Kaat Yôhanes iba

1 Me mañ mut,* me ntilna mpohlak muda lôñni bon bé ba me ngwés toi, ha ndik metama bé, ndi yak bôt bobasôna ba bi pam i yi maliga; 2 inyule maliga ma ma nyégle ikété yés, mon m’a ba ki lôñni bés i boga ni boga. 3 Nyambe Tata, ni Yésu Kristô Man Tata, ba ga ti bés konangoo i mbuma ñañ, ni konangoo, lôñni nsañ; ba ga ti ki bés maliga, ni gwéha.

4 Me nkon maséé ngandak inyule me nkoba le bon boñ bahogi ba nkil ikété maliga,+ inoñnaga ni mbén Tata a bi ti bés. 5 Jon nano, a muda, me nyemhe we le di gwéhna bés ni bés. (Me ntilna bé we mbén mondo, ndi mbén di bi kôhna ibôdôl i bibôdle.)+ 6 Gwéha ini le: di kee ni bisu i hiôm inoñnaga ni mambén mé.+ Mu mbén ini nyen di nlama ke ni bisu i hiumul, ndik kiki di bi nok ibôdôl i bibôdle. 7 Inyule ngandak bôt ba malôga i mal nene ikété nkoñ ’isi,+ i bôt ba neebe bé le Yésu Kristô a bi lo ni nyuu minsôn.+ Mut malôga nu ni nkolba-Kristô.+

8 Yoña yihe ni bébomede, le ni nimis bañ matam malam ma minson di bi gwel ipôla nan, ndi le ni kôhna nsaa u yôni.+ 9 I mut a nke ni bisu i noñ njel yé nyemede, ndi a téñbe bé ni biniigana bi Kristô, wee a ta bé ikété adna ni Nyambe.+ I mut a ntéñbe ni i biniigana bini, nyen a yé ikété adna ni Tata lôñni Man.+ 10 Ibale mut a nlo i bééni, ndi a lona bé bé i biniigana bini, ni leege bañ nye ikété mandap manan,+ to yéga ni yéga bañ nye. 11 Inyule i mut a nyéga nye, wee a nyoñ ngaba mu minson nwé mimbe.

12 To hala kiki me gwé ngandak mam i tilna bé, me nsômbôl bé boñ hala ni lipep lôñni tinti, ndi me mbot ñem le m’a lo nyoo bééni inyu pot lôñni bé i mbombom, inyu boñ le maséé manan ma ba i nya i yôni.

13 Bon ba manyuñ nu muda, nu a yé mpohlak, ba nyéga we.