Kaat Matéô

27 I ngéda kel i bi ye, baéga biprisi bobasôna ni mimañ mi litén ba kodba, ba hek pék inyu nol Yésu.+ 2 Kiki ba nkañ nye, ba kena nye, ba ti nye Pilatô, ngomin i pes mbok.+

3 Ha nyen Yuda, nu a bi liibana nye, kiki a ntehe le ba mpémhene Yésu mbagi nyemb, kiññem i bôdôl kéés nye, a témbna 30 ma batjañtjañ ba silba yak baéga biprisi ni mimañ mi litén,+ 4 a kal le: “Me bi boñ béba i ngéda me bi liibana matjél ma nginsohi.” Ba kal le: “Hala a mbéñge bé bés! Jam joñ li!”* 5 Ha nyen a leñ batjañtjañ ba silba ikété témpel, a nyodi ha. I mbus, a ke, a nidba.+ 6 Ndi baéga biprisi ba yoñ batjañtjañ ba silba, ba kal le: “I ta bé kunde i ha moni mi i homa minkuu mi makébla mimpubhaga inyule mi yé moni mi matjél.” 7 Kiki ba nkodba, ba hek pék, ba gwélél i moni mi inyu somb wom u mma dibee* inyu boñ le u yila wom soñ inyu bakén ba bôt. 8 Jon ba nsébél wom u le: “Wom Matjél,”+ letee ni len. 9 Hala nyen i jam mpôdôl Yérémia a pot li bi yon le: “Ba bi yoñ ki 30 ma batjañtjañ ba silba, ndamba ba ntamb inyu nuñul mut, ndamba bon ba Israel ba bi nôgla i saa inyu yé, 10 ba ti ki nwo inyu wom u mma dibee inoñnaga ni oda Yéhôva* a bi ti me.”+

11 Nano, Yésu a bé a téé i bisu bi ngomin i pes mbok; ha nyen ngomin i pes mbok i bi bat nye mbadga le: “Baa u yé Kiñe Lôk Yuda?” Yésu a timbhe le: “Wemede nyen u nkal hala.”*+ 12 Ndi i ngéda baéga biprisi ni mimañ mi litén ba bé ôm nye minsohi, a bi timbhe bé.+ 13 Ha nyen Pilatô a kal nye le: “U nok bé mam momasôna ba yé kal inyu ôm we nsohi?” 14 Ndi a bi timbhe bé nye to buk, kayéle hala a hélés ngomin i pes mbok ngandak.

15 Ndi hiki ngand Pasa, ngomin i pes mbok i bééna lem i pémés mut mok wada inyu limut, tonjee ba nsômbôl.+ 16 Ha ngéda i, ba bé ba gwé mut mok wada nu a bé yiba ngandak, jôl jé le Barabas. 17 Jon, i ngéda ba bi kodba, Pilatô a kal bo le: “Njee ni nsômbôl le me pémhene bé i mok, Barabas tole Yésu, nu ba nsébél le Kristô?” 18 Inyule Pilatô a bé yi le njôñ yon i bi tinde bo i ti nye Yésu. 19 Jam lipe li yé le, i ngéda a bé a yii i homa bikééhene, nwaa wé a ômle nye nwin u u nkal le: “Nwas i mut a téé sép nunu nwee inyule len, me nok ndutu ngandak ikété eem inyu yé.” 20 Ndi baéga biprisi ni mimañ mi litén ba tinde mamut i bat le Barabas+ nyen ba pémés i mok, ndi ba nol Yésu.+ 21 Ngomin i pes mbok i timbhe, i kal bo le: “Ipôla bôt bana bo iba, njee ni nsômbôl le me pémhene bé i mok?” Ba kal le: “Barabas.” 22 Pilatô a kal bo le: “Me boñok ni lelaa ni Yésu, nu ba nsébél le Kristô?” Bobasôna ba kal le: “Péni nye i kék!”*+ 23 A kal le: “Ndi inyuki? Imbe béba jam a mboñ?” Ndi to hala, ba kônde ki lond ni ngui le: “Péni nye i kék!”+

24 Kiki a ntehe le biliya gwé bi yé yañga, le yubda yon hala a nlona, Pilatô a yoñ malép, a jôwa moo i bisu bi limut, a kal le: “Me gwé bé nsohi wo ki wo inyu matjél ma mut nunu. Bé bon n’a begee i pil matjél u.” 25 Ha nyen bôt bobasôna ba bi timbhe, ba kal le: “Matjél mé ma ba i ngii yés ni i ngii bon bés.”+ 26 I mbus, a pémhene bo Barabas, ndi a ti oda le ba bép Yésu,+ a ti ki bo nye le ba péni nye i kék.+

27 I mbus, bisônda bi ngomin i pes mbok bi jôbna Yésu ikété ndap i ngomin i pes mbok, bisônda gwobisôna bi kodba, bi kéña nye.+ 28 Bi héya nye mambot mé, bi ha nye mbôñgô kôyôp libadô,+ 29 bi bañ ki ntut biloo, bi ha wo i ño wé, bi gwélha nye jai i woo walôm. Bi kahal ôm maboñ i bisu gwé, bi ndeglege nye, bi kalak le: “Di nyéga,* a Kiñe Lôk Yuda!” 30 Bi tjôle ki nye matai,+ bi kwahal jai, bi bôdôl bép nye i ño. 31 Sôk i nsôk, i ngéda bi bi mal ndegle nye, bi héya nye mbôñgô libadô, bi témb bi ha nye mambot mé ma ngii, bi kena nye inyu tômôl nye i kék.+

32 Kiki bisônda bi bé pam, bi koba mut Kiréné ba nsébél le Simôn. Bi nyégsa i mut nu i begee kék njiiha* i Yésu.+ 33 I ngéda bi bi pam i homa ba nsébél le Gôlgôta, hala wee Homa Kégéé ño,+ 34 bi ti nye wai mpôdnaga ni njôñlô* le a nyo;+ ndi kiki a noode yo, a tjél nyo yo. 35 I ngéda bi bi mal tômôl nye i kék, bi leñ mbam inyu kabna mambot mé,+ 36 bi yén ki ha inyu tat nye. 37 Bi bi ha ki libam i ngii ño wé, li li bééna nsohi ba bi ôm nye, ni matila le: “Yésu nunu, Kiñe Lôk Yuda.”+

38 I mbus, bisônda bi péni mintonba ima i bikék ipañ yé, wada i pes yé walôm, wada i pes yé waé.+ 39 Yak i bôt ba bé tagbe ba kahal sol nye,+ ba pôghak miño,+ 40 ba kalak le: “A we nu u kalak le u mbôk témpel, u oñ ki yo dilo daa,+ tohol wemede! Ibale u yé man Nyambe, nyodi i kék njiiha,* u sôs!”+ 41 Nlélém jam ki, yak baéga biprisi ni bayimbén lôñni mimañ mi litén ba bôdôl ndegle nye, ba kalak le:+ 42 “A bi tohol bôt bape, ndi a nla bé tohol nyemede! Ibale a yé Kiñe Israel,+ a nyodi nano i kék njiiha,* a sôs, ndi d’a hémle nye. 43 Nye yak a mbôdôl Nyambe ñem, ibale Nyambe a ngwés toi nye, a tohlak ni nye,+ inyule a kalak le: ‘Me yé Man Nyambe.’”+ 44 Nlélém jam ki, yak mintonba mi bé i bikék ipañ yé mi bé sol nye.+

45 Ibôdôl i kosi* ipam i ngeñ aa* i kôkôa, jiibe li bi kôp mu mbok i yosôna.+ 46 Jam kiki bo ngeñ aa i kôkôa, Yésu a lond makeñi, a kal le: “Éli, Éli, lama sabaktani?” Hala wee: “A Nyambe wem, a Nyambe wem, inyuki u ntjôô me?”+ 47 Kiki ba nok hala, bahogi ipôla bôt ba bé ba téé ha, ba bôdôl kal le: “I mut nunu a yé i sébél Éliya.”+ 48 I nlélém ngéda, wada wap a ke ngwéé, a yoñ sut, a yube yo ikété wai i mbai; i mbus, a yoñ sut i, a som yo i kék,* a ti nye le a nyo.+ 49 Ndi bana bape ba kal le: “Nwas nye nyoo! Di tehe too Éliya a nlo i tohol nye.” 50 Yésu a témb a lond ni kiñ ikeñi, a pémés nhébék wé u nsôk.*+

51 Ndi nuna-ki, libadô li témpel+ li kéni bipes biba+ ibôdôl i ngii ikepam ’isi,+ yak hisi hi nyeñg, yak maaa ma bôô. 52 Yak bisoñ* bi yibla, ngandak mim mi bapubhaga* ba ba bi wo, mi pam, 53 mi nene i mis ma ngandak bôt. (I mbus bitugne bi Yésu, ngim bôt i i bé lôl nyoo i homa bisoñ bi bé, i jôp ikété tison* mpubhaga.)* 54 Ndi i ngéda ñane mbôgôl bisônda ni bôt ba bé tat Yésu ba bi tehe hisi hi nyeñg ni mam ma bé tagbe, ba kon woñi ngandak, ba kal le: “Ibabé pééna, i mut nunu a bak Man Nyambe.”+

55 Yak ngandak bôda i i bi kiha ni Yésu ibôdôl i Galiléa inyu gwélél nye, i bé i téé nonok, i béñgege;+ 56 mukété nsoñgi wap: Maria Magdaléna; Maria nyañ Yakôbô ni Yôsé; yak nyañ bon ba Sébédéô.+

57 I ngéda kôkôa i bi kwo, ngwañ mut wada u Arimatia u lo, jôl jé le Yôsep; yak nye a bi yila nnigil Yésu.+ 58 I mut nu a ke yak Pilatô, a bat nye mim u Yésu.+ Pilatô a ti oda le ba ti nye wo.+ 59 Yôsep a suhus mim, a lép* wo loñge mboñ u mpôp,+ 60 a niñi wo i soñ* i mondo+ a bi tém ikété liaa. Kiki a mbiiñgaha soso ngok i lijubul li soñ,* a ke. 61 Ndi Maria Magdaléna ni nunu Maria numpe ba yégle ba yii ha i bisu bi soñ.+

62 I kel i bé noñ ha, hala wee i mbus kel Ngôôba,*+ baéga biprisi ni Farisai ba kodba i bisu bi Pilatô, 63 ba kal le: “A Nwet, di nhoñol jam i mut bikadba nu a bi kal i ngéda a bé i niñ, le: ‘I mbus dilo daa, me nlama tuge.’+ 64 Jon ti oda le ba tat soñ loñge letee ni i hilo hi nyônôs aa, inyu boñ le banigil bé ba lo bañ i nip mim wé,+ ndi ba kal bôt le: ‘A ntuge ikété bawoga!’ Ki malôga mana ma ga ba béba iloo ma bisu.” 65 Pilatô a kal bo le: “Bébomede ni gwé bisônda. Kena, ni tat soñ loñge loñge kiki ni nla.” 66 Ha nyen ba bi ke, ba tibil band soñ ni ngok, ba téé ki bisônda ha inyu tat yo.