Sakaria

8 Yéhôva nu mintôñ mi gwét a bi témb a pôdôs me, a kal le: 2 “Lana nyen Yéhôva nu mintôñ mi gwét a nkal: ‘M’a sôñ yaga Siôn bañga lisôñôk,+ me sôñ ki nye ni hiun hikeñi.’”

3 “Lana nyen Yéhôva a nkal: ‘M’a témb i Siôn,+ me yééne ki i Yérusalem.+ Ba ga sébél Yérusalem le tison maliga,*+ ba sébél ki hikôa hi Yéhôva nu mintôñ mi gwét le hikôa hipubhaga.’”+

4 “Lana nyen Yéhôva nu mintôñ mi gwét a nkal: ‘Mimañ mi bôlôm ni mimañ mi bôda mi ga témb mi yén i bahoma ba Yérusalem, hiki wada ni ntoñgo wé i woo inyule a ñun ngandak.*+ 5 Yak bahoma ba tison ba ga ba nyonok ni boñge bôlôm lôñni boñge bôda ba ba ntuk mu tison.’”+

6 “Lana nyen Yéhôva nu mintôñ mi gwét a nkal: ‘To ibale bôt ba litén, ba ba nyégle mu dilo di, b’a hoñol le hala a nla bé bôña, baa yak inyu yem, hala a nla bé bôña?’ Hala nyen Yéhôva nu mintôñ mi gwét a mpot.”

7 “Lana nyen Yéhôva nu mintôñ mi gwét a nkal: ‘M’a tohol litén jem, me pémés jo mu biloñ bi yé i pes likôl ni mu biloñ bi yé i pes hiôñg.*+ 8 M’a témbna bo i Yérusalem,+ ba yééne ki nyoo. Ba ga yila litén jem, me yila ki Nyambe wap,+ nu maliga ni nu telepsép.’”

9 “Lana nyen Yéhôva nu mintôñ mi gwét a nkal: ‘Ni bana ñem ngui,*+ a bé ba ni ñemble i bibañga bini bi mpémél i manyo ma bapôdôl,+ bibañga ba bi pot i kel ba bé tek hikuu hi ndap Yéhôva nu mintôñ mi gwét, inyu oñ témpel. 10 Inyule i ngéda bisu, to mut binam, to lém, ba bé kôhna bé nsaa;+ yak i mut a bé boñ bibôlô gwé bi hiki kel a bééna bé nsañ, hala kiki ñoo a bé; inyule me bé boñ le hiki mut a telbene nuu numpe.’

11 “‘Ndi ibôdôl nano, i bôt ba litén ba ba nyégle, m’a boñ ha bé bo kiki me bé boñ i ngéda kôba,’+ hala nyen Yéhôva nu mintôñ mi gwét a mpot. 12 ‘Inyule ba ga nwes mbôô ikété nsañ;* nkôô wai u ga num matam mé, hisi hi ti bijek gwé,+ yak ngii i ti manwee mé. I bôt ba litén ba ba nyégle, m’a boñ le ba kôdôl i gwom bini gwobisôna.+ 13 A bé bôt ba litén* li Yuda ni li Israel, nlélém kiki bôt ba biloñ bipe ba bé sima bé inyu tiihe bôt bape,+ hala ki nyen ba ga sima bé inyu sayap bôt bape.+ Ni kon bañ woñi!+ Ni bana ñem ngui.’*+

14 “Inyule lana nyen Yéhôva nu mintôñ mi gwét a nkal: ‘“Nlélém kiki me bi kit le me nlona béba i ngii nan inyule basôgôlsôgôl banan ba bi unbaha me, ndi me bi tam bé,”+ hala nyen Yéhôva nu mintôñ mi gwét a nkal, 15 hala ki nyen me nkit nano le m’a boñ Yérusalem ni litén li Yuda loñge.+ Ni kon bañ woñi!”’+

16 “‘I mam mana mon ni nlama boñ: Ni kalna maliga bé ni bé;+ yak i ngéda ni nkéés mu manwemel manan, ni pémés mbagi i i nit maliga ni nsañ.+ 17 Ni hoñlene bañ bé ni bé mam mabe mu miñem minan,+ ni gwés bañ to kum soñ bitembee,+ inyule me ñoo i mam mana momasôna,’+ hala nyen Yéhôva a mpot.”

18 Yéhôva nu mintôñ mi gwét a bi témb a pôdôs me, a kal le: 19 “Lana nyen Yéhôva nu mintôñ mi gwét a nkal: ‘Sôga je* i sôñ i nyônôs ina,+ sôga je i sôñ i nyônôs itan,+ sôga je i sôñ i nyônôs isaambok+ lôñni sôga je i sôñ i nyônôs jôm+ bi ga ba mangéda ma mahak ni ma maséé inyu litén li Yuda, hala wee mangéda ma mangand.+ Jon ni gwés maliga ni nsañ.’

20 “Lana nyen Yéhôva nu mintôñ mi gwét a nkal: ‘I ga pam ngim ngéda le matén ni bôt ba ngandak bitison ba loo. 21 Bôt ba tison yada ba ga ke yak bôt ba tison ipe, ba kalak le: “Bôga bés, di kenek i yemhe* Yéhôva le a unda bés loñgeñem. Bôga bés, di kenek i yéñ Yéhôva nu mintôñ mi gwét. Yak bés di yé i ke nyoo.”*+ 22 Ngandak matén ni mimpémba mi biloñ bi ga lo i yéñ Yéhôva nu mintôñ mi gwét i Yérusalem,+ bi yemhe* ki Yéhôva le a unda bo loñgeñem.’

23 “Lana nyen Yéhôva nu mintôñ mi gwét a nkal: ‘Mu dilo di nyen jôm li bôlôm, ba ba nlôl mu matén+ ma dilémb tjodisôna, ba ga gwel mbot* i man Lôk Yuda ni ngui, ba kalak le: “Di nsômbôl ke ni bé,+ inyule di bi nok le Nyambe a yé lôñni bé.”’”+