MANYODI

1 I bon bôlôm ba Israel ba ba bi jôp i Égiptô lôñni Yakôb (hiki mut a lo ni lihaa+ jé), môl map mana: 2 Ruben, Siméôn, Lévi ni Yuda;+ 3 Isakar, Zébulôn ni Benyamin; 4 Dan ni Naftali; Gad ni Aser.+ 5 Mbôda Yakôb* yosôna i bé 70 ma bôt,* ndi Yôsep a bé a ma ke i Égiptô.+ 6 Sôk i nsôk, Yôsep a wo,+ yak lôkisañ yé yosôna ni i hiai hi hiosôna. 7 Bon ba Israel* ba gwal, nsoñgi wap u bet. Ba bôl, ba kônde ki bana ngui i nya i mbuma ñañ, kayéle ba yon mu loñ.+

8 I mbus ngéda, kiñe ipe i i bi yi bé Yôsep, i bôdôl ane i Égiptô. 9 Kiñe i kal litén jé le: “Nuna-ki! Litén li Israel li yé ngandak, li ban-ga ki ngui iloo bés.+ 10 Di gwélél likeñge inyu kéñ bo le ba bôl ha bañ, tiga le ibale gwét bi mbôdôl, ba ga nit baoo bés inyu jôs bés, ba nyodi ki munu loñ.”

11 Jon ba bi téé baane ba bôlô njok* i ngii yap inyu tét bo ni bôlô ngui.+ Bon ba Israel ba ôñôl ki Faraô bitison i het ba ntéédana bijek ni gwom bipe, hala wee Pitôm ni Ramses.+ 12 Ndi kiki ba bé ke ni bisu i tét bon ba Israel, hala nyen ba bé kônde bôl, ba yonok ki mu loñ, kayéle bon ba Israel+ ba bé kônha bo woñi, ba hindhaga bo ñem. 13 Bôt ba Égiptô ba bi yilha bon ba Israel minkol, ba bé nyégsa bo i sal bôlô njok.+ 14 Ba boñ le niñ i lôlôl bo mu kiki ba bé sélha bo ni ngui, inyule ba bé sal ni simet, ba bébék brik, ba nyégsaga bo i sal mintén mi bibôlô nwominsôna i wom. Ñ, ba bé tét bo, ba sélhak bo béba bôlô njok.+

15 I mbus ngéda, kiñe Égiptô i pôdôs bagwélés bôda ba Lôk Héber le Sifra bona Pua, 16 a ti bo oda le: “Kiki ni mba ni nhôla bôda ba Lôk Héber i gwal,+ ni béñge bo i ngéda ba mbet i téblé gwal,* ibale man munlôm nu, nola nye; ndi ibale man muda nu, nwaha nye i niñ.” 17 Ndi bagwélés bôda ba bé kon bañga Nyambe woñi, ba bi boñ bé kiki kiñe Égiptô i bi kal bo. Jon ba bi nwas bon bôlôm i niñ.+ 18 I mbus ngéda, kiñe Égiptô i sébél bagwélés bôda, a bat bo le: “Inyuki ni nwas bon bôlôm i niñ?” 19 Bagwélés bôda ba kal Faraô le: “Bôda ba Lôk Héber ba ta bé kiki bôda ba Égiptô. Ba gwé ngui, ilole ngwélés bôda a njôp inyu hôla bo, ki ba ma gwal.”

20 Jon Nyambe a bi bôñôl bagwélés bôda loñge, yak litén li bôl, li bana ki ngui ngandak. 21 Kiki bagwélés bôda ba bi kon bañga Nyambe woñi, a ti bo bon i mbus ngéda. 22 Sôk i nsôk, Faraô a ti litén jé oda le: “Hiki man munlôm nu Lôk Héber a ngwéé, leña nye i lom Nil, ndi nwaha hiki man muda i niñ.”+

2 Ha ngéda i, mut wada mu litén li Lévi a bii ngond Lôk Lévi.+ 2 Muda a yoñ jém, a gwal man munlôm. I ngéda muda a bi tehe le man a nlôôha nlam, a sôô nye sôñ aa.+ 3 Kiki a bi la ha bé sôô nye,+ a yoñ sel,* a hoo yo kuntak lôñni hitjo. A ha man mu, a bii yo i mbaa lom Nil, ipôla makai. 4 Ndi manyañ wé nu muda+ a telep haa inyu béñge kii i ga pémél nye.

5 I ngéda ngond Faraô i bi sôs inyu nogop i lom Nil, bagwélél bé ba bôda ba bé kil mu mbaa lom. Kiki a ntehe sel ipôla makai, a pala ep ngwélél wé nu muda le a yoñ yo.+ 6 I ngéda a bi yibil yo, a tehe man munlôm a ñee. A kônôl nye ngoo, a kal le: “I man nunu a yé man wada mu bon ba Lôk Héber.” 7 Ha nyen manyañ mañge nu muda a kal ngond Faraô le: “Baa me kee, me séblene we nléla wada mu bôda ba Lôk Héber, le a lélél we man?” 8 Ngond Faraô i kal nye le: “Kenek!” I nlélém ngéda, mañge muda a ke, a sébél nyañ man.+ 9 Ha nyen ngond Faraô i kal nyañ man le: “Yoñ man nunu, lélél me nye, m’a saa we.” Jon muda a bi yoñ man, a lel nye. 10 I ngéda man a bi nañ, muda a lona nye yak ngond Faraô, a yila man wé.+ A ti nye jôl le Môsi,* a kal le: “Inyule me bi yôñôl nye i malép.”+

11 I ngéda Môsi a bi nañ, a pam, a ke yak lôkisañ i béñge bibôlô bi ngui ba bé sal.+ Ha nyen a bi tehe man Égiptô a mbép man Lôk Héber wada, hala wee maasañ wada. 12 A béñge ini pes ni ii, kiki a ntehe bé mut, a nol man Égiptô, a sôô nye ikété lisege.+

13 Ndi i hilo hi bé noñ, a pam, a tehe bon ba Lôk Héber iba ba yé i jo. A kal nu a bééna njom le: “Inyuki u mbép maasoñ?”*+ 14 Ndi a kal nye le: “Njee a ntéé we ñane ni nkéés i ngii yés? Baa u nsômbôl nol me kiki u bi nol man Égiptô?”+ Môsi a kon woñi, a kal le: “Ibabé pééna, i jam lini li nyiba!”

15 I mbus, Faraô a nok i jam li, a kahal yéñ nol Môsi; ndi Môsi a ke Faraô ngwéé, a ke i yééne i loñ Madian.+ Kiki a mpam nyoo, a yén ipañ bee malép. 16 Prisi Madian+ i bééna bingond bisaambok; bi lo i ap malép, ni i yônôs binyôl bi bilém inyu nyus bémba isañ wap. 17 Ndi kiki lem, batééda bémba ba bi lo, ba luhul bo. Ha nyen Môsi a bi telep, a hôla* bôda, a ti ki bémba yap malép. 18 I ngéda ba bi témb i ndap isañ wap le Réuel,*+ a hel, a bat le: “Kii i mboñ le ni hoo huu hala len?” 19 Ba timbhe le: “Man Égiptô+ wada a nsôñ bés i moo ma batééda bémba, nye ki nyen a ñébél bés malép, a nyus yak bémba.” 20 A bat bingond gwé le: “Ndi i mut nu a yé hee? Inyuki ni nyék nye nyoo? Ni kee, ni sébél nye le a loo, a je lôñni bés.” 21 I mbus ha, Môsi a neebe i yén ni Réuel, yak nye a ti Môsi ngond yé Sipôra+ i libii. 22 I mbus ngéda, Sipôra a gwal man munlôm, Môsi a ti nye jôl le Gersôm,*+ inyule a bé kal le: “Me bi yila nkén mut i loñ ipe.”+

23 I mbus ntandaa ngéda,* kiñe Égiptô i wo,+ ndi bon ba Israel ba bé waa bé lond inyu libak jap li nkol, ba siidaga, nlondok wap u bedek letee ni yak bañga Nyambe+ le a nhôla bo. 24 Sôk i nsôk, Nyambe a nok nlondok+ wap, a bigda malômbla a bi boñ ni Abraham, ni Isak, ni Yakôb.+ 25 Jon Nyambe a bi nun Lôk Israel; a tehe ki libak jap.

3 Môsi a bi yila ntééda bémba, a bé tééda bémba i nkil wé Yétrô,+ prisi i Madian. I ngéda a bé kena bémba i pes hiôñg i ñoñ, a sôk pam i hikôa hi bañga Nyambe, i Hôreb.+ 2 Ha nyen añgel i Yéhôva i pémél nye ikété lindômbôô li hié,+ i ñemkété man e biloo. Kiki a bé béñge, a tehe le man e biloo a nloñ ndi a nlék bé. 3 Jon Môsi a bi kal le: “M’a tiige bebee inyu béñge i hélha jam ini, kayéle me tehe inyuki man e biloo a nlék bé.” 4 I ngéda Yéhôva a bi tehe le a ntiige bebee inyu béñge, a sébél nye i ñemkété man e biloo, a kal le: “A Môsi! A Môsi!” Ha nyen Môsi a timbhe le: “Me nunu.” 5 Nyambe a kal ni nye le: “U tiige ha bañ bebee. Héya bitamb i makôô moñ, inyule i homa u tééne a yé hisi hipubhaga.”

6 A kal ki le: “Me yé Nyambe nu isoñ, Nyambe nu Abraham,+ Nyambe nu Isak,+ ni Nyambe nu Yakôb.”+ Ha nyen Môsi a bi sôô su wé, inyule a bé kon woñi i nun bañga Nyambe. 7 Yéhôva a kônde le: “Me ntehe yaga ndutu i bôt ba litén jem ba ba yé i Égiptô, me nok ki bo ba nlond inyule bôt ba nyégsa bo i sal bôlô ngéba; me nyi toi njôghe+ yap. 8 M’a sôs inyu tohol bo i moo ma bôt ba Égiptô,+ me nyodna ki bo mu loñ i, inyu kena bo i loñge loñ i i yé ikeñi; loñ i i nkuli milik ni wéi,+ hala wee nkoñ u Lôk Kanaan, u Lôk Hét, u Lôk Amôr, u Lôk Péris, u Lôk Hivi ni u Lôk Yébus.+ 9 Ni maliga, nlondok u bon ba Israel u mpam i meeni, me ntehe ki lelaa bon ba Égiptô ba ntét bo.+ 10 Nano loo, m’a om we yak Faraô, u ga nyodna ki litén jem, hala wee Lôk Israel, i Égiptô.”+

11 Ndi Môsi a kal bañga Nyambe le: “Me me yé njee i ke yak Faraô inyu nyodna Lôk Israel i Égiptô?” 12 Ha nyen Nyambe a timbhe le: “M’a ba ni we,+ me nti ki we i yimbne ini inyu unda le men me ñep we: i ngéda u ga nyodna litén i Égiptô, ni ga gwélél* bañga Nyambe hana hikôa+ hini.”

13 Ndi Môsi a kal bañga Nyambe le: “Hégda le me nke i tehe bon ba Israel, me kal bo le: ‘Nyambe nu basôgôlsôgôl banan a ñep me i bééni,’ ndi ba bat me le: ‘Jôl jé le njee?’+ Lelaa m’a timbhe bo?” 14 Jon Nyambe a kal Môsi le: “M’a yila i jam me nkit* le me nyila.”*+ A kônde le: “Lana nyen u nlama kal bon ba Israel, ‘M’a yila nyen a ñep me i bééni.’”+ 15 Nyambe a kal ki Môsi le:

“Lana nyen u nlama kal bon ba Israel, ‘Yéhôva, Nyambe nu basôgôlsôgôl banan, Nyambe nu Abraham,+ Nyambe nu Isak,+ ni Nyambe nu Yakôb,+ a ñep me i bééni.’ Jôl jem li i boga ni boga,+ ni i jôl lini nyen tjai tjodisôna di nlama hoñlene me. 16 Nano kee, u kot mimañ mi Lôk Israel, u kal bo le: ‘Yéhôva, Nyambe nu basôgôlsôgôl banan, Nyambe nu Abraham, nu Isak, ni nu Yakôb a mpémél me, a kal me le: “Me ntehe yaga libak linan,+ ni i jam ba yé i boñ bé i Égiptô. 17 Jon me mbôn bé le, m’a héya bé ikété ndutu+ i bôt ba Égiptô, me kena bé i loñ i Lôk Kanaan, i Lôk Hét, i Lôk Amôr,+ i Lôk Péris, i Lôk Hivi ni i Lôk Yébus,+ loñ i i nkuli milik ni wéi.”’+

18 “Ba ga emble+ yaga we, ha nyen u ga ke, we ni mimañ mi Israel yak kiñe Égiptô, ni nlama kal nye le: ‘Yéhôva, Nyambe nu Lôk Héber+ a nkwel ni bés. Jon soho, nwas le di kee liké li dilo daa i ñoñ, inyu ti Yéhôva Nyambe+ wés bisesema.’ 19 Ndi me nyi yaga le kiñe Égiptô i ga ti bé bé kunde le ni kee, handugi le woo u ngui+ won u nyégsa nye i boñ hala. 20 Jon m’a sambal woo wem, me bép ki loñ Égiptô ni ngandak bihélha bi mam m’a boñ nyoo. I mbus hala, a’ nwas bé le ni kee.+ 21 M’a tinde bôt ba Égiptô i unda bé loñgeñem; i ngéda ni ga ke, ni ga ke yaga bé moo nso.+ 22 Hiki muda a nlama bat muda wé libôk ni nkén muda nu a nyééne i ndap yé gwom bi silba, gwom bi gôl ni mambot. Ni ga ha gwo bon bôlôm banan ni bon bôda banan, ni ga yoñ ki gwom gwobisôna bi bôt ba Égiptô.”+

4 Môsi a timbhe le: “Ndi hégda le ba nhémle bé me, ba emble bé to me,+ inyule b’a kal le: ‘Yéhôva a bi pémél bé we.’” 2 Ha nyen Yéhôva a bat nye le: “Kii u gwé mu woo woñ?” A timbhe le: “Ntoñgo.” 3 Nyambe a kal le: “Leñ wo ’isi.” Kiki Môsi a nleñ wo ’isi, ntoñgo u yila nyoo;+ a ke yo ngwéé. 4 Ndi Yéhôva a kal Môsi le: “Sambal woo woñ, u gwel yo hikoda.”* A sambal woo wé, a gwel yo, i témb i yila ntoñgo i woo wé. 5 Nyambe a kal ni le: “Hala a yé inyu boñ le ba hémle le Yéhôva, Nyambe nu basôgôlsôgôl bap, Nyambe nu Abraham, Nyambe nu Isak, ni Nyambe nu Yakôb,+ a mpémél we.”+

6 Yéhôva a kal ki nye le: “Soho, ha woo ikété mbot yoñ.” A ha woo ikété mbot yé. I ngéda a bi pémés wo, nun-ki, woo wonsôna u bééna lô, u pôbôk kiki libu li lisuni!*+ 7 Nyambe a kal ni le: “Témb ha woo ikété mbot yoñ.” A témb a ha wo ikété mbot yé. I ngéda a bi pémés wo, u témb mbôô kiki ini nyuu ipe! 8 Nyambe a kal le: “Ibale ba nhémle bé we, tole ba neebe bé yimbne bisu; ibabé pééna, ba ga neebe yimbne+ i nyônôs iba. 9 Ndi to ibale ba nhémle bé i biyimbne bini gwo biba, ndi ba tjél ki emble we, u ga yoñ ndék malép mu lom Nil, u kôp mo mu nnumuk ’isi, ha nyen malép u nyôñôl i lom Nil m’a yila matjél i nnumuk ’isi.”+

10 Môsi a kal Yéhôva le: “Nwéhél me a Yéhôva, ndi hop u nyidil me,* to i ngéda kôba, to ibôdôl nu u mpôdôs ngwélél woñ, inyule me nhoo bé hop,* yak hilémb i nyét+ me.” 11 Yéhôva a kal nye le: “Njee a bi hek nyo u mut binam? Njee a gwé ki ngui i boñ le bôt ba ba mbuk, le ba ba ndok, le ba tehna loñge, tole ba ba ndim? Baa me Yéhôva bé? 12 Nano ni, kenek, m’a ba lôñni we i ngéda w’a pot,* m’a kal ki we i yom u nlama pot.”+ 13 Ndi a kal le: “Nwéhél me a Yéhôva, soho, ep mut numpe u gwé ngôñ i ep.” 14 Ha nyen Yéhôva a bi unbene Môsi ngandak, a kal le: “Baa manyuñ bé le Arôn,+ man Lôk Lévi? Me nyi le a mpot loñge ngandak. Nye nunu a yé i njel le a boma we. I ngéda a’ tehe we, a’ kon maséé.*+ 15 U nlama pôdôs nye, u kal ki nye i yom a nlama pot.*+ M’a ba ni we, m’a ba ki ni nye i ngéda ni mba ni mpot,+ m’a kal ki bé i yom ni nlama boñ. 16 A’ pôdôs litén inyu yoñ; nyen a’ pot inyu yoñ, we u ga ba Nyambe+ inyu yé.* 17 U ga yoñ ntoñgo unu i woo woñ, u boñ ki biyimbne ni wo.”+

18 Jon Môsi a bi témb yak nkil+ wé Yétrô, a kal nye le: “Soho, me gwé ngôñ i témb yak lôk kéé yem i Égiptô inyu tehe too ba ngi yii i niñ.” Yétrô a kal Môsi le: “Kee ni nsañ.” 19 I mbus ha, ki Môsi a ngi yii i Madian, Yéhôva a kal nye le: “Kee, témb i Égiptô, inyule i bôt bobasôna ba yéñék nol we,* ba mal wo.”+

20 Ha nyen Môsi a bi yoñ nwaa wé ni bon bé bôlôm, a bédés bo i ngii jagas, a kahal témb i loñ Égiptô. Môsi a yoñ ki ntoñgo bañga Nyambe a bi kal nye le a yoñ. 21 Yéhôva a kal ni Môsi le: “I ngéda u ga témb i Égiptô, bihélha bi mam gwobisôna me nti we ngui i boñ,+ u nlama boñ gwo i bisu bi Faraô. Ndi m’a nwas le a bana nledek ñem,+ a’ nwas bé le litén li kee.+ 22 U nlama kal Faraô le: ‘Lana nyen Yéhôva a nkal: “Israel a yé man wem, mbôkgwéé+ wem. 23 Me nti we oda le u nwas man wem le a kee inyu boñ le a gwélél me. Ndi ibale u nwas bé nye le a kee, m’a nol man woñ, mbôkgwéé+ woñ.”’”

24 Ndi mu njel, i homa ba bi tégbaha u, Yéhôva+ a boma nye, a yéñ le a nol+ nye.* 25 Sôk i nsôk, Sipôra+ a yoñ ngok i nhoo,* a kwee man wé, a leñ jôlôl li nsude* i makôô mé,* a kal le: “Inyule u yé me nlôm ni njel matjél mana.” 26 Jon Nyambe a bi nwas nye. Inyu likwee nyen Sipôra a bi kal ha ngéda i le: “U yé me nlôm ni njel matjél mana.”

27 Yéhôva a kal ni Arôn le: “Kee i ñoñ i boma Môsi.”+ Ha nyen a bi ke, a boma nye i hikôa hi bañga Nyambe,+ a sos nye mamañ inyu yéga nye. 28 Môsi a añle Arôn mam momasôna Yéhôva, nu a bi ep nye,+ a bi kal nye, yak biyimbne gwobisôna a bi kal nye le a boñ.+ 29 I mbus ha, Môsi bo Arôn ba ke, ba kot mimañ nwominsôna mi Lôk Israel.+ 30 Arôn a añle bo mam momasôna Yéhôva a bi kal Môsi, a boñ ki biyimbne+ i bisu bi litén. 31 Ha nyen litén li bi hémle.+ I ngéda bon ba Israel+ ba bi nok le Yéhôva a mbéñge libak jap, a tehe ki ndutu+ yap, ba ôôp, ba ôm ki maboñ ’isi.

5 I mbus ha, Môsi bo Arôn ba jôp yak Faraô, ba kal nye le: “Lana nyen Yéhôva, Nyambe nu Israel a nkal: ‘Nwas le litén jem li kee i tégbaha ngand inyu yem i ñoñ.’” 2 Ndi Faraô a kal le: “Yéhôva+ a yé njee, le me nôgôl kiñ yé, me nwas ki Israel le a kenek?+ Me nyi yaga bé me Yéhôva, m’a nwas bé to Israel le a kee.”+ 3 Ndi ba kal nye le: “Nyambe nu Lôk Héber a nkwel ni bés. Soho, di ngwés ke liké li dilo daa i ñoñ, inyu ti Yéhôva Nyambe+ wés bisesema; ibale hala bé, a ga leñ bés makon tole a ga nol bés ni pansoñ.” 4 Kiñe Égiptô i timbhe bo le: “A Môsi ni Arôn, inyuki ni nsôña bôt ba litén le ba sal bôlô yap? Ni témb i bôlô!”*+ 5 Faraô a kônde le: “Ni ntehe yaga le bôt ba litén lini ba yé ngandak nano, ndi bé ni ngwés ha bé le ba sal.”

6 I nlélém kel, Faraô a ti baane bôlô ni bati bôlô oda le: 7 “Ni ti ha bañ bôt ba litén lini minumuk mi bikai inyu bép brik.+ Nano, bomede bon ba nlama ke, ba kot minumuk mi bikai mi. 8 Ndi ni nlama nyégsa bo i bép nlélém nsoñgi u brik kiki ngéda bisu. Ni suhlene bañ bo nsoñgi u brik, inyule ba nkahal ngeñee.* Inyu hala nyen ba nlond le: ‘Di nsômbôl ke, di nsômbôl ke i ti Nyambe wés bisesema!’ 9 Ni boñ bo le ba kônde sal ni ngui, ni boñ ki le ba pagap kayéle ba sédi bañ maôô inyu emble bitembee.”

10 Jon baane bôlô+ ni bati bôlô ba bi pam, ba kal litén le: “Lana nyen Faraô a nkal: ‘M’a ti ha bé me bé minumuk mi bikai. 11 Ni kee, bébomede ni yéñ minumuk mi bikai to hee homa ni nla léba nwo, ndi nsoñgi nan u brik u ga sôs yaga bé.’” 12 Ha nyen litén li bi tjama ni loñ Égiptô yosôna inyu bada bakalô, ba ba ga gwélél kiki minumuk mi bikai. 13 Baane bôlô ba Faraô ba bé nyégsa bo i hoo sal, ba kalak le: “Ni nlama ti nlélém nsoñgi u brik hiki kel, kiki i ngéda ba bé ti bé minumuk mi bikai.” 14 Baane bôlô ba Faraô ba bép+ bati bôlô ba bomede ba bi téé i ngii Lôk Israel. Ba kal bati bôlô le: “Inyuki ni nyônôs bé nsoñgi nan u brik ni mbéna yônôs? Ni bi yônôs bé wo yani, to len ni nyônôs bé wo.”

15 Jon bati bôlô ba Lôk Israel ba bi jôp, ba tjeelene Faraô, ba kal le: “Inyuki u mboñ bagwélél boñ hala? 16 Ba nti ha bé bés minumuk mi bikai, ndi ba nkal bés le: ‘Ni bép brik!’ Ba mbép bés, ki le litén joñ jon li gwé njom.” 17 Ndi Faraô a kal le: “Ni ngeñee! Ni ngeñee!*+ Inyu hala nyen ni nkal le: ‘Di nsômbôl ke, di nsômbôl ti Yéhôva+ bisesema!’ 18 Nano kena, ni témb i bôlô! B’a ti ha bé bé minumuk mi bikai, ndi n’a ke ni bisu i ti nlélém nsoñgi u brik.”

19 Ha nyen bati bôlô ba Lôk Israel ba bi tehe le mam ma mal lédél bo, inyule ba bi ti bo oda le: “Ni nlama yaga bé suhus nsoñgi u brik ni nti hiki kel.” 20 Kiki ba nyodi yak Faraô, ba boma Môsi bo Arôn ba téé ha njel, ba bemek bo. 21 I nlélém ngéda, ba kal bo le: “Yéhôva a béñge i jam ni mboñ, a kéés ki bé, hala kiki ni mboñ le Faraô ni bagwélél bé ba oo bés,* ni nha ki pansoñ i woo wap le ba nol bés.”+ 22 Ha nyen Môsi a soohe Yéhôva, a kal le: “A Yéhôva, inyuki u mboñ le i litén lini li nok ndutu? Inyuki u bi ep me? 23 Ibôdôl i ngéda me bi jôp yak Faraô inyu pot i jôl+ joñ, a nai i boñ litén+ lini béba; ndi we u yé ngi sôñ litén+ joñ.”

6 Yéhôva a kal Môsi le: “Nano u ga tehe i yom m’a boñ Faraô.+ Woo wem u ngui u ga nyégsa nye i nwas bo le ba kee, ni woo wem u ngui ki nyen m’a nyégsa nye i luhul bo i loñ+ yé.”

2 I mbus, Nyambe a kal Môsi le: “Men me yé Yéhôva. 3 Me bé pémél Abraham, Isak ni Yakôb kiki Nyambe Nu ngui yosôna;+ ndi inyu jôl jem le Yéhôva,+ me bi yina bé ni bo i nya i yôni.*+ 4 Me bi boñ ki malômbla ni bo le m’a ti bo loñ Kanaan, i het ba bééne bakén.+ 5 Nano, memede me nok nlondok u bon ba Israel, ba bôt ba Égiptô ba nyilha minkol, me mbigda ki malômbla+ mem.

6 “Jo ni jon, kal bon ba Israel le: ‘Men me yé Yéhôva, m’a tohol bé, ni ga sal ha bé bibôlô bi ngui bi bôt ba Égiptô, ni ga ba ha bé minkol+ nwap; m’a kobol bé ni woo wem u lipémba, me kogse+ ki bo bañga bañga. 7 N’a yila litén jem, m’a ba ki Nyambe+ nan; ibabé pééna, n’a yi le men me yé Yéhôva Nyambe nan, nu a nkobol bé le ni sal ha bañ bibôlô bi ngui bi loñ Égiptô. 8 M’a jubus bé i loñ me bi kum soñ*+ le m’a ti Abraham, Isak ni Yakôb; m’a ti bé i loñ i, i ga ba nan. Men me yé Yéhôva.’”+

9 I mbus ha, Môsi a legel bon ba Israel i nwin unu, ndi ba bi emble bé nye inyule ba bi lehel ñem, yak inyule ba bé sélha bo béba bôlô i minkol.+

10 Yéhôva a pôdôs Môsi, a kal le: 11 “Kee yak Faraô, kiñe Égiptô, u kal nye le a nlama nwas le bon ba Israel ba nyodi i loñ yé.” 12 Ndi Môsi a kal Yéhôva le: “Ibale bon ba Israel ba ñemble bé me,+ lelaa Faraô nye a yé le a emble me, me nu hop u nyidil?”*+ 13 Ndi Yéhôva a tiimba kal Môsi bo Arôn i mam ba bé lama añle bon ba Israel ni Faraô, kiñe Égiptô, le ndi bon ba Israel ba pam i loñ Égiptô.

14 Baéga ba mandap ma bikôkôa bana: bon bôlôm ba Ruben, mbôkgwéé+ nu Israel: Hanok, Palu, Esrôm ni Karmi.+ Bon ba yé mbôda Ruben.

15 Bon bôlôm ba Siméôn bana: Yémuel, Yamin, Ôhad, Yakin, Zôhar ni Saul, man ngond Kanaan.+ Bon ba yé mbôda Siméôn.

16 Môl ma bon bôlôm ba Lôk Lévi+ mana, inoñnaga ni mahaa map: Gersôn, Kôhat ni Mérari.+ Lévi a bi niñ 137 nwii.

17 Bon bôlôm ba Gersôn bana: Libni ni Siméi, bon ba bé basañ ba mahaa+ map.

18 Bon bôlôm ba Kôhat bana: Amram, Izhar, Hébrôn ni Uziel.+ Kôhat a bi niñ 133 nwii.

19 Bon bôlôm ba Mérari bana: Mali ni Musi.

Mahaa ma Lôk Lévi ma, inoñnaga ni mahaa+ map.

20 Amram a bi bii Yôkébed, manyañ isañ nu muda.+ A gwélél nye Arôn ni Môsi.+ Amram a bi niñ 137 nwii.

21 Bon bôlôm ba Izhar bana: Kôra,+ Néfeg ni Zikri.

22 Bon bôlôm ba Uziel bana: Misael, Elsafan+ ni Sitri.

23 Arôn a bi bii Éliséba, ngond Aminadab, manyañ Naasôn+ nu muda. A gwélél nye Nadab, Abihu, Éléazar ni Itamar.+

24 Bon bôlôm ba Kôra bana: Asir, Elkana ni Abiasaf.+ Mahaa ma Lôk Kôra+ ma.

25 Man Arôn nu munlôm le Éléazar,+ a bi bii ngond Putiel yada. A gwélél nye Finéhas.+

Bon ba bé baéga ba mandap ma bikôkôa, ba ba nlôl ni bon bôlôm ba Lévi.+

26 I Arôn bo Môsi bana bon Yéhôva a bi kal le: “Nyodnana litén li Israel i loñ Égiptô, mintôñ mintôñ.”*+ 27 I bôt bana, Môsi bo Arôn,+ bon ba bi kal Faraô, kiñe Égiptô, le a nwas le litén li Israel li nyodi i Égiptô.

28 I kel Yéhôva a bi pôdôs Môsi i loñ Égiptô, 29 Yéhôva a kal Môsi le: “Men me yé Yéhôva. Kal Faraô, kiñe Égiptô, mam momasôna me nkal we.” 30 Ha nyen Môsi a kal Yéhôva le: “Ngo hop u nyidil me;* Faraô a ta yaga bé le a emble me!”+

7 Yéhôva a kal ki Môsi le: “Emble, me nyilha we kiki Nyambe* inyu Faraô, yak manyuñ Arôn a’ yila mpôdôl+ woñ. 2 U ga tiimba kal manyuñ Arôn mam momasôna m’a kal we, nye a’ pôdôs Faraô; sôk i nsôk, a’ nwas bon ba Israel le ba nyodi mu loñ yé. 3 Ndi me, m’a nwas le Faraô a bana nledek ñem,+ m’a boñ ki ngandak biyimbne ni bihélha bi mam i loñ Égiptô.+ 4 To hala, Faraô a’ emble bé bé, ha nyen m’a unda Égiptô ngui yem,* me kogse+ ki loñ bañga bañga inyu nyodna litén jem likeñi* le Lôk Israel i loñ Égiptô. 5 Ibabé pééna, bôt ba Égiptô b’a yi toi le men me yé Yéhôva+ i ngéda m’a sambal woo wem ikolba Égiptô, ni i ngéda m’a nyodna Lôk Israel i loñ yap.” 6 Môsi bo Arôn ba boñ kiki Yéhôva a bi kal bo; ba boñ toi hala. 7 Môsi a bééna 80 ma nwii, Arôn nye a ban-ga 83 nwii i ngéda ba bé pôdôs Faraô.+

8 I mbus, Yéhôva a kal Môsi bo Arôn le: 9 “Ibale Faraô a nkal bé le: ‘Boña hélha jam,’ ha nyen w’a kal Arôn le: ‘Yoñ ntoñgo woñ, leñ wo ’isi i bisu bi Faraô.’ Ntoñgo u ga yila soso nyoo.”+ 10 Jon Môsi bo Arôn ba bi jôp yak Faraô, ba boñ yaga kiki Yéhôva a bi kal bo. Arôn a leñ ntoñgo wé ’isi i bisu bi Faraô ni i bisu bi bagwélél bé, u yila soso nyoo. 11 Ndi Faraô a sébél bôt ba pék ni bôt ba makañ; yak biprisi bi makañ bi loñ Égiptô+ bi boñ nlélém jam ni makañ+ map.* 12 Hiki wada a leñ ntoñgo wé ’isi, hiki ntoñgo u yila soso nyoo; ndi ntoñgo u Arôn u mil mintoñgo nwap. 13 To hala, Faraô a nai ni nledek ñem,+ a emble bé to bo, kiki Yéhôva a bi kal.

14 Yéhôva a kal Môsi le: “Ñem Faraô u nhéñha bé.+ A ntop bé nwas le litén li kee. 15 Yani kegla, kee yak Faraô. A ga ke i lép. Ha nyen u ga telep i mbaa lom Nil inyu boma nye; i ntoñgo u u bi yila nyoo,+ yoñ wo i woo woñ. 16 U ga kal nye le: ‘Yéhôva, Nyambe nu Lôk Héber a ñep me i weeni,+ a nkal le: “Nwas litén jem le li kee i gwélél me i ñoñ,” ndi u yé ngi nôgôl me letee ni nano. 17 Lana nyen Yéhôva a mpot: “Munu jam lini nyen w’a yil le men me yé Yéhôva.+ M’a bép malép ma lom Nil ni ntoñgo u yé i woo wem, malép m’a yila matjél. 18 Tjobi di yé mu lom Nil di ga wo, lom a ga numb béba njiñ, yak bôt ba Égiptô b’a la ha bé nyo malép ma lom Nil.”’”

19 I mbus, Yéhôva a kal Môsi le: “Kal Arôn le: ‘Yoñ ntoñgo woñ, sambal woo woñ i ngii malép ma Égiptô:+ balom bé, diléléba tjé, bititimba+ gwé, ni bitéédana gwé bi malép, inyu boñ le malép momasôna ma yila matjél.’ Matjél m’a ba homa nyensôna i loñ Égiptô, yak ikété biébél bi bikék ni biébél bi ngok.” 20 I nlélém ngéda, Môsi bo Arôn ba boñ toi kiki Yéhôva a bi kal bo. A pa ntoñgo, a bép malép ma lom Nil i bisu bi Faraô ni bagwélél bé, malép momasôna ma lom ma yila matjél.+ 21 Tjobi di bé mu lom di wo,+ lom a bôdôl numb béba njiñ, bôt ba Égiptô ba bé bé le ba nyo malép ma Nil,+ matjél ma bé homa nyensôna i loñ Égiptô.

22 Ndi biprisi bi makañ bi Égiptô bi boñ nlélém jam ni makañ+ map, kayéle Faraô a nai ni nledek ñem, a emble bé to Môsi bo Arôn, kiki Yéhôva a bi kal.+ 23 Ha nyen Faraô a témb i ndap yé, to i jam lini li bi tihba bé nye ñem. 24 Bôt ba Égiptô bobasôna ba bé tém ipañ lom Nil inyu bana malép ma nyo, inyule ba bé bé le ba nyo malép ma Nil. 25 Yéhôva a bi boñ le malép ma Nil ma yila matjél dilo disaambok.

8 I mbus, Yéhôva a kal Môsi le: “Jôp yak Faraô, kal nye le: ‘Lana nyen Yéhôva a nkal: “Nwas le litén jem li kee, li gwélél me.+ 2 Ibale u ntop bé le ba kee, m’a yônôs loñ yoñ yosôna ni minkoñgo.+ 3 Lom Nil a ga yon ni minkoñgo, mi ga bet, mi jôp ikété ndap yoñ, ikété tuñ yoñ, i ngii nañi yoñ, ikété mandap ma bagwélél boñ ni i ngii litén joñ, ikété muu moñ ni ikété bipan*+ gwoñ i het u mbuune flawa. 4 Minkoñgo mi ga bet i ngii yoñ, i ngii litén joñ ni i ngii bagwélél boñ bobasôna.”’”

5 I mbus ngéda, Yéhôva a kal Môsi le: “Kal Arôn le: ‘Yoñ ntoñgo woñ, sambal woo woñ i ngii balom, diléléba di Nil, ni bititimba; boñ ki le minkoñgo mi bet, mi yon i loñ Égiptô.’” 6 Ha nyen Arôn a sambal woo wé i ngii malép ma Égiptô, minkoñgo mi bôdôl bet, mi yon i loñ Égiptô. 7 Ndi biprisi bi makañ bi boñ nlélém jam ni binjénjé gwap, yak bo ba lona minkoñgo i loñ Égiptô.+ 8 Faraô a sébél Môsi bo Arôn, a kal le: “Yemhana Yéhôva le a héya minkoñgo i meeni, yak ikété litén+ jem, inyule me gwé ngôñ i nwas litén linan le li kee i ti Yéhôva bisesema.” 9 Môsi a kal Faraô le: “Soho, wen kal me imbe ngéda me nlama yemhe le minkoñgo mi nyodi i weeni, le mi nyodi yak bagwélél boñ, ikété litén joñ ni ikété mandap moñ. Mi ga yégle ndik i lom Nil.” 10 Faraô a timbhe le: “Yani.” Jon Môsi a kal le: “Mam ma ga bôña kiki u nkal, inyu boñ le u yi le numpe a ta bé kiki Yéhôva Nyambe+ wés. 11 Minkoñgo mi ga nyodi i weeni, ikété mandap moñ, mi nyodi yak bagwélél boñ ni ikété litén joñ. Mi ga yégle ndik i lom Nil.”+

12 Jon Môsi bo Arôn ba bi nyodi yak Faraô, Môsi a yemhe Yéhôva inyu minkoñgo a bi lona i ngii Faraô.+ 13 Ha nyen Yéhôva a boñ kiki Môsi a bi bat, minkoñgo mi bôdôl wo ikété mandap, ikété bikotoo ni i nwom. 14 Ba kot minkoñgo nwind ndi nwind, loñ i kahal numb bôô njiñ. 15 I ngéda Faraô a bi tehe le loñ i nkôhna hogbe, a nai ni nledek ñem,+ a tjél emble Môsi bo Arôn, kiki Yéhôva a bi kal.

16 Nano, Yéhôva a kal Môsi le: “Kal Arôn le: ‘Sambal ntoñgo woñ, bép minluñ mi biték mi hisi, mi ga yila dikala i loñ Égiptô yosôna.’” 17 Hala nyen ba bi boñ. Arôn a sambal ntoñgo u bé nye i woo, a bép minluñ mi biték mi hisi, dikala di kôba bôt i nyuu, yak bilém. Minluñ mi biték nwominsôna mi hisi mi yila dikala i loñ Égiptô+ yosôna. 18 Biprisi bi makañ bi noode boñ nlélém jam, le bi pémés dikala ni binjénjé+ gwap, ndi bi bi la bé. Dikala di lo i ngii bôt ni bilém. 19 Jon biprisi bi bi kal Faraô le: “Hinoo hi Nyambe+ hini!” Ndi Faraô a nai ndigi ni nledek ñem, a tjél emble bo, kiki Yéhôva a bi kal.

20 Yéhôva a kal Môsi le: “Yani kegla tutu, kee yak Faraô. A ga ke i lép. U ga kal nye le: ‘Lana nyen Yéhôva a nkal: “Nwas litén jem le li kee i gwélél me. 21 Ndi ibale u nwas bé litén jem le li kee, me ga ep bibole* i ngii yoñ, i ngii bagwélél boñ, i ngii litén joñ ni ikété mandap moñ; bibole bi ga yon ikété mandap ma Égiptô, bi ga ba homa nyensôna mu hisi ba* nyééne. 22 I yokel nu, me ga tihba bé* nkoñ u Gôsen, i het litén jem li nyééne. Bibole bi ga ba bé nyoo,+ ha nyen u ga yi le me Yéhôva, me yé munu loñ+ ini. 23 M’a boñ maselna ipôla bôt bem ni bôt boñ. I yimbne ini i ga bôña yani.”’”

24 Hala ki nyen Yéhôva a bi boñ. Mauñ ma bibole ma bôdôl yon i ndap Faraô, i mandap ma bagwélél bé, ni i loñ Égiptô+ yosôna. Bibole+ bi ôbôs loñ. 25 Ha nyen Faraô a sébél Môsi bo Arôn, a kal bo le: “Kena, tina Nyambe nan bisesema munu loñ.” 26 Ndi Môsi a kal le: “I ta bé loñge i boñ hala, inyule bisesema di nti Yéhôva Nyambe wés bi ga bébél bôt ba Égiptô.+ Ibale bôt ba Égiptô ba ntehe bés di nti bisesema bi bi mbébél bo, baa ba ga ôm bé bés ngok? 27 Di ga ke liké li dilo daa i ñoñ, nyoo nyen di ga tine Yéhôva Nyambe wés bisesema, kiki a bi kal bés.”+

28 Ha nyen Faraô a bi kal le: “M’a nwas le ni kee i ti Yéhôva Nyambe nan bisesema i ñoñ. Ndi ni ke bañ haa ngandak. Yemhana Nyambe nan inyu yem.”+ 29 Môsi a timbhe le: “Nano, i nyodi me nyodi i weeni, me nke i yemhe Yéhôva. Yani, bibole bi ga nyodi yak Faraô, yak bagwélél bé ni ikété litén jé. Ndi Faraô a nlama waa lôk bés,* le a tjél nwas litén le li kee i ti Yéhôva+ bisesema.” 30 I mbus, Môsi a nyodi yak Faraô, a pam, a yemhe Yéhôva.+ 31 Ha nyen Yéhôva a bi boñ i yom Môsi a bi bat nye. Bibole bi nyodi yak Faraô, bi nyodi yak bagwélél bé ni ikété litén jé. Bole to yada i bi yégle bé. 32 Ndi Faraô a témb a nai ni nledek ñem, a top bé nwas litén le li kee.

9 I mbus, Yéhôva a kal Môsi le: “Jôp yak Faraô, kal nye le: ‘Lana nyen Yéhôva, Nyambe nu Lôk Héber a nkal: “Nwas le litén jem li kee, li gwélél me.+ 2 Ibale u ntop bé le ba kee, ndi u ke ni bisu i gwel bo, 3 nun-ki! Woo u Yéhôva+ u ga bép bilém gwoñ bi bi yé i nwom. Himala hi kon hi ga kwél bihosi, magas, kamél yosôna, mauñ ma nyaga ni bibémba bi mintômba.+ 4 Yéhôva a ga bagal yaga bilém bi Israel ni bilém bi Égiptô, lém to yada i bon ba Israel i ga wo bé.”’”+ 5 Handugi hala, Yéhôva a bi ti ntéak ngéda, a kal le: “Yani, Yéhôva a ga boñ i jam lini munu loñ.”

6 Yéhôva a bi boñ hala i kel i bé noñ, bilém gwobisôna bi Égiptô bi bôdôl wo,+ ndi lém to yada i Israel i bi wo bé. 7 I ngéda Faraô a bi yéñ yi kii i bi tagbe, ba kal nye le lém to yada i Israel i nwo bé. To hala, ñem u Faraô u nai le u nhéñha bé, a top bé nwas le litén li kee.+

8 Yéhôva a kal ki Môsi bo Arôn le: “Yônhana moo manan mo ima ni libu li juu, Môsi a nlama nwes jo i ngii, i bisu bi Faraô. 9 Libu li ga yila minluñ mi biték i loñ Égiptô yosôna, li yila ki mot i manyuu ma bôt ni ma bilém i loñ Égiptô yosôna.”

10 Ha nyen ba bi yoñ libu li juu, ba telep i bisu bi Faraô, Môsi a nwes jo i ngii, li yila mot i manyuu ma bôt ni i manyuu ma bilém. 11 Biprisi bi makañ bi bi la bé telep i bisu bi Môsi kiki bi bééna mot, inyule mot ma bi pam i manyuu map, ma pam ki i manyuu ma bôt ba Égiptô+ bobasôna. 12 Ndi Yéhôva a nwas le Faraô a bana nledek ñem; a emble bé Môsi bo Arôn, kiki Yéhôva a bi kal Môsi.+

13 I mbus, Yéhôva a kal Môsi le: “Yani kegla tutu, kee yak Faraô, kal nye le: ‘Lana nyen Yéhôva, Nyambe nu Lôk Héber, a nkal: “Nwas litén jem le li kee, li gwélél me. 14 Inyule nano, me ñep dimala tjem tjodisôna i ngii yoñ, yak i ngii bagwélél boñ ni i ngii litén joñ, inyu boñ le u yi le numpe a ta bé kiki me munu hisi hiosôna.+ 15 Inyule ibale me sambal woo wem i bép we ni litén joñ ni himala hi kon, ki u ntjiba* hana ’isi. 16 Ndi inyu njom ini yaga nyen me nwas we i niñ: le me unda we lipémba jem, ni le jôl jem li añlana ni nkoñ ’isi+ wonsôna. 17 Baa u ngi kenek ni bisu i ngôgbene litén jem, jon u nwas bé jo le li kee? 18 Nun-ki! Bebee ni i ngéda ini yani, m’a nôs nop matan-ga nu ngui, nu a ma no bé i Égiptô letee ni nano. 19 Jon, ti oda le ba jubus bilém gwoñ gwobisôna ni gwom gwoñ gwobisôna bi bi yé i nwom. Ibale lém tole mut a nyégle i wom, ibabé le a solop, a ga wo i ngéda nop matan-ga a ga kwo.”’”

20 Bagwélél ba Faraô ba ba bi kon lipôdôl li Yéhôva woñi, ba bi pala boñ le bagwélél bap ni bilém gwap ba jôp i mandap, 21 ndi nu ni nu a bi diihe bé lipôdôl li Yéhôva, a bi nwas bagwélél bé ni bilém gwé i nwom.

22 I mbus, Yéhôva a kal Môsi le: “Sambal woo woñ i ngii, inyu boñ le nop matan-ga a kwoo mu loñ Égiptô+ yosôna, i ngii bôt, i ngii bilém, ni i ngii nwom nwominsôna mi loñ Égiptô.”+ 23 Jon Môsi a bi sambal ntoñgo wé i ngii; Yéhôva a om mbambat, nop matan-ga, ni hié* hana ’isi. Yéhôva a nôs nop matan-ga i loñ Égiptô yosôna. 24 Matan-ga ma bé kwo, hié hi loñok i ñemkété matan-ga. I nop matan-ga nu a bé ngui ngandak, i nya i maa bé ba i Égiptô ibôdôl nu a bi yila loñ.+ 25 Nop matan-ga a bi nol gwom gwobisôna bi bé i nwom mu loñ Égiptô yosôna, a nol bôt ni bilém; a ôbôs nwom nwominsôna, a bôk yak bie+ gwobisôna. 26 Ndik i nkoñ u Gôsen, i het bon ba Israel+ ba bééne, nyen nop matan-ga a bi kwo bé.

27 Ha nyen Faraô a bi om le ba sébél Môsi bo Arôn, a kal bo le: “I lisañ lini, me mboñ béba. Yéhôva nyen a téé sép, me ni litén jem di nhôs. 28 Yemhana Yéhôva le a mélés mbambat ni nop matan-ga. Ha nyen m’a nwas bé le ni kee, n’a kônde ha bé yén hana.” 29 Jon Môsi a kal nye le: “I ngéda me ga nyodi i tison, me ga pa moo i bisu bi Yéhôva. Mbambat i ga mal, nop matan-ga a ga no ha bé; le ndi u yi le i hisi hini hi yé hi Yéhôva.+ 30 Ndi me nyi le, to ha ngéda i, we ni bagwélél boñ n’a kon bé Yéhôva Nyambe woñi.”

31 Loñge bôñgô* ni kôn* bi bi nyugda, inyule kôn i bé i ma hôlôl, yak sut i bé i ma sem. 32 Ndi blé ni ntén blé umpe* bi bi nyugda bé, inyule bi bé ngi hôlôl.* 33 Môsi a hebi yak Faraô, a nyodi mu tison, a pa moo i bisu bi Yéhôva; ha nyen mbambat ni nop matan-ga bi bi mal, yak nop a mal.+ 34 Kiki Faraô a ntehe le nop, nop matan-ga ni mbambat bi mal, a témb a boñ béba, a ke ni bisu i bana nledek ñem,+ nye ni bagwélél bé. 35 Faraô a nai ni nledek ñem, a top bé nwas le bon ba Israel ba kee, kiki Yéhôva a bi kal Môsi.+

10 I mbus, Yéhôva a kal Môsi le: “Jôp yak Faraô, inyule me nwas le nye ni bagwélél bé ba bana minledek mi miñem,+ le ndi me boñ biyimbne gwem i bisu gwé,+ 2 ni le u añle bon boñ ni balal boñ lelaa me bi kogse bôt ba Égiptô, me boñ ki ngandak biyimbne nyoo;+ ha nyen n’a yi toi le men me yé Yéhôva.”

3 Jon Môsi bo Arôn ba bi jôp yak Faraô, ba kal nye le: “Lana nyen Yéhôva, Nyambe nu Lôk Héber a nkal: ‘Letee ni ngéda mbe u ga tjél suhus wemede isi yem?+ Nwas le litén jem li kee, li gwélél me. 4 Ndi ibale u nai le u nwas bé litén jem le li kee, wee yani m’a om bitandi i loñ yoñ. 5 Bi ga hô hisi hiosôna, kayéle mut a ga la ha bé tehe biték. Bi ga je gwom gwobisôna bi mpei nop matan-ga, hala wee gwom nop matan-ga a bi yék, bi ga je ki bie binan gwobisôna bi bi ño mu nwom.+ 6 Bitandi bi ga yon ikété mandap moñ, ikété mandap ma bagwélél boñ bobasôna ni ikété mandap ma bôt ba Égiptô bobasôna, bi ga yon mukété i nya i yé le bosoñ ni basôgôlsôgôl banan ba bé ngi tehe ibôdôl i ngéda ba bé munu loñ ini letee ni len.’”+ Ha nyen a bi, a kôm Faraô mbus, a pam.

7 Bagwélél ba Faraô ba kal ni le: “I mut nunu a ga bane bés ngok baagene* letee ni ngéda mbe? Nwas bôt bana ba kenek, ba gwélél Yéhôva Nyambe wap. Ngo Égiptô a ntjiba, we u yé ngi tehe hala?” 8 Ha nyen ba bi témbna Môsi bo Arôn yak Faraô, a kal bo le: “Kena, ni gwélél Yéhôva Nyambe nan. Ndi bonjee ba ga ke ni?” 9 Môsi a timbhe le: “Di ga ke ni boñge bés ba wanda, mimañ nwés mi bôt, bon bés bôlôm, bon bés bôda, mintômba nwés ni nyaga+ yés; inyule di ga tégbaha ngand inyu Yéhôva.”+ 10 A kal bo le: “Ibale me nwas le bé ni bon banan ni kee, wee Yéhôva a yé toi ni bé!+ Bo bé la, ni gwé nsoñgi mbe. 11 To! Bôlôm botama bon ba ga ke i gwélél Yéhôva, inyule i jam li jon ni bi bat.” I mbus, ba luhul bo i bisu bi Faraô.

12 Ha nyen, Yéhôva a kal Môsi le: “Sambal woo woñ i ngii loñ Égiptô inyu lona bitandi, le bi je bikai gwobisôna mu loñ, hala wee gwom gwobisôna nop matan-ga a bi yék.” 13 Kunda yada, Môsi a sambal ntoñgo wé i ngii loñ Égiptô, Yéhôva a boñ le mbebi i i nlôl i pes likôl, i hôñ mu loñ njamuha yosôna ni juu nyensôna. Kiki kel i nye, mbebi i i nlôl i pes likôl i lona bitandi. 14 Bitandi bi jôp i loñ Égiptô yosôna, bi bedep ki mu nkoñ u Égiptô+ wonsôna. Mam ma bep kiyaga;+ bitandi bi bé ngi ba ngandak hala, bi ga ba ha bé ki to ngandak hala. 15 Bi hô loñ yosôna, bi boñ le jiibe li kôp i loñ. Bi je bikai gwobisôna bi bé mu loñ, ni matam ma bie momasôna nop matan-ga a bi yék. Hiai to hiada hi bi yégle bé i ngii bie, bebela to yada i yégle bé i nwom mi loñ Égiptô yosôna.

16 Ha nyen Faraô a bi pala sébél Môsi bo Arôn, a kal bo le: “Me mboñ béba i mis ma Yéhôva Nyambe nan, me mboñ yak bé béba. 17 Nano, soho, nwéhél béba yem ndik lisañ lini. Yemhana Yéhôva Nyambe nan, le a kena himala hi nyemb hini haa ni me.” 18 I mbus ha, a* nyodi yak Faraô, a pam, a ke i yemhe Yéhôva.+ 19 Yéhôva a héñha njel mbebi, i yila béba mbebi i i nlôl i pes hiôñg, i begee bitandi, i kena gwo letee ni i tuye Nkôibaga. Tandi to yada i bi yégle bé i nkoñ u Égiptô wonsôna. 20 Ndi Yéhôva a nwas le Faraô a bana nledek ñem,+ a nwas bé le bon ba Israel ba kee.

21 Ha nyen Yéhôva a bi kal Môsi le: “Sambal woo woñ i ngii, le jiibe li hô loñ Égiptô. Jiibe li ga likeñi i nya i yé le mut a nla tihba.” 22 I nlélém ngéda, Môsi a sambal woo i ngii, jiibe likeñi li kwél loñ Égiptô yosôna dilo daa.+ 23 Mu dilo daa di, mut Égiptô to wada a bé la bé tehe nuu numpe, to wada wap a bé la bé nyodi i homa a bééne. Ndi bon ba Israel bobasôna ba bééna mapubi i pes yap.+ 24 I mbus, Faraô a sébél Môsi, a kal le: “Kena, ni gwélél Yéhôva.+ Ndik mintômba minan ni nyaga nan gwon bi ga yégle hana. Ni nla yak ke ni bon banan.” 25 Ndi Môsi a timbhe nye le: “Wemede nyen u ga ti ki bés* bilém inyu bisesema, ni inyu bisesema bi ntul i hié, le di sémél gwo Yéhôva Nyambe+ wés. 26 Di ga kena yak bilém gwés. Lém* to yada i ga yégle bé hana, inyule di ga gwélél bilém bihogi inyu bégés Yéhôva Nyambe wés; di nyi bé to kii di ga ti Yéhôva inyu bégés nye, letee di pam nyoo.” 27 Ndi Yéhôva a nwas le Faraô a bana nledek ñem, Faraô a nwas bé bo le ba kee.+ 28 Faraô a kal nye le: “Nyodi me i mbom! We nu me mbôñe, u telep ha bañ me i bisu, inyule i kel u ga tehe su wem, u ga wo.” 29 Ha nyen Môsi a timbhe nye le: “Kiki u mpot, m’a yéñ ha bé tehe su woñ.”

11 Yéhôva a kal Môsi le: “M’a lona himala hipe yak Faraô ni i Égiptô. I mbus ha, a’ nwas le ni nyodi hana.+ I ngéda a’ nwas le ni kee, a’ luhul toi bé hana.+ 2 Nano ni, kal litén le, bôlôm bobasôna ni bôda bôbasôna ba nlama bat bôt bap ba libôk gwom bi silba ni gwom bi gôl.”+ 3 Yéhôva a tinde bôt ba Égiptô le ba unda litén li Israel loñgeñem. Handugi hala, Môsi nyemede a bé mut bôt ba bé ti lipém ngandak i loñ Égiptô; bagwélél ba Faraô ni litén li Égiptô ba bé ti nye lipém ngandak.

4 Môsi a kal ni le: “Lana nyen Yéhôva a nkal: ‘Bebee ni kosi juu, me ga tagbene i ñemkété Égiptô,+ 5 babôkgwéé bobasôna ba yé i loñ Égiptô ba ga wo,+ ibôdôl i mbôkgwéé nu Faraô, nu a yii i yééne yé ane, letee ni i mbôkgwéé nu nkol muda u u nkok i ngok kôgôl, yak ni babôkgwéé ba bilém bobasôna.+ 6 Nlondok nkeñi u ga ba i loñ Égiptô yosôna, i nya ba maa bé nok, ni i nya ba ga nok ha bé kekikel.+ 7 Ndi to ngwo y’a bôs bé* bon ba Israel, to bilém gwap; inyu boñ le ni yi le Yéhôva a nla boñ maselna ipôla bôt ba Égiptô ni bon ba Israel.’+ 8 Bagwélél boñ bobasôna ba ga sôs i tehe me, ba ga ôôp i bisu gwem, ba kalak le: ‘Kenek, we ni litén jolisôna li li noñ we.’+ Ha nyen m’a ke.” I mbus ha, Môsi a nyodi yak Faraô, a pam, a bak ñunbak ngandak.

9 Yéhôva a kal Môsi le: “Faraô a ga emble bé bé,+ le ndi me boñ ngandak bihélha bi mam i loñ Égiptô.”+ 10 Môsi bo Arôn ba bi boñ bihélha bi mam gwobisôna i bisu bi Faraô,+ ndi Yéhôva a bi nwas Faraô le a bana nledek ñem, kayéle a bi nwas bé le bon ba Israel ba nyodi mu loñ+ yé.

12 Yéhôva a kal Môsi bo Arôn i loñ Égiptô le: 2 “I sôñ ini i ga ba bibôdle bi nwii* inyu nan. I ga ba sôñ bisu i nwii inyu nan.+ 3 Ni kal ntôñ u Israel wonsôna le: ‘I hilo hi nyônôs jôm hi sôñ ini, hiki mut a nlama yoñ ntômba+ wada inyu lihaa jé,* ntômba wada inyu hiki ndap. 4 Ndi ibale bôt ba ndap yé ba* nlôôha ba ndék inyu mal ntômba wada, wee a ga kabna wo ikété ndap yé ni mut wé libôk inoñnaga ni nsoñgi u bôt.* Ni ga kap ntômba inoñnaga ni libim hiki mut a ga je. 5 Ntômba u nlama ba nlôm ntômba nu nwii wada, nu a gwé bé lem yo ki yo.+ Ni nlama pohol nye mu bon banan ba balôm ba mintômba tole mu bon banan ba kembee. 6 Ni nlama tééda man ntômba letee ni hilo hi nyônôs 14 hi sôñ+ ini, hiki lihaa mu ntôñ u bon ba Israel li nlama nol nye i manañle ma hiañgaa.*+ 7 Ba nlama yoñ ndék matjél mu matjél mé, ba hoo mo i bitembee bi likôga, ni i ngii likôga li hiki ndap i het ba ga jél+ man ntômba.

8 “‘Ba nlama je minsôn nwé i u u.+ Ba nlama bôm nwo i hié, ba je ki nwo ni bret bi ngi-séñha+ lôñni bikai bi nlol.+ 9 Ni jek bañ nsôn wo ki wo u u yé yômi tole u u yé nadak, hala wee nlambak ikété malép; ndi ni bôm man ntômba i hié, ño wé, makôô mé, lôñni gwom gwé bi kété. 10 Ni nlama bé tééda yom yo ki yo mu letee ni bikegla, ndi hiki yom i nyégle letee ni bikegla, ni nlama ligis+ yo. 11 Lana nyen ni nlama je man ntômba: ni nlama téñ ngôli i bôbôk,* ni ban-ga bitamb i makôô lôñni ntoñgo i woo; ni nlama hoo je nye. I yé Pasa i Yéhôva. 12 Inyule m’a tagbene mu loñ Égiptô i u u, me bép babôkgwéé ba loñ Égiptô, babôkgwéé ba bôt ni ba binuga;+ m’a pémhene ki banyambe ba Égiptô+ bobasôna mbagi. Men me yé Yéhôva. 13 Matjél ma ga ba kiki yimbne i ngii mandap i het ni yéne; i ngéda me ga tehe matjél, me ga lela* bé, le himala hi tihba bañ bé inyu tjé bé i ngéda me ga bép loñ Égiptô.+

14 “‘N’a bigda i kel ini, n’a tégbaha ki ngand inyu Yéhôva i kel ini mu tjai dinan tjodisôna: i litéak lini li ga nom ngéda yosôna. 15 Ni ga je bret bi ngi-séñha+ dilo disaambok. I hilo hi bisu, ni ga héya séñha mu mandap manan, inyule nu ni nu a ga je bijek bi gwé séñha, ibôdôl i hilo hi bisu ipam i hilo hi nyônôs isaambok, i mut nu a nlama nôla.* 16 Likoda lipubhaga li ga ba i hilo hi bisu, likoda lipubhaga lipe li bak i hilo i nyônôs isaambok. Bôlô yo ki yo i ga séla bé mu dilo+ di. Ba ga lamb ndik bijek hiki mut a nla je.

17 “‘Ni nlama tégbaha ngand Bret bi ngi-séñha,+ inyule i yokel nu nyen m’a nyodna bôt banan bobasôna* i loñ Égiptô. Ni nlama tééda i hilo hi mu tjai dinan tjodisôna: i litéak lini li ga nom ngéda yosôna. 18 Ibôdôl i kôkôa+ i hilo hi nyônôs 14, letee ni i kôkôa i hilo hi nyônôs 21 hi sôñ bisu, ni ga je bret bi ngi-séñha. 19 Dilo disaambok, ba nlama bé léba séñha yo ki yo i mandap manan, inyule nu ni nu a nje bijek bi bi gwé séñha,+ to ibale a yé nkén mut tole man Israel i ligwéak,+ i mut nu a nlama nôla.* 20 Ni nlama bé je yom yo ki yo i i gwé séñha. Ni ga je bret bi ngi-séñha i mandap manan momasôna.’”

21 Môsi a pala sébél mimañ mi Israel+ nwominsôna, a kal nwo le: “Kena, ni pohol bon ba bilém* inyu mahaa manan, ni ti ki gwo sesema inyu Pasa. 22 I mbus, ni nlama yoñ mbom u hisôp,* ni yube wo mu matjél ma yé i saspan, ni hoo mo i ngii likôga ni i bitembee bi likôga; to wada nan a nlama bé pam i ndap yé letee ni kegla. 23 I ngéda Yéhôva a’ tagbe i bép bôt ba Égiptô ndi a tehe matjél i ngii likôga ni i bitembee bi likôga, Yéhôva a’ lela* i nwemel u, a’ nwas bé to le himala hi nyemb* hi jôp ikété mandap+ manan.

24 “Bé ni bon+ banan ni nlama tééda i jam lini: i litéak lini li ga nom i boga ni boga. 25 I ngéda ni ga jôp ikété loñ Yéhôva a ga ti bé, kiki a bi kal, ni nlama ke ni bisu i tééda i ngand+ ini. 26 I ngéda bon banan ba ga bat bé le: ‘Kii i ngand ini i nkobla?’+ 27 Ni nlama timbhe bo le: ‘I ngand ini i yé sesema i Pasa inyu Yéhôva, nu a bi lela mandap ma bon ba Israel i Égiptô i ngéda a bi bép bon ba Égiptô, ndi a péyés mandap més.’”

Ha nyen bôt ba litén ba bi ôôp, ba ôm maboñ ’isi. 28 I mbus, bon ba Israel ba ke, ba boñ yaga inoñnaga ni oda Yéhôva a bi ti Môsi bo Arôn.+ Ba bi boñ toi hala.

29 I kosi juu, Yéhôva a nol babôkgwéé ba loñ Égiptô+ bobasôna, ibôdôl i mbôkgwéé nu Faraô nu a bé a yii i yééne yé ane letee ni i mbôkgwéé nu mut mok nu a bé i ndap mok,* ni babôkgwéé bobasôna ba bilém.+ 30 Faraô a telep juu, nye ni bagwélél bé bobasôna lôñni bôt ba Égiptô bobasôna. Nlondok nkeñi u nôga ipôla bôt ba Égiptô, inyule ndap to yada i i bééna bé mim i bé bé.+ 31 Kunda yada, Faraô a sébél Môsi bo Arôn+ juu, a kal bo le: “Telbana, pama munu loñ yem, bé ni bana bon ba Israel bape. Kena, ni gwélél Yéhôva, kiki ni bi kal.+ 32 Ni yoñ ki bibémba binan bi mintômba ni mauñ manan ma nyaga, kena, kiki ni bi kal.+ Ndi ni nlama ki sayap me.”

33 Ha nyen bôt ba Égiptô ba bi bôdôl nyégsa bôt ba litén li Israel le ba pala+ nyodi mu loñ, inyule ba bé kal le: “Bésbobasôna di yé kiki minwok mi bôt!”+ 34 Jon bôt ba litén ba bi yoñ flawa ba bi bôô, bo ngi ha yo séñha, ni bipan i het ba bi buune flawa, ba kañ gwo ikété mambot map, ba begee gwo i bituu gwap. 35 Bon ba Israel ba boñ i yom Môsi a bi kal bo, ba bat bôt ba Égiptô gwom bi silba, gwom bi gôl, ni mambot.+ 36 Yéhôva a tinde bôt ba Égiptô i unda litén li Israel loñgeñem, kayéle ba ti bo i gwom ba bi bat, ba yoñ ki gwom gwobisôna bi bôt ba Égiptô.+

37 I mbus, bon ba Israel ba nyodi i Ramses+ inyu ke i Sukôt;+ i bôlôm ba bé ke ni makôô ba bé bebee le 600 000, ibabé i soñgol boñge.+ 38 Yak limut likeñi li mintén mi bôt nwominsôna*+ li ke ni bo, ni bibémba bi mintômba lôñni mauñ ma nyaga, bilém ngandak kiyaga. 39 Ba bôdôl bôm flawa ba bi bôô, i ba bi pamna i Égiptô, ba boñ bret bi ngi-séñha bi bi bé ngiiña. I flawa ba bi bôô i bééna bé séñha inyule ba bi pala luhul bo i Égiptô, kayéle ba bi bana bé ngéda inyu kôôba yom yo ki yo.+

40 I ngéda bon ba Israel ba bi nyodi i Égiptô,+ ba bé ba ma niñ kiki bakén ba bôt 430 nwii.+ 41 I lisuk li 430 nwii, i yokel yaga nu nyen litén* li Yéhôva jolisôna li bi nyodi i loñ Égiptô. 42 Ba nlama tégbaha ngand i u u, inyu séé mapam map i loñ Égiptô ni mahôla ma Yéhôva. Bon ba Israel bobasôna ba nlama tégbaha ngand i u u, inyu ti Yéhôva lipém mu tjai tjap tjodisôna.+

43 I mbus, Yéhôva a kal Môsi bo Arôn le: “Litéak li Pasa lini: nkén mut nye ki nye a nla bé je Pasa.+ 44 Ndi ibale mut a gwé nkol u a bi somb ni moni, a nlama kwee wo.+ Ndik ha ngéda i nyen nkol u, u nla je Pasa. 45 To nkén mut, to mut bôlô a nla bé je yo. 46 Hiki ntômba u nlama jéba ikété ndap yada. Ni nlama bé pamna nsôn wé to wada i mbégdé, ni nlama bé to bôk hés+ yé to yada. 47 Ntôñ u Israel wonsôna u nlama tégbaha ngand Pasa. 48 Ibale nkén mut nu a nyééne i bééni a nsômbôl tégbaha ngand Pasa inyu Yéhôva, i bôlôm bobasôna ba nyééne i nyeni ba nlama kweeba. Ha nyen a nla tégbaha ngand Pasa, a yila ki kiki man Lôk Israel i ligwéak. Ndi mut nye ki nye nu a yé ngi kweeba a nla bé je yo.+ 49 Nlélém mbén u ga ba inyu man Lôk Israel ni inyu nkén mut nu a nyééne i bééni.”+

50 Bon ba Israel bobasôna ba bi boñ yaga inoñnaga ni oda Yéhôva a bi ti Môsi bo Arôn. Ba bi boñ toi hala. 51 I yokel yaga nu nyen Yéhôva a bi nyodna bon ba Israel bobasôna* i loñ Égiptô.

13 Yéhôva a kônde pôdôs Môsi, a kal nye le: 2 “Babôkgwéé* bobasôna ba bon ba Israel, yilha bo bapubhaga* inyu yem. Hiki man munlôm nu a yé mbôkgwéé nu man Israel a yé wem, yak hiki mbôkgwéé nu lém, nu a yé nlôm a yé wem.”+

3 Môsi a kal ni litén le: “Bigdana le munu hilo hini nyen ni nyodi i loñ Égiptô,+ i loñ i het ni bé minkol,* inyule ni woo u ngui nyen Yéhôva a nyodna bé hana.+ Jon yom yo ki yo i i gwé séñha i jéba bañ. 4 Ni yé i nyodi len, i sôñ Abib.*+ 5 I ngéda Yéhôva a ga jôbna we i loñ i Lôk Kanaan, i Lôk Hét, i Lôk Amôr, i Lôk Hivi ni i Lôk Yébus,+ loñ Nyambe a bi kum soñ i bisu bi basôgôlsôgôl boñ le a’ ti we,+ loñ i i nkuli milik ni wéi,+ ha nyen u nlama tégbaha i ngand ini mu sôñ ini. 6 U ga je bret bi ngi-séñha+ dilo disaambok, ndi hilo hi nyônôs isaambok hi ga ba ngand inyu Yéhôva. 7 Ba ga je bret bi ngi-séñha+ dilo disaambok; ba nlama bé léba yom yo ki yo i i gwé séñha i weeni,+ ba nlama bé to léba séñha yo ki yo mu nkoñ woñ wonsôna.* 8 U nlama kal man woñ nu munlôm i kel i le: ‘Me yé i boñ hala inyu jam Yéhôva a bi bôñôl me i ngéda me bé nyodi i Égiptô.’+ 9 Hala a ga ba we kiki yimbne i woo woñ ni kiki mbigda* i mbom+ yoñ,* inyu boñ le mbén Yéhôva i ba i nyo woñ, inyule ni woo wé ngui nyen Yéhôva a bi nyodna we i Égiptô. 10 Nwii ndi nwii, u nlama nôgôl i mbén ini i ntéak wé ngéda.+

11 “I ngéda Yéhôva a ga jôbna we i loñ i Lôk Kanaan, loñ a bi kum soñ i bisu gwoñ ni i bisu bi basôgôlsôgôl+ boñ le a ga ti we, 12 u nlama ti Yéhôva hiki man munlôm u ga bana nu a yé mbôkgwéé,* ni hiki mbôkgwéé nu lém nu a yé nlôm. Ba yé ba Yéhôva.+ 13 U ga ti ntômba inyu kobol hiki mbôkgwéé nu jagas; ibale u nkobol bé nye, u nlama bôk nye joo. U ga kobol+ ki hiki man woñ munlôm nu a yé mbôkgwéé.

14 “Ibale man woñ a mbat we i dilo di nlo le: ‘I jam lini li nkobla le kii?’ Ha nyen u nlama timbhe nye le: ‘Ni woo wé ngui nyen Yéhôva a bi nyodna bés i Égiptô, i loñ i het di bé minkol.*+ 15 I ngéda Faraô a bi nai ndik le a nwas bé bés le di kee,+ Yéhôva a bi nol babôkgwéé bobasôna ba loñ Égiptô, ibôdôl i mbôkgwéé nu mut binam letee ni i mbôkgwéé nu lém.+ Inyu hala nyen babôkgwéé bem bobasôna ba ba yé balôm,* me nti bo Yéhôva kiki sesema, me nkobol ki hiki man wem munlôm nu a yé mbôkgwéé.’ 16 Hala a nlama ba kiki yimbne i woo woñ ni kiki pisis libadô i mbom+ yoñ,* inyule ni woo wé ngui nyen Yéhôva a bi nyodna bés i Égiptô.”

17 I ngéda Faraô a bi nwas le litén li kee, Nyambe a bi éga bé bo mu njel i nkena i loñ i bôt ba Filistia, to hala kiki i njel i, i bé bebee. Inyule Nyambe a bi kal le: “Bôt ba litén ba nla héñha mahoñol i ngéda ba ga tehe gwét, ba témb ki i Égiptô.” 18 Jon Nyambe a bi boñ le litén li nôñôl nyoo i ñoñ, mu njel i yé i mbaa tuye Nkôibaga.+ Ndi bon ba Israel ba bi nyodi i loñ Égiptô, ba bak ntjegek kiki mintôñ mi gwét. 19 Môsi a bi yoñ yak bihés bi Yôsep, a kena gwo, inyule Yôsep a bi boñ le bon ba Israel ba kum yaga soñ i bisu gwé, a kal le: “Nyambe a ga hoñol yaga bé, ni kena ki bihés gwem i ngéda ni mba ni nyodi hana.”+ 20 Ba nyodi i Sukôt, ba ke i yééne i Étam, bebee ni ñoñ.

21 Yéhôva a bé bôk bo i bisu, njamuha ikété jél li ond inyu unda bo njel,+ yak juu ikété jél li hié inyu ti bo mapubi, jon ba bé la ke juu+ ni njamuha. 22 Jél li ond li bé ke bé haa ni litén njamuha, to juu+ jél li hié li bé ke bé jo haa.

14 Nano, Yéhôva a kal Môsi le: 2 “Kal bon ba Israel le ba témb ni mbus, ba yééne i bisu bi Pihahirôt, ipôla Migdol ni tuye, i mbombom Baal-Zéfôn.+ Ni ga yééne i mbombom homa nu, bebee ni tuye. 3 Ha nyen Faraô a ga kal inyu bon ba Israel le: ‘Ba nimil mu nkoñ. Ñoñ u nkéña bo.’ 4 M’a nwas le Faraô a bana nledek ñem,+ a ga noñ bo. Me ga gwélél Faraô ni ntôñ wé gwét+ wonsôna inyu ti memede lipém; ibabé pééna, ha nyen bôt ba Égiptô ba ga yi le men me yé Yéhôva.”+ I mbus, ba boñ hala.

5 I mbus ngéda, ba kal kiñe Égiptô le litén li nke ngwéé. Kunda yada, Faraô ni bagwélél bé ba héñha mahoñol ba bééna inyu litén,+ ba kal le: “Inyuki di mboñ hala? Inyuki di nwas le bon ba Israel ba ba ha bañ minkol nwés?” 6 Jon a bi boñ le ba kôôba bikak gwé bi gwét, a ke ki ni ntôñ wé gwét.+ 7 A yoñ 600 mimpohlak mi bikak bi gwét ni bini bikak bi gwét bipe gwobisôna bi Égiptô, ni bajogwét mu ngii bikak gwap. 8 Hala nyen Yéhôva a bi nwas le Faraô, kiñe Égiptô, a bana nledek ñem, a noñ bon ba Israel, ki le bon ba Israel ba bé pam ni makénd.*+ 9 Bôt ba Égiptô, ni bikak bi gwét bi Faraô gwobisôna, ni bakilhosi bé, yak ni ntôñ wé gwét ba noñ bo,+ ba koba bo i homa ba bé yééne i mbaa tuye, bebee ni Pihahirôt, i mbombom Baal-Zéfôn.

10 I ngéda Faraô a bi pam bebee, bon ba Israel ba pa mis, ba tehe bôt ba Égiptô ba noñ bo. Bon ba Israel ba kon woñi ngandak, ba bôdôl lôndôl Yéhôva.+ 11 Ba kal Môsi le: “Baa inyule bisoñ bi ta bé i Égiptô, jon u nlona bés hana le di wo i ñoñ?+ Kii u mboñ bés? Inyuki u nyodna bés i Égiptô? 12 I ngéda di bé pôdôs we i Égiptô, baa di bi kal bé we le: ‘Nwas bés nwee, le di kee ni bisu i gwélél bôt ba Égiptô’? Inyule i yé bés nseñ le di gwélél bôt ba Égiptô iloole di wo i ñoñ.”+ 13 Ha nyen Môsi a bi kal litén le: “Ni kon bañ woñi.+ Telbana siñ siñ, ni tehe lelaa Yéhôva a ga tohol bé, ni tehe i yom a ga boñ len+ inyu nan. Inyule bana bôt ba Égiptô ni ntehe len, ni ga tehe ha bé bo kekikel.+ 14 Yéhôva nyemede nyen a ga jo inyu nan,+ ndi bé ni ga yén nwee.”

15 Yéhôva a kal ni Môsi le: “Inyuki u nwaa bé lôndôl me? Kal bon ba Israel le ba jôp i njel. 16 Ndi we, pa ntoñgo woñ, sambal woo woñ i ngii tuye, bagal nye, inyu boñ le bon ba Israel ba tagbene mu ñemkété tuye, i nnumuk ’isi. 17 Ndi me, m’a nwas le bôt ba Égiptô ba bana nledek ñem, inyu boñ le ba noñ bo. Hala nyen m’a gwélél Faraô, ni ntôñ wé gwét wonsôna, ni bikak gwé bi gwét, yak ni bakilhosi+ bé inyu ti memede lipém. 18 Ha nyen bôt ba Égiptô ba ga yi yaga le men me yé Yéhôva i ngéda m’a gwélél Faraô, ni bikak gwé bi gwét, yak ni bakilhosi+ bé inyu ti memede lipém.”

19 Ndi añgel i bañga Nyambe+ i i bé bôk ntôñ u Israel i bisu, i nyodi, i ke i mbus yap; yak jél li ond li li bé bo i bisu, li nyodi, li ke li telep i mbus yap.+ 20 Hala nyen jél li bi lo ipôla ntôñ u bôt ba Égiptô ni ntôñ u Israel.+ Pes yada, li bé ti jiibe. Ini pes ipe, li bé ti mapubi juu.+ Jon u wonsôna, ntôñ wada u bé la bé tiige bebee ni uu ntôñ umpe.

21 I mbus, Môsi a sambal woo wé i ngii tuye;+ u wonsôna, Yéhôva a gwélél mbebi i nlôl i pes likôl inyu nyuge malép ma tuye le ma témb ni mbus, malép ma bagla+ kayéle nnumuk ’isi+ u nene i ñemkété tuye. 22 Ha nyen bon ba Israel ba bi tagbene mu ñemkété tuye, i nnumuk ’isi,+ libap li malép li bak i pes yap walôm ni i pes yap waé.+ 23 Bôt ba Égiptô ba noñ bo; bihosi bi Faraô gwobisôna, ni bikak gwé bi gwét, ni bakilhosi bé ba kahal noñ bo i ñemkété tuye.+ 24 Ilole kel i nye,* i ñemkété jél li hié ni li ond nyen Yéhôva a bi béñgne ntôñ u bôt ba Égiptô,+ a yubda ki wo. 25 A héya makôô ma bikak gwap bi gwét kayéle ba bééna ndutu i luk gwo, jon bôt ba Égiptô ba bé kal le: “Di kee ngwéé, di keñgle Israel, inyule Yéhôva a njo inyu yap ikolba bôt ba Égiptô.”+

26 Ha nyen Yéhôva a bi kal Môsi le: “Sambal woo woñ i ngii tuye, le malép ma témb, ma hô bôt ba Égiptô, bikak gwap bi gwét, ni bakilhosi bap.” 27 I nlélém ngéda, Môsi a sambal woo wé i ngii tuye, kel i bak bebee ni ye, malép ma tuye ma témb i homa wé. Kiki bôt ba Égiptô ba bé ke malép ngwéé, Yéhôva a leñ bôt ba Égiptô i ñemkété tuye.+ 28 Kiki malép ma bé témb, ma hô bikak bi gwét, ni bakilhosi, ni ntôñ gwét u Faraô wonsôna, u u bi jôp mu tuye inyu noñ bon ba Israel.+ To wada ikété yap a bi pei bé.+

29 Ndi bon ba Israel ba bé kil mu nnumuk ’isi i ñemkété tuye,+ libap li malép li bak i pes yap walôm ni i pes yap waé.+ 30 Hala nyen Yéhôva a bi tohol Israel i moo ma bôt ba Égiptô+ i kel i, Israel a tehe mim mi bôt ba Égiptô mi niñi i mbaa tuye. 31 Israel a tehe ki ngui* ikeñi Yéhôva a bi unda ikolba bôt ba Égiptô; litén li Israel li bôdôl kon Yéhôva woñi, li hémle ki Yéhôva ni ngwélél wé Môsi.+

15 Ha ngéda i nyen Môsi ni bon ba Israel ba bi tubul Yéhôva+ i hiémbi hini:

“Me tubul Yéhôva hiémbi, inyule a nkôhna lipém li mbuma ñañ.+

A nleñ hosi ni mut a bak a yii yo i ngii, i tuye.+

 2 Yéhôva* a yé ngui yem ni lipémba jem, inyule a nyila ntohol+ wem.

A yé Nyambe wem, m’a bégés nye;+ Nyambe nu tata wem,+ m’a añal nye.+

 3 Yéhôva a yé njogwét nunkeñi.+ Jôl+ jé le Yéhôva.

 5 Mangudga makeñi ma bi hô bo; ba yin ikétékété malép kiki ngok.+

 9 Ñoo a bé kal le: ‘M’a noñ bo! Me gwel bo!

Me yoñ ki nkus* wap letee me* nuu!

M’a sodol pansoñ yem! Woo wem w’a ane bo!’+

11 Njee ikété banyambe a yé kiki we, a Yéhôva?+

Njee a mpôna we inyu libak joñ lipubi+ li li nlôôha?

Wen ba nlama kon woñi, ba tublak we tjémbi di bibégés, wen u mboñ bihélha bi mam.+

12 U bi sambal woo woñ walôm, hisi hi mil bo tjwat.+

13 Ni loñge yoñ ñem,* u bi éga litén u bi kobol.+

Ni ngui yoñ, u ga éga bo letee ni i liyééne joñ lipubhaga.

I bôt bobasôna ba nyééne i Kanaan b’a nimis makénd map.+

16 Woñi ni sehla bi ga kwél bo.+

18 Yéhôva a’ ba kiñe i boga ni boga.+

20 I mbus, mpôdôl nu muda le Miriam, manyañ muda nu Arôn, a yoñ hingoma i woo wé, yak bôda bobasôna ba noñ nye, ba kôdôk dingoma, ba sagak. 21 Miriam a timbhe bôlôm, a tôbôk le:

“Tublana Yéhôva hiémbi, inyule a nkôhna lipém li mbuma ñañ.+

A nleñ hosi ni mut a bak a yii yo i ngii, i tuye.”+

22 I mbus, Môsi a éga bon ba Israel, a nyodna bo i tuye Nkôibaga, ba ke i ñoñ Sur. Ba bi ke liké li dilo daa i ñoñ, ndi ba léba bé malép. 23 Ba pam i Mara,*+ ndi ba la bé nyo malép ma Mara inyule ma bé lol. Inyu hala nyen ba bi sébél i homa nu le Mara. 24 Jon litén li bi bôdôl huñbene Môsi,+ li kalak le: “D’a nyo kii?” 25 Kiki Môsi a bi lôndôl Yéhôva,+ Yéhôva a unda nye e yada. I ngéda a bi leñ yo ikété malép, malép ma yila malam.

Nyoo nyen Nyambe a bi ti bo litiñ, a kal bo i jam li yé le li kena bo i bikééhene, nyoo ki nyen a bi noode+ bo. 26 A kal le: “Ibale u ntibil nôgôl kiñ Yéhôva Nyambe woñ, u boñ mam ma téé i mis mé, u nôgôl yak mambén mé, u tééda ki matiñ+ mé, wee makon me bi leñ bôt ba Égiptô,+ m’a leñ bé we mo, inyule me, Yéhôva, men me mélés makon moñ.”+

27 I mbus, ba pam i Élim, i het 12 mangen ma malép ma bééne, ni 70 ma maén. Ba yééne ha, bebee ni malép.

16 I ngéda ntôñ wonsôna u bon ba Israel u bi nyodi i Élim, u pam i ñoñ Sin u u yé ipôla Élim ni Sinai,+ i hilo hi nyônôs 15 hi sôñ i nyônôs 2 i mbus manyodi map i loñ Égiptô.

2 Ha nyen ntôñ wonsôna u bon ba Israel u bôdôl huñbene Môsi bo Arôn i ñoñ.+ 3 Bon ba Israel ba bé waa bé kal bo le: “Ngo i bak nseñ le woo u Yéhôva u nol bés i loñ Égiptô, di bé di yii nyoo ipañ dibee di binuga,+ di jek bijek,* di nuak. Ndi bé ni bi lona bés munu ñoñ unu inyu nol i bôt bana bobasôna* ni njal.”+

4 Yéhôva a kal ni Môsi le: “M’a nôs bijek inyu nan, bi lôlak i ngii.+ Hiki kel, hiki mut a nlama pam inyu bada jé libim li bijek,+ inyu boñ le me noode litén lini i tehe too ba ga nôgôl mambén mem tole ba ga nôgôl bé mo.+ 5 Ndi i hilo hi nyônôs isamal,+ i ngéda ba ga lamb i yom ba mbada, i libim li bijek ba ga bada, li ga ba bijek ba mbéna bada hiki kel ngélé iba.”+

6 Môsi bo Arôn ba kal ni bon ba Israel bobasôna le: “I kôkôa ini, ni ga yi toi le Yéhôva nyen a bi nyodna bé i loñ Égiptô.+ 7 Kegla, ni ga tehe lipémba li Yéhôva, inyule Yéhôva a nok minhuñbe ni nhuñbene nye. Ndi bés di yé bonjee le ni huñbene bés?” 8 Môsi a kal ki le: “I ngéda Yéhôva a ga ti bé binuga kôkôa le ni je, yak bijek* kegla letee ni nuu, ni ga tehe le Yéhôva a nok minhuñbe ni nhuñbene nye. Ndi bés di yé bonjee? Ni nhuñbene bé bés, ndi Yéhôva+ nyen ni nhuñbene.”

9 I mbus, Môsi a kal Arôn le: “Kal ntôñ u bon ba Israel wonsôna le: ‘Lona i bisu bi Yéhôva, inyule a nok minhuñbe+ minan.’” 10 Ndik kiki Arôn a mal pôdôs ntôñ u bon ba Israel wonsôna, ba hielba, ba nun nyoo i pes ñoñ, ba tehe lipémba li Yéhôva li nene ikété ond.+

11 Yéhôva a pôdôs ki Môsi, a kal le: 12 “Me nok minhuñbe mi bon ba Israel.+ Kal bo le: ‘I manañle ma hiañgaa,* ni ga je binuga, yak kegla, ni ga nuu bret;+ ha nyen n’a yi toi le men me yé Yéhôva Nyambe+ nan.’”

13 Jon i kôkôa i, dikwaa* di bi lo, di hô homa nyensôna ba bé yééne;+ yak kegla, manwee ma bi kéña liyééne jap jolisôna. 14 I ngéda manwee ma bi num, yom i nene i ñoñ,+ i bé minluñ minluñ, i bak mabga mu hisi wengoñle litan-ga li nop. 15 I ngéda bon ba Israel ba bi tehe yo, ba kahal badna le: “Kii ini?” Inyule ba bé yi bé yo. Môsi a kal bo le: “Bijek* bi gwon Yéhôva a nti bé le ni je.+ 16 Yéhôva a nti i oda ini le: ‘Hiki mut a nlama bada libim a nla je. Ni ga bada hihéga hiada hi ômer*+ inyu mut wada, inoñnaga ni nsoñgi bôt hiki mut a gwé i ndap yé libadô.’” 17 Bon ba Israel ba bôdôl boñ hala; bahogi ba bé bada ngandak, bape ba badga ndék. 18 I ngéda ba bé hek yo ni ômer, i mut a bé bada ngandak a bé lôôha bé bana, yak i mut a bé bada ndék, yom i bé héñél bé nye.+ Hiki mut a bé bada yo inoñnaga ni i yom a bé la je.

19 Ha nyen Môsi a bi kal bo le: “Mut nye ki nye a nlama bé tééda to ndék mu ipam kegla.”+ 20 Ndi ba bi nôgôl bé Môsi. I ngéda bôt bahogi ba bi tééda ndék mu ipam kegla, bitômb bi bé jôp mu, i numbuk béba njiñ; Môsi a unbene bo. 21 Ba bé bada yo hiki kegla, hiki mut inoñnaga ni i yom a bé la je. I ngéda hiañgaa hi bé nyai, i bé nyimbi.

22 I hilo hi nyônôs isamal, ba bé bada libim li bijek+ ngélé iba, dihéga di ômer diba inyu mut wada. Jon baane ba ntôñ bobasôna ba bi lo i yis Môsi hala. 23 Ha nyen a bi kal bo le: “Haana nyen Yéhôva a nkal: ‘Yani a yé kel bañga noi,* sabat pubi inyu Yéhôva.+ Ni bôm i yom ni gwé ngôñ i bôm, ni nat ki i yom ni gwé ngôñ i nat;+ ndi i yom i nyégle, ni bii yo ipañ, ni tééda ki yo ipam kegla.’” 24 Jon ba bi bii yo ipañ ipam kegla, kiki Môsi a bi kal, ndi i bi numb bé béba njiñ, to bitômb bi bi jôp bé mu. 25 Môsi a kal ni le: “Ni je yo len, inyule len a yé sabat inyu Yéhôva. Len, ni ga koba bé yo ’isi. 26 Ni ga bada yo dilo disamal, ndi i hilo hi nyônôs isaambok, i kel sabat,+ i ga ba bé.” 27 To hala, bôt bahogi ba bi pam inyu bada yo i hilo hi nyônôs isaambok, ndi ba bi koba bé to yom.

28 Ha nyen Yéhôva a bi kal Môsi le: “Letee ni ngéda mbe n’a tjél nôgôl matiñ mem ni mambén+ mem? 29 Ni hôya bañ le Yéhôva nyen a bi ti bé sabat.+ Inyu hala nyen i hilo hi nyônôs isamal, a nti bé bijek inyu dilo diba. Hiki mut a nlama yén i homa a yéne; mut to wada a nlama bé nyodi i homa wé i hilo hi nyônôs isaambok.” 30 Jon litén li bi tééda sabat* i hilo hi nyônôs isaambok.+

31 Litén li Israel li bi sébél i bijek* bi le “mana.”* Mana i bé pôp kiki mbôô kôriañda,* i nek kiki mimbamba mi bikoga ba mboñ ni wéi.+ 32 Môsi a kal ni le: “Haana nyen Yéhôva a nkal: ‘Yoña hihéga hiada hi ômer i mana, ni tééda ki yo mu tjai+ dinan tjodisôna, inyu boñ le mbôda nan i tehe bijek me bi ti bé le ni je i ñoñ i ngéda me bi nyodna bé i loñ Égiptô.’” 33 Jon Môsi a bi kal Arôn le: “Yoñ hibee hiada, u ha hihéga hiada hi ômer i mana mukété, u bii ki hio i bisu bi Yéhôva. Hala a yé jam ni ga tééda inyu tjai+ dinan tjodisôna.” 34 Kiki Yéhôva a bi kal Môsi, hala nyen Arôn a bi bii hibee i bisu bi Mbôgi,*+ le hi téédana. 35 Bon ba Israel ba bi je mana 40 ma nwii,+ letee ba pam i loñ i het bôt ba bé yééne.+ Ba bi je mana letee ba pam i nwaa u loñ Kanaan.+ 36 Ômer yada i yé hihéga hiada hi éfa* ikété jôm.

17 Ntôñ u bon ba Israel wonsôna u bi nyodi i ñoñ Sin,+ u kenek, u telbak bahoma bahoma, inoñnaga ni oda i Yéhôva;+ i mbus, ba yééne i Réfidim.+ Ndi litén li bééna bé malép ma nyo.

2 Ha nyen litén li bôdôl nôôma Môsi,+ li kalak le: “Ti bés malép ma nyo.” Ndi Môsi a kal bo le: “Inyuki ni nôôma me? Inyuki ni nwaa bé noode Yéhôva?”+ 3 Ndi nyus malép i bi gwel bôt ba litén ngandak, ba bôdôl huñbene Môsi,+ ba kalak le: “Inyuki u bi nyodna bés i Égiptô, le ndi di wo nyus malép, bés ni bon bés, ni bilém gwés?” 4 Ha nyen Môsi a bi lôndôl Yéhôva le: “M’a boñ lelaa ni i litén lini? Ngo ndék ngéda, wee ba ñôm me ngok!”

5 Yéhôva a kal ni Môsi le: “Bôk litén i bisu, yoñ ki mimañ minhogi mi litén li Israel, yak ntoñgo woñ u bi gwélél inyu bép lom Nil.+ Yoñ wo i woo woñ, u kee. 6 Nun-ki! M’a telep i bisu gwoñ nyoo i ngii liaa, i Hôreb. U nlama bép liaa, malép ma ga pémél mu, le ndi bôt ba litén ba nyo.”+ Hala nyen Môsi a bi boñ, mimañ mi Israel mi tehge. 7 Jon a bi sébél i homa nu le Masa*+ ni Mériba,*+ inyu jomol li bon ba Israel, ni inyule ba bi noode+ Yéhôva, ba kalak le: “Baa Yéhôva a yé ipôla yés, tole a ta bé ipôla yés?”

8 I mbus, Lôk Amalek+ i lo i jôs bon ba Israel i Réfidim.+ 9 Ha nyen Môsi a bi kal Yôsua+ le: “Pohol bôlôm, le ndi ni ke i jôs Lôk Amalek. Yani, m’a telep i ngii hikôa, ni ntoñgo u bañga Nyambe i woo.” 10 Yôsua a boñ kiki Môsi a bi kal nye,+ a jôs Lôk Amalek. Môsi, Arôn ni Hur+ ba bet i ngii hikôa.

11 Ngéda yosôna Môsi a bé a pa moo mé i ngii, bon ba Israel ba bé yémbél, ndi i ngéda a bé a suhus moo mé, Lôk Amalek yon i bé yémbél. 12 I ngéda moo ma Môsi ma bi bôdôl yidil nye, Arôn ni Hur ba yoñ ngok, ba biine nye yo ’isi, a yééne mu. I mbus, hiki wada wap a kahal nit woo u Môsi i yé pes, kayéle moo mé ma yégle ma téé i ngii letee hiañgaa hi nañal. 13 Hala nyen Yôsua a bi yémbél Lôk Amalek ni pansoñ+ lôñni i bôt ba bé nit bo.

14 Yéhôva a kal ni Môsi le: “Tila i jam lini ikété kaat inyu boñ le ba hoñol* jo, tiimba ki kal jo Yôsua, le: ‘Me ga sas yaga Lôk Amalek hana ’isi,* le ba bigda ha bañ bo.’”+ 15 I mbus, Môsi a oñ juu li bisesema, a sébél jo le Yéhôva-Nisi,* 16 a kalak le: “Inyule moo ma Lôk Amalek ma nkolba yééne ane i Yéhôva,*+ jon Yéhôva a ga jôs bo gwét tjai+ tjodisôna.”

18 Yétrô, prisi i Madian, nkil Môsi,+ a nok i mam momasôna Nyambe a bi bôñôl Môsi ni litén jé Israel, lelaa Yéhôva a bi nyodna Israel i Égiptô.+ 2 Yétrô, nkil Môsi, a bi leege Sipôra, nwaa Môsi, i ngéda Môsi a bi om nye i nyeni, 3 lôñni bon bé bôlôm+ bo iba. Jôl li man wé munlôm wada le Gersôm,*+ inyule Môsi a bi kal le: “Me bi yila nkén mut i loñ ipe.” 4 Jôl li nuu numpe le Éliézer,* inyule Môsi a bi kal le: “Nyambe nu tata wem a yé nhôla wem, nyen a bi sôñ me le Faraô a nol bañ me ni pansoñ.”+

5 Ha nyen Yétrô, nkil Môsi, nye ni bon bôlôm ba Môsi lôñni nwaa Môsi, a ke i boma Môsi i ñoñ, i het a bé yééne bebee ni hikôa hi bañga Nyambe.+ 6 I mbus, a éble Môsi nwin le: “Me Yétrô,+ nkil woñ, me yé i lo i tehe we ni nwaa woñ lôñni bon bé bôlôm bo iba.” 7 I nlélém ngéda, Môsi a pam, a ke i boma nkil wé, a ôôp, a sos nye mamañ. Hiki wada a bat nuu numpe too a yé mbôô; i mbus, ba jôp i ndap libadô.

8 Môsi a añle nkil wé mam momasôna Yéhôva a bi boñ Faraô ni Égiptô inyu hôla bon ba Israel,+ a kal ki nye mandutu momasôna ba bi kôhna mu njel,+ ni lelaa Yéhôva a bi kobol bo. 9 Yétrô a kon maséé inyu loñge yosôna Yéhôva a bi bôñôl bon ba Israel, kiki a bi sôñ bo i moo ma Égiptô. 10 Ha nyen Yétrô a bi kal le: “Yéhôva a kôli ni bibégés, nu a bi sôñ bé i moo ma Égiptô ni ma Faraô, a kobol ki litén isi ane i Égiptô. 11 Nano, me nyi le Yéhôva a nloo bana banyambe+ bape bobasôna, inyu jam a bi boñ i bôt ba bi ngôgbene litén jé.” 12 Yétrô, nkil Môsi, a lona sesema i ntul i hié ni bisesema bipe inyu Nyambe. Arôn ni mimañ nwominsôna mi Israel ba lo i je ni nkil Môsi i bisu bi bañga Nyambe.

13 I kel i bé noñ ha, Môsi a yén inyu kéés litén kiki lem, yak bôt ba litén ba bé telep i bisu gwé ibôdôl kegla letee ni kôkôa. 14 I ngéda nkil Môsi a bi tehe mam momasôna Môsi a bé boñ inyu litén, a kal le: “Inyuki u mboñ litén hala? Inyuki wetama nyen u nyén inyu kéés litén jolisôna li li téé we i bisu ibôdôl kegla letee ni kôkôa?” 15 Môsi a timbhe nkil wé le: “Inyule litén li nwaa bé lo i tehe me inyu bat Nyambe mahoñol mé. 16 I ngéda nkaa u yé, ba nlona wo i meeni. Me nlama kéés i bôt ba, me yis ki bo makidik ma bañga Nyambe ni mambén+ mé.”

17 Nkil Môsi a kal nye le: “Hala bé nyen u nlama boñ. 18 Ibabé pééna, u ga waa, we ni litén li li yé lôñni we, inyule i mbegee ini i nlôôha yét inyu yoñ, u nla bé to begee yo wetama. 19 Nano ni, emble maéba me nti we, ndi Nyambe a’ ba ni we.+ We, pôdôs bañga Nyambe+ inyu litén, u kena ki minkaa i bisu bi bañga Nyambe.+ 20 Toñle bo matiñ ni mambén,+ yis ki bo njel ba nlama nôñôl, ni minson ba nlama gwel. 21 Ndi u nlama ki pohol bôlôm ba kôli+ mukété bôt ba litén, bôt ba nkon Nyambe woñi, bôt ba maliga ba ba ñoo nkus malôga,+ téé bo le ba ba baane: ñane wada inyu hikôô hi bôt, ñane wada inyu mbôgôl bôt, ñane wada inyu môm matan ma bôt, ni ñane wada inyu jôm+ li bôt. 22 Ba nlama kéés bôt i ngéda minkaa mi yé,* ba ga lona we minkaa nwominsôna mi mi nlet,+ ndi ba ga kéés minkaa mi mi ntomb. Hôyôs nson woñ, u nwas le ba hôla we i begee mbegee yoñ.+ 23 Ibale u mboñ hala, kiki Nyambe a nkal we, u ga la begee i mbegee ini, yak hiki mut a ga huu i mbai yé, a bak maséé.”

24 Môsi a pala nôgôl nkil wé, a boñ ki mam momasôna a bi kal nye. 25 Môsi a pohol bôt ba kôli ikété litén li Israel jolisôna, a téé bo le ba ba baane i ngii litén: ñane wada inyu hikôô hi bôt, ñane wada inyu mbôgôl bôt, ñane wada inyu môm matan ma bôt, ni ñane wada inyu jôm li bôt. 26 Hala nyen ba bé kéés bôt i ngéda minkaa mi bé. Ba bé kena minkaa mi mi nlet yak Môsi,+ ndi bon ba bé kéés minkaa nwominsôna mi mi bé tomb. 27 I mbus, Môsi a yéga nkil wé, nkil+ wé a témb i loñ yé.

19 I sôñ i nyônôs aa, i mbus le bon ba Israel ba bi nyodi i loñ Égiptô, i nlélém kel,* ba pam i ñoñ Sinai. 2 Ba bi nyodne i Réfidim,+ ba pam i ñoñ Sinai, ba yééne mu ñoñ. Israel a yééne nyoo i mbombom hikôa.+

3 Ha nyen Môsi a bi bet yak bañga Nyambe, Yéhôva a pôdôs nye nyoo i hikôa,+ a kal le: “Lana nyen w’a kal mbôda* Yakôb, u añle ki bon ba Israel le: 4 ‘Bébomede ni bi tehe i yom me bi boñ bon ba Égiptô+ inyu begee bé i bipapai bi minyôgôl, le ndi me lona bé i meeni.+ 5 Nano ni, ibale ni nôgôl toi me, ni tééda ki malômbla mem, ibabé pééna, ni ga yila tik yem yom* ipôla matén momasôna,+ inyule hisi hiosôna hi yé hiem.+ 6 Ni ga yila ane i biprisi ni litén lipubhaga+ inyu yem.’ U nlama kal bon ba Israel i bibañga bini.”

7 Jon Môsi a bi ke, a sébél mimañ mi litén, a añle bo bibañga gwobisôna Yéhôva a bi kal nye.+ 8 I mbus ha, litén jolisôna li timbhe ni kiñ yada, li kal le: “Di yé bebee i boñ mam momasôna Yéhôva a nkal.”+ Kunda yada, Môsi a ke i kal Yéhôva i yom litén li mpot. 9 Yéhôva a kal ni Môsi le: “Nun-ki! Me ga lo ikété soso ond, inyu boñ le i ngéda me mba me mpot lôñni we, bôt ba litén ba emblege, ni le ba hémle ki we ngéda yosôna.” I mbus, Môsi a añle Yéhôva i yom litén li mpot.

10 Ha nyen Yéhôva a bi kal Môsi le: “Ke tehe bôt ba litén, yilha bo bapubhaga len ni yani; ba nlama jôwa mambot map. 11 Ba nlama ki ba nkôôbaga i hilo hi nyônôs aa, inyule i hilo hi nyônôs aa nyen Yéhôva a ga sôs i hikôa Sinai, bôt ba litén bobasôna ba tehge. 12 U nlama téé minwaa inyu litén mu mapañ momasôna ma hikôa, u kal ki jo le: ‘Yoña yihe le ni bet bañ mu hikôa, ni tihba bañ to mapañ mé. Tonjee mut a ga tihba hikôa, ba ga nol yaga nye. 13 Woo wo ki wo u nlama bé tihba i mut a ndogop, ndi ba ga ôm nye ngok, tole ba ga ôm nye likoñ. To a yé mut binam, to a yé nuga, a ga niñ bé.’+ Ndi i ngéda ba ga hem toñ i nlôm ntômba,+ ha nyen ba ga la bet hikôa.”

14 I mbus, Môsi a sôs hikôa, a ke i tehe bôt ba litén, a bôdôl yilha bo bapubhaga, ba jôwa ki mambot+ map. 15 A kal litén le: “Ni ba nkôôbaga inyu hilo hi nyônôs aa. Ni lal bañ ni baa banan.”*

16 Kegla, i hilo hi nyônôs aa, mbambat i bi bam, nwegnwek a nwek, yak soso ond+ i bé i ngii hikôa, ba nok ki kiñ hioñ i nlond makeñi. Litén jolisôna li bôdôl sehla+ nyoo i homa ba nyééne. 17 Môsi a nyodna litén mu homa ba bé yééne inyu boma bañga Nyambe, ba telep ha ’isi hikôa. 18 Hikôa Sinai hiosôna hi bé tu hiida, inyule Yéhôva a bi sôs i hikôa ikété hié;+ hiida hi bé bet kiki hiida hi juu li li nloñ ni ngui, yak hikôa hiosôna hi bé nyeñg ngandak.+ 19 Kiki kiñ hioñ i bé ke ni bisu i lond makeñi, Môsi a bé pot, yak kiñ i bañga Nyambe i timbhege nye.

20 Hala nyen Yéhôva a bi sôs i hikôa Sinai, i ngii hikôa. I mbus, Yéhôva a sébél Môsi i ngii hikôa, yak Môsi a bet+ nyoo. 21 Yéhôva a kal ni Môsi le: “Sôs, béhe bôt ba litén le ba noode bañ lela minwaa inyu nun Yéhôva; ibale ba mboñ hala, ngandak ikété yap i ga wo. 22 Yak biprisi bi bi mbéna tiige bebee ni Yéhôva bi ba bipubhaga, le ndi Yéhôva a bép* bañ gwo.”+ 23 Ndi Môsi a kal Yéhôva le: “Litén li nla bé bet i hikôa Sinai inyule u mal béhe bés, u kal le: ‘Téé minwaa mu mapañ ma hikôa, u yilha ki hio hipubhaga.’”+ 24 To hala, Yéhôva a kal nye le: “Kenek, sôs, ndi tiimba ki lo, we ni Arôn; ndi u nwas bañ le biprisi ni litén ba lela minwaa inyu bet yak Yéhôva, tiga le a bép bo.”+ 25 Ha nyen Môsi a bi sôs i tehe bôt ba litén, a kal ki bo i mam ma.

20 I mbus, Nyambe a pot i bibañga+ bini gwobisôna:

2 “Men me yé Yéhôva Nyambe woñ, nu a bi nyodna we i loñ Égiptô, i het u bé nkol.*+ 3 U nlama bé bana banyambe bape, ndik metama.*+

4 “U nlama bé boñ sat inyu yoñ, to ôñgba i yom yo ki yo i i yé nyoo ngii, to i i yé hana ’isi, to i i yé ikété malép ma ma yé hana ’isi.+ 5 U nlama bé ôôp i bisu gwap, to nwas le ba tinde we i gwélél gwo,+ inyule me Yéhôva Nyambe woñ, me yé Nyambe nu a mbat le ba bégés ndik nyetama,+ nu a nlona kogse inyu hihôha hi basañ i ngii bon ni balal ikepam ndandi i bôt ba ñoo me, 6 ndi nu a ntéñbe i gwés dikôô di tjai di bôt ba ngwés me, ba nôglak ki mambén+ mem.

7 “U nlama bé bep gwélél jôl* li Yéhôva Nyambe woñ,+ inyule Yéhôva a ga nwas bé i mut a mbep gwélél jôl jé ngi kogse.+

8 “Bigda kel sabat le u tééda yo pubhaga.+ 9 U nlama sal dilo disamal,+ u boñ ki bibôlô gwoñ gwobisôna, 10 ndi hilo hi nyônôs isaambok hi yé sabat inyu Yéhôva Nyambe woñ. U nlama bé sal bôlô yo ki yo, to we, to man woñ nu munlôm, to man woñ nu muda, to ngwélél woñ nu munlôm, to ngwélél woñ nu muda, to lém yoñ, to nkén mut nu a nyééne mu nkoñ woñ.*+ 11 Inyule Yéhôva a bi gwélél dilo disamal inyu hek ngii, ni ’isi, ni tuye, ni gwom gwobisôna bi yé mu; ndi a noi i hilo hi nyônôs isaambok.+ Inyu hala nyen Yéhôva a bi sayap kel sabat, a yilha ki yo pubhaga.

12 “Ti isoñ bo nyuñ lipém,+ inyu boñ le u niñ ntandaa ngéda mu loñ Yéhôva Nyambe woñ a nti we.+

13 “U nlama bé nol+ mut.

14 “U nlama bé ke i ndéñg.+

15 “U nlama bé nip.+

16 “U nlama bé telbene mut woñ libôk+ mbôgi bitembee.

17 “U nlama bé tam ndap i mut woñ libôk. U nlama bé bana ngôñ i yoñ nwaa mut woñ libôk,+ to ngwélél wé nu munlôm, to ngwélél wé nu muda, to nlôm nyaga nu a yé wé, to jagas jé, to yom yo ki yo mut woñ libôk+ a gwé.”

18 Bôt bobasôna ba litén ba bé nok mbambat i mbam, ba tehge nwegnwek a nwek, ba nogok ki kiñ hioñ i nlond, ba tehge yak hikôa hi ntu hiida. Kiki ba bi tehe hala, ba kahal sehla, ba telep haa.+ 19 Jon ba bi kal Môsi le: “Wen pôdôs bés, di ga emble we, ndi u nwas bañ le Nyambe nyen a pôdôs bés, tiga le di wo.”+ 20 Ndi Môsi a kal litén le: “Ni kon bañ woñi, inyule bañga Nyambe a mal lo inyu noode+ bé, le ndi ni kee ni bisu i kon nye woñi kayéle ni boñ bañ béba.”+ 21 Litén li telep haa, ndi Môsi a tiige bebee ni soso ond i het bañga Nyambe a bé.+

22 Yéhôva a kal ni Môsi le: “Lana nyen u nlama kal bon ba Israel: ‘Bébomede ni ntehe lelaa me pôdhak bé, kiñ i lôlak i ngii.+ 23 Ni nlama bé bañ banyambe ba silba inyu pôdna bibégés ni nti bo ni bibégés ni nti me, ni nlama bé ki to bañ banyambe ba gôl inyu bébomede.+ 24 U ga bôñôl me juu li bisesema li biték, mu ngii juu nyen w’a ti bisesema bi bi ntul i hié, ni bisesema inyu kôp nsañ, ni mintômba nwoñ, ni nyaga yoñ. Hiki homa nu m’a boñ le ba bigda jôl jem,*+ nyoo nyen m’a lo i weeni, me sayap ki we. 25 Ibale u mbôñôl me juu li bisesema li ngok, u nlama bé gwélél ngok ba nkôñg.+ Inyule ibale u ngwélél sélél inyu nkôñg ngok, wee u nhindis juu. 26 U nlama bé boñ juu jem li bisesema ni likala, tiga le ba tehe gwom gwoñ bi mbôô* i ngéda u mbédél mu.’

21 “I matéak mana mon u ga kal bo:+

2 “Ibale u nsomb nkol u u yé man Lôk Héber,+ a ga ba nkol nwii minsamal, ndi i nwii mi nyônôs minsaambok, a ga ba kunde ibabé le a saa yom yo ki yo.+ 3 Ibale a bi lo nyetama, a ga ke nyetama. Ibale a bi lo ni nwaa, nwaa a nlama ke ni nye. 4 Ibale nwet wé a bi ti nye muda, yak muda a gwélél nye bon bôlôm tole bon bôda, wee muda ni bon bé ba ga ba ba nwet wé, ndi nkol u ga ke wotama.+ 5 Ndi ibale nkol u nai, u kal le: ‘Me ngwés nwet wem, nwaa wem, ni bon bem; me gwé bé ngôñ i ba kunde,’+ 6 nwet wé a nlama kena nye i bisu bi bañga Nyambe. I mbus, nwet wé a ga kena nye i nwemel tole i tembee nwemel, a ga tôp nye ôô ni tubul ôô, a ga ba nkol u nwet wé niñ yé yosôna.

7 “Ibale mut a nuñul ngond yé le i ba nkol, i ga ba bé kunde kiki nkol munlôm u nyila kunde. 8 Ibale hingonda hi, hi nlémél bé nwet wé, a yoñ bé to nye kiki linyaa jé, ndi a gwés le mut numpe nyen a somb nye,* a gwé bé kunde i nuñul nye yak bakén ba bôt, wee a nliibana nye. 9 Ibale a nyoñ nye inyu man wé nu munlôm, a nlama tééda nye kiki ba ntééda ngond muda. 10 Ibale a mbii muda numpe, a nlama bé suhus ngaba bijek i muda nu bisu, to i mambot mé, to i yom nlôm a kôli ti nwaa.*+ 11 Ibale a mbôñôl bé i muda nu mam mana mo maa, ha nyen muda a mba kunde i ke ibabé le a saa to yom.

12 “Nu ni nu a mbép mut ndi a wo, yak nye a nlama nôla.+ 13 Ibale a mboñ bé hala ni ntjeñ, yak bañga Nyambe a nwas i jam li, me ga unda we i homa a nla ke ngwéé.+ 14 Ibale mut a ñunbene mut wé libôk ngandak, ndi a nol nye ni ntjeñ,+ i mut nu a nlama nôla to ibale a nke i solop i juu jem li bisesema.+ 15 I mut a mbép isañ to nyañ, a nlama nôla.+

16 “I mut a nip mut+ numpe, ndi a nuñul nye, tole ba léba i mut ba bi nip i moo mé,+ a nlama nôla.+

17 “I mut a ntiihe* isañ to nyañ a nlama nôla.+

18 “Ibale bôt ba nomol, wada a ôm nuu numpe ngok tole kut,* ndi i mut nu a wo bé, a nañal i nañi le to telep a la bé telep, lana nyen mam ma nlama bôña: 19 Ibale i mut nu a nla telep, a kahal hiôm i mbégdé ni ntoñgo, i mut a mbép nye a ga kôhna bé kogse. A ga saa* ndigi ngéda yosôna a nlébha i mut a mbabaa inyule a nsal bé, letee a mbôôp loñge.

20 “Ibale mut a mbép nkol wé munlôm tole nkol wé muda, ndi u wél nye i moo, ba nlama pun+ nkol u. 21 Ndi ibale nkol u nkônde niñ hilo hiada tole dilo diba, ba nlama bé pun wo, inyule nwet wé a bi somb wo ni moni nwé.

22 “Ibale bôlôm ba njo sañ, ndi ba kumul muda jém, a gwal ngéda ngi kola,*+ ndi muda to man ba wo bé,* i mut a gwé njom a nlama saa i yom nlôm muda a ga tamb nye; a ga saa yo ni njel bakéés.+ 23 Ndi ibale wada wap a nwo, u nlama saa niñ inyu niñ,+ 24 jis inyu jis, lisoñ inyu lisoñ, woo inyu woo, kôô inyu kôô,+ 25 mbabaa hié inyu mbabaa hié, mbabaa inyu mbabaa, kut inyu kut.

26 “Ibale mut a mbép jis li nkol wé munlôm tole jis li nkol wé muda, ndi a ôbôs jo, a nlama nwas le nkol wé u kee; nkol u ga ba kunde inyu saa* jis+ jé. 27 Ibale a mbôk lisoñ li nkol wé munlôm tole li nkol wé muda, a nlama nwas nkol wé le u kee, nkol u ga ba kunde inyu saa* lisoñ jé.

28 “Ibale nlôm nyaga a ñôm munlôm tole muda bitoñ ndi i mut nu a wo, ba nlama ôm nlôm nyaga ngok letee a wo,+ ba ga je bé minsôn nwé; ndi nwet nlôm nyaga a ga kôhna bé kogse. 29 Ndi ibale nlôm nyaga a bééna lem i ôma bitoñ, ba kal ki nwet wé hala, ndi nwet wé a tééda bé nye, i pam le nlôm nyaga a nol munlôm tole muda, ba nlama ôm i nlôm nyaga nu ngok, yak nwet wé a nlama nôla. 30 Ibale ba mbat nye binoñ,* a nlama ti hiki jam ba ga bat nye inyu kobol niñ* yé. 31 To ibale man munlôm tole man muda nyen nlôm nyaga a ñôm bitoñ, hala nyen litéak lini li nkal le ba nlama boñ nwet nlôm nyaga. 32 Ibale nkol munlôm tole nkol muda won nlôm nyaga a ñôm bitoñ, nwet wé a ga saa 30 ma sékel* yak nwet nkol, ba ga ôm ki nlôm nyaga ngok letee a wo.

33 “Ibale mut a nyék bee i néhi, tole a tém bee, a hô bé yo, ndi nlôm nyaga a kwo mukété tole jagas, 34 nwet bee a nlama saa* i lém i.+ A nlama saa ndamba nwet lém a ga tamb nye, i nuga i nwo i ga ba nuga yé. 35 Ibale nlôm nyaga nu ngim mut a nkumul nlôm nyaga nu mut numpe, ndi i nlôm nyaga nu a wo, ba nlama nuñul nyaga i i yé yômi; ba kabna moni nwé, ba kabna ki nuga i i nwo. 36 Tole ibale i bé yiba le nlôm nyaga a bééna lem i ôma bitoñ, ndi nwet wé a tééda bé nye, a nlama saa* nlôm nyaga ni nlôm nyaga, i nuga i nwo i ga ba nuga yé.

22 “Ibale mut a nip nlôm nyaga tole ntômba, a nol nye tole a nuñul nye, a gwé le a saa balôm ba nyaga batan inyu nlôm nyaga wada, mintômba mina inyu ntômba+ wada.

2 (“Ibale ba ngwel mut wip+ a yé i bôk ndap, ndi ba bép nye, a wo; wee ba gwé bé pil matjél inyu nyemb yé. 3 Ndi ibale i jam lini li mbôña kel i ma ye, wee ba gwé pil matjél inyu nyemb yé.)

“A nlama saa.* Ndi ibale a gwé bé to yom, ba nlama nuñul nye inyu gwom a nip. 4 Ibale yom a bi nip i ngi yii yômi, to nlôm nyaga, to jagas, to man ntômba, a nlama saa* yo ngélé iba.

5 “Ibale mut a mpémés bilém gwé le bi kee i je i wom tole i wom u minkôô mi wai, ndi a nwas gwo le bi kee i je i wom u mut numpe, a nlama saa,* a ga ti gwom bi nlôôha bilam bi wom wé, tole gwom bi nlôôha bilam bi wom wé u minkôô mi wai.

6 “Ibale mut a nkuye hié, ndi hié hi kap biloo; i mbus, hi ke i wom u mut numpe, hi ligis mimbom nwé mi kôn tole hi ligis kôn a yé ngi bumbul, tole hi ligis wom wonsôna, i mut a nkoda hié a nlama saa* i gwom bi nlék.

7 “Ibale mut a nti mut wé libôk moni tole gwom le a tééda, ndi ba nip gwo i ndap mut wé libôk, ibale ba ngwel mut wip, mut wip a ga saa* gwo ngélé iba.+ 8 Ndi ibale ba ngwel bé mut wip, ba nlama kena nwet ndap i bisu bi bañga Nyambe+ inyu yi too nyen a bi yoñ* gwom bi mut wé libôk. 9 Hiki ngéda ba nsoman mut le a gwé yom i ta bé yé, to nlôm nyaga, to jagas, to ntômba, to mbot, to imbe yom i nimil, i a nla kal le: ‘Yom yem ini!’ Bipes gwo biba bi nlama kena hop wap i bisu bi bañga Nyambe.+ I mut Nyambe a ga bagal le a nkwo nkaa nyen a ga saa* mut wé libôk ngélé iba.+

10 “Ibale mut a nti mut wé libôk jagas, to nlôm nyaga, to ntômba, to imbe lém ipe le a tééda, ndi lém i wo, tole i kwo bôk, tole mut a kena yo ibabé le mut nye ki nye a tehe, 11 i mut ba bi ti lém le a tééda a nlama kum soñ i bisu bi Yéhôva, le a bi tihba bé gwom bi mut wé libôk; yak nwet lém a nlama neebe hala. Nuu mut numpe a ga saa* bé to yom.+ 12 Ndi ibale ba nip lém i moo mé, a gwé le a saa* nwet lém. 13 Ibale nuga bikai i mpat lém, a ga unda yo.* A gwé bé le a saa* lém i nuga bikai i mpat.

14 “Ibale mut a mpoo lém yak mut wé libôk, ndi lém i kwo bôk tole i wo i ngéda nwet wé a ta bé ha, i mut a mpoo lém a nlama saa* yo. 15 Ibale nwet lém a yé ha, i mut a mpoo lém a gwé bé le a saa* yo. Ibale ba bi lend lém, i moni ba bi ti inyu lend lém nwon mi yé nsaa.*

16 “Ibale munlôm a nlop hingonda hi hi yé konji, hi ban-ga bé yega libii, ndi a lalna hio, a nlama saa likil inyu boñ le hi yila nwaa+ wé. 17 Ibale isañ a nai le a nti bé nye ngond yé, to hala, i mut nu a nlama saa ndamba likil.

18 “U nwahak bañ le muda makañ a niñ.+

19 “Tonjee mut a nlalna lém a nlama ndigi nôla.+

20 “I mut a nti banyambe bape bisesema handugi Yéhôva nyetama, a nlama tjiba.+

21 “U nlama bé tééñga nkén mut, to tét nye,+ inyule bébomede ni bé bakén i loñ Égiptô.+

22 “Ni nlama bé boñ yik muda yo ki yo béba, to man nyuu*+ nye ki nye. 23 Ibale u mboñ bo béba to ndék, ndi ba lôndôl me, ibabé pééna m’a nok nlondok+ wap; 24 ha nyen hiun hiem hi ga kala, me ga nol bé ni pansoñ, baa banan ba ga yila biyik, yak bon banan ba yila bon ba nyuu.

25 “Ibale u mpôôs mut moni, to numbe mut ikété litén jem nu a yé liyep,* mut woñ libôk, u nlama bé yilna nye mut a mpôôs moni ni yéñe. U nlama bé bat nye nseñ.+

26 “Ibale u mbat mut pil, ndi u yoñ mbot yé kiki bibep,+ u nlama timbhe nye yo ilole hiañgaa hi nañal. 27 Inyule yotama yon a gwé inyu hôba, i mbot i yon a ngwélél inyu hô nyuu* yé. Kii a ga hôba i ngéda a nañal?+ I ngéda a’ lôndôl me, ibabé nkaa, m’a nok inyule me nkona ngoo.*+

28 “U nlama bé tiihe* Nyambe,+ to ñane* nye ki nye nu litén+ joñ.

29 “U nlama bé tiñha i yôñôl makébla mu ngandak yoñ libumbul, ni mu yom i nsôbi mu homa u ntjôl môô ni i waa woñ wai+ inyu ti me. U gwé le u ti me babôkgwéé ba bon boñ bôlôm.+ 30 Lana nyen u nlama boñ ni nlôm woñ nyaga, yak ni ntômba+ woñ: a ga yén ni nyañ dilo disaambok. I hilo hi nyônôs juem, u ga ti me nye.+

31 “Ni nlama ba bapubhaga inyu yem:+ ni ga je bé minsôn mi lém le nuga bikai i mpat.+ Ni ga leñ nwo ngwo.

23 “U nlama bé tjam ñañ u bitembee.+ U yila bañ mbôgi bitembee inyu nit béba mut.+ 2 U nlama bé noñ limut li bôt inyu boñ béba, u nlama bé to ti mbôgi i i lémél limut li bôt inyu kôde mbagi i téé. 3 U nlama bé lona mbagla ikété nkaa u hiyeyeba.+

4 “Ibale u nkoba nlôm nyaga, tole jagas li ñoo woñ li nimil, ndi u léba lém yé, u nlama témbna nye yo.+ 5 Ibale u ntehe jagas li ñoo woñ li nkwo inyule mbegee i nyuu jo, u nlama bé boñ wengoñle yom i ta bé, u kahal ke. U nlama hôla nye i téé lém+ yé.

6 “U nlama bé kôde mbagi+ ikété nkaa u hiyeyeba.

7 “Tjél mbôgi* bitembee, u nol bañ mut nu a gwé bé nsohi lôñni mut nu a téé sép, inyule m’a kal bé me le béba mut i téé sép.*+

8 “U nlama bé neebe bitek, inyule bitek bi nkwés bôt ba pék ndim, bi nla yak boñ le bôt ba téé sép+ ba kôde bipôdôl gwap.

9 “U nlama bé tét nkén mut. Bébomede ni nyi i yom nkén mut a nôgda,* inyule ni bé bakén ba bôt i loñ Égiptô.+

10 “U ga nwes mbôô mu hisi hioñ nwii minsamal,+ u bumbul ki matam mé. 11 Ndi i nwii mi nyônôs minsaambok, u nlama bé sal wom woñ, ndi nwas wo hala. Diyeyeba di loñ yoñ di ga je i gwom bi ño mu; i gwom diyeyeba di ga yék, binuga bi bikai bi ga je gwo. U ga boñ nlélém jam ni wom woñ u minkôô mi wai lôñni wom woñ u ôlivé.

12 “U ga sal dilo disamal; ndi i hilo hi nyônôs isaambok, u ga sal bé, inyu boñ le nlôm woñ nyaga ni jagas joñ bi noi, ni le man munlôm nu nkol woñ muda lôñni nkén mut ba témb ba kôhna ngui.+

13 “Yoña yihe le ni boñ mam momasôna me bi nkal bé,+ ni nlama bé to sima môl ma banyambe bape; ba nlama bé nok we u nsima mo i nyo+ woñ.

14 “Ngélé aa hiki nwii, u nlama tégbaha ngand inyu yem.+ 15 U ga tégbaha ngand Bret bi ngi-séñha.+ U ga je bret bi ngi-séñha dilo disaambok, kiki me bi kal we, i ntéak ngéda mu sôñ Abib,*+ inyule ha ngéda i nyen u bi nyodi i Égiptô. Mut nye ki nye a nlama bé lo i bisu gwem moo nso.+ 16 U ga tégbaha ki ngand Libumbul* li matam ma bisu ma bôlô yoñ, matam ma gwom u bi nwes mu wom+ woñ. U ga tégbaha yak ngand Likôhle* li bijek i lisuk li nwii, i ngéda u ga kot matam ma bôlô+ yoñ mu wom woñ. 17 Ngélé aa hiki nwii, bôlôm boñ bobasôna ba ga lo i bisu bi bañga Nwet le Yéhôva.+

18 “U nlama bé sem matjél ma sesema yem ni yom yo ki yo i i gwé séñha. Yak mahoñ ba nti kiki sesema i mangand mem ma nlama bé lal letee ni kegla.

19 “U ga lona matam ma bisu ma ma nlôôha malam ma hisi hioñ i ndap Yéhôva Nyambe+ woñ.

“U nlama bé lamb man kembee ikété milik mi nyañ.+

20 “Me yé i ep añgel i bisu gwoñ+ inyu sôñ we i njel, ni inyu jôbna we i homa me mal kôôba.+ 21 Emble nye, nôgôl ki nye. U ndogbene bañ nye, inyule a ga nwéhél bé bibéba+ binan, inyule a bééga jôl jem.* 22 Ndi ibale u ntibil nôgôl nye, u boñ ki mam momasôna me nkal, me ga ba ñoo baoo boñ, me kolba ki bakolba boñ. 23 Inyule añgel yem i ga bôk we i bisu, i jôbna we yak Lôk Amôr, Lôk Hét, Lôk Péris, Lôk Kanaan, Lôk Hivi ni Lôk Yébus; me ga tjé ki bo.+ 24 U nlama bé ôôp i bisu bi banyambe bap, to nwas le ba tinde we i gwélél bo, u nlama bé nigle maboñok+ map. Ndi u ga tjé banyambe bap, u nyugut ki mél map mapubhaga.+ 25 Ni nlama gwélél Yéhôva Nyambe+ nan, yak nye a ga sayap bijek* gwoñ ni malép+ moñ. Me ga héya makon nyoo i weeni.+ 26 Mém ma ga so bé bôda ba loñ yoñ, ba ga ba bé to kom,+ me ga boñ ki le u niñ ntandaa ngéda.*

27 “We ngi pam nyoo, m’a boñ le ba kon me woñi,+ m’a lona yubda ikété biloñ gwobisôna u ga boma, me boñ ki le baoo boñ bobasôna ba kee we ngwéé.*+ 28 We ngi pam nyoo, m’a boñ le ba tomb,*+ hala a ga luhul Lôk Hivi, Lôk Kanaan ni Lôk Hét i bisu gwoñ.+ 29 M’a luhul bé bo i bisu gwoñ nwii wada, tiga le loñ i yégle hôlô, ni le binuga bi bikai bi bôl, bi kolba ki we.+ 30 Ndék ni ndék nyen m’a luhul bo i bisu gwoñ, letee u bôl, u yoñ ki loñ.+

31 “M’a téé minwaa nwoñ ibôdôl i tuye Nkôibaga letee ni tuye nu loñ Filistia, ibôdôl i ñoñ letee ni i Lom,*+ inyule m’a ti bôt ba loñ i moo moñ; u ga luhul ki bo i bisu gwoñ.+ 32 U nlama bé boñ malômbla ni bo, to ni banyambe+ bap. 33 Ba nlama bé yééne mu loñ yoñ, tiga le ba tinde we i boñ béba ikolba me. Ibale u ngwélél banyambe bap, hala a ga yilna toi we hiandi.”+

24 I mbus, Yéhôva a kal Môsi le: “Bet hikôa, we ni Arôn, ni Nadab, ni Abihu,+ yak ni 70 ma mimañ mi Israel, ni ôôp nyoo haa. 2 Môsi nyetama nyen a nlama tiige bebee ni Yéhôva; ndi bana bôt bape ba nlama bé tiige bebee, to litén li nlama bé bet hikôa ni nye.”+

3 Môsi a lo, a kal litén bibañga gwobisôna Yéhôva a mpot ni matéak momasôna,+ ha nyen litén li timbhe ni kiñ yada le: “Di yé bebee i boñ mam momasôna Yéhôva a nkal.”+ 4 Jon Môsi a bi tila bibañga bi Yéhôva+ gwobisôna. I mbus, a pule telep kegla, a oñ juu li bisesema isi hikôa, a tek ki 12 ngok inyu 12 matén ma Israel. 5 I mbus ha, a ep boñge bôlôm ba Lôk Israel le ba ti bisesema bi ntul i hié, ba sémél ki Yéhôva balôm ba nyaga kiki sesema inyu kôp nsañ.+ 6 Môsi a yoñ ki pes yada i matjél, a ha yo ikété biséya, ndi a nwes ii pes ipe i matjél i ngii juu li bisesema. 7 I mbus, a yoñ kaat malômbla, a éñél yo litén.+ Ha nyen bôt ba litén ba bi kal le: “Di yé bebee i boñ mam momasôna Yéhôva a nkal, di ga ba ki manôgla.”+ 8 Jon Môsi a bi yoñ matjél, a nwes mo i ngii litén,+ a kal le: “Mana mon ma yé matjél ma malômbla Yéhôva a bi boñ ni bé kingéda bipôdôl+ bini gwobisôna.”

9 Môsi ni Arôn, Nadab ni Abihu lôñni 70 ma mimañ mi Israel ba bet hikôa, 10 ba tehe Nyambe nu Israel.+ Yom i bé isi makôô mé wengoñle ngok i safirô le ba nai ’isi, i bayak kiki ngii yomede.+ 11 Nyambe a bi boñ bé mintôô mi bôt ba Israel+ béba; ba bi tehe yiinda i bañga Nyambe, ba je, ba nyo.

12 Yéhôva a kal ni Môsi le: “Bet nyono meeni i ngii hikôa, u yén ha. M’a ti we dibambha di ngok, mu nyen m’a tila mambén ni matiñ inyu niiga+ litén.” 13 Ha nyen Môsi ni nhôla wé Yôsua+ ba bi ke; Môsi a bet hikôa hi bañga Nyambe.+ 14 Ndi a bi kal mimañ mi litén le: “Ni bem bés hana letee di témb i bééni.+ Arôn ni Hur+ ba yé ha. Ibale mut a gwé nkaa, a nla ke i tehe bo.”+ 15 Môsi a bet hikôa, ond i ma hô+ hikôa.

16 Lipém li Yéhôva+ li yén i ngii hikôa Sinai,+ yak ond i hô hio dilo disamal. I hilo hi nyônôs isaambok, Nyambe a sébél Môsi i ñemkété ond. 17 Inyu bon ba Israel ba ba bé béñge, lipém li Yéhôva li bé nene wengoñle soso hié i ngii hikôa. 18 Môsi a jôp ikété ond, a bet hikôa.+ A yén nyoo i hikôa 40 ma dilo.*+

25 Yéhôva a kal ni Môsi le: 2 “Kal bon ba Israel le ba yôñôl me likébla mu gwom gwap; ni ga yôñôl me likébla yak hiki mut nu ñem u ntinde nye i ti yom.+ 3 I likébla lini jon ni ga yoñ i boni: gôl,+ silba,+ mamuna,+ 4 bôñgô i i yé mangoñ,* mahuu ma ntômba ma ma yé wedewede,* bôñgô i i nkôyôp tjôôm, loñge bôñgô,* mahuu ma kembee, 5 bikôp bi balôm ba mintômba bi ba nkuibaha, bikôp bi hiel hiobi, bikék bi akasia,+ 6 môô inyu bilambe,+ labinda inyu môô mapubhaga+ ni inyu biloñge bi binjinjiñ,+ 7 ngok ônix, ni ini ngok ipe ba nlama éde mu éfôd*+ ni mu hultôl*+ i prisi keñi. 8 Ba ga ôñôl me homa mpubhaga, m’a yén* ki ipôla yap.+ 9 Ni ga boñ lap ni gwom gwé gwobisôna inoñnaga ni ndémbél* me yé i unda we.+

10 “Ba ga boñ nkuu ni kék akasia, nkuu u nlama ap dikéñéé di moo* diba ni pes, pôk yé i bak hikéñéé hi woo hiada ni pes, ntel wé u bak hikéñéé hi woo hiada ni pes.+ 11 I mbus, hoo wo bañga gôl.+ U ga hoo wo mukété ni i mbégdé, u boñ ki ñôndi gôl mu mapañ mé momasôna.+ 12 U ga ôô ki bisômôl bi gôl bina inyu nkuu, u éde gwo i ngii makôô mé mo ma-na; bisômôl biba inyu pes yada, bisômôl biba ki inyu ii pes ipe. 13 U ga boñ mimbôñgô mi bikék ni kék akasia, u hoo ki nwo gôl.+ 14 U ga som mimbôñgô mi bikék mu bisômôl bi yé i mapañ ma Nkuu inyu begee Nkuu. 15 Mimbôñgô mi bikék mi ga yégle ndik mu bisômôl bi Nkuu; ba ga sodol bé mwo mu.+ 16 U ga ha Mbôgi* me ga ti+ we mukété Nkuu.

17 “U ga boñ ngudul ni bañga gôl, i nlama ap dikéñéé di moo diba ni pes, pôk yé i bak hikéñéé hi woo hiada ni pes.+ 18 U ga boñ bikérubim bi gôl biba; u ga gwélél hama inyu boñ gwo, u téé ki gwo i masuk mo ima ma ngudul.+ 19 Boñ bikérubim i masuk mo ima, hiki kérubim i lisuk jada li ngudul. 20 Bikérubim bi ga sambal bipapai gwap gwo biba i ngii, bipapai gwap bi hôk ngudul,+ kérubim yada i bak i mbombom i ini ipe. Masu ma bikérubim ma nunuk ngudul. 21 U ga bii ngudul+ i ngii nkuu, u ga ha Mbôgi* me ga ti we mukété Nkuu. 22 Ha homa nu nyen me ga pémél we, me pôdôs ki we i ngii Nkuu.+ Ipôla bikérubim gwo biba bi bi yé i ngii nkuu Mbôgi, me ga kal we mambén momasôna u nlama añle bon ba Israel.

23 “U ga boñ ki téblé+ ni kék akasia, i ga ap dikéñéé di moo diba, pôk yé i bak hikéñéé hi woo hiada, ntel wé u bak hikéñéé hi woo hiada ni pes.+ 24 U ga hoo yo bañga gôl, u éde ki ñôndi gôl mu mapañ mé momasôna. 25 U ga kéñ mapañ mé ni minten, mi ban-ga pôk i libai li woo jada,* u boñ ki ñôndi gôl mu mapañ ma minten momasôna. 26 U ga boñ bisômôl bi gôl bina, u éde gwo i makas mé ma-na i het makôô mé mo ma-na ma yé. 27 Bisômôl bi ga ba bebee ni minten, bi mba bi ngwel mimbôñgô mi bikék mi mi nhôla i begee téblé. 28 U ga boñ mimbôñgô mi bikék ni kék akasia, u hoo ki nwo gôl, ba ga beegene nwo téblé.

29 “U ga boñ ki minleha nwé, mabôndô mé, ni dibôi tjé lôñni biséya bi ba ga gwélél inyu suglene makébla ma wai. U ga boñ gwo ni bañga gôl.+ 30 I bret ba mbii i bisu bi Nyambe, u ga tek gwo i téblé ngéda yosôna.+

31 “U ga boñ tééne bilambe+ ni bañga gôl. Ba ga gwélél hama inyu boñ tééne bilambe. Tééne yé, tén yé, mintjep nwé, mabôndô mé, matole mé ni bisem gwé bi ga ba ndik yom yada.+ 32 Tééne bilambe i ga bana mintjep minsamal mu bipes gwé gwo biba, mintjep maa i pes yada, mintjep maa ki ii pes ipe. 33 I pes yada i tén, hiki ntjep u ga bana mabôndô maa ma ma mpôna mbônji bikai, hiki ntjep u ban-ga matole ni bisem bi bi noñna; yak ii pes ipe i tén, hiki ntjep u ga bana mabôndô maa ma ma mpôna mbônji bikai, hiki ntjep u ban-ga matole ni bisem bi bi noñna. Hala nyen ba ga boñ inyu mintjep minsamal mi tén i tééne bilambe. 34 Tén i tééne bilambe i ga bana mabôndô ma-na ma ma mpôna mbônji bikai, matole mé ni bisem gwé bi noñnaga. 35 Litole jada li ga ba isi mintjep ima mi bisu mi tén, litole jada li bak ki isi mintjep ima mi mi noñ, yak litole jada li bak isi mintjep ima mi mi nsôk. Hala nyen ba ga boñ inyu mintjep minsamal mi mi mpémél i tén. 36 Matole, mintjep, ni tééne bilambe yosôna bi ga ba ndik yom yada, ba ga gwélél hama inyu boñ yo ni bañga gôl.+ 37 U ga bôñôl yo bilambe bisaambok; i ngéda ba ga kuye gwo, bi ga béyés bisu gwap.+ 38 Biyôñôl* gwé bi nsiñga ni bibeglene gwé bi hié bi ga ba ni bañga gôl.+ 39 Ba nlama gwélél talént* yada i bañga gôl inyu boñ tééne bilambe ni bisélél gwé. 40 Yoñ yihe le u boñ gwo inoñnaga ni ndémbél* u bi tehe i hikôa.+

26 “U nlama oñ lap+ ni jôm li mabadô, mbañak ni nkébék loñge bôñgô,* bôñgô i i yé mangoñ,* bôñgô i mahuu ma ntômba i i yé wedewede ni bôñgô i i nkôyôp tjôôm. U ga mage bititii bi bikérubim+ mu mabadô+ ma. 2 Hiki libadô li nlama ap môm ima ma dikéñéé di moo* ni juem, pôk yé i bak dikéñéé di moo dina. Mabadô momasôna ma nlama ap nlélém.+ 3 U ga at mabadô matan le ma yila libadô likeñi jada; u at yak mana mabadô matan mape, le ma yila libadô likeñi lipe. 4 U ga kôñôl dilonde i lisuk li libadô likeñi jada, di bak ni bôñgô i i yé mangoñ;* u boñ nlélém jam i lisuk li lini libadô likeñi lipe i het ba nla at mo ima. 5 U ga kôñôl 50 ma dilonde i lisuk li libadô likeñi jada, u kôñôl ki 50 ma dilonde i lisuk li lini libadô likeñi lipe, le ndi dilonde di nun-naga i het mabadô ma ñadba. 6 U ga boñ 50 ma bibéndél bi gôl, u gwélél gwo inyu at mabadô makeñi, le ndi lap i ba ndik yom yada.+

7 “U ga boñ ki mabadô ni mahuu ma kembee+ inyu hô lap. U ga boñ jôm li mabadô+ ni jada. 8 Hiki libadô li nlama ap môm maa ma dikéñéé di moo, pôk yé i bak dikéñéé di moo dina. I jôm li mabadô ni jada li, li nlama ap nlélém. 9 U ga at mabadô matan, u at ki mana mabadô masamal mape yap pes, u hôt ki libadô li nyônôs isamal li li yé i bisu bi lap. 10 U ga kôñôl 50 ma dilonde i lisuk li libadô likeñi jada, u kôñôl ki 50 ma dilonde i lisuk li lini libadô likeñi lipe, i het ma ñadba. 11 U ga boñ 50 ma bibéndél bi mamuna, u band dilonde lôñni bibéndél inyu at mabadô, kayéle lap i ba ndik yom yada. 12 I ndék libadô i nyégle i ga yômbôp. Pes libadô, hala wee i libadô li nyégle, li ga yômbôp i mbus lap. 13 I bipes gwo biba bi lap, libadô li li nyégle li ga lela libadô li bisu ni hikéñéé hi woo hiada kayéle li hô lap.

14 “Inyu hô ki lap, u ga bôñôl bikôp bi balôm ba mintômba bi ba nkuibaha, u témb u kéhi bikôp bi hiel hiobi+ i ngii yé.

15 “U ga boñ mabam+ inyu lap ni bikék bi akasia; i mbus, u téé+ mo. 16 Hiki libam l’a bana ntel u jôm li dikéñéé di moo, pôk yé i bak hikéñéé hi woo hiada ni pes. 17 Hiki libam l’a bana mapanda ima.* Hala nyen u nlama boñ inyu mabam momasôna ma lap. 18 U ga boñ 20 ma mabam inyu pes lap i i mbéñge nwelmbok.

19 “U ga boñ 40 ma bitééne bi silba,+ u ha gwo isi 20 ma mabam: bitééne biba inyu mapanda ima ba libam jada; bitééne biba ki bi yé inyu mapanda ima+ ma lii libam lipe. 20 Inyu ini pes ipe i lap, hala wee i pes ñombok, u ga boñ 20 ma mabam 21 ni 40 ma bitééne bi silba inyu mabam ma, bitééne biba isi libam jada, bitééne biba ki isi lii libam lipe. 22 Inyu pes i mbus mbééga i lap, hala wee i pes hiôñg, u ga boñ mabam masamal.+ 23 U ga boñ mabam ima, ma ma ga ba kiki mbiñ makas i mbus mbééga i lap. 24 Mbiñ i ga ba iba iba ibôdôl ’isi ipam i ngii, letee ni i sômôl bisu. U ga boñ hala inyu mabam mo ima, mon ma ga ba kiki mbiñ inyu makas mana mo ima. 25 Mabam m’a ba juem, bitééne gwap bi silba bi bak 16, bitééne biba isi libam jada, bitééne biba ki isi lii libam lipe.

26 “U ga boñ bihimbil ni bikék bi akasia, bihimbil bitan inyu mabam ma pes lap+ yada, 27 bihimbil bitan inyu mabam ma pes lap ipe, ni bihimbil bitan inyu mabam ma pes lap i i yé i hiôñg, hala wee i mbus mbééga. 28 Himbil i ñemkété i i ntagbe i ñemkété u mabam, i ga ke ibôdôl lini lisuk ipam lii.

29 “U ga hoo mabam gôl,+ u boñ ki bisômôl bi gôl inyu tégbaha bihimbil, u hoo yak bihimbil gôl. 30 U ga téé lap inoñnaga ni titii u bi tehe i hikôa.+

31 “U nlama boñ libadô li li mbagal bituñ,+ mbañak ni bôñgô i i yé mangoñ,* bôñgô i mahuu ma ntômba i i yé wedewede, bôñgô i i nkôyôp tjôôm, ni nkébék loñge bôñgô.* U ga mage bititii bi bikérubim mu libadô li. 32 U ga kéi libadô i ngii mbiñ akasia yo ina nhook ni gôl. Dikoba di mbiñ di nlama ba ni gôl. Mbiñ i mba i téé i ngii bitééne bi silba bina. 33 U ga kéi libadô li li mbagal bituñ isi bibéndél, u jôbna nkuu Mbôgi+ i mbus libadô li. Libadô li ga bagal Homa mpubhaga+ ni Homa a nlôôha mpubhaga.+ 34 U ga bii ngudul i ngii Nkuu Mbôgi, u jôbna ki wo i Homa a nlôôha mpubhaga.

35 “U ga bii téblé i pes ñombok i bisu bi libadô li li mbagal bituñ; u bii tééne bilambe+ i pes nwelmbok i lap, i nunuk téblé. 36 U ga boñ libadô inyu lijubul li lap, mbañak ni bôñgô i i yé mangoñ, bôñgô i mahuu ma ntômba i i yé wedewede, bôñgô i i nkôyôp tjôôm, ni nkébék loñge bôñgô, bôñgô yosôna i bak mbagak.+ 37 Inyu libadô li lijubul, u ga boñ mbiñ itan ni kék akasia, u hoo yo gôl. Dikoba tjap di ga ba ni gôl, u ôô ki bitééne bi mamuna bitan inyu mbiñ i.

27 “U ga boñ juu li bisesema ni kék akasia;+ li ga ap dikéñéé di moo*+ ditan, pôk yé i bak dikéñéé di moo ditan. Bipes gwo bina bi juu li bisesema bi nlama ap nlélém, yak ntel wé u bak dikéñéé di moo daa. 2 U ga boñ bitoñ+ mu makas mé mo ma-na; bitoñ ni juu li bisesema bi ga ba ndik yom yada, u ga hoo juu li bisesema mamuna.+ 3 U ga boñ minlôñga inyu héya libu mu juu,* u boñ ki bisoble, biséya, basoso ba nwas, ni bibeglene bi hié, u ga boñ bisélél gwé gwobisôna ni mamuna.+ 4 U ga boñ bumul inyu juu li bisesema, hala wee ngahi mamuna; u ga boñ ki bisômôl bina bi mamuna mu makas mo ma-na ma ngahi. 5 U ga ha ngahi isi minten mi juu li bisesema, i bak i ñem u ntel u juu li bisesema. 6 U boñ mimbôñgô mi bikék ni kék akasia inyu juu li bisesema, u hoo ki nwo mamuna. 7 Ba ga som mimbôñgô mi bikék ikété bisômôl kayéle mimbôñgô mi bikék mi ba bipes gwo biba bi juu li bisesema i ngéda ba ga begee+ jo. 8 U ga boñ juu li bisesema nlélém kiki nkuu u mabam u u gwé hôk. Juu li bisesema li ga bôña kiki me bi unda we i hikôa.+

9 “U ga boñ kotoo+ inyu lap. I pes nwelmbok, lipénd li kotoo li ga bana mabadô mbañak ni nkébék loñge bôñgô,* ma ga ap 100 dikéñéé di moo inyu pes+ i. 10 Kotoo i ga bana 20 ma mbiñ ni 20 ma bitééne bi mamuna. Dikoba di mbiñ ni minkôô* nwap bi ga ba ni silba. 11 Mabadô ma lipénd li kotoo i pes ñombok yak mo ma ga ap 100 dikéñéé di moo, ma ban-ga 20 ma mbiñ ni 20 ma bitééne bi mamuna, ma ban-ga ki dikoba ni minkôô* inyu mbiñ bi bi ga ba ni silba. 12 I pes hiôñg, pôk i lipénd li kotoo i ga bana mabadô ma 50 ma dikéñéé di moo; lipénd li ban-ga jôm li mbiñ lôñni jôm li bitééne. 13 Pôk kotoo i pes likôl, i het hiañgaa hi mpémél, i ga ba 50 ma dikéñéé di moo. 14 Pes walôm i lipénd li kotoo i ga bana mabadô ma 15 dikéñéé di moo, i ban-ga ki mbiñ aa ni bitééne+ baa. 15 Yak pes waé i lipénd li kotoo i ga bana mabadô ma 15 dikéñéé di moo, i ban-ga ki mbiñ aa ni bitééne baa.

16 “Lijubul li kotoo li nlama bana libadô li li ga ap 20 ma dikéñéé di moo, li bak mbañak ni bôñgô i i yé mangoñ,* ni bôñgô i mahuu ma ntômba i i yé wedewede,* ni bôñgô i i nkôyôp tjôôm, ni nkébék loñge bôñgô,* bôñgô yosôna i bak mbagak;+ yak ni mbiñ ina lôñni bitééne bina.+ 17 Mbiñ yosôna i i yé mu lipénd li mabadô li li nkéña kotoo i ga bana minkôô ni dikoba di silba, ndi bitééne gwap bi ga ba ni mamuna.+ 18 Lipénd li kotoo li ga ap 100 dikéñéé di moo,+ pôk yé i bak 50 ma dikéñéé di moo, ntel wé u bak dikéñéé di moo ditan; mabadô ma lipénd ma ga ba mbañak ni nkébék loñge bôñgô, yak bitééne bi lipénd bi ga ba ni mamuna. 19 Bisélél ni gwom gwobisôna ba ngwélél inyu nson u lap bi ga ba ni mamuna, yak bon ba bikék ba lap ni bon ba bikék ba kotoo bobasôna ba ga ba ni mamuna.+

20 “Inyu bana mapubi, u ga kal bon ba Israel le ba lona môô malam ma ôlivé,* inyu boñ le bilambe bi loñ ngéda yosôna.+ 21 Arôn ni bon bé ba ga yoñ bitelbene le bilambe bi loñ ibôdôl kôkôa ipam kegla, i bisu bi Yéhôva+ ikété ndap libadô i likoda, i bisu bi libadô li li yé bebee ni nkuu Mbôgi.+ I litéak lini li ga nom i boga ni boga; tjai tjodisôna di bon ba Israel+ di nlama noñ jo.

28 “Ikété bon ba Israel, u ga sébél manyuñ Arôn lôñni bon bé bôlôm le ba gwélél me nson u prisi:+ Arôn+ lôñni Nadab bo Abihu,+ Éléazar bo Itamar,+ bon bôlôm ba Arôn.+ 2 U ga boñ mambot mapubhaga inyu manyuñ Arôn, inyu lipém ni inyu bilama.+ 3 U ga pôdôs bôt ba likeñge* bobasôna, ba me mal yônôs ni mbuu u pék,+ ba ga boñ mambot inyu Arôn inyu boñ le a ba mpubhaga, le ndi a gwélél me nson u prisi.

4 “I mambot mana mon ba ga boñ: hultôl,+ éfôd,*+ mbôñgô mbot u u gwé bé binam,+ mbôñgô mbot umpe ntéñék maniga-maniga,*+ yañsi, ni libadô;+ ba ga boñ mana mambot mapubhaga inyu manyuñ Arôn ni bon bé bôlôm, le ndi ba gwélél me nson u prisi. 5 Bôt ba likeñge ba ga gwélél gôl, bôñgô i i yé mangoñ,* bôñgô i mahuu ma ntômba i i yé wedewede,* bôñgô i i nkôyôp tjôôm, ni loñge bôñgô.*

6 “Inyu boñ éfôd,* ba ga gwélél gôl, bôñgô i i yé mangoñ,* bôñgô i mahuu ma ntômba i i yé wedewede,* bôñgô i i nkôyôp tjôôm, ni nkébék loñge bôñgô; ba mage+ yosôna. 7 Éfôd* i ga bana bipisis biba bi mabadô i bituu bi bi yé ñadak mu masuk mé mo ima ma ngii. 8 Mbagak ngôli*+ u u yé ntéñék i éfôd* inyu gwel yo u nlama bôña ni minlélém mi bisélél, hala wee gôl, bôñgô i i yé mangoñ,* bôñgô i mahuu ma ntômba i i yé wedewede,* bôñgô i i nkôyôp tjôôm, ni nkébék loñge bôñgô.

9 “U ga yoñ ngok ônix iba,+ u kédél môl ma bon bôlôm ba Israel+ mu ngii yap, 10 môl masamal mu ngok yada, môl masamal ki mu ngok ipe, inoñnaga ni bimañ gwap. 11 I mut a mbéna kédél ngok a ga kédél môl ma bon bôlôm ba Israel mu ngok i yo iba kiki a nkédél béndél.+ I mbus, u ga som ngok mu bipañgbene bi gôl. 12 U ga bii i ngok i yo iba i ngii bipisis bi mabadô bi bi yé i bituu bi éfôd,* le i ba ngok mbigda inyu bon ba Israel;+ Arôn a ga begee môl ma bon bôlôm ba Israel i bisu bi Yéhôva, mu bipisis bi mabadô bi bi yé nye i bituu le i ba mbigda. 13 U ga boñ bipañgbene bi gôl 14 ni minsañ ima mi bañga gôl nkébék kiki nkôô,+ u téñ minkébék mi minsañ mu bipañgbene.+

15 “U ga kal i mut a mage gwom le a boñ hultôl mbagi.+ I nlama ba kiki éfôd,* hala wee ni gôl, ni bôñgô i i yé mangoñ, ni bôñgô i mahuu ma ntômba i i yé wedewede, ni bôñgô i i nkôyôp tjôôm, ni nkébék loñge bôñgô.+ 16 I ngéda ba mbôk yo, bipes gwé gwo bina bi nlama ap nlélém, i ga ap nsamblak libai li woo* jada, pôk yé i bak libai li woo jada. 17 U nlama éde mimpañgak mi ngok mu, u boñ minlôñ mi ngok mina. Nlôñ u bisu: rubi, tôpasô, ni émérôd. 18 Nlôñ u nyônôs iba: turkuas, safirô, ni yaspi. 19 Nlôñ u nyônôs aa: ngok léshem,* agat, ni amétistô. 20 Nlôñ u nyônôs ina: krisôlitô, ônix, ni jad. Ba ga som yo mu bipañgbene bi gôl. 21 Ngok i ga bana môl ma 12 bon bôlôm ba Israel. Ba ga kédél hiki ngok kiki ba nkédél béndél, hiki ngok i ga bana jôl li litén jada ikété 12 matén.

22 “U ga kép minsañ mi hultôl, kiki ba nkép minkôô mi bañga gôl.+ 23 U ga boñ bisômôl bi gôl biba inyu hultôl, u ha gwo i makas ima ma hultôl. 24 U ga tégbaha minkôô ima mi gôl ikété bisômôl biba bi bi yé i makas ima ma hultôl. 25 U ga tégbaha masuk ima ma minkôô ima mu bipañgbene biba, u kañ nwo i bipisis bi bi yé mu bituu bi éfôd,* i bisu gwé. 26 I mbus hultôl, u ga boñ bisômôl bi gôl biba, u ha gwo i makas mé ima ma ma yé isi, i ngii éfôd.*+ 27 I bisu bi éfôd,* nyoo isi bipisis biba bi bi yé mu bituu bi éfôd, bebee ni homa gwom bi ñadba, i ngii mbagak ngôli* éfôd,+ u ga boñ ki bisômôl biba bi gôl. 28 Nkôô u u yé mangoñ u ga gwel hultôl, won u ga gwel bisômôl bi hultôl ni bisômôl bi éfôd.* Hala a ga boñ le hultôl i yégle i niñi mu éfôd, i ngii mbagak ngôli.*

29 “Arôn a nlama begee môl ma bon bôlôm ba Israel mu tôl* yé, i ngii hultôl mbagi, i ngéda a ga jôp i Homa mpubhaga kiki mbigda i bisu bi Yéhôva ngéda yosôna. 30 U ga bii Urim ni Tumim*+ ikété hultôl mbagi, bi nlama ba mu tôl* Arôn i ngéda a ga jôp i bisu bi Yéhôva, Arôn a ga begee i gwom bi mu tôl* yé i bisu bi Yéhôva ngéda yosôna inyu kéés bon ba Israel.

31 “U ga boñ mbôñgô mbot u éfôd* u u gwé bé binam, i bak ni bôñgô i i yé mangoñ.+ 32 Lipondo li ga ba i ngii,* ha i ñemkété u mbôñgô mbot. I mut a mbak gwom nyen a ga bak mapañ momasôna ma lipondo. Lipondo li ga ba kiki lipondo li kôti kei, inyu boñ le mbot i wéhi bañ. 33 Homa nyensôna i lisuk li mbôñgô mbot, u ga boñ matam ma grénad ni bôñgô i i yé mangoñ, ni bôñgô i mahuu ma ntômba i i yé wedewede, ni bôñgô i i nkôyôp tjôôm; u ga ha mangeñee ma gôl ipôla matam ma grénad. 34 U ga noña lingeñee jada li gôl ni litam li grénad jada, lingeñee jada li gôl ni litam li grénad jada, homa nyensôna i lisuk li mbôñgô mbot u u gwé bé binam. 35 I mbot i yon Arôn a nlama haba le ndi a gwel nson, liyôgbe li mangeñee li ga nôga i ngéda a ga jôp ni i ngéda a ga pam i homa mpubhaga i bisu bi Yéhôva, inyu boñ le a wo bañ.+

36 “U ga gwélél bañga gôl inyu boñ hibambha hi gôl hi hi mbai, u kédél mu ngii kiki ba nkédél béndél, le: ‘Libak lipubi li yé li Yéhôva.’+ 37 U nlama téñ hibambha mu yañsi+ ni nkôô u u yé mangoñ; hi ga ba i bisu bi yañsi. 38 Hi ga ba i mbom Arôn, Arôn a ga begee béba i mut a mboñ hihôha ikolba gwom bipubhaga,+ gwon bon ba Israel ba mpubus i ngéda ba nti gwo kiki makébla mapubhaga. Hi nlama yégle i mbom yé ngéda yosôna, le ndi ba lémél Yéhôva.

39 “U ga gwélél loñge bôñgô* inyu bak mbôñgô mbot ntéñék maniga-maniga,* u ga boñ yañsi ni loñge bôñgô, u boñ ki mbagak libadô.+

40 “U ga boñ ki mimbôñgô mi mambot, mabadô, ni dikôtô inyu bon ba Arôn,+ inyu lipém ni inyu bilama.+ 41 U ga ha manyuñ Arôn ni bon bé bôlôm mambot, u hoo bo,+ u téé bo,*+ u yilha ki bo bapubhaga, le ndi ba gwélél me nson u prisi. 42 Bôñôl ki bo minkanda ni loñge bôñgô* inyu hô nso+ wap. Mi ga ke ibôdôl i bôbôk ipam i mabel. 43 Arôn ni bon bé bôlôm ba nlama haba mambot mana i ngéda ba njôp i ndap libadô i likoda tole i ngéda ba ga tiige bebee ni juu li bisesema inyu gwel nson i homa mpubhaga, le ba begee bañ béba, to wo ba wo bañ. I litéak lini li ga nom i boga ni boga inyu yé ni inyu mbôda* yé i mbus yé.

29 “Haana nyen u ga boñ le ba yila bapubhaga inyu gwélél me nson u prisi: yoñ man nlôm nyaga, balôm ba mintômba iba ba ba gwé bé lem yo ki yo,+ 2 bret bi ngi-séñha, ngiiña bret bi ngi-séñha bi bi yé mbôôk ni môô, ni mimbamba mi biôlô mi ngi-séñha nhook ni môô.+ U ga gwélél flawa ilam i blé inyu boñ gwo, 3 u ha gwo ikété sel, u bii gwo i bisu gwem ikété sel;+ u ga bii gwo ni nlôm nyaga lôñni balôm ba mintômba iba.

4 “U ga lona Arôn ni bon bé bôlôm i lijubul li ndap libadô i likoda,+ u nugus ki bo ni malép.+ 5 I mbus, u ga yoñ mambot,+ u ha Arôn mbôñgô mbot, ni mbôñgô mbot u éfôd u u gwé bé binam, ni éfôd,* yak ni hultôl; u tibil ki téñ mbagak ngôli* mu bôbôk+ yé. 6 U ga téñ yañsi mu ño wé, u bii ki hibambha hi gôl hipubhaga* i ngii yañsi.+ 7 U ga yoñ ki môô mapubhaga,*+ u kôp mo i ngii ño wé, u hoo nye.+

8 “I mbus, u ga tiigaha bon bé bôlôm, u ha bo mimbôñgô mi mambot,+ 9 u téñ Arôn ni bon bé bôlôm mabadô i bôbôk, u ha ki bo dikôtô; bon ba ga gwel nson u prisi, i litéak lini li ga nom i boga ni boga.+ Hala nyen u ga téé Arôn ni bon bé bôlôm le ba gwel nson u prisi.*+

10 “U ga lona ki nlôm nyaga i bisu bi ndap libadô i likoda, Arôn ni bon bé bôlôm ba ga bii moo map mu ño u nlôm nyaga.+ 11 U ga nol nlôm nyaga i bisu bi Yéhôva, i lijubul li ndap libadô i likoda.+ 12 Yoñ ndék matjél ma nlôm nyaga ni hinoo hioñ, ha mo mu bitoñ bi juu li bisesema,+ u kôp mana matjél momasôna ma nyégle isi juu li bisesema.+ 13 I mbus, yoñ mahoñ+ momasôna ma ma nhô minla, ni lihoñ li li yé i ngii libaa, yak ditam tjé tjo diba lôñni mahoñ ma ma yé i ngii yap, ligis gwo le hiida hiap hi bédél mu ngii juu li bisesema.+ 14 Ndi minsôn mi nlôm nyaga, koo yé ni tjibi tjé, u ga ligis gwo ni hié haa ni liyééne linan. Hala a yé sesema inyu béba.

15 “I mbus ha, u ga yoñ nlôm ntômba wada mu, Arôn ni bon bé bôlôm ba ga bii moo map mu ño u nlôm ntômba.+ 16 U ga nol nlôm ntômba, u yoñ matjél mé, u nwes mo mu bipes gwobisôna bi juu li bisesema.+ 17 Baa nlôm ntômba, jôwa gwom gwé bi kété+ ni makôô* mé, bii gwo ni ño wé mu juu li bisesema. 18 U nlama ligis nlôm ntômba nyensôna, le hiida hié hi bédél mu juu li bisesema. Hala a yé sesema i ntul i hié inyu Yéhôva, i numbuk loñge njiñ.*+ Hala a yé sesema i hié inyu Yéhôva.

19 “I mbus, u ga yoñ nuu nlôm ntômba numpe, Arôn ni bon bé bôlôm ba ga bii moo map mu ño u nlôm ntômba.+ 20 U ga nol nlôm ntômba, u yoñ ndék matjél mu matjél mé, u ha mo i hipét hi ôô walôm u Arôn, ni i dipét di maôô ma walôm ma bon bé bôlôm, ni i balôm ba dinoo di moo map ma walôm, ni i balôm bap ba dinoo di makôô map ma walôm; u nwes ki matjél mu bipes gwobisôna bi juu li bisesema. 21 I mbus ha, yoñ ndék matjél i i yé mu juu li bisesema ni ndék môô mapubhaga,+ nwes gwo i ngii Arôn ni mambot mé, yak i ngii bon bé bôlôm ni mambot map inyu boñ le Arôn ni mambot mé, yak bon bé bôlôm ni mambot map ba ba bapubhaga.+

22 “Yoñ ki mahoñ ma nlôm ntômba, hala wee mahoñ ma nwel, ni mahoñ ma ma nhô minla, ni lihoñ li li yé i ngii libaa, yak ditam tjé tjo diba lôñni mahoñ ma ma yé i ngii yap,+ ni bel wé walôm, inyule a yé nlôm ntômba ba ngwélél inyu téé bo le ba gwel nson u prisi.+ 23 Mu sel i bret bi ngi-séñha i i yé i bisu bi Yéhôva, yoñ ngiiña bret yada, ni ngiiña bret yada ba mbôô ni môô, ni mbamba ôlô wada. 24 U nlama ha gwobisôna i moo ma Arôn ni i moo ma bon bé bôlôm, u ga ndéñgés gwo le bi ba likébla ba ndéñgés i bisu bi Yéhôva. 25 I mbus, u ga héya gwo i moo map, u ligis gwo mu juu li bisesema, i ngii sesema i ntul i hié, i numbuk loñge njiñ* i bisu bi Yéhôva. Hala a yé sesema i hié inyu Yéhôva.

26 “I mbus ha, yoñ ki tôl i nlôm ntômba ba ngwélél inyu téé bo le ba gwel nson u prisi,+ nu ba nti inyu Arôn, ndéñgés yo le i ba likébla ba ndéñgés i bisu bi Yéhôva; yon i ga ba ngaba yoñ. 27 U ga yoñ tôl i likébla ba ndéñgés, u yilha yo pubhaga; u boñ nlélém jam ni bel u ngaba pubhaga ba ndéñgés, bi bi nyôña mu nlôm ntômba ba ngwélél inyu téé bo le ba gwel nson u prisi,+ hala wee mu ngaba ba nti Arôn ni bon bé bôlôm. 28 Gwon bi ga ba ngaba i Arôn ni i bon bé bôlôm inoñnaga ni litéak bon ba Israel ba nlama noñ i boga ni boga, inyule bi yé ngaba pubhaga; bi ga yila ki ngaba pubhaga bon ba Israel+ ba nlama ti. Hala a yé ngaba yap pubhaga inyu Yéhôva i i nyôña mu bisesema gwap inyu kôp nsañ.+

29 “Bon bôlôm+ ba Arôn ba ga yik gwélél mambot mé mapubhaga+ i mbus yé, i ngéda ba ga hoo bo môô, ba téé ki bo le ba gwel nson u prisi. 30 Man wé munlôm wada a ga yoñ tel yé i prisi keñi, nyen a ga haba i mambot ma dilo disaambok+ inyu gwel nson i homa mpubhaga i ngéda a njôp i ndap libadô i likoda.

31 “U ga yoñ nlôm ntômba ba ngwélél inyu téé bo le ba gwel nson u prisi, u ga lamb ki minsôn nwé i homa mpubhaga.+ 32 Arôn ni bon bé bôlôm ba ga je+ minsôn mi nlôm ntômba, ni bret bi bi yé mu sel ha lijubul li ndap libadô i likoda. 33 Ba ga je i gwom bi ntina inyu hô bibéba gwap,* kayéle ba téé bo le ba gwel nson u prisi,* ba yila ki bapubhaga. Ndi i mut a kôli bé,* a nlama bé je gwo inyule bi yé gwom bipubhaga.+ 34 Ibale kegla, minsôn mi nyégle mu sesema ba nti inyu téé bo le ba gwel nson u prisi, ibale yak bret bi nyégle, u nlama ligis+ i gwom bi nyégle. Ba nlama bé je gwo inyule bi yé gwom bipubhaga.

35 “U ga boñ hala inyu Arôn ni bon bé bôlôm inoñnaga ni mam momasôna me nkal we. U ga yoñ dilo disaambok inyu téé bo le ba gwel nson u prisi.*+ 36 Hiki kel, u ga ti nlôm nyaga wada kiki sesema inyu béba, i ngéda u ga ti i sesema ini i ngii juu li bisesema inyu hô bibéba,* u ga yilha jo lipubhaga; u nlama hoo juu li bisesema môô inyu yilha jo lipubhaga.+ 37 U ga ti bisesema dilo disaambok inyu hô bibéba kayéle juu li bisesema li yila lipubhaga, u ga yilha jo lipubhaga+ inyu boñ le li lôôha ba lipubhaga. I mut a ntihba juu li bisesema a nlama ba mpubhaga.

38 “I bisesema bini gwon u ga ti i juu li bisesema: hiki kel, balôm ba mintômba iba ba nwii wada, ngéda yosôna.+ 39 Bikegla, u ga ti man nlôm ntômba wada kiki sesema, u ti ki nuu man nlôm ntômba numpe i manañle ma hiañgaa.*+ 40 Inyu man nlôm ntômba nu bisu, ba ga lona kilô yada ni jam* i flawa ilam, mpôdnaga lôñni lita yada* i môô ma mintédék mi ôlivé, ni likébla li lita wai yada.* 41 U ga ti man nlôm ntômba nu yônôs iba kiki sesema i manañle ma hiañgaa,* ni likébla li bijek lôñni likébla li wai nlélém kiki bikegla. U ga ti jo kiki sesema i numb loñge njiñ,* sesema i hié inyu Yéhôva. 42 Hala a ga ba sesema i ntul i hié hiki kel tjai ndi tjai, yon ni ga ti i lijubul li ndap libadô i likoda, i bisu bi Yéhôva, i homa me ga pémél bé inyu pôdôs+ we.

43 “Ha homa nu nyen me ga pémél bon ba Israel, inyu boñ le i homa nu a yila mpubhaga ni njel lipém+ jem. 44 Me ga yilha ndap libadô i likoda pubhaga, me yilha ki juu li bisesema lipubhaga, me yilha yak Arôn lôñni bon bé bôlôm+ bapubhaga inyu boñ le ba gwélél me nson u prisi. 45 Me ga yén* ipôla litén li Israel, me ba ki Nyambe+ wap. 46 Hala nyen ba ga yi toi le men me yé Yéhôva Nyambe wap nu a bi nyodna bo i loñ Égiptô, kayéle me yén ipôla yap.+ Men me yé Yéhôva Nyambe wap.

30 “U ga boñ juu li bisesema inyu lighene binjinjiñ+ mu ngii yé; u ga boñ jo ni kék akasia.+ 2 Bipes gwé gwo bina bi nlama ap nlélém, juu li ga ap hikéñéé hi woo hiada,* pôk yé i bak hikéñéé hi woo hiada, ntel wé u bak dikéñéé di moo diba. Juu li bisesema ni bitoñ gwé bi ga ba ndik yom yada.+ 3 U ga hoo jo bañga gôl: i ngii yé, i bipes gwé gwobisôna, ni i bitoñ gwé; u boñ ki mapañ mé momasôna ni gôl. 4 U ga boñ ki bisômôl biba bi gôl. Bi ga ba isi mapañ ma juu li bisesema, i bipes gwé biba, biba hiki pes, ba ga som mimbôñgô mi bikék mu bisômôl inyu begee jo. 5 Boñ mimbôñgô mi bikék ni kék akasia, u hoo ki nwo gôl. 6 U ga tek juu li bisesema i bisu bi libadô* li li yé ipañ nkuu Mbôgi.*+ Me ga pémél we+ i ngii ngudul i nkuu Mbôgi.

7 “Arôn+ a ga ligis biloñge bi binjinjiñ+ i juu li bisesema,+ le hiida hi bédél mu juu li bisesema i ngéda a ga kôôba bilambe+ hiki kegla. 8 Arôn a ga ligis ki biloñge bi binjinjiñ i ngéda a ga kuye bilambe i manañle ma hiañgaa.* Hala a yé sesema binjinjiñ bi ngéda yosôna, bi ni ga ti Yéhôva tjai ndi tjai. 9 U nlama bé ligis binjinjiñ+ bi kôli bé i ngii yé, to sesema i ntul i hié, to likébla li bijek; u nlama bé to kôp likébla li wai i ngii yé. 10 Ngélé yada hiki nwii, i kel Bikwak,*+ Arôn a nlama kôp ndék matjél ma sesema inyu béba+ i ngii bitoñ bi juu li bisesema, inyu yilha juu li bisesema lipubhaga. A ga boñ hala mu tjai dinan tjodisôna, ngélé yada hiki nwii inyu yilha juu li bisesema lipubhaga. Juu li bisesema li yé yom i nlôôha pubhaga inyu Yéhôva.”

11 Yéhôva a kal ki Môsi le: 12 “I ngéda u ga yoñ ñañga wap, ni i ngéda u ga soñgol bon ba Israel,+ hiki mut a nlama ti Yéhôva binoñ inyu niñ yé i ngéda u ga yoñ ñañga wap. Hala a yé inyu boñ le himala hi kwél bañ bo i ngéda ba ga tila môl map. 13 I bôt bobasôna ba ga tila môl map ba ga ti: pes sékel* yada inoñnaga ni sékel i homa mpubhaga.*+ Sékel yada i yé môm ima ma géra.* Pes sékel yada i yé likébla li Yéhôva.+ 14 Hiki mut ba ga tila jôl, nu a gwé 20 ma nwii tole iloo ha, a ga ti Yéhôva+ likébla. 15 Ngwañ mut u nlama bé ti iloo pes sékel* yada, to hiyeyeba hi nlama bé ti isi pes sékel yada, i ngéda ba ga ti Yéhôva likébla inyu kobol* biniñ binan. 16 U ga yoñ moni* mi kobla* yak bon ba Israel, u ga ti nwo inyu nson i ndap libadô i likoda kayéle mi ba kiki mbigda inyu bon ba Israel i bisu bi Yéhôva, i ti binoñ* inyu biniñ binan.

17 Yéhôva a kônde pôdôs Môsi, a kal le: 18 “Inyu jôwa moo ni makôô, boñ bômbôô pan i mamuna ni tééne+ yé; u tek yo ipôla ndap libadô i likoda ni juu li bisesema, u ha ki malép mukété.+ 19 Arôn ni bon bé bôlôm ba ga jôwa moo map ni makôô map+ ha homa nu. 20 I ngéda ba ga jôp i ndap libadô i likoda, ni i ngéda ba ga tiige bebee ni juu li bisesema inyu gwel nson, ni inyu ti Yéhôva bisesema bi ntul i hié kayéle hiida hiap hi bet, ba ga pubus bomede ni malép inyu boñ le ba wo bañ. 21 Ba nlama jôwa moo map ni makôô map inyu boñ le ba wo bañ, i litéak lini li ga nom i boga ni boga inyu yé ni inyu mbôda yé, mu tjai tjap tjodisôna.”+

22 Yéhôva a kal ki Môsi le: 23 “Yoñ ki labinda i i nlôôha numb loñge: hihéga hi 500 sékel i mabga mire; yoñ ki pes mu hihéga hi, hala wee hihéga hi 250 sékel i hiomi hi hi numb loñge, ni 250 sékel i kalamus i i numb loñge, 24 ni hihéga hi 500 sékel i kasia* inoñnaga ni sékel i homa mpubhaga,*+ lôñni hin yada* i môô ma ôlivé. 25 U ga pôdna yosôna loñge*+ inyu boñ môô mapubhaga; mon ma ga ba môô mapubhaga.

26 “U ga hoo mo mu ndap libadô i likoda,+ yak mu nkuu Mbôgi, 27 hoo ki mo mu téblé ni mu bisélél gwé gwobisôna, mu tééne bilambe ni bisélél gwé, ni mu juu li binjinjiñ, 28 yak mu juu li bisesema bi ntul i hié ni bisélél gwé gwobisôna, ni mu bômbôô pan lôñni tééne yé. 29 U nlama pubus gwo kayéle bi lôôha yila bipubhaga.+ Nu ni nu a ga tihba gwo a nlama ba mpubhaga.+ 30 U ga hoo Arôn+ ni bon bé bôlôm,+ u yilha ki bo bapubhaga le ndi ba gwélél me nson u prisi.+

31 “U ga pôdôs bon ba Israel, u kal bo le: ‘I môô mana ma ga ke ni bisu i ba môô mapubhaga inyu yem mu tjai dinan tjodisôna.+ 32 Ba ga hoo bé mo mu manyuu ma bôt ba binam, ni nlama bé to boñ yom yo ki yo i i mpôna mo. Ma yé yom ipubhaga. Ma ga ke ni bisu i ba yom ipubhaga inyu nan. 33 Nu ni nu a mboñ nhoop u u mpôna unu, ndi a hoo wo mut nu a kôli bé,* a nlama nôla.’”*+

34 I mbus, Yéhôva a kal Môsi le: “Yoñ minlélém mi dihéga mi labinda+ ini: matôi ma staké, ônika, galbanum ni bañga nunumba. 35 Gwélél yosôna inyu boñ binjinjiñ;+ labinda i nlama ba mpôdnaga loñge,* i ban-ga bas,+ i bak bañga, i bak ki pubhaga. 36 U ga kok ndék binjinjiñ le i yila minluñ minluñ, u kôp ndék minluñ i bisu bi nkuu Mbôgi i ndap libadô i likoda, i homa me ga pémél we. I binjinjiñ bini bi ga lôôha ba bipubhaga inyu nan. 37 Ni nlama bé boñ ntén binjinjiñ u inyu nan.+ Bi ga ba i mis moñ kiki yom ipubhaga inyu Yéhôva. 38 Nu ni nu a ga boñ minlélém mi binjinjiñ inyu nok njiñ yé a nlama nôla.”*

31 Yéhôva a kônde pôdôs Môsi, a kal nye le: 2 “Emble-ki, me mal pohol* Bézalél,+ man Uri, man Hur, nu litén li Yuda.+ 3 M’a yônôs nye ni mbuu u Nyambe, le a bana pék, a tibil nok mam,* a bana ki yi i sal mintén mi bibôlô nwominsôna, 4 inyu tjek bibôlô bi likeñge, inyu ôô gwom bi gôl, gwom bi silba ni gwom bi mamuna, 5 inyu kôñg ngok ni boñ le i jôp loñge ikété bipañgbene gwap,+ ni inyu gwélél bikék inyu boñ mintén mi gwom nwominsôna.+ 6 Handugi hala, me mal téé Ôhôliab+ man Ahisamak, nu litén li Dan, inyu hôla Bézalél; me ga ha ki pék ikété miñem mi bôt ba likeñge* bobasôna, le ndi ba boñ gwom gwobisôna me mal kal we:+ 7 ndap libadô i likoda,+ nkuu Mbôgi,+ ngudul+ i i yé mu ngii yé, ni bisélél gwobisôna bi ndap libadô, 8 téblé+ ni bisélél gwé, tééne bilambe i i yé ni bañga gôl lôñni bisélél+ gwé gwobisôna, juu li binjinjiñ,+ 9 juu li bisesema bi ntul i hié+ ni bisélél gwé gwobisôna, bômbôô pan ni tééne+ yé, 10 mambot ma ma yé mbagak loñge, mambot mapubhaga inyu prisi Arôn, mambot bon bé bôlôm ba ga haba inyu gwel nson u prisi,+ 11 môô mapubhaga, ni biloñge bi binjinjiñ inyu homa mpubhaga.+ Ba ga boñ i gwom gwobisôna me bi kal we.”

12 Yéhôva a kal ki Môsi le: 13 “Pôdôs bon ba Israel, u kal bo le: ‘Téntén, ni ga tééda dilo tjem di sabat,+ inyule di yé yimbne ipôla me ni bé mu tjai dinan tjodisôna, inyu boñ le ni yi le me Yéhôva, me nyilha bé bapubhaga. 14 Ni nlama tééda sabat, inyule i yé yom ipubhaga inyu nan.+ Nu ni nu a yé le a yan sabat, a nlama nôla. Ibale mut a nsal to imbe bôlô i kel i, a nlama nôla.*+ 15 Bôlô i nlama séla dilo disamal, ndi hilo hi nyônôs isaambok hi yé kel bañga noi.*+ I hilo hi, hi yé yom ipubhaga inyu Yéhôva. I mut a ga sal i kel sabat a nlama nôla. 16 Bon ba Israel ba nlama tééda sabat; ba ga tégbaha sabat mu tjai tjap tjodisôna. Hala a yé malômbla inyu ntandaa ngéda. 17 Hala a yé yimbne inyu ngéda yosôna ipôla me ni litén li Israel,+ inyule Yéhôva a bi yoñ dilo disamal inyu hek ngii ni hisi, ndi i hilo hi nyônôs isaambok, a téé bôlô, a noi.’”+

18 Ndik kiki Nyambe a bi mal pôdôs Môsi i ngii hikôa Sinai, a ti nye dibambha di ngok di Mbôgi+ diba, dibambha di ngok di di bé ntilga ni hinoo hi Nyambe.+

32 I nlélém ngéda, litén li tehe le Môsi a ntiñha sôs i hikôa.+ Jon bôt ba litén ba bi kodba ipañ Arôn, ba kal nye le: “Telep, bôñôl bés nyambe nu a ga bôk bés i bisu,+ inyule di nyi bé kii i mpémél i Môsi nunu, i mut a bi nyodna bés i loñ Égiptô.” 2 Arôn a kal ni bo le: “Yoña dimbuñga* di gôl+ mu maôô ma baa banan, ni ma bon bôlôm banan, ni ma bon bôda banan, ni lona me tjo.” 3 Ha nyen bôt ba litén bobasôna ba bi bôdôl héya dimbuñga* di gôl mu maôô map, ba lona tjo yak Arôn. 4 A yoñ gôl i moo map, a ôô yo ni sélél i i nkédél, a boñ ôñgba* i man nyaga.+ Ba bôdôl kal le: “A Israel, Nyambe woñ nunu, nu a bi nyodna we i loñ Égiptô.”+

5 Kiki Arôn a bi tehe hala, a oñ juu li bisesema i bisu bi ôñgba. I mbus, Arôn a pot makeñi, a kal le: “Ngand i ga ba yani inyu Yéhôva.” 6 Jon ba bi pule telep i hilo hi bé noñ, ba bôdôl ti bisesema bi ntul i hié lôñni bisesema inyu kôp nsañ. I mbus, bôt ba litén ba yén inyu je ni nyo. I mbus ha, ba telep inyu tégbaha loñge ngéda.*+

7 Yéhôva a kal ni Môsi le: “Kee, sôs, inyule litén joñ, li u bi nyodna i loñ Égiptô, li mboñ béba.+ 8 Ba mpala yék njel me bi kal bo le ba noñ.+ Ba mal bôñôl bomede ôñgba* i man nyaga, ba ñôôp i bisu gwé, ba nti ki yo bisesema, ba kalak le: ‘A Israel, Nyambe woñ nunu, nu a bi nyodna we i loñ Égiptô.’ 9 Yéhôva a kônde kal Môsi le: “Me mal tehe le litén lini li gwé ño mbe.*+ 10 Nano ni, nwas me le me tjé bo ikété hiun hiem hikeñi, le ndi we nyen me yilha loñ ikeñi.”+

11 Ha nyen Môsi a bi yemhe* Yéhôva Nyambe+ wé, a kal le: “Éé a Yéhôva, inyuki u nlôôha unbene litén joñ i ngéda u mal nyodna jo i loñ Égiptô ni lipémba likeñi lôñni woo u ngui?+ 12 Inyuki u nti bôt ba Égiptô pôla le ba kal le: ‘A bééna mahoñol mabe i ngéda a bé nyodna bo. A bé sômbôl nol bo mu dikôa ni sas bo mu hisi+ hiosôna’? Nwas ngandak hiun, héñha mahoñol* le u tjé bañ litén joñ. 13 Bigda bagwélél boñ le Abraham, Isak ni Israel, ba u bi kumul soñ ni wemede, u kal le: ‘Me ga bulus mbôda* nan kiki tjôdôt di ngii,+ me ga ti mbôda* nan i loñ ini yosôna me bi pôdôl bé, inyu boñ le i ba yap inyu ngéda yosôna.’”+

14 Ha nyen Yéhôva a bi héñha mahoñol,* a tjé ha bé litén jé kiki a bi kal.+

15 I mbus, Môsi a hielba, a sôs i hikôa ni dibambha di ngok di Mbôgi+ diba i woo+ wé. Dibambha di ngok di bé ntilga bipes gwo biba; di bé ntilga i bisu ni i mbus. 16 Dibambha di ngok di bé nson u Nyambe, yak matila ma bé mu ma bé matila ma Nyambe, nkédlak i ngii dibambha di ngok.+ 17 I ngéda Yôsua a bi nok liyôgbe li litén ni minlondok nwap, a kal Môsi le: “Liyôgbe li gwét li yé nyoo i liyééne jés.” 18 Ndi Môsi a kal le:

19 Ndik kiki Môsi a bi tiige bebee ni liyééne jap, a tehe man nyaga+ ni bôt ba nsak, a unup ngandak; yak dibambha di ngok a bééna mu moo mé, a leñ tjo ha isi hikôa,+ a bol tjo. 20 A yoñ man nyaga ba bi boñ, a ligis nye, a nyugut nye minluñ minluñ;+ i mbus, a nwes minluñ i malép, a nyus bon ba Israel+ i malép ma. 21 Môsi a kal ni Arôn le: “Kii bôt ba litén lini ba mboñ we, kayéle u lona béba ikeñi i ngii yap?” 22 Arôn a timbhe le: “U unup bañ, a nwet wem. Wemede u nyi litén lini loñge, le li yé ndik bebee i boñ béba.+ 23 Ba bi kal me le: ‘Bôñôl bés nyambe nu a ga bôk bés i bisu, inyule di nyi bé kii i mpémél i Môsi nunu, i mut a bi nyodna bés i loñ Égiptô.’+ 24 Jon me bi kal bo le: ‘Nu ni nu a gwé gôl, a héya yo, a ti me yo.’ I mbus, me leñ yo i hié, i man nyaga nunu a pam.”

25 Môsi a tehe le bôt ba litén ba mboñ ndik kiki ba ngwés, inyule Arôn a bi la bé kéñ bo, kayéle ba wéha bomede nyuu i bisu bi baoo bap. 26 Ha nyen Môsi a bi telep i lijubul li liyééne jap, a kal le: “Njee a yé i pes Yéhôva? A loo i meeni!”+ Ha nyen bon ba Lévi ba bi kodba ipañ yé. 27 A kal bo le: “Lana nyen Yéhôva, Nyambe nu Israel a mpot: ‘Hiki wada nan a nlama yoñ pansoñ yé, a tagbene mu homa litén li nyééne ibôdôl lini lisuk* ipam lii lisuk lipe, a nol maasañ, mut wé libôk, ni liwanda+ jé.’” 28 Bon ba Lévi ba boñ kiki Môsi a bi kal. Hala nyen 3 000 di bôlôm di bi wo i kel i. 29 Môsi a kal ni le: “Ni ti bébomede nkikip* inyu gwel nson u Yéhôva i len ini, inyule hiki wada nan a mal kolba man wé, ni maasañ;+ i len ini, Nyambe a ga sayap+ bé.”

30 I kel i bé noñ ha, Môsi a kal litén le: “Ni mboñ béba i nlôôha ikeñi; nano, me yé i bet hikôa yak Yéhôva inyu tehe too a nla nwéhél béba+ nan.” 31 Ha nyen Môsi a bi témb yak Yéhôva, a kal le: “Kinje béba ikeñi litén lini li mboñ! Ba mbôñôl bomede nyambe nu gôl!+ 32 Ndi nano, ibale u ngwés, nwéhél bo béba+ yap; ndi ibale hala bé, wee sas jôl jem mu kaat u bi tila.”+ 33 Ndi Yéhôva a kal Môsi le: “I mut a mboñ me béba, nyen m’a sas jôl jé mu kaat yem. 34 Nano, kee, éga litén letee ni homa me nkal we. Emble-ki! Añgel yem i ga bôk we i bisu,+ i kel m’a bat le ba timbhe i bisu gwem, m’a kogse bo inyu béba yap.” 35 Ha nyen Yéhôva a bi bôdôl bép litén, inyule ba bi boñ man nyaga nu Arôn a bi ôô.

33 Yéhôva a kal ki Môsi le: “Nyodi hana, we ni litén u bi nyodna i loñ Égiptô. Kee letee ni i loñ me bi kum soñ i bisu bi Abraham, Isak, ni Yakôb, me kal le: ‘M’a ti yo mbôda*+ yoñ.’ 2 Me ga ep añgel le i bôk we i bisu,+ me ga luhul ki Lôk Kanaan, Lôk Amôr, Lôk Hét, Lôk Péris, Lôk Hivi, ni Lôk Yébus.+ 3 Bet letee ni i loñ i i nkuli milik ni wéi.+ Ndi me ga ke bé ni we, inyule u yé litén li li gwé ño mbe,*+ tiga le me tjé we mu njel.”+

4 I ngéda bôt ba litén ba bi nok i bibañga bi ngui bini, ba bôdôl ee, mut to wada a haba bé bieñg gwé. 5 Yéhôva a kal Môsi le: “Kal bon ba Israel le: ‘Ni yé litén li li gwé ño mbe.*+ Me bak le me tagbene ipôla nan, me tjé+ ki bé kunda yada. Nano, ni bii bieñg binan ipañ letee me yi yom m’a boñ bé.’” 6 Jon ibôdôl ha i hikôa Hôreb, bon ba Israel ba bi haba ha bé* bieñg gwap.

7 I mbus, Môsi a yoñ ndap yé libadô, a téé yo i mbus liyééne li litén, haa ni liyééne li litén, a sébél yo le ndap libadô i likoda. Hiki mut nu a bééna ngôñ i bat Yéhôva+ mahoñol mé, a bé a pam, a ke i ndap libadô i i bé i mbus liyééne li litén. 8 I ngéda Môsi a bé a pam inyu ke i ndap libadô, bôt ba litén bobasôna ba bé ba telep, hiki mut a bé a telep i lijubul li ndap yé libadô, ba nunuk Môsi letee le a jôp i ndap libadô. 9 I ngéda Môsi a bé a jôp i ndap libadô, jél li ond+ li bé li sôs, li telep i lijubul li ndap libadô i ngéda Nyambe a bé kwel ni Môsi.+ 10 I ngéda bôt ba litén bobasôna ba bé ba tehe jél li ond li ntelep i lijubul li ndap libadô, hiki mut a bé a ôôp i lijubul li ndap yé libadô. 11 Yéhôva a bé pôdôs Môsi mbom ni mbom,+ kiki mut wada a yé le a pôdôs mut numpe. I ngéda Môsi a bé a témb i homa litén li nyééne, man Nun le Yôsua,+ nhôla wé,+ a bé nyodi bé i ndap libadô.

12 Môsi a kal ni Yéhôva le: “Emble-ki, u nkal me le: ‘Éga litén lini,’ ndi u nyis bé me njee u ga ep le a kee ni me. Handugi hala, u bi kal me le: ‘Me nyi we loñge,* u nlémél ki me.’* 13 Soho, ibale me nlémél we, boñ le me yi manjel+ moñ, kayéle me yi we, me kee ki ni bisu i lémél we. Tehe ki i bôt bana kiki litén+ joñ.” 14 Jon Nyambe a bi kal le: “Memede m’a* kee ni we,+ m’a ti ki we noi.”+ 15 Ha nyen Môsi a bi kal nye le: “Ibale wemede* u nke bé lôñni bés, u nyodna bañ bés hana. 16 Lelaa bôt ba ga yi le me ni litén joñ di nlémél we? Baa i ta bé inyule u ga ke lôñni bés,+ kayéle me ni litén joñ di ba maselna ni biloñ bipe gwobisôna bi nkoñ ’isi?”+

17 Yéhôva a kal Môsi le: “Me ga boñ yak i jam lini u mbat me, inyule u nlémél me, ni le me nyi we loñge.”* 18 Môsi a kal ni le: “Soho, unda me lipém joñ.” 19 Ndi Nyambe a kal le: “M’a tagbe i bisu gwoñ, u ga tehe le me yé loñge kiyaga, m’a añal ki jôl li Yéhôva+ i bisu gwoñ; ndi i mut m’a ngwés unda loñgeñem, wee nyen m’a unda loñgeñem; yak i mut m’a ngwés kon ngoo, wee nyen m’a kon ngoo.”+ 20 Ndi Nyambe a kal ki le: “U nla bé tehe su wem, inyule mut binam to wada a nla bé tehe su wem, ndi a niñ.”

21 Yéhôva a kônde kal le: “Homa wada nunu a yé me bebee. Telep ha i ngii liaa. 22 I ngéda me mba me ntagbe, me undga we lipém jem, m’a ha we i hôk liaa, m’a hô ki we ni woo wem letee me mal tagbe. 23 I mbus le me ntagbe, m’a héya woo wem, u ga tehe ndik mbus yem. Ndi mut binam a nla bé tehe su wem.”+

34 I mbus, Yéhôva a kal Môsi le: “Kôñg dibambha di ngok diba kiki di bisu,+ mu dibambha di ngok dini nyen m’a tila bibañga bi bi bé mu dibambha di ngok di bisu,+ di u bi bol.+ 2 Kôôba inyu yani kegla; inyule yani kegla, u ga bet i hikôa Sinai, u telep ki i bisu gwem, ha i ngii hikôa.+ 3 Ndi mut nye ki nye a bet bañ ni we, ba nlama bé to tehe mut numpe i ngii hikôa. To bibémba bi mintômba, to mauñ ma nyaga bi nlama bé je ipañ hikôa+ hi.”

4 Jon Môsi a bi kôñg dibambha di ngok diba kiki dibambha di ngok di bisu, a pule telep kegla, a bet hikôa Sinai, kiki Yéhôva a bi kal nye, a yoñ dibambha di ngok diba mu woo wé. 5 Ha nyen Yéhôva a bi sôs+ ikété ond, a telep ha ni nye, a añal ki jôl li Yéhôva.+ 6 Yéhôva a tagbe i bisu gwé, a kalak le: “Yéhôva, Yéhôva, Nyambe nu konangoo+ ni nu ñem ngôô,*+ nu a mpala bé unup,+ nu a ntéñbe ki i unda ngandak gwéha*+ ni maliga,*+ 7 a ntéñbe i gwés dikôô di bôt,+ a nwéhlak hihôha, ni litjañg, ni béba;+ ndi kekikel a ga nwas bé béba mut ngi kogse,+ a nlona kogse inyu hihôha hi basañ i ngii bon ni balal, ni ndandi ikepam i ndindii.”+

8 Kunda yada, Môsi a ôôp letee ni ’isi, a ôm ki maboñ ’isi. 9 I mbus, a kal le: “Éé a Yéhôva, ibale me nlémél we, me nsoohe le u kee ni bés, u ba ki ipôla+ yés; to ibale di yé litén li li gwé ño mbe,*+ nwéhél hihôha hiés ni béba+ yés, u yoñ ki bés kiki bôt boñ.” 10 Ha nyen Nyambe a bi kal le: “Me yé i boñ i malômbla mana: i bisu bi litén joñ jolisôna, m’a boñ bihélha bi mam bi bi yé ngi bôña* hana hisi hiosôna, to ikété biloñ+ gwobisôna; yak matén momasôna i het ni nyééne ma ga tehe nson u Yéhôva, inyule jam li mbuma ñañ jon me ga boñ inyu nan.+

11 “Nôgôl mam momasôna me nkal we i len ini.+ M’a luhul Lôk Amôr i bisu gwoñ, yak Lôk Kanaan, Lôk Hét, Lôk Péris, Lôk Hivi, ni Lôk Yébus.+ 12 Yoñ yihe le u boñ bañ malômbla ni bôt ba nyééne mu loñ i het u nke,+ tiga le hala a ba hiandi inyu* yoñ.+ 13 Ni ga bôk muu map ma bisesema, ni nyugut mél map mapubhaga, ni kit ki mbiñ yap ipubhaga.*+ 14 U nlama bé ôôp i bisu bi nyambe numpe,+ inyule Yéhôva a nyiba kiki* nu a mbat le ba bégés ndik nyetama.* Ñ, a yé Nyambe nu a mbat le ba bégés ndik nyetama.+ 15 Yoñ yihe le u boñ bañ malômbla ni bôt ba loñ, inyule i ngéda ba ga ke i libambe* ni banyambe+ bap, ba tinak bo bisesema, mut a yé le a naña we, u je yom a nti kiki sesema.+ 16 Ibabé pééna, u ga yoñ bingond gwap bihogi, u ti gwo bon boñ bôlôm;+ ha nyen bingond gwap bi ga ke i libambe* ni banyambe bap, ba tinde ki bon boñ bôlôm i ke i libambe ni banyambe+ bap.

17 “U nlama bé ôô banyambe.+

18 “U ga tégbaha ngand Bret bi ngi-séñha.+ U ga je bret bi ngi-séñha, kiki me bi kal we; boñ hala dilo disaambok, i ntéak ngéda, i sôñ Abib,*+ inyule i sôñ Abib nyen u bi nyodi i Égiptô.

19 “Hiki man woñ munlôm nu a yé mbôkgwéé* a yé wem,+ yak babôkgwéé bobasôna ba ba yé balôm ikété nyaga yoñ tole mintômba+ nwoñ ba yé bem. 20 U ga ti ntômba inyu kobol hiki mbôkgwéé nu jagas. Ndi ibale u nkobol bé nye, u nlama bôk nye joo. U ga kobol ki hiki man woñ munlôm nu a yé mbôkgwéé.+ Mut nye ki nye a nlama bé lo i bisu gwem moo nso.

21 “U ga sal dilo disamal, ndi i hilo hi nyônôs isaambok u ga noi.+ U ga noi* hala, yak i ngéda nson ni i ngéda libumbul.

22 “U ga tégbaha ngand Sonde ni matam ma bisu ma libumbul li blé, u tégbaha ki ngand Likôhle li bijek* i lisuk li nwii.+

23 “Ngélé aa hiki nwii, bôlôm boñ bobasôna ba ga lo i bisu bi bañga Nwet le Yéhôva, Nyambe nu Israel.+ 24 Inyule m’a luhul biloñ i bisu gwoñ,+ me kéñbaha ki nkoñ woñ, mut nye ki nye a’ bana bé ngôñ i yoñ loñ yoñ, i ngéda u mba u mbet yak Yéhôva Nyambe woñ ngélé aa hiki nwii.

25 “U nlama bé sem matjél ma sesema yem ni yom yo ki yo i i gwé séñha.+ U nlama bé tééda sesema i ngand Pasa letee ni kegla.+

26 “U ga lona matam ma bisu ma ma nlôôha malam ma hisi hioñ i ndap Yéhôva Nyambe+ woñ.

“U nlama bé lamb man kembee ikété milik mi nyañ.”+

27 Yéhôva a kal ki Môsi le: “U ga tila i bibañga+ bini, inyule ni i bibañga bini nyen me yé i boñ malômbla ni we, yak ni Israel.”+ 28 A yén ha ni Yéhôva 40 ma dilo.* A bi je bé bret, a nyo bé to malép.+ A tila bibañga bi malômbla, hala wee Jôm li Mambén,*+ mu dibambha di ngok.

29 I mbus ha, Môsi a sôs hikôa Sinai ni dibambha di ngok di Mbôgi diba mu woo+ wé. I ngéda a bi sôs hikôa, Môsi a bé yi bé le kiki a bi pot ni Nyambe, su* wé u bé bai. 30 I ngéda Arôn ni bon ba Israel bobasôna ba bi tehe Môsi, ba yimbe le su wé u mbai, ba kon woñi i tiige nye bebee.+

31 Ndi Môsi a sébél bo. Arôn ni baane bobasôna ba litén ba lo i boma nye, Môsi a kwel ni bo. 32 I mbus, bon ba Israel bobasôna ba tiige nye bebee, a kal bo mambén momasôna Yéhôva a bi ti nye i hikôa Sinai.+ 33 I ngéda Môsi a bé a mal kwel ni bo, a bé a hô su wé ni libadô.+ 34 Ndi i ngéda Môsi a bé a jôp i bisu bi Yéhôva inyu kwel ni nye, a bé a héya libadô letee le a pam.+ I ngéda a bé a pam, a bé a kal bon ba Israel mambén a bi kôhna.+ 35 Bon ba Israel ba bé tehe le su u Môsi u mbai; i mbus, Môsi a bé a hô su wé ni libadô letee a témb a jôp inyu kwel ni Nyambe.*+

35 I mbus ngéda, Môsi a kot ntôñ u Israel wonsôna, a kal bo le: “Haana nyen Yéhôva a nkal le mam ma bôña:+ 2 bôlô i nlama séla dilo disamal, ndi hilo hi nyônôs isaambok hi ga ba yom ipubhaga inyu nan, hi yé sabat i bañga noi inyu Yéhôva.+ I mut a ga sal i kel sabat a nlama nôla.+ 3 I kel sabat, ni nlama bé kuye hié mu bahoma bobasôna ni nyééne.”

4 Môsi a kal ki ntôñ u Israel wonsôna le: “Haana nyen Yéhôva a nkal: 5 ‘Ni yôñôl Yéhôva likébla mu gwom ni gwé.+ Hiki mut nu ñem u ntinde i ti yom,+ a lona likébla inyu Yéhôva: gôl, silba, mamuna, 6 bôñgô i i yé mangoñ,* mahuu ma ntômba ma ma yé wedewede,* bôñgô i i nkôyôp tjôôm, loñge bôñgô,* mahuu ma kembee,+ 7 bikôp bi balôm ba mintômba bi ba nkuibaha, bikôp bi hiel hiobi, bikék bi akasia, 8 môô inyu bilambe, labinda inyu môô mapubhaga ni inyu biloñge bi binjinjiñ,+ 9 ngok ônix, ni ini ngok ipe inyu éde mu éfôd,+ ni mu hultôl.+

10 “‘I bôt bobasôna ba gwé likeñge*+ nyoo i bééni, ba loo, ba boñ ki gwom gwobisôna Yéhôva a nkal, 11 hala wee: lap ni ndap yé libadô, ni bikôp bi bi nhô yo, ni bibéndél gwé, ni mabam mé, ni bihimbil gwé, ni mbiñ yé, yak ni bitééne gwé; 12 Nkuu+ ni mimbôñgô nwé mi bikék,+ ni ngudul,+ ni libadô+ li li mbagal bituñ; 13 téblé+ ni mimbôñgô nwé mi bikék, ni bisélél gwé gwobisôna, ni bret ba mbii i bisu bi Nyambe;+ 14 tééne bilambe+ inyu ti mapubi ni bisélél gwé, bilambe gwé ni môô inyu ti mapubi;+ 15 juu li binjinjiñ+ ni mimbôñgô nwé mi bikék; môô mapubhaga, ni biloñge bi binjinjiñ;+ libadô inyu lijubul li lap; 16 juu li bisesema bi ntul i hié+ ni bumul mamuna, mimbôñgô nwé mi bikék ni bisélél gwé gwobisôna; bômbôô pan lôñni tééne+ yé; 17 mabadô ma lipénd li kotoo,+ mbiñ yé ni bitééne gwé; libadô inyu lijubul li kotoo; 18 bon ba bikék ba lap ni bon ba bikék ba kotoo lôñni minkôô+ nwap; 19 mambot ma ma yé mbagak loñge+ inyu gwel nson ikété homa mpubhaga, mambot mapubhaga inyu prisi Arôn,+ ni mambot bon bé bôlôm ba ga haba inyu gwel nson u prisi.’”

20 Ntôñ u Israel wonsôna u nyodi i bisu bi Môsi. 21 Hala nyen hiki mut nu ñem wé ni mahoñol mé* ma bé tinde nye i ti yom,+ a bé a lo, a ti likébla inyu Yéhôva le li gwéélana inyu boñ ndap libadô i likoda, inyu boñ gwom gwobisôna bi mbéda inyu nson wé, ni inyu boñ mambot mapubhaga. 22 Bôlôm ni bôda ba bé lo ndigi, lo ni lo, hiki mut nu ñem u bé tinde nye i ti yom, a bé a lona bikwen, dimbuñga,* dilonde, ni bieñg bi nyañga bipe, yak ni mintén mi gwom bi gôl nwominsôna. Bobasôna ba bé lona Yéhôva+ makébla* map ma gôl. 23 Yak i bôt bobasôna ba bééna bôñgô i i yé mangoñ, mahuu ma ntômba ma ma yé wedewede, bôñgô i i nkôyôp tjôôm, loñge bôñgô,* mahuu ma kembee, bikôp bi balôm ba mintômba bi ba nkuibaha, ni bikôp bi hiel hiobi, ba bé ba lona i gwom bi. 24 I bôt bobasôna ba bééna ngôñ i ti silba ni mamuna, ba bé ti gwo inyu Yéhôva, yak i bôt bobasôna ba bééna bikék bi akasia ba bé lona gwo inyu mintén mi bibôlô nwominsôna.

25 Bôda ba likeñge+ bobasôna ba bé bañ bôñgô ni moo map, ba lona ki i gwom ba bi bañ: bôñgô i i yé mangoñ, bôñgô i mahuu ma ntômba ma ma yé wedewede, bôñgô i i nkôyôp tjôôm, ni loñge bôñgô.* 26 Yak bôda ba likeñge bobasôna, ba ñem u bi tinde i boñ hala, ba bi bañ bôñgô ni mahuu ma kembee.

27 Yak baane ba lona ngok ônix ni ini ngok ipe ba ga éde mu éfôd* ni mu hultôl,+ 28 ba lona ki labinda ni môô inyu bilambe, inyu môô mapubhaga,+ ni inyu biloñge bi binjinjiñ.+ 29 Bôlôm ni bôda bobasôna, ba miñem mi bé tinde bo i ti yom, ba bé lona yo inyu nson u Yéhôva, kiki a bi kal bo ni njel Môsi le ba boñ; bon ba Israel ba bé lona yo kiki likébla ñem u bé tinde bo i ti inyu Yéhôva.+

30 Môsi a kal ni bon ba Israel le: “Nuna-ki, Yéhôva a mal pohol Bézalél, man Uri, man Hur, nu litén li Yuda.+ 31 A mal ki yônôs nye ni mbuu Nyambe, le a bana pék, ni bañga yi, lôñni likeñge i boñ mintén mi bibôlô nwominsôna 32 inyu tjek bibôlô bi likeñge, inyu ôô gwom bi gôl, gwom bi silba ni gwom bi mamuna, 33 inyu kôñg ngok ni boñ le i jôp loñge ikété bipañgbene gwap, ni inyu gwélél bikék inyu boñ mintén mi gwom nwominsôna. 34 A ti ki nye ngap i niiga, nye ni Ôhôliab+ man Ahisamak, nu litén li Dan. 35 A mal yônôs miñem nwap ni likeñge*+ inyu boñ mintén mi bibôlô nwominsôna, ni bôlô i mut a mage gwom ni bôlô i mut a mbak gwom ni bôñgô i i yé mangoñ, ni bôñgô i mahuu ma ntômba ma ma yé wedewede, ni bôñgô i i nkôyôp tjôôm lôñni loñge bôñgô,* yak ni bôlô yosôna i mut nu a mbañ mabadô. I bôt bana ba ga boñ mintén mi bibôlô nwominsôna, bo ki bon ba ga kôôba mintén mi bibôlô bi likeñge nwominsôna.

36 “Bézalél a ga sal ni Ôhôliab lôñni hiki mut likeñge* nu Yéhôva a mal ti pék ni yi kayéle a yi gwel nson wonsôna u homa mpubhaga, ndik kiki Yéhôva a bi kal.”+

2 I mbus, Môsi a sébél Bézalél ni Ôhôliab lôñni hiki mut likeñge nu Yéhôva a bi ha pék+ ikété ñem wé, hiki mut nu ñem u bé tinde nye i ti nyemede ni ñem wé wonsôna inyu gwel nson.+ 3 Ba yoñ makébla+ momasôna bon ba Israel ba bi lona yak Môsi inyu nson u homa mpubhaga. Ndi hiki kegla, bon ba Israel ba bé ke ni bisu i lona makébla ñem u bé tinde bo i ti.

4 I ngéda ba bi bôdôl nson mpubhaga, bôt ba likeñge bobasôna ba bé lo, wada i mbus nuu, 5 ba kalak Môsi le: “I gwom bôt ba litén ba yé i lona, bi nloo gwom bi mbéda inyu nson Yéhôva a nti oda le u bôña.” 6 Jon Môsi a bi ti oda le ba legel mu homa litén li nyééne le: “A bôlôm, a bôda, ni lona ha bañ yom yo ki yo inyu likébla lipubhaga.” Hala nyen ba bi sôña bôt ba litén le ba kônde ha bañ lona gwom bipe. 7 Gwom bi bi kola inyu nson wonsôna u bé lama séla, bi loo yak gwom bi bé béda.

8 Bôt ba likeñge+ ba oñ lap+ ni jôm li mabadô, mbañak ni nkébék loñge bôñgô,* bôñgô i i yé mangoñ,* bôñgô i mahuu ma ntômba i i yé wedewede* ni bôñgô i i nkôyôp tjôôm; a* mage bititii bi bikérubim+ mu ngii. 9 Hiki libadô li bé ap môm ima ma dikéñéé di moo* ni juem, pôk yé i bak dikéñéé di moo dina. Mabadô momasôna ma bé ap nlélém. 10 I mbus, a at mabadô matan, a at ki mana mabadô matan mape yap pes. 11 A kôñôl ki dilonde i lisuk li libadô likeñi jada, i het mabadô ma ñadba, dilonde di bak ni bôñgô i i yé mangoñ. A boñ nlélém jam i lisuk li lini libadô likeñi lipe, i het mabadô ma ñadba. 12 A kôñôl 50 ma dilonde i lisuk li libadô likeñi jada, a kôñôl ki 50 ma dilonde i lisuk li lini libadô likeñi lipe, le ndi dilonde di nun-naga i het mabadô ma ñadba. 13 A boñ yak 50 ma bibéndél bi gôl, a gwélél gwo inyu at mabadô makeñi le ndi lap i ba ndik yom yada.

14 I mbus ha, a boñ mabadô ni mahuu ma kembee inyu hô lap. A boñ jôm li mabadô+ ni jada. 15 Hiki libadô li bé ap môm maa ma dikéñéé di moo, pôk yé i bak dikéñéé di moo dina. I jôm li mabadô ni jada li, li bé ap nlélém. 16 A at mabadô matan, a at ki mana mabadô masamal mape yap pes. 17 A kôñôl 50 ma dilonde i lisuk li libadô likeñi jada, i het mabadô ma ñadba; a kôñôl ki 50 ma dilonde i lisuk li lini libadô likeñi lipe, i het mabadô ma ñadba. 18 A boñ 50 ma bibéndél bi mamuna inyu at mabadô, kayéle lap i ba ndik yom yada.

19 A boñ bikôp bi balôm ba mintômba bi ba nkuibaha inyu lap, a boñ ki bikôp bi hiel hiobi inyu hô yo.+

20 I mbus, a boñ mabam inyu lap ni bikék bi akasia,+ a téé+ ki mo. 21 Hiki libam li bééna ntel u jôm li dikéñéé di moo, pôk yé i bak hikéñéé hi woo hiada ni pes. 22 Hiki libam li bééna mapanda ima.* Hala nyen a bi boñ inyu mabam momasôna ma lap. 23 A boñ mabam inyu pes lap i i mbéñge nwelmbok: 20 ma mabam. 24 A boñ ki 40 ma bitééne bi silba, a ha gwo isi 20 ma mabam: bitééne biba inyu mapanda ima ba libam jada; bitééne biba ki bi yé inyu mapanda ima+ ma lii libam lipe. 25 Inyu ini pes ipe i lap, hala wee i pes ñombok, a boñ 20 ma mabam, 26 ni 40 ma bitééne bi silba inyu mabam ma: bitééne biba isi libam jada, bitééne biba ki isi lii libam lipe.

27 Inyu pes i mbus mbééga i lap, hala wee i pes hiôñg, a boñ mabam+ masamal. 28 A boñ mabam ima, ma ma bé kiki mbiñ makas i mbus mbééga i lap. 29 Mbiñ i bé iba iba ibôdôl ’isi ipam i ngii, letee ni i sômôl bisu. Hala nyen a bi boñ inyu mbiñ makas yo iba. 30 Mabam momasôna ma bé juem, bitééne gwap bi silba bi bak 16: bitééne biba isi libam jada, bitééne biba ki isi lii libam lipe.

31 I mbus ha, a boñ bihimbil ni bikék bi akasia, bihimbil bitan inyu mabam ma pes lap+ yada, 32 bihimbil bitan ki inyu mabam ma pes lap ipe, ni bihimbil bitan inyu mabam ma pes lap i i yé i hiôñg, hala wee i mbus mbééga. 33 A boñ ki himbil i ñemkété le i tagbe i ñemkété u mabam, i kenek ibôdôl lini lisuk ipam lii lisuk lipe. 34 A hoo mabam gôl, a boñ ki bisômôl bi gôl inyu tégbaha bihimbil, a hoo yak bihimbil gôl.+

35 I mbus, a boñ libadô li li mbagal bituñ,+ mbañak ni bôñgô i i yé mangoñ, bôñgô i mahuu ma ntômba i i yé wedewede, bôñgô i i nkôyôp tjôôm, ni nkébék loñge bôñgô. A mage bititii+ bi bikérubim+ mu libadô li. 36 A bôñôl ki jo mbiñ ina ni kék akasia, a hoo mbiñ gôl, yak dikoba di mbiñ di bé ni gôl, a ôô ki bitééne bi silba bina inyu mbiñ i. 37 A boñ yak libadô inyu lijubul li lap, mbañak ni bôñgô i i yé mangoñ, bôñgô i mahuu ma ntômba i i yé wedewede, bôñgô i i nkôyôp tjôôm, ni nkébék loñge bôñgô, bôñgô yosôna i bak mbagak;+ 38 a boñ ki mbiñ itan ni dikoba tjap. A hoo ngii yap gôl, a hoo ki minkôô* nwap gôl, ndi bitééne gwap gwo bitan bi bé ni mamuna.

37 I mbus ha, Bézalél+ a boñ Nkuu+ ni kék akasia, Nkuu u bé ap dikéñéé di moo* diba ni pes, pôk yé i bak hikéñéé hi woo hiada ni pes, ntel wé u bak hikéñéé hi woo hiada ni pes.+ 2 A hoo nkuu bañga gôl mukété ni i mbégdé, a boñ ki ñôndi gôl mu mapañ mé momasôna.+ 3 A ôô ki bisômôl bi gôl bina inyu nkuu, a éde gwo i ngii makôô mé mo ma-na; bisômôl biba inyu pes yada, bisômôl biba ki inyu ii pes ipe. 4 A boñ yak mimbôñgô mi bikék ni kék akasia, a hoo nwo gôl.+ 5 A som mimbôñgô mi bikék mu bisômôl bi yé i mapañ ma Nkuu inyu begee Nkuu.+

6 A boñ ngudul ni bañga gôl.+ I bé ap dikéñéé di moo diba ni pes, pôk yé i bak hikéñéé hi woo hiada ni pes.+ 7 I mbus, a boñ bikérubim+ bi gôl biba; a gwélél hama inyu boñ gwo, a téé ki gwo i masuk mo ima ma ngudul.+ 8 Kérubim yada i bé i lisuk jada li ngudul, kérubim ipe i bak i lisuk lipe li ngudul. A boñ bikérubim i masuk mo ima ma ngudul. 9 Bikérubim gwo biba bi bé sambal bipapai gwap i ngii, bipapai gwap bi hôk ngudul.+ Kérubim yada i bé i mbombom i ini ipe, masu ma bikérubim ma nunuk ngudul.+

10 I mbus ha, a boñ téblé ni kék akasia,+ i bé ap dikéñéé di moo diba, pôk yé i bak hikéñéé hi woo hiada, ntel wé u bak hikéñéé hi woo hiada ni pes.+ 11 A hoo yo bañga gôl, a boñ ki ñôndi gôl mu mapañ mé momasôna. 12 I mbus, a kéñ mapañ mé ni minten, mi ban-ga pôk i libai li woo jada,* a boñ ki ñôndi gôl mu mapañ ma minten momasôna. 13 Handugi hala, a ôô bisômôl bi gôl bina mu, a éde gwo i makas mé ma-na i het makôô mé mo ma-na ma yé. 14 Bisômôl bi bé bebee ni minten, bi nidik mimbôñgô mi bikék mi mi nhôla i begee téblé. 15 A boñ ki mimbôñgô mi bikék ni kék akasia, a hoo nwo gôl, ba bé beegene nwo téblé. 16 I mbus ha, a boñ bisélél ba bé bii i téblé ni bañga gôl: minleha nwé, ni mabôndô mé, ni madis mé lôñni dibôi di ba ga gwélél inyu suglene makébla ma wai.+

17 A boñ ki tééne bilambe+ ni bañga gôl. A gwélél hama inyu boñ tééne bilambe. Tééne yé, tén yé, mintjep nwé, mabôndô mé, matole mé ni bisem gwé bi bé ndik yom yada.+ 18 Tééne bilambe i bééna mintjep minsamal mu bipes gwé gwo biba, mintjep maa i pes yada, mintjep maa ki ii pes ipe. 19 I pes yada i tén, hiki ntjep u bééna mabôndô maa ma ma mpôna mbônji bikai, hiki ntjep u ban-ga matole ni bisem bi bi noñna; yak ii pes ipe i tén, hiki ntjep u bééna mabôndô maa ma ma mpôna mbônji bikai, hiki ntjep u ban-ga matole ni bisem bi bi noñna. Hala nyen ba bé boñ inyu mintjep minsamal mi tén i tééne bilambe. 20 Tén i tééne bilambe i bééna mabôndô ma-na ma ma bé pôna mbônji bikai, matole mé ni bisem gwé bi bé noñna. 21 Litole jada li bé isi mintjep ima mi bisu mi tén, litole jada li bak ki isi mintjep ima mi mi noñ, yak litole jada li bak isi mintjep ima mi mi nsôk. Hala nyen ba bi boñ inyu mintjep minsamal mi tén i tééne bilambe. 22 Matole, mintjep, ni tééne bilambe yosôna bi bé ndik yom yada, ba bi gwélél hama inyu boñ yo ni bañga gôl. 23 A boñ ki bilambe bisaambok+ ni biyôñôl* gwé bi nsiñga lôñni bibeglene gwé bi hié ni bañga gôl. 24 A bi gwélél talént* yada i bañga gôl inyu boñ tééne bilambe ni bisélél gwé.

25 I mbus, a boñ juu li binjinjiñ+ ni kék akasia. Bipes gwé gwo bina bi bé ap nlélém; juu li bé ap hikéñéé hi woo hiada, pôk yé i bak hikéñéé hi woo hiada, ntel wé u bak dikéñéé di moo diba. Juu li bisesema ni bitoñ gwé bi bé ndik yom yada.+ 26 A hoo jo bañga gôl: i ngii yé, i bipes gwé gwobisôna, ni i bitoñ gwé; u boñ ki ñôndi gôl mu mapañ mé momasôna. 27 A bôñôl ki juu li bisesema bisômôl biba bi gôl isi mapañ mé, i bipes gwé biba, biba hiki pes kayéle ba som mimbôñgô mi bikék mu bisômôl inyu begee jo. 28 I mbus ha, a boñ mimbôñgô mi bikék ni kék akasia, a hoo nwo gôl. 29 A boñ ki môô mapubhaga*+ ni biloñge bi binjinjiñ,+ bi bak bañga, bi bak ki mpôdnaga loñge.*

38 A boñ juu li bisesema bi ntul i hié ni kék akasia. Bipes gwé gwo bina bi bé ap nlélém: li bé ap dikéñéé di moo* ditan, pôk yé ki i bak dikéñéé di moo ditan, yak ntel wé u bak dikéñéé di moo daa.+ 2 A boñ ki bitoñ mu makas mé mo ma-na; bitoñ ni juu li bisesema bi bé ndik yom yada. A hoo ki juu li bisesema mamuna.+ 3 I mbus ha, a boñ bisélél gwobisôna bi juu li bisesema: minlôñga, biséya, basoso ba nwas, ni bibeglene bi hié. A boñ bisélél gwé gwobisôna ni mamuna. 4 A boñ ki bumul inyu juu li bisesema, hala wee ngahi mamuna. A som i ngahi i isi minten mi juu li bisesema, i bak i ñemkété u ntel u juu li bisesema. 5 A ôô bisômôl bina mu makas mo ma-na, bebee ni bumul mamuna; bi bé gwel mimbôñgô mi bikék. 6 I mbus, a boñ mimbôñgô mi bikék bi akasia, a hoo nwo mamuna. 7 A som mimbôñgô mi bikék ikété bisômôl bi bi bé i bipes gwo biba bi juu li bisesema inyu begee jo. A oñ juu li bisesema nlélém kiki nkuu u mabam u u gwé hôk.

8 A boñ ki bômbôô pan i mamuna+ ni tééne yé mamuna; a gwélél biléman* bi bôda ba ba bé ntjegek loñge inyu gwel nson i lijubul li ndap libadô i likoda.

9 I mbus ha, a boñ kotoo+ inyu lap. I pes nwelmbok i kotoo, a boñ mabadô mbañak ni nkébék loñge bôñgô,* ma bé ap 100 dikéñéé di moo.+ 10 Kotoo i bééna 20 ma mbiñ ni 20 ma bitééne bi mamuna, dikoba di mbiñ ni minkôô* nwap bi bé ni silba. 11 Yak mabadô ma lipénd i pes ñombok ma bé ap 100 dikéñéé di moo. Lipénd li bééna 20 ma mbiñ ni 20 ma bitééne bi bi bé ni mamuna. Dikoba di mbiñ ni minkôô* nwap bi bé ni silba. 12 Ndi i pes hiôñg, mabadô ma lipénd ma bé ap 50 ma dikéñéé di moo. Mbiñ i bé 10, yak bitééne bi bé 10; dikoba di mbiñ ni minkôô* nwap bi bé ni silba. 13 Pôk i lipénd li kotoo i pes likôl, i het hiañgaa hi mpémél, i bé 50 ma dikéñéé di moo. 14 Pes walôm i lipénd li kotoo i bééna mabadô ma 15 dikéñéé di moo, i ban-ga ki mbiñ aa ni bitééne baa. 15 Yak pes waé i lijubul li kotoo i bééna mabadô ma 15 dikéñéé di moo, i ban-ga ki mbiñ aa ni bitééne baa. 16 Mabadô momasôna ma lipénd li kotoo ma bé mbañak ni nkébék loñge bôñgô.* 17 Bitééne inyu mbiñ bi bé ni mamuna, dikoba di mbiñ ni minkôô* nwap bi bak ni silba, ngii mbiñ i bé nhook ni silba; yak mbiñ yosôna i i bé mu kotoo+ i bééna minkôô mi silba.

18 Libadô li lijubul li kotoo li bé mbagak ni bôñgô i i yé mangoñ,* ni bôñgô i mahuu ma ntômba i i yé wedewede,* ni bôñgô i i nkôyôp tjôôm, yak ni nkébék loñge bôñgô.* Libadô li bé ap 20 ma dikéñéé di moo, ntel wé u bak dikéñéé di moo 5, nlélém ntel ni mabadô ma lipénd li li nkéña kotoo.+ 19 Mbiñ yé ina ni bitééne gwé bina bi bé ni mamuna. Dikoba di mbiñ ni minkôô* nwap bi bé ni silba, ba hoo ki ngii mbiñ ni silba. 20 Bon ba bikék ba lap bobasôna lôñni bon ba bikék ba kotoo ba bé ni mamuna.+

21 Nsoñgi u gwom bi lap unu, hala wee lap Mbôgi;+ Môsi a bi ti Lôk Lévi+ oda le ba gwel i nson unu isi énél i Itamar,+ man prisi Arôn. 22 Bézalél,+ man Uri, man Hur, nu litén li Yuda, a bi boñ mam momasôna Yéhôva a bi kal Môsi. 23 Ôhôliab+ man Ahisamak, nu litén li Dan, a bé hôla Bézalél; a bé mut likeñge, ni mut a mage gwom, ni mut a mbak gwom ni bôñgô i i yé mangoñ, ni bôñgô i mahuu ma ntômba i i yé wedewede, ni bôñgô i i nkôyôp tjôôm lôñni loñge bôñgô.*

24 I gôl yosôna ba bi gwélél inyu nson wonsôna u homa mpubhaga i bé gôl ba bi ti kiki likébla ba ndéñgés:+ 29 talént* ni 730 sékel,* inoñnaga ni sékel i homa mpubhaga.* 25 Yak silba i ntôñ u bôt ba ba bi tila môl map i bé 100 talént ni 1 775 sékel, inoñnaga ni sékel i homa mpubhaga.* 26 Pes sékel yada hiki mut a bé ti, i bé pes sékel yada inoñnaga ni sékel i homa mpubhaga.* I bôt ba bi tila môl map, ba ba bééna 20 ma nwii tole iloo ha,+ ba bé 603 550.+

27 Ba bi gwélél 100 talént i silba inyu ôô bitééne bi homa mpubhaga ni bitééne bi libadô;* 100 bitééne i bé ti 100 talént, talént yada inyu tééne yada.+ 28 A gwélél 1 775 sékel inyu boñ dikoba inyu mbiñ, a hoo ngii yap mamuna, a kañ mbiñ ni minkôô.

29 Mamuna ba bi ti kiki makébla* ma bé 70 ma talént ni 2 400 sékel. 30 A gwélél i mamuna ma inyu boñ bitééne i lijubul li ndap libadô i likoda, ni juu li bisesema li mamuna, ni bumul mamuna, ni bisélél gwobisôna bi juu li bisesema, 31 ni bitééne bi bi yé mu kotoo, ni bitééne bi lijubul li kotoo, ni bon ba bikék ba lap bobasôna lôñni bon ba bikék+ bobasôna ba ba yé mu kotoo.

39 Ba bi gwélél bôñgô i i yé mangoñ,* ni bôñgô i mahuu ma ntômba i i yé wedewede,* ni bôñgô i i nkôyôp tjôôm+ inyu boñ mambot ma ma yé mbagak loñge inyu gwel nson ikété homa mpubhaga. Ba boñ mambot mapubhaga ma ma bé inyu Arôn,+ kiki Yéhôva a bi kal Môsi.

2 Inyu boñ éfôd,*+ a bi gwélél gôl, bôñgô i i yé mangoñ, bôñgô i mahuu ma ntômba i i yé wedewede,* bôñgô i i nkôyôp tjôôm, ni nkébék loñge bôñgô. 3 Ba gwélél hama inyu bép gôl, ba yilha yo mapep ma gôl, a kit yo le i yila bôñgô le ba mbak ni bôñgô i i yé mangoñ,* bôñgô i mahuu ma ntômba i i yé wedewede, bôñgô i i nkôyôp tjôôm, ni nkébék loñge bôñgô;* a mage éfôd* ni i bôñgô i. 4 Ba boñ bipisis bi mabadô inyu éfôd* i bituu, bi bi yé ñadak mu masuk mé mo ima ma ngii. 5 Mbagak ngôli,* u u bé ntéñék i éfôd* inyu gwel yo,+ u bi bôña ni minlélém mi bisélél, hala wee gôl, bôñgô i i yé mangoñ, bôñgô i mahuu ma ntômba i i yé wedewede, bôñgô i i nkôyôp tjôôm, ni nkébék loñge bôñgô, kiki Yéhôva a bi kal Môsi.

6 I mbus, ba bi som ngok ônix mu bipañgbene bi gôl, ba kédél môl ma bon bôlôm ba Israel mu ngii yap, kiki ba nkédél béndél.+ 7 A* bii i ngok i yo iba i ngii bipisis bi mabadô bi bi bé i bituu bi éfôd,* le i ba ngok mbigda inyu bon ba Israel,+ kiki Yéhôva a bi kal Môsi. 8 A* boñ ki hultôl,+ kiki mut likeñge a bi mage éfôd,* hala wee ni gôl, ni bôñgô i i yé mangoñ, ni bôñgô i mahuu ma ntômba i i yé wedewede, ni bôñgô i i nkôyôp tjôôm, ni nkébék loñge bôñgô.+ 9 I ngéda ba bé ba bôk yo, bipes gwé gwo bina bi bé ap nlélém. Ba boñ hultôl kayéle i ngéda ba bé ba bôk yo, i bé ap nsamblak libai li woo* jada, pôk yé i bak nsamblak libai li woo jada. 10 Ba boñ minlôñ mi ngok mina mu hultôl. Nlôñ u bisu: rubi, tôpasô, ni émérôd. 11 Nlôñ u nyônôs iba: turkuas, safirô, ni yaspi. 12 Nlôñ u nyônôs aa: ngok léshem,* agat, ni amétistô. 13 Nlôñ u nyônôs ina: krisôlitô, ônix, ni jad. Ba bé som i ngok i mu bipañgbene bi gôl. 14 Ngok i bééna môl ma 12 bon bôlôm ba Israel. Ba bi kédél i môl ma kiki ba nkédél béndél, hiki ngok i bééna jôl li litén jada ikété 12 matén.

15 I mbus ha, ba bi kép minsañ mi hultôl, kiki ba nkép minkôô mi bañga gôl.+ 16 Ba boñ ki bipañgbene bi gôl biba ni bisômôl bi gôl biba, ba éde bisômôl i makas ima ma hultôl. 17 I mbus, ba tégbaha minkôô ima mi gôl ikété bisômôl biba bi bi yé i makas ima ma hultôl. 18 Ba tégbaha masuk ima ma minkôô ima mu bipañgbene biba, ba kañ nwo i bipisis bi bi yé mu bituu bi éfôd,* i bisu gwé. 19 I mbus hultôl, ba boñ bisômôl bi gôl biba, ba éde gwo i makas mé ima ma ma yé isi, i ngii éfôd.*+ 20 Ba boñ ki bisômôl biba bi gôl, ba bii gwo i bisu bi éfôd,* nyoo isi bipisis biba bi bi yé mu bituu bi éfôd, bebee ni homa gwom bi ñadba, i ngii mbagak ngôli* i éfôd. 21 Kiki jam li nsôk, ba gwel hultôl ni nkôô u u yé mangoñ, won u bé gwel bisômôl bi hultôl ni bisômôl bi éfôd.* Hala a bé boñ le hultôl i yégle i niñi mu éfôd, i ngii mbagak ngôli,* kiki Yéhôva a bi kal Môsi.

22 I mbus, a* bi boñ mbôñgô mbot u éfôd* u u gwé bé binam, a bak i mbot ini yosôna ni bôñgô i i yé mangoñ,+ nlélém kiki mbak gwom. 23 Lipondo li bé i ngii, ha i ñemkété mbôñgô mbot u u gwé bé binam, li bak kiki lipondo li kôti kei. Mapañ momasôna ma lipondo ma bé mbagak inyu boñ le jombe li wéhi bañ. 24 Homa nyensôna i lisuk li mbôñgô mbot u u gwé bé binam, ba boñ ki matam ma grénad ni bôñgô i i yé mangoñ, ni bôñgô i mahuu ma ntômba i i yé wedewede, ni bôñgô i i nkôyôp tjôôm, bôñgô yosôna i bak nkébék. 25 Ba boñ yak mangeñee ma bañga gôl, ba ha mangeñee ipôla matam ma grénad homa nyensôna i lisuk li mbôñgô mbot u u gwé bé binam, ipôla matam ma grénad; 26 Ba noña lingeñee jada ni litam li grénad jada, lingeñee jada ni litam li grénad jada, homa nyensôna i lisuk li mbôñgô mbot u u gwé bé binam u u bé gwéélana inyu gwel nson, kiki Yéhôva a bi kal Môsi.

27 Ba bi gwélél ki loñge bôñgô* inyu bak mbôñgô mbot ntéñék maniga-maniga, i mut a mbak gwom nyen a bi bak yo inyu Arôn ni bon bé bôlôm,+ 28 a boñ ki yañsi+ ni loñge bôñgô,* a boñ bieñg bi dikôtô ni loñge bôñgô,*+ a boñ ki minkanda ni nkébék loñge bôñgô;+ 29 a boñ yak libadô li nkébék loñge bôñgô, ni bôñgô i i yé mangoñ, ni bôñgô i mahuu ma ntômba i i yé wedewede lôñni bôñgô i i nkôyôp tjôôm, bôñgô yosôna i bak mbagak, kiki Yéhôva a bi kal Môsi.

30 Sôk i nsôk, ba bi gwélél bañga gôl inyu boñ hibambha hi gôl hi hi mbai, hibambha hi gôl hipubhaga,* ba kédél mu ngii kiki ba nkédél béndél, le: “Libak lipubi li yé li Yéhôva.”+ 31 Ba éde nkôô u bôñgô i i yé mangoñ mu libam, inyu bii jo i ngii yañsi kiki Yéhôva a bi kal Môsi.

32 Hala nyen nson wonsôna u lap, ndap libadô i likoda, u bi mal; bon ba Israel ba boñ mam momasôna Yéhôva a bi kal Môsi.+ Ba boñ toi hala.

33 I mbus, ba lona lap+ yak Môsi, ndap libadô+ ni bisélél gwé gwobisôna: bibéndél+ gwé, mabam+ mé, bihimbil+ gwé, mbiñ yé, ni bitééne+ gwé; 34 bikôp bi balôm ba mintômba bi ba nkuibaha,+ bikôp bi hiel hiobi, libadô li li mbagal bituñ,+ 35 nkuu Mbôgi ni mimbôñgô nwé mi bikék,+ ngudul;+ 36 téblé, bisélél+ gwé gwobisôna, ni bret ba mbii i bisu bi Nyambe; 37 tééne bilambe i i yé ni bañga gôl, bilambe+ gwé (hala wee minlôñ mi bilambe) ni bisélél+ gwé, lôñni môô inyu ti mapubi;+ 38 juu li bisesema+ li gôl, môô mapubhaga,+ biloñge bi binjinjiñ,+ libadô+ inyu lijubul li lap; 39 juu li mamuna+ ni bumul yé mamuna, mimbôñgô nwé mi bikék+ ni bisélél+ gwé gwobisôna, bômbôô pan lôñni tééne+ yé; 40 mabadô ma lipénd li kotoo, mbiñ yé ni bitééne+ gwé; libadô+ inyu lijubul li kotoo, minkôô nwé ni bon bé ba bikék+ lôñni bisélél gwobisôna inyu nson lap, inyu ndap libadô i likoda; 41 mambot ma ma yé mbagak loñge inyu gwel nson ikété homa mpubhaga, mambot mapubhaga inyu prisi Arôn,+ ni mambot bon bé bôlôm ba ga haba inyu gwel nson u prisi.

42 Bon ba Israel ba bi boñ nson wonsôna inoñnaga ni mam momasôna Yéhôva a bi kal Môsi.+ 43 I ngéda Mosi a bi béñge nson wap wonsôna, a tehe le ba bi boñ toi kiki Yéhôva a bi kal; Môsi a sayap bo.

40 Yéhôva a kal ni Môsi le: 2 “I hilo hi bisu hi sôñ bisu nyen u ga téé lap, hala wee ndap libadô i likoda.+ 3 Ha nkuu Mbôgi mukété,+ u sôô ki Nkuu i mbus libadô.+ 4 U ga lona téblé,+ u bii gwom ba nlama tek mu ngii yé; u ga lona tééne bilambe,+ u kuye ki bilambe+ gwé. 5 I mbus, u bii juu li gôl li li yé inyu binjinjiñ+ i bisu bi nkuu Mbôgi, u ha ki libadô i lijubul li lap.+

6 “U ga bii juu li bisesema bi ntul i hié+ i lijubul li lap, hala wee ndap libadô i likoda, 7 u tek ki bômbôô pan ipôla ndap libadô i likoda ni juu li bisesema, u ha ki malép mukété.+ 8 I mbus, boñ kotoo+ homa nyensôna ipañ lap, u kéi ki libadô+ i lijubul li kotoo. 9 Ha nyen u ga yoñ môô mapubhaga,+ u hoo lap ni gwom gwobisôna bi yé mukété,+ u yilha yo pubhaga ni bisélél gwé gwobisôna, inyu boñ le i yila yom ipubhaga. 10 U ga hoo juu li bisesema bi ntul i hié ni bisélél gwé gwobisôna; u yilha ki juu li bisesema lipubhaga, kayéle li yila juu li bisesema li li nlôôha ba mpubhaga.+ 11 U ga hoo ki bômbôô pan lôñni tééne yé, u yilha yo pubhaga.

12 “I mbus ha, u ga lona Arôn ni bon bé bôlôm i lijubul li ndap libadô i likoda, u pubus ki bo ni malép.+ 13 U ha Arôn mambot mapubhaga,+ u hoo nye,+ u yilha ki nye mpubhaga le ndi a gwélél me nson u prisi. 14 U ga tiigaha ki bon bé bôlôm bebee, u ha bo mimbôñgô mi mambot.+ 15 U ga hoo bo kiki u bi hoo isañ+ wap, kayéle ba gwélél me nson u prisi; i ngéda u ga hoo bo, hala a ga yilha bo ntôñ u biprisi inyu ngéda yosôna mu tjai tjap tjodisôna.”+

16 Môsi a boñ mam momasôna Yéhôva a bi kal nye.+ A boñ toi hala.

17 I sôñ bisu, i nwii mi nyônôs ima, i hilo hi bisu hi sôñ nyen ba bi téé+ lap. 18 I ngéda Môsi a bi téé lap, a tek bitééne+ gwé, a ha mabam+ mé, a som bihimbil+ gwé, a téé ki mbiñ yé. 19 Môsi a sambal libadô+ inyu hô lap, a hô ndap libadô ni bikôp,+ kiki Yéhôva a bi kal nye.

20 I mbus ha, a yoñ dibambha di ngok di Mbôgi,+ a ha tjo mukété Nkuu,+ a jubus ki mimbôñgô mi bikék+ mu bisômôl bi Nkuu, a bii yak ngudul+ mu ngii Nkuu.+ 21 Môsi a jôbna Nkuu ikété lap, a kéi libadô+ li li mbagal bituñ, a sôô nkuu Mbôgi,+ kiki Yéhôva a bi kal nye.

22 I mbus, a ha téblé+ ikété ndap libadô i pes ñombok i lap, i bisu bi libadô,* 23 Môsi a tek bret+ i homa wap i bisu bi Yéhôva, kiki Yéhôva a bi kal nye.

24 A bii tééne bilambe+ ikété ndap libadô i likoda i mbombom téblé, i pes nwelmbok i lap. 25 Môsi a kuye bilambe+ i bisu bi Yéhôva, kiki Yéhôva a bi kal nye.

26 A téé ki juu li gôl+ ikété ndap libadô i likoda, i bisu bi libadô, 27 inyu lighene biloñge bi binjinjiñ+ mu ngii yé,+ kiki Yéhôva a bi kal Môsi.

28 I mbus, a ha libadô inyu lijubul+ li lap i homa wé.

29 Môsi a bii juu li bisesema bi ntul i hié+ i lijubul li lap, hala wee ndap libadô i likoda, inyu boñ le a ti sesema i ntul i hié+ ni likébla li bijek mu ngii yé, kiki Yéhôva a bi kal nye.

30 A bi bii ki bômbôô pan ipôla ndap libadô i likoda ni juu li bisesema, a ha malép mukété inyu jôwa moo ni makôô.+ 31 Môsi bo Arôn lôñni bon bôlôm ba Arôn ba jôwa moo map ni makôô map mukété. 32 Hiki ngéda ba bé jôp i ndap libadô i likoda, ni i ngéda ba bé tiige bebee ni juu li bisesema, ba bé pubus bomede,+ kiki Yéhôva a bi kal Môsi.

33 Sôk i nsôk, a téé kotoo+ i mapañ momasôna ma lap ni ma juu li bisesema, a kéi ki libadô i lijubul li kotoo.+

Hala nyen Môsi a bi mal nson. 34 Ha nyen ond i bôdôl hô ndap libadô i likoda, yak lipém li Yéhôva li yon mu lap.+ 35 Môsi a bé la bé jôp i ndap libadô i likoda inyule ond i bé mu ngii yé, yak lipém li Yéhôva li yon mu lap.+

36 Hiki ngéda ond i bé nyodi i ngii lap, bon ba Israel ba bé ba nyodi i bahoma bobasôna ba bé telep mu liké+ jap. 37 Ndi i ngéda ond i bé nyodi bé, ba bé bé ba jôp njel.+ 38 Inyule ond i Yéhôva i bé i ngii lap njamuha, yak hié hi bé i ngii yé juu, i bisu bi litén li* Israel i bahoma bobasôna ba bé telep mu liké+ jap.