Kaat bisu i Miñañ

10 Bôt ba Filistia ba bé jôs Lôk Israel gwét. Bon ba Israel ba bi ke bôt ba Filistia ngwéé, ngandak yap i wo i hikôa Gilbôa.+ 2 Bôt ba Filistia ba bi noñ Saulô ni bon bé bôlôm, ba sôk ba koba bo, bôt ba Filistia ba nol Yônatan, Abinadab ni Malkisua,+ bon bôlôm ba Saulô. 3 Gwét bi bi ke bé loñge inyu Saulô, baleñ mimpihlôñgô+ ba tihba nye, ba babaa nye. 4 I mbus, Saulô a kal mbegee bijôl gwé bi gwét le: “Yoñ pansoñ yoñ, u ôm me yo, tiga le i bôt ba ngikweeba bana ba lo, ba kép me mbai.”*+ Ndi mbegee bijôl gwé bi gwét a bé top bé boñ hala, inyule a bé kon woñi ngandak. Ha nyen Saulô a bi yoñ pansoñ, a kwél yo i ngii.+ 5 I ngéda mbegee bijôl gwé bi gwét a bi tehe le Saulô a nwo, yak nye a kwo i ngii pansoñ yé, a wo. 6 Hala nyen Saulô ni bon bé bôlôm bo baa ba bi wo; yak bôt bé ba lihaa bobasôna ba ba bé i gwét, ba wo.+ 7 I ngéda bon ba Israel ba ba bé yééne i nsôsôgô* ba bi tehe hiki mut a nke ngwéé, ni le Saulô ni bon bé bôlôm ba nwo, yak bo ba tjôô bitison gwap, ba ke ngwéé; bôt ba Filistia ba lo, ba yén mu.

8 I kel i bé noñ ha, kiki bôt ba Filistia ba nlo i hun mambot ma mim, ba koba mim u Saulô ni mim mi bon bé bôlôm i hikôa Gilbôa.+ 9 Ha nyen ba bi kit ño u Saulô, ba yoñ bijôl gwé bi gwét, ba om ki bôt ni loñ Filistia yosôna inyu legel nwin i mandap ma bisat+ gwap ni yak bôt ba loñ. 10 I mbus, ba bii bijôl gwé bi gwét i ndap* nyambe wap, ba kéi kégéé yé ño i ndap Dagôn.+

11 I ngéda bôt ba Yabes+ i Giléad bobasôna ba bi nok i mam momasôna bôt ba Filistia ba bi boñ Saulô,+ 12 bajogwét ba tison bobasôna ba telep, ba begee mim u Saulô ni mim mi bon bé bôlôm. Ba kena nwo i Yabes, ba jô bihés gwap isi e ikeñi i Yabes,+ ba sôga je* dilo disaambok.

13 Hala nyen Saulô a bi wo inyule a bi téñbe bé ni Yéhôva;+ a bi nôgôl bé to lipôdôl li Yéhôva, a ke ki i tehe muda makañ,+ 14 iloole a bat Yéhôva sômbôl yé. Inyu hala nyen Nyambe a bi boñ le a wo, a yoñ ane, a ti yo David man Yésé.+