Kaat Matéô

25 “Ha nyen Ane ngii y’a ba kiki jôm li bingond bi ngi yi munlôm.* Bi bi yoñ bilambe gwap,+ bi pam inyu boma mbiimuda.+ 2 Bitan bi bé bijôñ, bitan bi ban-ga pék.*+ 3 Bingond bi bé bijôñ bi yoñ bilambe gwap, ndi bi yoñ bé môô mape, 4 ndi bingond bi bééna pék bi yoñ bilambe gwap, bi yoñ ki môô ikété bipôs. 5 Kiki mbiimuda a bé tiñha, hilo hi kahal tôñgôl bobasôna; i mbus, ba ke ’ilo. 6 Ndi i ñem mau, ba nok nlondok le: ‘Mbiimuda nunu! Pama inyu boma nye.’ 7 Ha nyen bingond bi gwobisôna bi bi telep, bi kôôba bilambe gwap.+ 8 Bingond bi bé bijôñ bi kal bini bingond bi bééna pék le: ‘Tina bés ndék mu môô manan inyule bilambe gwés bi yé bebee ni lém.’ 9 Bingond bi bééna pék bi timbhe, bi kal le: ‘Ibale di nti bé môô, bebek le m’a kola ha bé inyu yés ni inyu nan. Jon kena yak bôt ba nuñul môô, ni somb manan.’ 10 I ngéda ba bi ke i somb môô, mbiimuda a lo. Bingond bi ngi yi munlôm bi bi bé nkôôbaga, bi jôp lôñni nye i ngand libii.+ I mbus, ba yip likôga. 11 I mbus ngéda, bini bingond bi ngi yi munlôm bipe, yak gwo bi lo, bi kal le: ‘A Nwet, a Nwet, yible bés!’+ 12 A timbhe, a kal bo le: ‘Me nkal bé maliga, me nyi bé bé.’

13 “Jon, yéna péé ibabé waa+ inyule ni nyi bé kel to ngeñ.+

14 “Inyule Ane ngii i yé kiki mut nu a nsômbôl ke i loñ ipe, a sébél minkol nwé, a yigle nwo nkus wé.+ 15 A ti nkol wada talént* itan, a ti umpe iba, a ti ki umpe talént yada, hiki mut inoñnaga ni ngap yé; i mbus, a ke i loñ ipe. 16 Ibabé i lep ngéda, nu a bi kôs talént itan a ke, a boñ nyuñga ni talént yé, a kôs yéñe i talént itan ipe. 17 Nlélém jam inyu nu a bi kôs talént iba, yak nye a kôs yéñe i talént iba ipe. 18 Ndi nkol u bi kôs ndik talént yada u ke, u tém ’isi, u sôô moni* mi nwet wé.

19 “I mbus jôga li ngéda, nwet nu minkol mini a lo inyu béñge kii mi mboñ ni moni a bi ti nwo.+ 20 Ha nyen nu a bi kôs talént itan a lo, a lona talént itan ipe, a kal le: ‘A nwet, u bi bôdôl me ñem, u ti me talént itan; béñge, me nkôs yéñe i talént itan ipe.’+ 21 Nwet wé a kal nye le: ‘Bôlô ilam, a loñge nkol u maliga! U ñunda le u yé maliga inyu ndék mam. M’a téé we i ngii ngandak mam.+ Lo kon maséé ni nwet woñ.’+ 22 I mbus, nu a bi kôs talént iba a lo, a kal le: ‘A nwet, u bi bôdôl me ñem, u ti me talént iba; béñge, me nkôs yéñe i talént iba ipe.’+ 23 Nwet wé a kal nye le: ‘Bôlô ilam, a loñge nkol u maliga! U ñunda le u yé maliga inyu ndék mam. M’a téé we i ngii ngandak mam. Lo kon maséé ni nwet woñ.’

24 “Sôk i nsôk, nkol u bi kôs talént yada u lo, u kal le: ‘A nwet, me yik le u yé mut nledek ñem, u mbumbul i homa u nwes bé mbôô, u kodok ki libumbul u nsal bé.+ 25 Jon me bi kon woñi, me ke me tém ’isi, me sôô talént yoñ. Yo ini me yé i timbhe we.’ 26 Nwet wé a timbhe, a kal nye le: ‘A béba nkol ni nkol u nyeñgep, baa wee u yik le me mbumbul i homa me nwes bé mbôô, me kodok ki libumbul me nsal bé? 27 Inyuki ni u mbii bé moni nwem i ndap ba ntéédana moni* inyu boñ le i ngéda me nlo, me kôs moni* nwem ni yéñe?

28 “‘Jon yoña i talént a gwé, ni ti yo nu a gwé jôm li talént.+ 29 Inyule nu a gwé, b’a kônde ki nye le a bana ngandak. Ndi nu a gwé bé, yak ndék a gwé, b’a yoñ nye yo.+ 30 Leña ki yoma nkol i nyoo i jiibe li mbégdé. Nyoo nyen a’ ee, a jek masoñ.’

31 “I ngéda Man mut+ a’ lo ikété lipém jé lôñni biañgel gwé gwobisôna,+ ha nyen a ga yén i yééne yé ane i lipém. 32 Biloñ gwobisôna bi ga kodba i bisu gwé, a’ bagal ki bôt bipes biba, ndik kiki ntééda bémba a mbagal mintômba ni minya mi kembee. 33 A’ téé mintômba i woo wé+ walôm, ndi minya mi kembee i woo wé waé.+

34 “I mbus, Kiñe y’a kal i bet ba yé nye i walôm le: ‘A bé ba Tata wem a nsayap, lona, ni kôdôl Ane i i yé nkôôbaga inyu nan ibôdôl i bibôdle* bi nkoñ ’isi. 35 Inyule njal i bi gwel me, ni ti me yom i je; nyus i bi gwel me, ni ti me yom i nyo. Me bé nkén, ni leege me loñge;+ 36 me bé nso,* ni ha me mbot.+ Me bi kon, ni tééda me loñge. Me bé i mok, ni yuuga me.’+ 37 Ha nyen bôt ba téé sép b’a timbhe nye ni bibañga bini le: ‘A Nwet, imbe ngéda di bi tehe we njal, ndi di ti we bijek; tole di bi tehe nyus i gwé we ndi di ti we yom i nyo?+ 38 Imbe ngéda di bi tehe we u yé nkén mut, ndi di leege we loñge; tole di tehe we nso ndi di ha we mbot? 39 Imbe ngéda di bi tehe we u nkon tole di tehe we i ndap mok, ndi di yuuga we?’ 40 Kiñe y’a timbhe bo le: ‘Me nkal bé maliga le, hiki ngéda ni bi boñ hala inyu nu a nlôôha ntitigi ipôla lôktata yem ini, wee me nyen ni bi bôñôl hala.’+

41 “I mbus, a’ kal i bôt ba yé nye i waé le: ‘Nyodna me ha,+ a bé ba ni yé ntiihege, kena ikété hié hi boga+ hi hi yé nkôôbaga inyu Nsohop ni biañgel gwé.+ 42 Inyule njal i bi gwel me, ndi ni bi ti bé me yom i je; yak nyus i bi gwel me, ndi ni bi ti bé me yom i nyo. 43 Me bé nkén mut, ndi ni bi leege bé me loñge; me bé nso, ndi ni bi ha bé me mbot; me bi kon, me ke i ndap mok, ndi ni bi tééda bé me loñge.’ 44 Ha nyen yak bo b’a timbhe ni bibañga bini le: ‘A Nwet, imbe ngéda di bi tehe we njal, tole nyus i gwé we, tole u yé nkén mut, tole u yé nso, tole u nkon, tole u yé i ndap mok, ndi di hôla bé we?’ 45 Ndi a’ timbhe bo, a kal le: ‘Me nkal bé maliga le, hiki ngéda ni bi tjél boñ hala inyu nu a nlôôha ntitigi ipôla bôt bana, wee me nyen ni bi tjél bôñôl hala.’+ 46 Bana ba ga ke i tjiba i boga,*+ ndi ba ba téé sép b’a kôhna niñ boga.”+