ba bi lôl nyoo uu nwii u Yordan+ ba bé 120 000 bisônda, ba ban-ga mintén mi bijôl bi gwét nwominsôna. 38 Bobasôna ba bé bôt ba gwét, nkôôbaga inyu gwét. Ba bi lo yak David i Hébrôn ni ñem wap wonsôna inyu téé nye kiñe i loñ Israel yosôna. Yak i bôt ba Israel bobasôna ba bi yégle ba bé kiñ yada* i téé David kiñe.+ 39 Bôt ba bi yén yak David dilo daa, ba jek, ba nyok i gwom bilôk bisañ gwap bi bi kôôbana bo. 40 I bôt ba bi lôl bebee, yak i bôt ba bi lôl haa kiki bo i minkoñ mi Isakar, mi Zébulôn ni mi Naftali, ba bé lona bijek i ngii magas, i ngii kamél, i ngii minyabén mi hosi* ni ngii nyaga; ba bi lona flawa, bikoga bi matam ma faigé ni bi matam ma nkôô wai, wai, môô, yak ngandak nyaga ni ngandak mintômba; inyule maséé ma bé i Israel.