BIBUK BI MAJUBUL

Nwin u Nyambe won u yé ntilga ikété Bibel inyu bésbobasôna. Di nlama nigil yo inyu yi Nwet a bi bat le ba tila yo. (Yôhanes 17:3; 2 Timôtéô 3:16) Ikété Bibel, Yéhôva Nyambe a nyelel sômbôl yé inyu bôt ba binam ni inyu hisi, hi hi yé liyééne jap.—Bibôdle 3:15; Masoola 21:3, 4.

Kaat ipe yo ki yo i nla bé tihba miñem mi bôt kiki Bibel. Bibel i ntinde bés i ôt pék mu bilem bi Yéhôva kiki bo gwéha, konangoo ni ñem ngôô. I nti botñem, i hôlga bôt i hônba yak mandutu ma nlôôha. Bibel i nyeelene ki bés mam ma nkoñ ’isi unu ma ma nkiha bé ni sômbôl i Nyambe.—Tjémbi 119:105; Lôk Héber 4:12; 1 Yôhanes 2:15-17.

Bibel i bi bôk i tilba ni hop Lôk Héber, hop Araméa ni hop Grikia. Bibel yosôna tole bipes gwé bi yé nkoblak ikété jam kiki bo 3 000 di dilémb. Bibel i nloo bini bikaat bipe gwobisôna huum, inyule yon ba nkobol ngandak, yo ki yon i yé ntjamak ni nkoñ ’isi wonsôna. Hala a nhélés bé bés, inyule mbañ i Bibel yada i bi kal le: “Unu ñañ nlam u Ane w’a añlana ni nkoñ ’isi wonsôna, i ba biloñ gwobisôna mbôgi, ndi to le lisuk li nlo.”—Matéô 24:14.

Kiki di nyi le nwin u Bibel u yé mahee, jon di nkobol yo i nya i ñunda le di ndiihe Bitilna. Di nyi loñge loñge le nson wés u yé le di pémés ngobol Bibel i i yé maliga. Inyu pémés i ngobol Bibel mondo ini, di bi tibil gwélél ngobol bisu le Bitilna Bipubi. Ngobol mbok yondo ni hop Ngisi. I ngobol ini i bi pam i nwii 1950. Kiki lipodok li bôt li nhéñha, hala a ntinde bés i tiimba kobol Bibel yosôna inyu boñ le i nôga loñge. Njômbi yés i bak ndik bé le di pémés ngobol i i yé maliga, ndi i bak ki le di pémés ngobol i i nôga loñge, i tombok i añ. I minkwel mini le “Matiñ ma ngobol Bibel,” “I mam ma yé munu ngobol ini,” ni “Lelaa di bi kôhna Bibel” mi mi yé i Apendis, mi ntoñol ndék mam di nkônde lémés munu ngobol ini.

I bôt ba ngwés Yéhôva, ba béghak nye ba nyéñ ngobol Bibel i i yé maliga, i tombok ki i añ. (1 Timôtéô 2:4) Inyu hala nyen di bi pémés ngobol Bibel ni hop Ngisi inyu boñ le i koblana ikété ngandak dilémb dipe. A we nu u nsoñgol i Bibel ini, botñem yés ni masoohe més ma yé le Bitilna Bipubi bi hôla we kiki u mba u mboñ biliya “i yéñ Nyambe le ndi u léba nye.”—Minson mi baôma 17:27.