NÉHÉMIA

1 Bibañga bi Néhémia*+ bini, man Hakalia: I sôñ Kislev,* i nwii mi nyônôs 20, me bé i yale* i Susan.*+ 2 Hanani,+ mankéé wem wada, a bi lôl i Yuda ni bôt bape. Me bat bo lelaa Lôk Yuda i i bi yégle i yé, i i bé lôl i minkôm;+ me bat yak bo lelaa Yérusalem a yé. 3 Ba timbhe me le: “I bôt ba bi lôl i minkôm, ba ba nyégle nyoo i pes mbok,* ba yé ikété ngandak ndutu ni wonyuu.+ Lipénd li Yérusalem li nkwo,+ yak hié hi nligis manwemel mé.”+

4 Ndik kiki me nok i bibañga bini, me yén ’isi, me bôdôl maéya, me ee ngandak dilo; me sôga je,*+ me soohe ki Nyambe nu ngii. 5 Me kal le: “A Yéhôva, Nyambe nu ngii, Nyambe nunkeñi ni nu ba kôli kon woñi, nu a ntééda malômbla mé, a téñbege i gwés bôt ba ngwés nye, ba téédaga ki mambén mé.+ 6 Soho yibil mis moñ, u sédi ki ôô woñ i emble masoohe ma ngwélél woñ i len ini. Me nsoohe we juu ni njamuha+ inyu Lôk Israel, bagwélél boñ; me ntam ki bibéba litén li Israel li mboñ we. Me ni litén+ jem* di bi boñ béba. 7 Di bi boñ yaga we béba+ inyule di bi tééda bé mambén, matiñ, ni matéak u bi ti ngwélél woñ Môsi.+

8 “Soho, hoñol mabéhna* u bi ti ngwélél woñ Môsi i ngéda u kal le: ‘Ibale ni ndogop, me ga boñ le ni tjama ikété biloñ.+ 9 Ndi ibale ni ntémb i meeni, ni tééda mambén mem, ni nôgôl ki mo, to ibale bôt ba litén linan ba yé ntjamak letee ni i masuk ma ’isi,* m’a kot+ bo nyoo, me lona ki bo i homa me mpohol le jôl jem li ba.’+ 10 Ba yé bagwélél boñ ni litén joñ, li u bi kobol ni ngui yoñ ikeñi lôñni woo woñ ngui.+ 11 Éé a Yéhôva, soho, sédi ôô woñ inyu emble masoohe ma ngwélél woñ, ni masoohe ma bagwélél boñ ba ba yé maséé i ti jôl joñ lipém.* Soho, boñ ki le mam mem* ma kee loñge i len ini, ni le kiñe* i kônôl me ngoo.”+

Ha ngéda i, men me bé ti kiñe+ wai.*

2 I sôñ Nisan,* i nwii mi nyônôs 20+ mi ane i Kiñe Artaserses,+ wai i bé i bisu gwé; kiki lem, me bi yoñ wai, me ti yo kiñe.+ Ndi me bé ngi kañ su hala i bisu gwé. 2 Kiñe i bat me le: “Inyuki u nkañ su hala, ki le u nkon bé? U nlama bana ndutu i ñem, ha jam lipe bé.” Kiki me nok hala, me kon woñi ngandak.

3 Ndi me timbhe kiñe le: “A kiñe, niñ ntandaa ngéda! Lelaa me yé le me tjél kañ su, ki le tison i het ba bi jô basôgôlsôgôl bem i nkwo, yak hié hi nligis manwemel mé?”+ 4 Ha nyen kiñe i bat me le: “U gwé ngôñ ni kii?” Kunda yada, me soohe Nyambe nu ngii.+ 5 Me timbhe kiñe le: “A kiñe, ibale hala a nlémél we, ibale u yé ki maséé ni ngwélél woñ, ep me i Yuda, i tison i het ba bi jô basôgôlsôgôl bem, inyu boñ le me tiimba oñ yo.”+ 6 Kiñe i bat me, nwaa wé* a bak nye ipañ, le: “Liké joñ l’a nom dilo tjañen? U ga témb kekii?” Hala a lémél kiñe i ep me,+ yak me me kal nye imbe ngéda m’a témb.+

7 Ha nyen me bi kal kiñe le: “Ibale hala a nlémél kiñe, ba ti me bikaat le me ti gwo bangomin ba bipes bi mbok ba uu Ngwañ Lom,*+ le ba nwas me le me tagbe letee me pam i Yuda. 8 Ba ti ki me kaat inyu Asaf, ntééda lipan* li Kiñe, le a ti me bikék m’a gwélél kiki minkond inyu boñ manwemel ma nkum Ndap,*+ ni lipénd li tison,+ yak ni ndap i het m’a yééne.” Jon kiñe i bi ti me gwo,+ inyule woo u Nyambe wem nu konangoo u bé ni me.+

9 I ngéda me bi pam yak bangomin ba bipes bi mbok ba uu Ngwañ Lom, me ti bo bikaat bi kiñe. Kiñe i bi ep ki me lôñni baane ba mintôñ mi gwét ni bakilhosi. 10 Kiki Sanbalat,+ mut Hôrônaim, ni mut ngomin* nu Lôk Amôn+ le Tôbia,+ ba nok hala, ba unup ngandak le mut a nlo i bôñôl litén li Israel loñge.

11 Sôk i nsôk, me pam i Yérusalem. I mbus dilo diaa, 12 me telep juu, me ni ndék bôt ipe, ndi me bi kal bé mut nye ki nye i jam Nyambe wem a bi tinde me* le me boñ inyu Yérusalem. Me bééna bé lém ipe yo ki yo, handugi i me bé me yiine. 13 Me pémél i nwemel u Nsôsôgô+ ni juu, me tagbene i bisu bi lingen li Soso Nyoo inyu ke i nwemel u Nwind mi Libu,*+ me béñge lelaa lipénd li Yérusalem li bi kwo, ni lelaa hié hi bi ligis manwemel mé.+ 14 I mbus, me ke letee ni i nwemel u Lingen,+ ni i titimba i Kiñe, ndi pôla i bé bé le lém me bé me yiine i tagbe. 15 Juu ni juu, me bédél mu nsôsôgô,*+ me ke ni bisu i béñge lipénd. I mbus, me jubul i nwemel u Nsôsôgô inyu témb i tison, ha nyen me huu i ndap.

16 Bakot nkus bakeñi+ ba bé yi bé i homa me bi ke, to i jam me bé boñ, inyule me bé ngi kal Lôk Yuda yom yo ki yo, to biprisi, to mintôô mi bôt, to bakot nkus bakeñi, to i bôt ba bé lama sal i bôlô i. 17 I mbus, me kal bo le: “Ni ntehe lelaa ndutu ikeñi i nkwél bés, le Yérusalem a nkwo, yak hié hi mal ligis manwemel mé. Loga, di tiimba oñ lipénd li Yérusalem, inyu boñ le di bana ha bañ i wonyuu ini.” 18 Me kal ni bo lelaa woo u Nyambe wem nu konangoo u bé ni me,+ me añle ki bo i jam kiñe i bi kal me.+ Ha nyen ba bi kal le: “Di telep, di bôdôl maoñ.” Jon ba bi tina makénd* inyu sal loñge bôlô.+

19 I ngéda Sanbalat mut Hôrônaim, ni mut ngomin* nu Lôk Amôn+ le Tôbia,+ lôñni mut Arabia le Gésem,+ ba bi nok i jam li, ba bôdôl nol bés hiol,+ ba yanak ki bés, ba kalak le: “Kii ni yé i boñ? Baa ni nkolba kiñe?”+ 20 Ndi me timbhe le: “Nyambe nu ngii nyen a’ boñ le mam més ma kee loñge,+ yak bés bagwélél bé, d’a telep, di oñ; ndi bé ni gwé bé jam jo ki jo ni Yérusalem,+ ni gwé bé to kunde i ngii yé, ni ta bé to mu ñañ wé.”

3 Prisi keñi le Éliasib,+ ni lôkisañ yé biprisi, ba bi bôdôl oñ nwemel u Mintômba.+ Ba téé wo le u ba mpubhaga,*+ ba ha ki makôga mé; ba téé ki i homa nunu mpubhaga: Ibôdôl i nwemel u Mintômba, ipam i Nkum ndap u Méa,+ letee ni i Nkum ndap u Hananel.+ 2 Bôt ba Yérikô+ ba bé oñ ipañ yap; yak Zakur, man Imri, a oñok ipañ bôt ba Yérikô.

3 Bon ba Haséna ba oñ nwemel u Tjobi;+ ba ha minkond+ nwé, ba ha ki makôga mé, malaye mé ni bihimbil gwé. 4 Mérémôt,+ man Uriya, man Hakôs, a bé tibil lipénd ipañ yap. Mésulam,+ man Bérékia, man Mésézabel, a bé tibil lipénd ipañ yé; yak Zadok, man Baana, a bé tibil lipénd ipañ yé. 5 Bôt ba Tékôa+ bon ba bé tibil lipénd ipañ yé, ndi mintôô nwap mi bôt mi bi top bé suhus bomede* i sal isi ane i bet bap.

6 Yôiada man Paséa, bo Mésulam man Bésôdéa, ba bé tibil nwemel u Nlômbi Tison;+ ba ha minkond nwé, ba ha ki makôga mé, malaye mé ni bihimbil gwé. 7 Mélatia mut Gibéôn+ bo Yadon mut Mérôn, ba bé tibil lipénd ipañ yap; ba bé bôt ba Gibéôn ni ba Mizpa,+ ba bak isi ane* i ngomin i pes mbok i uu Ngwañ Lom.*+ 8 Uziel man Haraya, nu a bé wada mu baôô gwom ni gôl, a bé tibil lipénd ipañ yap. Hanania, mboñ labinda, a bé tibil lipénd ipañ yé; ba bi tek ngok ’isi* i Yérusalem letee ni lipénd Likeñi.+ 9 Réfaya, man Hur, ñane pes mbok yada i Yérusalem, nyen a bé tibil lipénd ipañ yap. 10 Yédaya, man Harumaf, a bé tibil lipénd i bisu bi ndap yé; yak Hatus, man Hasabnéya, a bé tibil lipénd ipañ yé.

11 Malkiya man Harim,+ bo Hasub man Pahat-Môab,+ ba bé tibil pes lipénd ipe, yak ni nkum ndap u Bup Hiuu.*+ 12 Salum, man Halôhes, ñane pes mbok yada i Yérusalem, a bé tibil lipénd lôñni bingond gwé.

13 Hanun ni bôt ba Zanôa+ ba bé tibil nwemel u Nsôsôgô;+ kiki ba mal oñ wo, ba ha makôga mé, malaye mé, ni bihimbil gwé; ba tibil ki lipénd, ntel u 1 000 hi dikéñéé di moo,* letee ni i nwemel u Nwind mi Libu.*+ 14 Malkiya, man Rékab, ñane pes mbok i Bét-Hakérem+, a bé tibil nwemel u Tjibi di Nyaga; kiki a mal oñ wo, a ha makôga mé, malaye mé, ni bihimbil gwé.

15 Salun, man Kolhôze, ñane pes mbok i Mizpa,+ a bé tibil nwemel u Lingen;+ kiki a mal oñ wo ni nyôl wé, a ha makôga mé, ni malaye mé, ni bihimbil gwé. A tibil yak lipénd li Titimba i Soso Mbôga+ li li bé ipañ wom Mbônji u kiñe,+ letee ni i likala+ li bé lôl i Nkoñ u David.+

16 Néhémia, man Azbuk, ñane pes mbok yada i Bét-Zur,+ a bé tibil lipénd ipañ yé, ibôdôl i bisu bi Wom Soñ u David,+ ipam i titimba+ ba bi tém, letee ni i Ndap Mimpémba mi Bôt.

17 I Lôk Lévi ini yon i bé tibil lipénd ipañ yé: Réhum, man Bani; yak Hasabia, ñane pes mbok yada i Kéila,+ a bé tibil lipénd ipañ yé inyu pes mbok yé. 18 Ini Lôk Lévi ipe yon i bé tibil lipénd ipañ yé: Bavai, man Hénadad, ñane pes mbok yada i Kéila.

19 Ézer, man Yésua,+ ñane Mizpa, a bé tibil pes lipénd ipe ipañ yé, ibôdôl i bisu bi libédél li Ndap Bijôl bi Gwét, i Jél li Lipénd.+

20 Baruk, man Zabai,+ a bé sal ni ngui ipañ yé. A bé tibil yak pes lipénd ipe, ibôdôl i Jél li Lipénd, letee ni i lijubul li ndap prisi keñi le Éliasib.+

21 Mérémôt,+ man Uriya, man Hakôs, a bé tibil pes lipénd ipe ipañ yé, ibôdôl i lijubul li ndap Éliasib, letee ni i lisuk li ndap Éliasib.

22 Biprisi, bi bi bé yééne i pes mbok i Yordan,*+ bi bé tibil lipénd ipañ yé. 23 Benyamin ni Hasub ba bé tibil lipénd ipañ yap, i bisu bi ndap yap. Azaria, man Maaséya, man Anania, a bé tibil lipénd ipañ yap, ipañ ndap yé. 24 Binui, man Hénadad, a bé tibil pes lipénd ipe ipañ yé, ibôdôl i ndap Azaria ipam i Jél li Lipénd,+ letee ni i likas yaga.

25 Palal, man Uzai, a bé tibil lipénd ipañ yé, i bisu bi Jél li Lipénd ni nkum u u yé ñadak ni Ndap* Kiñe,+ i mabeda ma kotoo Batat.+ Pédaya, man Parôs,+ a bé tibil lipénd ipañ yé.

26 Basal i témpel*+ ba ba bé yééne i Ôfel+ ba bé tibil lipénd letee ni i bisu bi nwemel u Malép,+ i pes likôl, letee ni i homa nkum ndap u bé pam ndék.

27 Bôt ba Tékôa+ ba bé tibil pes lipénd ipe ipañ yap, ibôdôl i bisu bi homa nkum ndap u bé pam ndék, letee ni i lipénd li Ôfel.

28 Biprisi bi bé tibil lipénd i ngii nwemel u Hosi,+ hiki wada i bisu bi ndap yé.

29 Zadok,+ man Imer, a bé tibil lipénd ipañ yap, i bisu bi ndap yé.

Sémaya, man Sékania, ntat nwemel u Likôl,+ a bé tibil lipénd ipañ yé.

30 Hanania man Sélémia, ni Hanun man Zalaf nu yônôs isamal, ba bé tibil pes lipénd ipe ipañ yé.

Mésulam,+ man Bérékia, a bé tibil lipénd ipañ yap, i bisu bi ndap* yé.

31 Malkiya, wada mukété bôt ba ñôô gwom ni gôl, a bé tibil lipénd ipañ yé, letee ni i ndap i basal i témpel*+ ni i bôt ba nyuñga, i bisu bi nwemel u Liwan, letee ni i tuñ nyôl i i yé i likas li lipénd.

32 I bôt ba ñôô gwom ni gôl ni bôt ba nyuñga, ba bé tibil lipénd ipôla tuñ nyôl i i yé i likas ni nwemel u Mintômba.+

4 Ndi i ngéda Sanbalat+ a bi nok le di yé i tiimba oñ lipénd, hala a tééñga* nye ngandak, a lôôha ki unup; a bôdôl nol Lôk Yuda hiol. 2 A pôdôs lôkisañ ni ntôñ gwét u Samaria, a kal bo le: “Kii ditégéé di Lôk Yuda dini di yé i boñ? Baa ba ga mal i bôlô ini botama? Baa ba ga ti bisesema? Baa ba ga mélés mam hilo hiada? Baa ba ga pémhene ngok munu nwind mi binan+ mi mi yé nlégék?”

3 Tôbia,+ man Lôk Amôn,+ a bé a téé nye ipañ, a kalak le: “Ibale to ndon yon i mbet mu ngii lipénd li ngok ba yé i oñ, ki li nkwo.”

4 “Éé a Nyambe wés, emble me, inyule i bôt bana ba nyan bés,+ boñ le diyana tjap di témb i ngii miño+ nwap, ti bo i moo ma baoo bap le ba kena bo i minkôm. 5 U hô bañ hihôha hiap, u sas bañ to béba yap i bisu gwoñ,+ inyule ba nsol bôt ba maoñ.”

6 Ha nyen di bi ke ni bisu i oñ lipénd, di at lipénd jolisôna, di bédés ki jo ipam i ñemkété. Bôt ba litén ba bé sal ni ñem wap wonsôna.

7 Ndi i ngéda Sanbalat, Tôbia,+ bôt ba Arabia,+ Lôk Amôn, ni bôt ba Asdôd,+ ba bi nok le maoñ ma lipénd li Yérusalem ma ngi kenek ni bisu, ni le di yé i yip i bahoma ba bi bugi, ba unup kiyaga. 8 Bobasôna ba ôô jimb le ba nlo i jôs Yérusalem, ba lona ki yubda mukété tison. 9 Ndi di bi soohe Nyambe wés, di bii ki batat inyu sôñ bés juu ni njamuha.

10 Ndi bôt ba Yuda ba bé kal le: “Bôt ba bôlô* ba yé nwaak, yak binan bi yé ngandak; di ga la bé oñ lipénd.”

11 Baoo bés ba bé kal le: “Di ga jôp i ñemkété wap, ba ga yi bé hala, ba ga tehe bé to bés, di ga nol bo, di téé yak bôlô.”

12 Hiki ngéda bôt ba Yuda, ba ba bé niñ bebee ni bo, ba bé jôp ikété tison, ba bé kal bés ibabé waa* le: “Ba ga leñ bés gwét, ba lôlak i bahoma bobasôna.”

13 Jon me bi téé bôt nyoo ’isi, i mbus lipénd, i bahoma ba néhi; me téé bo inoñnaga ni mahaa map, lôñni paminsoñ yap, makoñ map, ni mimpihlôñgô nwap. 14 I ngéda me bi tehe le ba nkon woñi, me pala telep, me kal mintôô mi bôt,+ ni bakot nkus bakeñi, ni bana bôt bape le: “Ni kon bañ bo woñi.+ Ni hoñol Yéhôva nu a yé mpémba, a bak ki a kôli le ba kon nye woñi;+ ni jo inyu lôkisoñ nan, inyu bon banan ba bôlôm ni ba bôda, inyu baa banan ni mandap manan.”

15 Nano, kiki baoo bés ba nok le di nyi i jam ba bé boñ, ni le bañga Nyambe a nkwés jimb jap, bésbobasôna di témb i maoñ ma lipénd. 16 Ibôdôl i kel i, jôga jada ikété bôt bem li bé sal,+ jôga lipe li gwelek makoñ, biben, ni mimpihlôñgô, li bak li hééba mambot ma bikei. Baane+ ba bé nit* bôt ba Yuda bobasôna 17 ba ba bé oñ lipénd. I bôt ba bé begee mambegee, ba bé sal ni woo wada, ba gwelek jôl gwét* ni woo umpe. 18 Hiki mut maoñ a bé sal, a ma téñ pansoñ yé i bôbôk. I mut a bé lama hem hioñ,+ a bé ipañ yem.

19 I mbus, me kal mintôô mi bôt, ni bakot nkus bakeñi, ni bana bôt ba litén bape le: “Bôlô i yé ngandak, yak lipénd li nlôôha mbôñgô, ndi bés di yé minleñ minleñ mu lipénd, mut wada a bak haa ni nuu numpe. 20 I ngéda ni ga nok ba nhem hioñ, ni lo, ni koba bés. Nyambe wés a ga jo inyu yés.”+

21 Ha nyen di bi kena bôlô ni bisu, jôga jada li gwelek makoñ, ibôdôl i maye ma kel letee ni i ngéda tjôdôt di mpam. 22 Ha ngéda i nyen me bi kal litén le: “Hiki mut a tégbaha u i Yérusalem lôñni nhôla wé, kayéle ba tadak bés juu, ba salak njamuha.” 23 Di bi yénak bé le di héya mambot més, to me, to lôk kéé yem, to bahôla bem,+ to batat ba ba bé noñ me; hiki wada wés a bé gwel jôl yé gwét i woo wé walôm.

5 Ndi bôt ba litén ni baa bap ba bôdôl tjelel ngandak ikolba lôkisañ yap Lôk Yuda.+ 2 Bôt bahogi ba bé kal le: “Di gwé ngandak bon bôlôm ni bon bôda. I mbéda bés bijek, le di je, di niñ ki.” 3 Bape ba kalak le: “Di nti nwom nwés, ni nwom nwés mi minkôô mi wai, ni mandap més kiki bibep inyu kôhna bijek i ngéda njal ikeñi.” 4 Bape ki ba bé kal le: “Di bi ti nwom nwés kiki bibep, yak nwom nwés mi minkôô mi wai, inyu poo moni le di saa tas kiñe.+ 5 Bés ni lôk kéé yés di yé lihaa jada,* bon bés ba yé bon bap. To hala, di yé nyégsaga i nuñul bon bés bôlôm ni bon bés bôda kiki minkol; bon bés bôda bahogi ba mal yila minkol.+ Ndi di nla bé téé i jam li, inyule bôt bape bon ba nyoñ nwom nwés ni nwom nwés mi minkôô mi wai.”

6 Me bi unup ngandak i ngéda me bi nok i bibañga bini lôñni njelel yap. 7 Ha nyen me bi ôt pék mu jam li, me ôm mintôô mi bôt minsohi, yak bakot nkus bakeñi, me kal bo le: “Ngo lôkisoñ nan yon ni mpôôs ni yéñe.”+

I mbus, me naña likoda likeñi inyu jam li. 8 Me kal bo le: “Kiki la yés, di bi kobol lôk kéé yés Lôk Yuda, i ba bi nuñle biloñ bipe. Ndi nano, baa lôkisoñ+ nan yon ni nsômbôl nuñul, inyu boñ le di témb di kobol bo?” Ha nyen ba bi mom nwee, ba yi ha bé i yom ba pot. 9 Me kal ki le: “I jam ni mboñ li ta bé loñge. Baa ni nlama bé kon Nyambe+ woñi, inyu boñ le di ti bañ baoo bés ba biloñ bipe pôla i yan bés? 10 Handugi hala, ngo me ni lôk kéé yem lôñni bahôla bem, di mpôôs bo moni ni kôn ngi yéñe. Soho, di waa pôôs bo ni yéñe.+ 11 Soho, i len ini yaga, timbhana bo nwom+ nwap, nwom nwap mi minkôô mi wai, nwom nwap mi bie bi ôlivé ni mandap map; yak i yéñe ni bi yôñôl bo mu jôga jada ikété mbôgôl* li moni, li kôn, li wai yondo, ni li môô.”

12 Ba kal ni le: “D’a timbhe bo i gwom bi, d’a bat bé bo yom yo ki yo. D’a boñ kii yosôna u nkal.” Jon me bi sébél biprisi, me boñ le i bôt bana ba kum soñ le b’a yônôs mbônga wap. 13 Me kumb ki mpék u mbot yem,* me kal le: “Lana nyen bañga Nyambe a kumb hiki mut nu a nyônôs bé mbônga wé, le a nimis ndap yé ni gwom gwé; hala nyen a kumb nye, a boñ nye le a yégle moo nso.” Ha nyen likoda jolisôna li bi kal le: “Amen!”* I mbus, ba bégés Yéhôva, yak litén li yônôs mbônga wé.

14 Handugi hala, ibôdôl i kel Kiñe Artaserses+ a bi téé me ngomin i pes mbok+ i nkoñ u Yuda, ibôdôl i nwii mi nyônôs 20+ letee ni i nwii mi nyônôs 32+ mi ane yé, hala wee 12 nwii, to me, to lôk kéé yem, di bi je bé bijek ngomin i pes mbok+ i bééna kunde i yoñ. 15 Ndi bangomin ba bipes bi mbok ba ba bi bôk me i bisu, ba bé tét litén. Hiki kel, ba bé yoñ 40 ma sékel* i silba inyu bret ni wai. Yak bahôla bap ba bé tét litén. Ndi me, me bi boñ bé hala+ inyule me nkon Nyambe+ woñi.

16 Jam lipe li yé le memede me bi yoñ ngaba i bôlô maoñ ma lipénd, ndi di bi somb bé wom to wada.+ Bahôla bem bobasôna ba bé ha inyu bôlô. 17 150 Lôk Yuda ni bakot nkus bakeñi ba bé je i téblé yem, yak bôt ba biloñ di bé leege. 18 Hiki kel, ba bé lamb ni moni nwem,* nlôm nyaga wada, ni mimpohlak mi mintômba minsamal, ni dinuni; ngélé yada hiki jôm li dilo, di bééna ki ngandak wai, mintén nwominsôna. Ndi to hala, me bi bat bé bijek ngomin i pes mbok i bééna kunde i yoñ, inyule bôlô i bé yidil litén ngandak. 19 “Éé a Nyambe wem, bigda me, u sayap ki me,* inyu mam momasôna me mboñ inyu litén+ lini.”

6 Ndi i ngéda Sanbalat, ni Tôbia,+ ni mut Arabia wada le Gésem,+ lôñni bana baoo bés bape ba bi nok le me mal tiimba oñ lipénd,+ ni le li bééna ha bé bahoma ba ba bi bugi (to hala kiki ha ngéda i, me bé ngi ha makôga mu manwemel+ ma tison), 2 Sanbalat bo Gésem ba pala ômle me i nwin unu le: “Loo, di téé ngim ngéda inyu bomna nyoo i mambai ma tegep mbok i Ônô.”+ Ndi ba bé hek pék i boñ me béba. 3 Jon me bi ômle bo bakenwin inyu kal bo le: “Me gwé soso bôlô, me nla bé me sôs nyoo. Ngo ibale me nyék bôlô inyu lo nyoo, ki i ntelep.” 4 Ba bi ômle me nlélém nwin ngélé ina; yak me, me tinak ndik bo nlélém ndimbhe.

5 Ha nyen Sanbalat a bi ômle me nhôla wé ni nlélém nwin ngélé i nyônôs itan. Nhôla wé a bééna nyiblak kaat i woo. 6 I bé ntilga mu kaat le: “Ngan i nke ikété biloñ, yak Gésem+ a nkal hala, le we lôñni Lôk Yuda ni yé i ôô jimb inyu kolba kiñe.+ Inyu hala nyen ni ñoñ lipénd; me nok bôt ba mpot le wen w’a yila kiñe yap. 7 U ntéé yak bapôdôl inyu añal jôl joñ i Yérusalem le: ‘Kiñe i yé i Yuda!’ Nano ni, i mam mana ma ga pam i maôô ma kiñe. Jon loo, di kwélél mu jam li.”

8 Ndi me ômle nye i ndimbhe ini le: “Jam to jada mu mam u mpot li téé bé; U mbot mo mbodok.”* 9 Bobasôna ba bé yéñ kônha bés woñi, ba kalak le: “Ba ga tomb,* ba téé bôlô.”+ Nano, a Nyambe wem, lédés me.*+

10 I mbus, me ke i ndap Sémaya, man Délaya, man Méhétabel, nu a bé nyibnege ikété ndap. A kal me le: “Di téé ngéda inyu bomna i ndap bañga Nyambe, ikété témpel, di yip makôga ma témpel inyule b’a lo i nol we. Ñ, b’a lo yaga i nol we juu.” 11 Ndi me timbhe nye le: “Baa mut kiki me a nlama ke ngwéé? Baa mut kiki me a nla jôp i témpel, ndi a niñ?+ M’a jôp yaga bé me mu!” 12 Ha nyen me bi yi le Nyambe bé nyen a bi om nye; ndi le Tôbia bona Sanbalat+ bon ba bi saa nye le a babaa me ni i bibañga bini.* 13 Ba bi saa nye inyu kônha me woñi ni i tinde me i boñ béba, inyu boñ le ba ôbôs jôl jem, le ndi ba ôm me minsohi.

14 “Éé a Nyambe wem, bigda i mam Tôbia+ bona Sanbalat ba bi boñ; bigda yak mpôdôl nu muda le Nôadia, ni bana bapôdôl bape, ba ba bi yéñ kônha me woñi.”

15 Maoñ ma lipénd ma bi mal i hilo hi nyônôs 25 hi sôñ Élul,* i mbus 52 dilo.

16 Kiki baoo bés ba bi nok hala, yak biloñ gwobisôna bi bi bé kéña bés bi tehe hala, hala a lôôha wéha bo nyuu;*+ ba nôgda le Nyambe wés nyen a nhôla le i bôlô ini i bôña. 17 Mu mangéda ma nyen mintôô mi bôt+ mi Yuda mi bé ômle Tôbia ngandak bikaat, yak Tôbia a timbhege bo. 18 Ngandak bôt i Yuda i bi kum soñ le i nit Tôbia, inyule a bé nkil Sékania, man Ara;+ ni le man wé Yéhônan a bi bii ngond Mésulam,+ man Bérékia. 19 Ba bé béna ki añle me mam malam a bé boñ, ba añlege nye i mam me bé kal. Ha nyen Tôbia a bé ômle me bikaat inyu kônha me woñi.+

7 Kiki ba mal tiimba oñ lipénd,+ me ha makôga.+ I mbus, ba téé batat nwemel,+ batôp tjémbi+ ni Lôk Lévi.+ 2 Ha nyen me bi téé mankéé Hanani+ le a énél Yérusalem, nye ni ñane Nkum ndap le Hanania,+ inyule a bé mut ba nla bôdôl ñem iloo ngandak bôt ipe, a konok ki bañga Nyambe+ woñi. 3 Me kal ni bo le: “Ba nlama bé yibil manwemel ma Yérusalem letee hiañgaa hi nyai. I ngéda batat ba mba ba ngi tadak, ba ga yip makôga, ba hémb ki mo. Ni téé ki batat mukété bôt ba Yérusalem, bahogi ba ga tat i het ba ñom bo, bape ba tadak i bisu bi mandap map.” 4 Tison i bé mbôm, i bak ikeñi; ndi i bééna ndék bôt,+ ba bé ngi to tiimba oñ mandap.

5 Nyambe wem a bi tinde me* i kot mintôô mi bôt, ni bakot nkus bakeñi lôñni litén, le ba tila môl map i bikaat inoñnaga ni mahaa map.+ Me léba yak kaat i bééna môl ma bôt ba bisu ba ba bi témb, ma bak ntilga inoñnaga ni mahaa ma basañ bap; i bé ntilga mu le:

6 I bôt bana bon ba bé bôt ba pes mbok* ba ba bi lôl i minkôm, bon kiñe Babilôn le Nébukadnézar+ a bi kena i minkôm;+ ndi i mbus ngéda, ba témb i Yérusalem ni i Yuda, hiki mut i tison+ yé. 7 I bôt bana bon ba bi lo lôñni Sôrôbabel:+ Yésua,+ Néhémia, Azaria, Raamia, Nahamani, Mordékai, Bilsan, Mispéret, Bigvai, Néhum, ni Baana.

Nsoñgi u bon bôlôm ba Lôk Israel+ unu: 8 bon ba Parôs: 2 172; 9 bon ba Séfatia: 372; 10 bon ba Ara:+ 652; 11 bon ba Pahat-Môab,+ mu mahaa ma Yésua ni Yôab:+ 2 818; 12 bon ba Élam:+ 1 254; 13 bon ba Zatu: 845; 14 bon ba Zakai: 760; 15 bon ba Binui: 648; 16 bon ba Bébai: 628; 17 bon ba Azgad: 2 322; 18 bon ba Adônikam: 667; 19 bon ba Bigvai: 2 067; 20 bon ba Adin: 655; 21 bon ba Ater, mu lihaa li Hézékia: 98; 22 bon ba Hasum: 328; 23 bon ba Bézai: 324; 24 bon ba Harif: 112; 25 bon ba Gibéôn:+ 95; 26 bôt ba Bétléhém ni ba Nétôfa: 188; 27 bôt ba Anatôt:+ 128; 28 bôt ba Bét-Azmavet: 42; 29 bôt ba Kiriat-Yéarim,+ bon ba Kéfira ni bon ba Béérôt:+ 743; 30 bôt ba Rama ni ba Géba:+ 621; 31 bôt ba Mikmas:+ 122; 32 bôt ba Bétel+ ni ba Ai:+ 123; 33 bôt ba Nébô ipe: 52; 34 bon ba Élam numpe: 1 254; 35 bon ba Harim: 320; 36 bon ba Yérikô: 345; 37 bon ba Lôd, bon ba Hadid ni bon ba Ônô:+ 721; 38 bon ba Sénaa: 3 930.

39 Nsoñgi u biprisi+ unu: bon ba Yédaya, mu lihaa li Yésua: 973; 40 bon ba Imer: 1 052; 41 bon ba Pasur:+ 1 247; 42 bon ba Harim:+ 1 017.

43 Nsoñgi u Lôk Lévi+ unu: bon ba Yésua ba ba bé mu lihaa li Kadmiel,+ ba bak ki mu mbôda Hôdavia: 74. 44 Nsoñgi u batôp tjémbi+ unu: bon ba Asaf:+ 148. 45 Nsoñgi u batat nwemel+ unu: bon ba Salum, bon ba Ater, bon ba Akub,+ bon ba Hatita ni bon ba Sôbai: 138.

46 Nsoñgi u basal i témpel*+ unu: bon ba Ziha, bon ba Hasufa, bon ba Tabaôt, 47 bon ba Kérôs, bon ba Sia, bon ba Padôn, 48 bon ba Lébana, bon ba Hagaba, bon ba Salmai, 49 bon ba Hanan, bon ba Gidel, bon ba Gahar, 50 bon ba Réaya, bon ba Rézin, bon ba Nékôda, 51 bon ba Gazam, bon ba Uza, bon ba Paséa, 52 bon ba Bésai, bon ba Méunim, bon ba Néfusésim, 53 bon ba Bakbuk, bon ba Hakufa, bon ba Harur, 54 bon ba Bazlit, bon ba Méhida, bon ba Harsa, 55 bon ba Barkos, bon ba Siséra, bon ba Téma, 56 bon ba Nézia ni bon ba Hatifa.

57 Bon ba bagwélél ba Salômô+ bana: bon ba Sôtai, bon ba Sôféret, bon ba Périda, 58 bon ba Yaala, bon ba Darkon, bon ba Gidel, 59 bon ba Séfatia, bon ba Hatil, bon ba Pôkéret-Hazébaim, bon ba Amôn. 60 Nsoñgi u basal i témpel*+ ni u bagwélél ba Salômô bobasôna u bé: 392.

61 I bôt ba bi lôl i Tel-Méla, i Tel-Harsa, i Kérub, i Adôn ni i Imer, ndi ba la bé unda le basañ bap ba bé bon ba Israel, ba la bé to unda le bomede ba yé toi bon ba Israel,+ nsoñgi wap unu: 62 Bon ba Délaya, bon ba Tôbia, bon ba Nékoda: 642. 63 Mu biprisi: bon ba Habaya, bon ba Hakôs,+ bon ba Barzilai, nu a bi bii ngond yada mu bingond bi man Lôk Giléad le Barzilai,+ ba ti ki nye jôl li lihaa li. 64 I bôt bana bon ba bi yéñ mahaa ma basañ bap ikété bikaat bi mahaa, ndi ba bi léba bé mo mu; jon ba bi ti bé bo kunde i gwel nson u biprisi.*+ 65 Ngomin i pes mbok*+ i bi kal bo le ba nlama bé je gwom bi nlôôha bipubhaga,+ letee ba bana prisi i i nla bat Nyambe mahoñol mé ni njel Urim ni Tumim.+

66 Nsoñgi u bôt ba likoda jôlisôna u bé 42 360,+ 67 ibabé i soñgol minkol mi bôlôm ni mi bôda,+ mi mi bé 7 337; yak nsoñgi u bôlôm ni u bôda ba ba bé batôp tjémbi+ u bé 245. 68 Bihosi gwap bi bé 736, minyabén nwap mi hosi* mi bak 245; 69 kamél yap i bé 435, yak magas map ma bak 6 720.

70 Bahogi ikété baéga ba mandap ma bikôkôa ba bi boñ makébla inyu maoñ.+ Ngomin i pes mbok* i bi ti i nkuu makébla: 1 000 hi drakma* i gôl, 50 ma biséya, ni 530 mimbôñgô mi mambot ma biprisi.+ 71 Baéga bahogi ba mandap ma bikôkôa ba bi ti makébla mana inyu bôlô: 20 000 drakma i gôl, 2 200 mina* i silba. 72 Bana bôt bape ba bi yégle, ba bi ti: 20 000 drakma i gôl, 2 000 mina i silba, ni 67 mimbôñgô mi mambot ma biprisi.

73 Biprisi, Lôk Lévi, batat nwemel, batôp tjémbi,+ ni bôt ba litén bahogi, basal i témpel,* ni bon ba Israel bobasôna ba bi ke i yééne i bitison+ gwap. I ngéda sôñ i nyônôs isaambok i bi kola,+ bon ba Israel ba bé ba ma yén i bitison+ gwap.

8 Litén jolisôna li nôgla, li kodba i ñem mbégdé wengoñle mut wada, i bisu bi nwemel u Malép.+ I mbus, ba kal Ésra,+ mut matila,* le a lona kaat mbén Môsi,+ i Yéhôva a bi ti Israel.+ 2 Jon i hilo hi bisu hi sôñ i nyônôs isaambok,+ prisi Ésra a bi lona mbén Môsi i bisu bi likoda+ li bôlôm ni li bôda, ni ba bobasôna ba bé le ba nok. 3 Ibôdôl i maye ma kel ipam i kosi, i bisu bi nwemel u Malép, ni kiñ ngii+ nyen Ésra a bi éñél bôlôm ni bôda kaat, lôñni ba bobasôna ba bé le ba nok; yak litén li tibil emble+ lisoñgol li kaat mbén Môsi. 4 Ésra, mut matila,* a bé a téé i hikôma hi mabam, hi ba bi bañ inyu jam li. Matitiya, Séma, Anaya, Uriya, Hilkia ni Maaséya ba bé ba téé i pes yé walôm; yak Pédaya, Misael, Malkiya,+ Hasum, Hasbadana, Sakaria ni Mésulam ba bak ba téé i pes yé waé.

5 Ésra a yibil kaat. Litén jolisôna li bé la tehe nye inyule a bé a téé i homa a yé i ngii iloo bôt bobasôna. I ngéda a bi yibil kaat, litén jolisôna li telep. 6 Ha nyen Ésra a bégés bañga Nyambe le Yéhôva, Nyambe nunkeñi; yak litén jolisôna li pa moo ngii, li timbhe le: “Amen!* Amen!”+ I mbus, ba ue miño nwap, ba ôôp i bisu bi Yéhôva, ba ôm mbom ’isi. 7 I bon ba Lôk Lévi bana: Yésua, Bani, Sérébia,+ Yamin, Akub, Sabétai, Hôdia, Maaséya, Kélita, Azaria, Yôzabad,+ Hanan ni Pélaya; ba bé toñle litén+ mbén Môsi, litén li bak li téé bitétéé. 8 Ba bé añ kaat ni kiñ ngii, hala wee kaat Mbén i bañga Nyambe, ba toñlak yo loñge, ba pémhak biniigana mu. Hala nyen ba bi hôla litén i nok i yom ba bé añ.*+

9 Néhémia, nu a bé ngomin i pes mbok* ha ngéda i, lôñni prisi ni mut matila* le Ésra,+ yak Lôk Lévi i i bé niiga litén, ba kal litén jolisôna le: “I kel ini i yé hilo hipubhaga inyu Yéhôva Nyambe+ nan. Ni ee bañ, to nlénd u ba bañ.” Inyule litén jolisôna li bé ee i ngéda li bi nok bibañga bi mbén Môsi. 10 A kal bo le: “Kena, jena bijek bilam, nyona ki binyonyo bilam; i bôt ba nkôôba bé yom yo ki yo, ômlana bo yap ngaba bijek;+ inyule i kel ini i yé hilo hipubhaga inyu Nwet wés. Jon, ni modop bañ, inyule maséé ma nlôl yak Yéhôva ma yé ngui nan.”* 11 Yak Lôk Lévi i bé mômôs litén jolisôna, i kalak le: “Ni ee bañ! Inyule i kel ini i yé hilo hipubhaga; to modop ni modop bañ.” 12 Jon litén jolisôna li bi ke i je ni i nyo, ni i ti bape ngaba yap bijek, ni i nok ngandak maséé;+ inyule ba bi nok bibañga ba bi éñél bo.+

13 I hilo hi nyônôs iba, baéga ba mandap ma bikôkôa ba litén jolisôna, ni biprisi lôñni Lôk Lévi, ba bi kodba yak mut matila* le Ésra, inyule ba bééna ngôñ i tibil nok bibañga bi mbén Môsi. 14 Ha nyen ba bi tehe ntilga ikété Mbén Yéhôva a ti Môsi, le Lôk Israel i bé lama yééne i bilap* i ngéda ngand sôñ i nyônôs isaambok,+ 15 ni le ba bé lama añal+ ni legel nwin mu bitison gwap gwobisôna ni i Yérusalem, ba kalak le: “Kena i mbok dikôa, ni lona bon ba mintjep mi bie bi ôlivé, mi bie bi môô ma bikai,* ni mi bie bi myrte; ni lona yak masee ma maén, lôñni bon ba mintjep mi bie bipe inyu oñ bilap, inoñnaga ni yom i yé ntilga ikété mbén Môsi.”

16 Jon bôt ba bi ke i yéñ bon ba mintjep, ba lona nwo inyu oñ bilap, hiki mut i ngii nyôl wé ndap; ba oñ ki bilap i bikotoo gwap, mu bikotoo bi témpel bi bañga Nyambe,+ i ñem mbégdé u nwemel u Malép,+ ni i ñem mbégdé u nwemel u Éfraim.+ 17 Hala nyen i bôt bobasôna ba bi lôl i minkôm ba bi oñ bilap, ba yééne ki mu bilap bi; inyule ibôdôl i dilo di man Nun le Yôsua+ letee ni i kel i, Lôk Israel i bi lôôs ha bé ngand i nya i, kayéle litén li kon maséé+ iloo hihéga. 18 Hiki kel, ibôdôl i hilo hi bisu letee ni i hilo hi nsôk, ba bé añ kaat Mbén i bañga Nyambe.+ Ba bi tégbaha ngand dilo disaambok, ba bana ki likoda li tôbôtôbô i hilo hi nyônôs juem, kiki mbén Môsi i bé kal.+

9 I hilo hi nyônôs 24 hi sôñ i nyônôs isaambok, Lôk Israel i kodba. Ba bé ba hééba minsugut, ba kôpba minluñ mi biték, ba sôga ki je.*+ 2 I bôt ba bé bon ba Israel i ligwéak, ba bagla ni bakén+ ba bôt bobasôna. Ba telep bitétéé, ba pahal bibéba gwap ni mahôha ma basôgôlsôgôl+ bap. 3 I mbus, kiki ba bé ba ngi téé ha homa wap, hala a bi yoñ ngeñ aa* inyu éñél bo kaat Mbén Yéhôva Nyambe wap ni kiñ ngii.+ Ini ngeñ aa ipe, ba pahal bibéba gwap, ba ôôp ki i bisu bi Yéhôva Nyambe wap.

4 Yésua, Bani, Kadmiel, Sébania, Buni, Sérébia,+ Bani ni Kénani ba bé ba téé i hikôma+ hi Lôk Lévi, ba yemhege Yéhôva Nyambe wap makeñi. 5 Ha nyen i Lôk Lévi ini le Yésua, Kadmiel, Bani, Hasabnéya, Sérébia, Hôdia, Sébania ni Pétaya, i kal le: “Telbana, ni bégés Yéhôva Nyambe nan i boga ni boga.*+ Éé a Nyambe, ba ti jôl joñ likeñi lipém, li li kôli ni bisai lôñni bibégés gwobisôna.

6 “Wetama yaga nyen u yé Yéhôva;+ wen u bi hek ngii, ñ, yak ngingii lôñni ntôñ wé gwét* wonsôna, hisi ni gwom gwobisôna bi yé mu, batuye ni gwom gwobisôna bi yé mukété yap. Wen u ntééda i gwom bi gwobisôna i niñ, yak ntôñ gwét u ngii u ñôôp i bisu gwoñ. 7 U yé Yéhôva, bañga Nyambe, nu a bi pohol Abram,+ a pémés nye nyoo Ur+ i bôt ba Kaldéa, a ti ki nye jôl le Abraham.+ 8 U bi tehe le ñem wé u tiñi ni we,+ inyu hala nyen u bi boñ malômbla ni nye le u ga ti nye lôñni mbôda yé loñ i Lôk Kanaan, ni i Lôk Hét, ni i Lôk Amôr, ni i Lôk Péris, ni i Lôk Yébus, ni i Lôk Girgas.+ U bi yônôs ki mimbônga nwoñ, inyule u téé sép.

9 “U bi tehe ndutu i basôgôlsôgôl bés i Égiptô,+ u nok ki minlondok nwap i tuye Nkôibaga. 10 Jon u bi unda biyimbne, u boñ ki mam ma hélha ikolba Faraô ni bagwélél bé bobasôna, lôñni bôt ba loñ+ yé bobasôna, inyule u bé yi le ba bi yan+ litén joñ. Jôl joñ li ke ki ngan letee ni i len ini.+ 11 U kan ki tuye i bisu gwap, inyu boñ le ba tagbene mu tuye, hisi hi bak nnumuk.+ U leñ i bôt ba bé noñ bo ikété ndip tuye kiki ba nleñ ngok ikété malép ma nkuli ni ngui.+ 12 U éga bo njamuha ni jél li ond, yak juu ni jél li hié, inyu ti bo mapubi mu njel ba bé lama kil.+ 13 U sôs ki i hikôa Sinai,+ u pôdôs bo, kiñ i lôlak i ngii;+ u ti bo mbagi i téé sép, ni mambén ma ma yé maliga,* matéak ni matiñ malam.+ 14 U yis bo sabat+ yoñ pubhaga, u ti bo matiñ, ni matéak, lôñni mbén ni njel ngwélél woñ Môsi. 15 I ngéda njal+ i bé i gwel bo, u bé u ti bo bret bi nlôl i ngii; yak i ngéda nyus+ i bé i gwel bo u bé u pémhene bo malép mu liaa. U kal bo le ba jôp, ba yoñ ki loñ u bi kum soñ* le u nti bo.

16 “Ndi basôgôlsôgôl bés, bo ba bi ngôgôp,+ ba ndogop,*+ ba emble bé to mambén moñ. 17 Ba tjél emble,+ ba bigda bé bihélha bi mam u bi boñ ipôla yap, ndi ba ndogop,* ba téé ngim ñéga le ba témb i Égiptô+ inyu yila minkol. Ndi we u yé Nyambe nu a yé bebee i nwéhél,* a ban-ga ñem ngôô* ni konangoo, a mpala bé unup, a ntéñbe ki i unda ngandak gwéha;*+ jon u bi tjôô bé bo.+ 18 I ngéda ba bi boñ ñôôk man nyaga,* ba kalak le: ‘Nyambe woñ nunu, nu a bi nyodna we i Égiptô,’+ ba yan ki we iloo hihéga, 19 to hala yaga, u bi yék bé bo i ñoñ:+ jél li ond li bi yék bé bo njamuha, li bé éga bo mu njel; to juu, jél li hié li bi waa bé éba bo mapubi mu njel ba bé lama kil.+ 20 U ti bo loñge yoñ mbuu inyu ti bo pék,+ u nim bé to bo mana+ moñ, u ti ki bo malép i ngéda nyus+ i bé i gwé bo. 21 U bi ti bo bijek i ñoñ+ 40 ma nwii. Ba bi hañ bé yom yo ki yo. Mambot map ma bi un bé,+ to makôô map ma bi nut bé.

22 “U bi ti bo biane ni biloñ, u kap gwo minkoñ minkoñ,+ kayéle ba bi yoñ nkoñ u Sihôn,+ hala wee nkoñ u kiñe Hesbôn;+ yak nkoñ u Og,+ kiñe Basan. 23 U boñ le bon bap ba ba ngandak kiki tjôdôt di ngii.+ U jôbna ki bo ikété loñ u bi bôn basôgôlsôgôl bap le ba nlama jôp, ba yoñ+ ki yo. 24 Jon ba bi jôp i loñ,+ ba yoñ ki yo. I Lôk Kanaan+ i i bé yééne nyoo, u bi suhus bo isi yap, u ti ki bo i moo map, yak bikiñe gwap ni bôt ba loñ, le ba boñ bo kii yosôna ba ngwés. 25 Ba bi yoñ bitison bi bi bééna mapénd ma ngui,+ lôñni nkoñ u u nti* ngandak bijek,+ ba yoñ yak mandap nyonok ni ngandak gwom bilam, ni bibee bi malép ba mal tém, ni nwom mi minkôô mi wai, ni bie bi ôlivé,+ ni ngandak bie i i num matam. Jon ba bi je, ba nuu, ba bana ngandak gwom, ba nok ki lingoñoo inyu loñge yoñ ñem i mbuma ñañ.

26 “Ndi ba bi yila ndok, ba kolba we,+ ba kôm ki Mbén yoñ mbus.* Ba nol bapôdôl ba ba bé béhe bo inyu témbna bo i weeni, ba yan+ ki we iloo hihéga ni njel maboñok map. 27 Inyu hala nyen u bi ti bo i moo ma bakolba+ bap, ba ba bi tééñga+ bo ibabé waa. Ndi ba bé ba lôndôl we i ngéda ba bé ikété ndééñga, yak we u emble bo nyoo ngii; jon u bi ti bo batohol inyu ngandak yoñ konangoo, le ba kobol bo i moo ma baoo+ bap.

28 “Ndi i ngéda ba bé ba nôgda hogbe, ba bé ba tiimba boñ béba i bisu gwoñ,+ jon u bé u tjôô bo i moo ma baoo bap le ba ane bo.*+ Ha nyen ba bé ba témb, ba lôndôl we le u hôla+ bo, yak we u bé u emble bo nyoo ngii, u tohlak ki bo ngandak ngélé inyu ngandak yoñ konangoo.+ 29 To hala kiki u bé béhe bo inyu témbna bo le ba noñ Mbén yoñ, ba bi ngôgôp, ba tjél nok mambén+ moñ. Ba bi boñ béba, ba noñ bé matiñ moñ ma ma nti mut niñ ibale a nôgôl mo.+ Ndi ba bi ndogop, ba kôm we mbus, ba bana ño mbe, ba tjél emble. 30 U bi hônba bo+ ngandak nwii, u ke ni bisu i ti bapôdôl boñ mbuu woñ le ba béhe bo, ndi ba bi tjél emble. Sôk i nsôk, u bi ti bo i moo ma bôt ba biloñ+ bipe. 31 Inyu ngandak yoñ konangoo, u bi tjé bé bo,+ u tjôô bé ki to bo, inyule u yé Nyambe nu konangoo+ ni nu ñem ngôô.*

32 “Ndi nano, Éé a Nyambe wés, Nyambe nunkeñi, nu lipémba, ni nu ba kôli kon woñi, nu a ntééda malômbla mé, a téñbege i unda gwéha,+ u yoñ bañ ndutu yosôna i nkwél bés kiki yañga jam, bés ni bikiñe gwés, baane+ bés, biprisi+ gwés, bapôdôl+ bés, basôgôlsôgôl bés, ni bôt ba litén joñ jolisôna, ibôdôl i dilo di kiñe Asiria+ letee ni i len ini. 33 U téé sép ikété mam momasôna ma bi kwél bés, inyule u bi ba maliga; ndi bés bon di bi boñ béba.+ 34 Bikiñe gwés, baane bés, biprisi gwés ni basôgôlsôgôl bés, ba bi tééda bé Mbén yoñ, ba nôgôl bé matiñ moñ, to mabéhna* u bi ti* bo. 35 To i ngéda ba bé yééne ikété ane yap, ba konok maséé ni mam malam u bi ti bo, ba niñik ikété loñ ikeñi u bi ti bo, loñ i i nti* ngandak bijek, ba bi gwélél bé we,+ ba tjôô bé to maboñok map mabe. 36 Ndi i len ini, bés bana di yé minkol,+ ñ, minkol ikété loñ u bi ti basôgôlsôgôl bés, le ba je matam mé ni gwom gwé bilam. 37 Bikiñe u bi téé i ngii yés inyule di bi boñ béba,+ gwon bi gwé gwom bilam bi loñ ini. Bi ñane bés ni bilém gwés kiki hala a nlémél bo, jon di yé ikété ndutu ikeñi.

38 “Inyu mam mana momasôna, di yé i boñ malômbla ma ngui,+ di ntila mo, di band ki mo ni béndél i baane bés, biprisi+ gwés, ni Lôk Lévi.”

10 I bôt bana bon ba bi band malômbla ni béndél+ yap:

9 I Lôk Lévi ini yon i bi ha béndél yap: Man Azania le Yésua, Binui mu bon ba Hénadad, Kadmiel,+ 10 ni lôkisañ yap le Sébania, Hôdia, Kélita, Pélaya, Hanan, 11 Mika, Réhôb, Hasabia, 12 Zakur, Sérébia,+ Sébania, 13 Hôdia, Bani ni Beninu.

14 I baane ba litén bana bon ba bi ha béndél yap: Parôs, Pahat-Môab,+ Élam, Zatu, Bani, 15 Buni, Azgad, Bébai, 16 Adôniya, Bigvai, Adin, 17 Ater, Hézékia, Azur, 18 Hôdia, Hasum, Bézai, 19 Harif, Anatôt, Nébai, 20 Magpias, Mésulam, Hézir, 21 Mésézabel, Zadok, Yadua, 22 Pélatia, Hanan, Anaya, 23 Hôséa, Hanania, Hasub, 24 Halôhes, Pilha, Sôbek, 25 Réhum, Hasabna, Maaséya, 26 Ahiya, Hanan, Anan, 27 Maluk, Harim ni Baana.

28 Bana bôt bape ba litén, hala wee biprisi, Lôk Lévi, batat nwemel, batôp tjémbi, basal i témpel,* lôñni ba bobasôna ba bi bagla ni bôt ba biloñ bipe inyu noñ Mbén i bañga Nyambe,+ bo ni baa bap, ni bon bôlôm bap, lôñni bon bôda bap, ni ba bobasôna ba bééna yi, lôñni ba bobasôna ba bé le ba nok,* 29 ba bi adba ni lôkisañ yap ni mintôô nwap mi bôt, ba kum soñ le ba ba ntiihege ibale ba nkil bé i Mbén i bañga Nyambe, i ba bi kôhna ni njel ngwélél bañga Nyambe le Môsi. Ba kum ki soñ le b’a noñ yaga mambén momasôna ma Yéhôva Nwet wés, ni mbagi yé, ni matiñ mé. 30 Ba kal le: “D’a ti bé bôt ba loñ bingond gwés, to bés d’a yoñ bé bingond gwap inyu bon bés bôlôm.”+

31 Ibale bôt ba loñ ba nlona manyuñga map, ni to umbe ntén kôn, inyu nuñul gwo i kel sabat, di ga somb bé yom yo ki yo i boni i kel sabat,+ to i hilo hipubhaga+ hipe. Di ga sal bé hisi i nwii mi nyônôs minsaambok,+ di ga bat bé to le ba saa bés pil+ wo ki wo.

32 Bésbomede di nkit ki le hiki wada wés a ga ti jôga jada ikété môga maa ma sékel* hiki nwii, inyu nson u mbôña i ndap* Nyambe+ wés, 33 inyu kôôba i gwom bini: minlôñ mi bret,*+ likébla li bijek ngéda yosôna,+ sesema i ntul i hié hiki kel i dilo di sabat+ ni i sôñ mondo,+ yak inyu mintéak mi mangand,+ gwom bipubhaga, bisesema inyu béba+ kayéle bi sas béba i Israel, ni nson wonsôna u mbôña i ndap Nyambe wés.

34 Di bi leñ ki mbam inyu yi imbe ngéda biprisi, Lôk Lévi ni bôt ba litén ba nlama lona tjéé i ndap Nyambe hiki nwii, inoñnaga ni mandap map ma bikôkôa, inyu ligis tjo i juu li bisesema li Yéhôva Nyambe wés, kiki i yé ntilga ikété Mbén.+ 35 Hiki nwii, di ga lona ki bijek bi bisu* bi disi tjés i ndap Yéhôva,+ yak ni matam ma bisu ma mintén mi bie nwominsôna, 36 lôñni babôkgwéé ba bon bés bôlôm ni babôkgwéé ba bilém bi bémba+ yés, kiki i yé ntilga ikété mbén Môsi, yak ni babôkgwéé mu mauñ més ma nyaga, ni mu bibémba gwés bi mintômba ni bi kembee. Di ga lona gwo i ndap Nyambe wés, inyu ti gwo biprisi bi bi ngwel nson i ndap Nyambe+ wés. 37 Handugi hala, di ga lona flawa bisu i libumbul+ jés, ni makébla més, ni matam ma mintén mi bie+ nwominsôna, ni wai yondo lôñni môô,+ inyu ti gwo biprisi mu bituñ i het ba ntéédana gwom i ndap Nyambe+ wés. Di ga lona ki jôga jada ikété jôm li libumbul jés inyu ti jo Lôk Lévi,+ inyule Lôk Lévi yon i nyoñ jôga jada ikété jôm mukété bitison gwobisôna di nsal nwom.

38 Prisi, man Arôn, a nlama ba lôñni Lôk Lévi i ngéda ba ga yoñ jôga jada ikété jôm; bon ba Lôk Lévi ba nlama yoñ jôga jada ikété jôm mukété jôga jada ikété jôm, ba ti jo i ndap Nyambe+ wés, i bituñ i het ba ntéédana gwom. 39 Inyule mu bituñ i het ba ntéédana gwom nyen Lôk Israel ni bon ba Lôk Lévi ba nlama lona likébla+ li bijek, li wai yondo lôñni li môô;+ mu nyen yak bisélél bi homa mpubhaga bi yéne, mu ki nyen biprisi bi bi ngwel nson, ni batat nwemel, lôñni batôp tjémbi ba yéne. Di ga yôi bé ndap Nyambe+ wés.

11 Baane ba loñ ba bé yééne i Yérusalem.+ Bana bôt bape ba litén ba leñ mbam+ inyu boñ le lihaa jada ikété jôm li loo i yééne i tison pubhaga le Yérusalem, ndi mana mahaa bôô mape ma yééne i bitison bipe. 2 Handugi hala, bôt bahogi ba bi neebe* i yééne i Yérusalem, yak bôt ba litén ba sayap bo.

3 Bana baéga ba pes mbok* bon ba bé yééne i Yérusalem. (Ini Lôk Israel ipe, ni biprisi, ni Lôk Lévi, ni basal i témpel,*+ lôñni bon* ba bagwélél ba Salômô,+ ba bé yééne i bitison bipe bi Yuda, hiki wada mu hisi hié ikété tison+ yé.

4 I Yérusalem ki nyen bon bape ba Yuda ni ba Benyamin ba bé yééne.) Mu bon ba Yuda: Ataya man Ôsiya, man Sakaria, man Amaria, man Séfatia, man Mahalalel, mu mbôda Péres,+ 5 ni Maaséya man Baruk, man Kolhôze, man Hazaya, man Adaya, man Yédaya, man Sakaria, mu lihaa li Séla. 6 Bon ba Péres bobasôna ba ba bé yééne i Yérusalem ba bé 468, ba bak bôt ba ngui.

7 Mu bon ba Benyamin: Salu+ man Mésulam, man Yôed, man Pédaya, man Kôlaya, man Maaséya, man Itiel, man Yésaya, 8 ni bana bape le Gabai bona Salai; bobasôna ba bé 928. 9 Man Zikri le Yôel nyen a bé mbéñge wap; yak Yuda man Hasénua, a bak ñéga nu yônôs iba mu tison.

10 Mu biprisi: Yédaya man Yôyarib, ni Yakin,+ 11 Séraya man Hilkia, man Mésulam, man Zadok, man Mérayôt, man Ahitub,+ ñéga wada mu ndap* i bañga Nyambe, 12 ni lôkisañ yap i i bé gwel nson mu ndap Nyambe; bobasôna ba bé 822. Bana bape le Adaya man Yérôham, man Pélalia, man Amzi, man Sakaria, man Pasur,+ man Malkiya, 13 ni lôkisañ yap, baéga ba mandap ma bikôkôa, bobasôna ba bé 242. Bana bape le Amasai man Azarel, man Azai, man Mésilémôt, man Imer, 14 ni lôkisañ yap i i bé bôt ba ngui, i ban-ga makénd; bobasôna ba bé 128. Zabdiel, nu a bé lôl i bañga lihaa, nyen a bé mbéñge wap.

15 Mu Lôk Lévi: Sémaya+ man Hasub, man Azrikam, man Hasabia, man Buni, 16 ni Sabétai,+ ni Yôzabad,+ mu baéga ba Lôk Lévi, bon ba bé éga minson mi bé séla i mbégdé i ndap i bañga Nyambe. 17 Bana bape le Matania+ man Mika, man Zabdi, man Asaf,+ mbôgna ntuba tjémbi, nyen a bé éga bibégés i ngéda masoohe,+ ni nhôla wé le Bakbukia, ni Abda man Samua, man Galal, man Yédutun.+ 18 Lôk Lévi yosôna i i bé i tison pubhaga i bé 284.

19 Akub bona Talmôn+ bon ba bé batat nwemel, lôñni lôkisañ yap i i bé tat manwemel; bobasôna ba bé 172.

20 Ini Lôk Israel ipe, ni biprisi, ni Lôk Lévi, ba bé yééne i bitison bipe bi Yuda, hiki wada mu hisi a bi kôdôl.* 21 Basal i témpel+ ba bé yééne i Ôfel.+ Ziha bona Gispa bon ba bé éga basal i témpel.*

22 Uzi a bé mbéñge Lôk Lévi i Yérusalem; a bé man Bani, man Hasabia, man Matania,+ man Mika, mu mbôda Asaf, bon ba bé batôp tjémbi; a bé éga nson u ndap i bañga Nyambe. 23 Inyule kiñe i bi ti oda inyu batôp tjémbi,+ ba bé lama kôhna nsaa inyu mam ma bé béda bo hiki kel. 24 Pétaya man Mésézabel, mu lihaa li Zéra, man Yuda, nyen a bé ntipék nu kiñe* inyu mam momasôna ma bé béñge litén.

25 Inyu mambai ni minkoñ nwap, bon ba Lôk Yuda bape ba bé yééne i Kiriat-Arba+ lôñni minkoñ nwé,* ni i Dibôn lôñni minkoñ nwé, ni i Yékabzéel+ lôñni mambai mé, 26 ni i Yésua, ni i Môlada,+ ni i Bét-Pélet,+ 27 ni i Hazar-Sual,+ ni i Béer-Séba lôñni minkoñ nwé,* 28 ni i Ziklag,+ ni i Mékôna lôñni minkoñ nwé,* 29 ni i En-Rimôn,+ ni i Zôra,+ ni i Yarmut, 30 ni i Zanôa,+ ni i Adulam lôñni mambai mé, ni i Lakis+ lôñni minkoñ nwé, ni i Azéka+ lôñni minkoñ nwé.* Ba bi yééne ibôdôl i Béer-Séba letee ni i nsôsôgô u Hinom.+

31 Bon ba Benyamin ba bééne i Géba,+ ni i Mikmas, ni i Ai, ni i Bétel+ lôñni minkoñ nwé,* 32 ni i Anatôt,+ ni i Nôb,+ ni i Anania, 33 ni i Hazôr, ni i Rama,+ ni i Gitaim, 34 ni i Hadid, ni i Zébôim, ni i Nebalat, 35 ni i Lôd lôñni i Ônô,+ nsôsôgô u baôô gwom. 36 Mintôñ mimpe mi Lôk Lévi mi mi bi lôl i Yuda mi bé yééne i nkoñ u Benyamin.

12 I biprisi ni Lôk Lévi bana bon ba bi bet i Yérusalem ni Sôrôbabel+ man Séaltiel,+ lôñni Yésua:+ Séraya, Yérémia, Ésra, 2 Amaria, Maluk, Hatus, 3 Sékania, Réhum, Mérémôt, 4 Idô, Ginétoi, Abiya, 5 Miyamin, Maadia, Bilga, 6 Sémaya, Yôyarib, Yédaya, 7 Salu, Amok, Hilkia ni Yédaya. Bon ba bé baéga ba biprisi ni baéga ba lôkisañ yap i dilo di Yésua.

8 Bana bon ba bé Lôk Lévi: Yésua, Binui, Kadmiel,+ Sérébia, Yuda ni Matania.+ Matania nyen a bé éga tjémbi di mayéga, nye ni lôkisañ yé. 9 Yak lôkisañ yap le Bakbukia bona Uni ba bé ba téé bo i mbombom inyu gwel nson u batat.* 10 Yésua a gwal Yôyakim, Yôyakim a gwal Éliasib, Éliasib+ a gwal Yôiada.+ 11 Yôiada a gwal Yônatan, Yônatan a gwal Yadua.

12 I dilo di Yôyakim, bana bon ba bé biprisi, baéga ba mandap ma bikôkôa: Mu lihaa li Séraya,+ Méraya; mu lihaa li Yérémia, Hanania; 13 mu lihaa li Ésra,+ Mésulam; mu lihaa li Amaria, Yéhôhanan; 14 mu lihaa li Maluki, Yônatan; mu lihaa li Sébania, Yôsep; 15 mu lihaa li Harim,+ Adna; mu lihaa li Mérayôt, Helkai; 16 mu lihaa li Idô, Sakaria; mu lihaa li Ginétôn, Mésulam; 17 mu lihaa li Abiya,+ Zikri; mu lihaa li Miniamin, ...;* mu lihaa li Môadia, Piltai; 18 mu lihaa li Bilga,+ Samua; mu lihaa li Sémaya, Yéhônatan; 19 mu lihaa li Yôyarib, Matenai; mu lihaa li Yédaya,+ Uzi; 20 mu lihaa li Salai, Kalai; mu lihaa li Amok, Éber; 21 mu lihaa li Hilkia, Hasabia; mu lihaa li Yédaya, Nétanel.

22 Ba bi tila môl ma baéga ba mandap ma bikôkôa ba Lôk Lévi ni môl ma biprisi i dilo di Éliasib, Yôiada, Yôhanan ni Yadua,+ hala wee letee ni i ngéda Darius, mut Persia, a bé ane.*

23 Ba bi tila môl ma bon ba Lôk Lévi, ba ba bé baéga ba mandap ma bikôkôa i kaat miñañ, letee ni i dilo di Yôhanan man Éliasib. 24 Baéga ba Lôk Lévi bana le: Hasabia, Sérébia ni Yésua,+ man Kadmiel.+ Lôkisañ yap i bé i téé bo i mbombom inyu ti bibégés ni mayéga inoñnaga ni biniigana bi David,+ mut bañga Nyambe. Ntôñ wada u batat u bé ipañ uu ntôñ umpe u batat. 25 Matania,+ Bakbukia, Ôbadia, Mésulam, Talmôn ni Akub+ ba bé tat manwemel,+ ba tadak ki bituñ i het ba ntéédana gwom; i bituñ bini bi bé bebee ni makôga ma témpel. 26 Ba bé gwel nson i dilo di Yôyakim, man Yésua,+ man Yôzadak, yak i dilo di ngomin i pes mbok le Néhémia, ni i dilo di prisi ni mut matila* le Ésra.+

27 I ngéda ngand mayibil ma lipénd li Yérusalem i bi kola, ba bi yéñ Lôk Lévi mu bahoma bobasôna ba bé yééne, ba lona bo i Yérusalem inyu tégbaha ngand mayibil ni maséé, ni tjémbi di mayéga,+ ba kôdôk ki nsik ni bibende bi mamuna, ni bikôkôda bi manganda, ni diluñ. 28 Bon bôlôm ba batôp tjémbi* ba kodba i tegep mbok,* ba lôlak mu minkoñ mi nkéña Yérusalem, i mambai ma bon ba Nétôfa,+ 29 i Bét-Gilgal,+ i minkoñ mi Géba+ ni mi Azmavet,+ inyule batôp tjémbi ba bi oñ mambai ipañ Yérusalem. 30 I mbus, biprisi ni Lôk Lévi ba pubus bomede, ba pubus ki litén,+ yak manwemel+ ni lipénd.+

31 Ha nyen me bi bédés baane ba Yuda i ngii lipénd. Me téé ki mintôñ minkeñi ima mi batôp tjémbi di mayéga, ni mintôñ mimpe mi mi noñ nwo. Ntôñ wada u bé kil i pes walôm i ngii lipénd, u kenek i nwemel u Nwind mi Libu.*+ 32 Hôsaya ni pes yada i baane ba Yuda ba bé noñ bo, 33 lôñni Azaria, Ésra, Mésulam, 34 Yuda, Benyamin, Sémaya ni Yérémia. 35 Bana bon ba biprisi bon ba bé ni bo, ba ban-ga sép:+ Sakaria man Yônatan, man Sémaya, man Matania, man Mikaya, man Zakur, man Asaf,+ 36 ni lôkisañ yé le Sémaya, Azarel, Milalai, Gilalai, Maai, Nétanel, Yuda, Hanani, ba ban-ga bikôkôda bi David,+ mut bañga Nyambe; yak Ésra,+ mut matila, a bé bôk bo i bisu. 37 Kiki ba mpam i nwemel u Lingen,+ ba ke i mbombom yap, ba tagbene mu likala+ li Nkoñ u David,+ ba lôô ki mu mabédél ma lipénd i ngii ndap David letee ni i nwemel u Malép,+ i pes likôl.

38 Uu ntôñ umpe u batôp tjémbi di mayéga u bi yoñ njel ipe,* yak me me noñ wo lôñni ini pes ipe i litén; di kil mu lipénd i ngii Nkum ndap u Bup Hiuu,*+ letee ni i lipénd Likeñi+ 39 ni i ngii nwemel u Éfraim,+ letee ni i nwemel u Nlômbi Tison;+ di ke letee ni i nwemel u Tjobi,+ Nkum ndap u Hananel,+ Nkum ndap u Méa; letee ni i nwemel u Mintômba,+ di telbene i nwemel u Batat.

40 Sôk i nsôk, mintôñ nwo ima mi batôp tjémbi mi bi telep i bisu bi ndap i bañga Nyambe; yak me me boñ nlélém, me ni pes yada i bakot nkus bakeñi ba ba bé lôñni me, 41 yak biprisi le Éliakim, Maaséya, Miniamin, Mikaya, Éliôénai, Sakaria ni Hanania, bi ban-ga sép, 42 yak Maaséya, Sémaya, Éléazar, Uzi, Yéhôhanan, Malkiya, Élam ni Ézer. Ha nyen batôp tjémbi ba bi tôp makeñi isi énél i Izraya.

43 I kel i, ba bi ti ngandak bisesema, ba nok ki maséé+ inyule bañga Nyambe a bi boñ le ba nok maséé ngandak. Yak bôda ni boñge ba bé nok maséé,+ kayéle liyôgbe li maséé li Yérusalem li bé nôga haa.+

44 I kel i nyen ba bi téé bôt inyu tééda bahoma i het ba ntéédana makébla,+ matam ma bisu+ ma libumbul,+ ni jôga jada ikété jôm+ jolisôna. Mu nyen ba bé lama tééda ngaba ba nyôñôl mu nwom mi bitison inyu biprisi lôñni Lôk Lévi, kiki mbén Môsi+ i bé kal, inyule litén li bé nok maséé inyu nson biprisi ni Lôk Lévi+ ba bé gwel. 45 Ba bôdôl ki gwel nson u Nyambe wap, ba noñ yak bilem gwap inyu ba mapubi i bisu bi Nyambe, kiki yak batôp tjémbi ni batat nwemel ba bi boñ, inoñnaga ni biniigana bi David ni man wé Salômô. 46 Inyule i ngéda kôba, i dilo di David bo Asaf, batôp tjémbi ba bééna baéga,* bo ki bon ba bé éga ntuba u tjémbi di di mbégés Nyambe,+ ni tjémbi di di nti nye mayéga. 47 I dilo di Sôrôbabel+ ni i dilo di Néhémia, Israel yosôna i bé ti batôp tjémbi+ ni batat nwemel+ makébla* ma ba bé lama kôhna inyu mam ma bé béda bo hiki kel. Ba bé biine Lôk Lévi+ yap ngaba ipañ, yak Lôk Lévi i biinege mbôda Arôn yap ngaba.

13 Ha ngéda i, ba bi éñél litén+ kaat Môsi, ba léba ntilga mukété le man Lôk Amôn tole man Lôk Môab+ a bé lama bé jôp i likoda li bañga Nyambe+ kekikel. 2 Inyule ba bi lo bé i boma Lôk Israel lôñni bret ni malép, ndi ba bi saa Balam le a tiihe bo.+ To hala, Nyambe wés a bi héñha ndiihe le i yila bisai.+ 3 Ndik kiki ba bi nok mbén Môsi, ba bôdôl bagal Lôk Israel ni ba bobasôna ba bé bakén ba bôt i ligwéak.*+

4 Ilole i jam lini li mbôña, Éliasib,+ mut lihaa li Tôbia,+ nyen a bé prisi ba bi téé inyu tééda bituñ i het ba ntéédana gwom* i ndap* Nyambe+ wés. 5 A bi kôôbana Tôbia tuñ ikeñi ikété bituñ i het ba ntéédana gwom;* mu tuñ i nyen ba bé téédana likébla li bijek, nunumba, bisélél, jôga jada ikété jôm li kôn, wai yondo, môô,+ gwom ba bi téé le ba nlama ti Lôk Lévi,+ batôp tjémbi, batat nwemel, yak ni makébla inyu biprisi.+

6 Mu ngéda i yosôna, me bé bé me i Yérusalem, inyule me bi ke yak Kiñe Artaserses+ i Babilôn i nwii mi nyônôs 32+ mi ane yé; ndék ngéda i mbus, me bat kiñe kunde i témb. 7 Ha nyen me bi témb i Yérusalem, me léba le Éliasib+ a bi boñ béba ikeñi kiyaga, a bi kôôbana Tôbia+ tuñ mukété bituñ i het ba ntéédana gwom, i kotoo i ndap i bañga Nyambe. 8 Hala a bi hindha me ñem ngandak, kayéle me yoñ gwom bi Tôbia gwobisôna bi bi bé mu tuñ i het ba ntéédana gwom, me leñ gwo i mbégdé. 9 Me ti ki oda le ba pubus bituñ i het ba ntéédana gwom. I mbus, me timbis bisélél bi ndap i bañga Nyambe+ mukété, yak ni likébla li bijek lôñni binunumba.+

10 Me bi léba ki le Lôk Lévi+ i bi kôhna bé ngaba+ yap. Inyu hala nyen Lôk Lévi ni batôp tjémbi ba ba bé gwel nson ba bi ke, hiki mut i wom+ wé. 11 Jon me bi nyéyéi bakot nkus bakeñi,+ me kal bo le: “Inyuki ni nwas le ba yôi+ ndap i bañga Nyambe?” I mbus, me kot bo, me témb me téé hiki mut i homa wé nson. 12 Bôt ba Yuda bobasôna ba lona jôga jada ikété jôm+ li kôn, li wai yondo ni li môô ikété bituñ i het ba ntéédana gwom.+ 13 Me pohol prisi le Sélémia, ni mut matila* le Zadok, yak mut wada ikété Lôk Lévi le Pédaya, me téé bo le bon ba ba batééda bituñ i het ba ntéédana gwom. Hanan man Zakur, man Matania, nyen a bé nhôla wap. Ni maliga, i bôt bana ba bé bôt ba kôli bôdôl ñem. Bon ba bééna nson i ti hiki mut ikété lôkisañ yap yé ngaba.

14 Éé a Nyambe wem, bigda me+ inyu jam lini, u hôya* bañ maboñok mem malam* inyu ndap yoñ ni minson mi mi ngwéla+ mu.*

15 Mu mangéda ma, me bi tehe bôt i Yuda, ba bé tjo* matam ma nkôô wai i waa wai i kel sabat,+ bape ba bé kot mimbom mi kôn, ba kéhak nwo i ngii magas; ba jôbnaga ki wai i Yérusalem i kel sabat,+ yak matam ma nkôô wai, ni matam ma faigé, ni mintén mi mambegee nwominsôna. Jon me bi béhe bo le ba nuñul ha bañ bijek i kel i.* 16 Yak bôt ba Tir ba ba bé yééne mu tison, ba bé lona tjobi ni mintén mi manyuñga nwominsôna, ba nuñlege gwo bôt ba Yuda i Yérusalem i kel sabat.+ 17 Jon me bi nyéyéi mintôô mi bôt mi Yuda, me kal nwo le: “Imbe i béba jam ni yé i boñ? Ngo ni ta bé i diihe kel sabat! 18 Baa i mam mana bé mon basôgôlsôgôl banan ba bi boñ, kayéle Nyambe wés a lona i ndutu ini yosôna i ngii yés, ni i ngii tison ini? Nano yak bé ni nkônde unbaha Nyambe inyule ni ndiihe bé sabat.”+

19 Ndik kiki u u bi kahal sude i Yérusalem ilole sabat i mbôdôl, me ti oda le ba yip manwemel ma lipénd li tison. Me kal ki le ba nlama bé yibil mo letee sabat i tagbe, me téé ki bahôla bem bahogi i manwemel inyu boñ le mut a jôbna bañ mbegee yo ki yo ikété tison i kel sabat. 20 Hala nyen bôt ba nyuñga ni banuñul mintén mi gwom nwominsôna ba bi tégbaha u wada tole mau ima, ibabé le ba jôp i Yérusalem. 21 I mbus, me béhe bo, me kal bo le: “Inyuki ni ntégbaha u i bisu bi lipénd? Ibale ni mboñ ki hala, m’a luhul bé ni ngui.” Ibôdôl ha ngéda i, ba bi lo ha bé i kel sabat.

22 Me béhe ki bon ba Lôk Lévi le ba bana lem i pubus bomede, ni le ba loo i tat manwemel inyu tééda kel sabat pubhaga.+ Éé a Nyambe wem, bigda me yak inyu jam li, kônôl ki me ngoo inoñnaga ni ndéñbe yoñ i unda ngandak gwéha.+

23 Mu mangéda ma, me tehe ki bon ba Lôk Yuda ba ba bi bii*+ bingond bi Lôk Asdôd,+ ni bi Lôk Amôn, ni bi Lôk Môab.+ 24 Pes yada mu bon bap i bé pot hop Asdôd, bana bape ba bé pot dilémb di biloñ bipe; ndi to wada mukété yap a bé yi bé pot hop Lôk Yuda. 25 Jon me bi nyéyéi i bôt ba, me tiihe ki bo, me bép+ bahogi, me tus* tjôñ tjap, me boñ bape le ba kum soñ i jôl li Nyambe, me kalak le: “Ni nlama bé ti bingond binan i mabii yak bon bap bôlôm, to neebe le ngond yap to yada i lo i libii yak bon bôlôm banan; to bébomede ni nlama bé bii bo.+ 26 Baa inyu bôda ba biloñ bipe bé nyen Salômô a bi boñ béba? Ikété biloñ gwobisôna, kiñe ipe i bé bé kiki nye;+ yak Nyambe+ wé a bé gwés nye, inyu hala nyen a bi téé nye kiñe i ngii Israel yosôna. Ndi yak nye, bôda ba biloñ bipe ba bi tinde nye i boñ béba.+ 27 Imbe i béba ikeñi ni yé i boñ, le ni nkolba Nyambe wés hala kiki ni mbii bôda ba biloñ bipe?”+

28 Wada mu bon ba Yôiada,+ man prisi keñi le Éliasib,+ a bi yila nkil Sanbalat,+ mut Hôrônaim. Jon me bi luhul nye le a kee me haa.

29 Éé a Nyambe wem, bigda bo inyule ba bi hindis nson u biprisi, ni malômbla ma nson u biprisi,+ ni ma Lôk Lévi.+

30 I mbus, me pubus bo ni mahindi momasôna ma biloñ bipe, me ti ki biprisi ni Lôk Lévi nson, kayéle hiki mut a gwel wé wé nson.+ 31 Handugi hala, me téé ngim ngéda ba nlama lona tjéé,+ me yoñ ki bitelbene inyu matam ma bisu* ma libumbul.

Éé a Nyambe+ wem, bigda me, u sayap ki me.*