MINLÉND MI YÉRÉMIA
א [Aleph]*
1 Wee! Yérusalem nunu a bééna ngandak bôt, nano a nyila hôlô!+
A nyila kiki yik muda, nye nu a bééna ngandak bôt iloo biloñ bipe!+
A bé ntôô muda ikété bipes bi mbok,* nano a yé nyégsaga i sal bôlô njok!+
ב [Beth]
2 U wonsôna, a ñee, ee ni ee,+ gwiiha bi nyôôs mamañ mé.
Ikété mimbok nwé nwominsôna, to wada a nlo bé i hôgbaha nye.+
Mawanda mé momasôna ma nliibana nye,+ ma kahal oo nye.
ג [Gimel]
3 Yuda a bi ke i minkôm,+ a bi nok njôghe, a yila ki nkol.+
Nano a nyééne ikété biloñ bipe,+ a gwé bé linôyôi.
Bakolba bé bobasôna ba bi kwél nye i ngéda a bé ikété njiiha.
ד [Daleth]
4 Minloñ mi Siôn mi yé ndik maéya ni maéya, inyule bôt ba nke ha bé nyoo i mangand.+
Makôga momasôna ma tison ma mbugi;+ biprisi gwé bi nsiida.
Yak bingond bi ngi yi munlôm* bi mbégél, bi yé ikété ndutu ikeñi.
ה [He]
5 I bôt ba bé jôs nye, ba ñane nye nano;* yom to yada i ntééñga bé baoo bé.+
Inyule Yéhôva nyen a nôgha nye njôghe inyu ngandak yé maboñok mabe.+
I bôt ba bé jôs nye, ba bi kena bon bé i minkôm.+
ו [Waw]
6 Ngond Siôn+ i nimis bilama gwé gwobisôna.
Baane bé ba yé kiki balôm ba ngôlôñ,* ba ba nléba bé homa bikai,
ba mbôk i bisu bi nu a noñ bo, ba bak ntombok.
ז [Zayin]
7 Nano kiki a yé ikété njiiha, to homa liyééne a gwé bé, Yérusalem a nhoñol
gwom bilam gwobisôna a bééna i ngéda kôba.+
I ngéda bôt bé ba bi kwo i moo ma nu a bi lo i jôs nye, a bi bana bé to nhôla,+
i bôt ba bé jôs nye, ba bi tehe nye, ba ndegle* ki nye inyule a bi kwo.+
ח [Heth]
8 Yérusalem a bi boñ béba ikeñi.+
Inyu hala nyen a nyila yom nyega.
I bôt bobasôna ba bé ti nye lipém, nano ba nyan nye, inyule ba bi tehe nso+ wé.
Nyemede a nsiida,+ a hielbaga ni hison.
ט [Teth]
9 Mam mé ma nyega ma bi hindis mambot mé.
A bi hoñol bé le lisuk jé li nla ba hala.+
A bi kwo béba mbek. Mut to wada a nlo bé i hôgbaha nye.
A Yéhôva béñge njiiha yem, inyule ñoo wem a ngôgôp, hala kiki a bi yémbél me.+
י [Yod]
10 Nu a bé jôs nye a bi kadal nkus wé wonsôna.+
Ñ, a bi tehe bôt ba biloñ bipe ba njôp i témpel yé,+
i bôt u bi téé mbén le ba jôp bañ i likoda joñ.
כ [Kaph]
11 Bôt bé bobasôna ba nsiida; ba nyéñ bijek.+
Ba bi ti tik yap gwom inyu kôhna yom i je, le ndi ba wo bañ.
Nun-ki a Yéhôva, béñge kiki me mpôna muda* a gwé bé nseñ.
ל [Lamed]
12 A bébobasôna ba ni ntagbe i minloñ, baa hala a ntééñga bé bé?
Nuna-ki, ni tehe!
Baa njôghe ipe i mpam njôghe ba bi nôgha me,
i njôghe Yéhôva a bi nôgha me i kel hiun hié hi bi kala?+
מ [Mem]
13 A bi om hié hi hi nlôl i ngii inyu ligis bihés gwem,+ hi ligis bihés gwem gwobisôna.
A bi sambal mbunja inyu makôô mem; a nyégsa me i témb ni mbus.
A bi boñ le me yila kiki muda le ba nyôi.
Kel yosôna me nkon.
נ [Nun]
14 A bi kañ maboñok mem mabe ni moo mé nyemede, a bééga me mo kiki kop nson.
A bi kañ me mo i joo, ngui i mal me.
Yéhôva a bi ti me i moo ma bôt me nla bé jôs.+
ס [Samekh]
15 I bôt ba ngui ba bé i meeni, Yéhôva a bi héya bo.+
A bi sébél bisônda i jôs me, le ba tjé boñge bem ba wanda.+
Yéhôva a bi tjo ngond ngi yi munlôm i Yuda i waa wai.+
ע [Ayin]
16 I mam mana mon ma ñééha me;+ gwiiha bi nkuli me i mis.
Inyule i mut a bak le a hôgbaha me tole a lédés me, a nke haa ni me.
Bon bem ba bôlôm ba nlehel ñem, inyule ñoo a nyémbél.
פ [Pe]
17 Siôn a mbat mahôla;*+ a gwé bé mut inyu hôgbaha nye.
Yéhôva a nti bôt bobasôna ba nkéña Yakôb oda le ba jôs nye.*+
Yérusalem a nyila yom nyega i mis map.+
צ [Tsade]
18 Yéhôva a téé sép,+ inyule men me bi nôgôl bé mambén* mé.+
A bôt ba matén momasôna, emblana, ni tehe ki ndutu yem.
Bingond gwem bi ngi yi munlôm* ni boñge bem ba wanda ba bi ke i minkôm.+
ק [Qoph]
19 Me bi sébél mimbok nwem, ndi mi bi liibana me.+
Biprisi gwem ni mimañ nwem mi litén mi bi wo ikété tison,
i ngéda ba bé yéñ bijek inyu boñ le ba yégle i niñ.+
ר [Resh]
20 Béñge ki a Yéhôva, inyule me yé ikété ndutu ikeñi.
Libum* li nkiiña me.
Ñem u nsiida ikété yem, inyule me bi ndogbene yaga we.+
I mbégdé, pañson i mélés me bon;+ ikété ndap, nyemb i yé.
ש [Shin]
21 Bôt ba nok me me nsiida, ndi mut to wada a nhôgbaha bé me.
Baoo bem bobasôna ba bi nok le me yé ikété ndutu.
Ba nkon maséé, inyule wen u bi lona me i ndutu i.+
Kel yada, u ga yônôs i jam u bi bôn le w’a boñ bo.+ Yokel, ba ga yila kiki me.+
ת [Taw]
22 Boñ le bibéba gwap bi pam i bisu gwoñ, u kogse ki bo ni bañga kogse,+
ndik kiki u bi kogse me inyu maboñok mem mabe.
Inyule me nsiida ngandak, yak ñem wem u nkon.
א [Aleph]
2 Wee! Yéhôva a nhô ngond Siôn ni ond i hiun hié!
A bi boñ le bilama bi Israel bi nyodi i ngii bi kwoo ’isi.+
A bi bigda ha bé kéhne yé makôô+ i hilo hi hiun hié.
ב [Beth]
2 Yéhôva a bi tjé mayééne ma Yakôb momasôna, ibabé konangoo.
Ikété hiun hié hikeñi, a bi bôk mapénd ma ngui ma ngond Yuda.+
Ane+ ni dikoo tjé di mbok,+ a bi bes bo ’isi, a hindis ki bo.
ג [Gimel]
3 Ikété hiun hié hikeñi, a bi mélés ngui* i Israel.
A bi témbna woo wé ni mbus, i ngéda ñoo a bi tiige bebee;+
yak ikété Yakôb, a bi ke ni bisu i loñ kiki hié hi hi nligis gwom gwobisôna bi bi yé ipañ.+
ד [Daleth]
4 A bi nimbil* mpihlôñgô wé wengoñle a ntehe ñoo; a pa woo wé walôm inyu jôs bés wengoñle a bé ñoo wés;+
a bé nol bôt ba bé balam i mis, ibabé waa.+
A bi kôp hiun+ hié ikété ndap libadô i ngond Siôn+ kiki hié.
ה [He]
5 Yéhôva a bi yila kiki ñoo,+
a bi milba Israel.
A bi milba minkum nwé mi mandap nwominsôna;
a bi tjé mapénd mé ma ngui momasôna.
A bi boñ le ngond Yuda i ee, i lond ki ngandak.
ו [Waw]
6 A mbôk lap yé,+ kiki ba mbôk pele i i yé ikété wom.
Yéhôva a bi boñ le ba hôya mangand ni sabat ikété Siôn,
ikété hiun hié hikeñi, a bi bañ bé kiñe, to prisi yaga.+
ז [Zayin]
7 Yéhôva a bi tjél juu jé li bisesema;
a tjôô yak homa wé mpubhaga.+
A bi nwas mabap ma minkum mi mandap i moo ma baoo.+
Ba bi bédés makiñ map i ndap Yéhôva,+ kiki i kel ngand.
ח [Heth]
8 Yéhôva a bi kit le, a mbôk lipénd li ngond Siôn.+
A bi nimbil nkôô ba ngwélél inyu hek gwom.+
A bi gwel bé woo wé le u lona bañ tjiba.*
A mboñ le libap ni lipénd bi ee.
Gwobisôna bi bi nimis ngui yap.
ט [Teth]
9 Manwemel mé ma nsôôbe ’isi.+
A bi tjé, a bôk ki bihimbil gwé.
Kiñe yé ni dikoo tjé di mbok ba yé ntjamak ikété biloñ.+
Mbén* i ta bé; yak bapôdôl bé ba ntehe ha bé biyiinda bi bi nlôl yak Yéhôva.+
י [Yod]
10 Mimañ mi ngond Siôn mi yiine i nso si, mi mom nwee.+
Mi nkôbba lipum li biték i miño nwap, mi hééba minsugut.+
Bingond bi ngi yi munlôm bi Yérusalem bi ñue miño nwap letee ni ’isi.
כ [Kaph]
11 Mis mem ma nwaa kulus gwiiha.+
Me nsiida ngandak ikété yem.*
Ñem u mpédi me* inyule ngond litén jem* i nkwo.+
Inyule boñge ni minkéñéé mi bon ba nkwo lihiô i bahoma ba mbamba ba tison.+
ל [Lamed]
12 Ba nwaa bé kal banyañ bap le: “Mama, njal ni nyus bi gwé me!”*+
Ba nkwo lihiô i bahoma ba mbamba ba tison kiki mut le a mbabaa,
ba nwo ndék ni ndék i moo ma banyañ bap.
מ [Mem]
13 Himbe hihéga me nla yôñôl we,
tole me ga hégha we ni kii, a ngond Yérusalem?
Ni kii me nla hégha we inyu ti we hogbe, a ngond Siôn i i yé ngi yi munlôm?
Inyule mbabaa yoñ i yé ikeñi kiki tuye.+ Njee a yé le a tibil we?+
נ [Nun]
14 Biyiinda bapôdôl boñ ba bi tehe bi yé bitembee, bi gwé bé to nseñ,+
ba bi yeelene bé we hihôha hioñ inyu boñ le u ke bañ i minkôm,+
ndi ba bi ke ni bisu i añle we biyiinda bi bitembee, ni kal we bipôdôl bi malôga.+
ס [Samekh]
15 I bôt bobasôna ba ntagbe i nloñ ba mbamb moo inyu yan me.+
Ba nhem hiôa, ba megek miño inyule ba yé nhelek+ i ngéda ba mbéñge ngond Yérusalem, ba badbaga le:
“Baa i tison ini yon ba bé kal le: ‘I nlôôha ba ilam, i nti bôt ba hisi hiosôna maséé’?”+
פ [Pe]
16 Baoo boñ ba ga nahlene we manyo.
Ba hem hiôa, ba jek masoñ, ba kalak le: “Di mal mil nye.”+
I kel ini yon di bé bem!+ I mal lo, di mal ki tehe yo!+
ע [Ayin]
17 Yéhôva a bi boñ i yom a bééna i mahoñol;+ a bi yônôs i yom a bi pot,+
i yom a bi ti kiki oda i ngéda kôba.+
A bi bôk ibabé konangoo.+
A bi nwas le ñoo a nol we hiol; a bi ti bakolba boñ ngui.*
צ [Tsade]
18 Miñem nwap mi nsébél Yéhôva ni kiñ ikeñi, a lipénd li ngond Siôn.
Gwiiha gwoñ bi kuli kiki lom, juu ni njamuha.
U yoñ bañ noi, mis moñ* ma waa bañ to kulus gwiiha.
ק [Qoph]
19 Telep! U lond u wonsôna i bibôdle bi faa juu.
Kôp Yéhôva mam momasôna ma yé we i ñem kiki ba nkôp malép.
Soohe nye inyu biniñ bi bon boñ,*
ba ba nkwo lihiô i makanda momasôna ma minloñ* inyule njal i gwé bo.+
ר [Resh]
20 Béñge a Yéhôva, nun-ki i nwet u yé i kogse.
Baa bôda ba nlama kônde je mbôda* yap, bon bap ba ba bi gwéé, ba bak mbôô,+
tole i homa mpubhaga nu Yéhôva nyen ba nlama nôlôl biprisi ni bapôdôl?+
ש [Shin]
21 Mim mi diloga ni mi mimañ mi bôt mi niñi ’isi, i ñem minloñ.+
Pansoñ i bi nol bingond bi ngi yi munlôm* ni boñge bem bôlôm.+
I kel hiun hioñ, u bi nol; u bi tjé ibabé konangoo.+
ת [Taw]
22 U bi sébél mam ma nkônha me woñi,* ma lôlak i bipes gwobisôna, kiki bo le u nsébél bôt i kel ngand.+
I kel hiun hi Yéhôva, mut to wada a ta bé le a ke ngwéé, a ga pei bé to;+
א [Aleph]
3 Me yé mut a bi tehe bôt ba nok njôghe inyu hisôô hi hiun hié.
2 A bi luhul me, a boñ le me kil i jiibe, ndi i mapubi bé.+
3 Hiki kel, ibabé waa, a bé sambal woo i kogse me.+
ב [Beth]
4 A bi bôlôs minsôn nwem ni koo yem;
a bi bôk bihés gwem.
5 A bi kéña me ni lipénd; a kéña ki me ni bibebela bi bi gwé mbôñ i nlol,+ yak ni mandutu.
6 A bi nyégsa me i yén i bahoma ba jiibe kiki bôt ba bi wo kôba.
ג [Gimel]
7 A bi kwéhne me ikété lipénd le ndi me pam bañ;
a kañ me makôô ni minsañ mi mamuna mi mi nyét.+
8 I ngéda me bé nhelek, me bi bat mahôla, ndi a bi top bé emble* masoohe mem.+
9 A bi yoñ ngok ba nkôñg, a sék me njel;
a kôde ki manjel mem.+
ד [Daleth]
10 A nsomop kiki ours,* a mbem me, a sôli kiki mbondo njéé.+
12 A bi nimbil* mpihlôñgô wé, a leñ me likoñ.
ה [He]
13 A bi tôp me ditam* ni makoñ* ma bot yé.
14 Me bi yila yom minjôha inyu matén momasôna; kel yosôna, ba ndegle me ikété tjémbi tjap.
15 A nuus me ni gwom bi nlol, a nkônde ki nyus me lilôli.+
ו [Waw]
16 A mbôk me masoñ ni dibaña;
a mboñ le me béñba ikété libu.+
17 U mélés nsañ me bééna; me nhôya i yom i yé ilam.
18 Jon me nkal le: “Bilama gwem bi mal, me mbem ha bé yom yo ki yo yak Yéhôva.”
ז [Zayin]
19 Bigda njiiha yem, bigda le me gwé bé liyééne,+ u bigda ki le me nje yom i nlol, ni kai i i gwé mbôñ.+
20 Ibabé pééna, u ga hoñol me, u sôs inyu hôla me.+
21 M’a bigda i jam li i ñem wem; inyu hala nyen me mba me nhônba, me bemek we.+
ח [Heth]
23 Hiki kel i nye,+ a ñunda bés konangoo; a kôli le di bôdôl nye ñem ngéda yosôna.+
24 Me bi kal le: “Yéhôva a yé ngaba yem,+ inyu hala nyen me mba me nhônba, me bemek nye.”+
ט [Teth]
25 Yéhôva a mboñ i mut a mbôdôl nye ñem loñge,+ yak i mut a nke ni bisu i yéñ nye.+
26 I yé loñge i bem tohi i Yéhôva+ ikété nwee.*+
27 I yé loñge le mut a nok ndutu* nye mañge.+
י [Yod]
28 A nlama yén nyetama, a mom nwee hala kiki Nyambe a yé i nôgha nye i ndutu i.+
29 A ha nyo wé i lipum li biték;+ bebek ha nyen botñem i ga ba.+
30 A lek limañ ibale mut a nsômbôl bép nye; a nwas le ba sol nye, bañga lisolok.
כ [Kaph]
31 Inyule Yéhôva a’ tjôô bé bés i mba ni mba.+
32 To hala kiki a bi nôgha bés njôghe, a ga kônôl bés ngoo inyule gwéha* yé i yé ikeñi.+
33 A ta bé maséé i nôgha bon ba bôt ndutu,+ to njôghe.
ל [Lamed]
34 I ngéda mut a ntét bôt ba mok ba nkoñ ’isi bobasôna ni kôô wé,+
35 i ngéda mut a nkôdne mut numpe mbagi i bisu bi Nungingii,+
36 i ngéda ba mbagle bé mut nkaa loñge,
Yéhôva a ta bé le a nihbe i mintén mi mam mi.
מ [Mem]
37 Baa njee a nla pot jam, a yônôs ki jo handugi le Yéhôva a ti oda?
38 Nyo u Nungingii
u ta bé le u podok mam mabe, u podok mam malam.
39 Baa mut a kôli le a tjelel i ngéda bikuu bi béba yé bi nkahal kwél nye?+
נ [Nun]
40 Di wan manjel més, ñ, di tibil yaga wan mo,+ di témb ki yak Yéhôva.+
41 Di yemhe* Nyambe nu ngii ni ñem wonsôna,+ di pa ki moo i ngii, di kalak le:
42 “Di bi boñ béba, di ndogop ki,+ jon u bi nwéhél bé bés.+
ס [Samekh]
44 U bi kéñ njel ni ond inyu boñ le di kôôge bañ we bebee, kayéle masoohe més ma tagbe bañ.+
45 U bi boñ le matén mape ma tehe bés kiki binan ni likund.”
פ [Pe]
46 Baoo bés bobasôna ba nahal manyo inyu pôdôl bés béba.+
47 Woñi ni tjandi bi yé bés i bisu,+ yak tjiba ni bikuu.+
48 Mangen ma malép ma nkuli me i mis inyu tjiba i ngond litén jem.+
ע [Ayin]
49 Gwiiha bi nwaa bé kuli me i mis, bi ñen bé to,+
50 letee Yéhôva a béñge, a tehe ki bés, a bak nyoo ngii.+
51 Me nok njôghe inyule mis mem ma ntehe i jam li bi pémél bingond gwobisôna bi tison yem.+
צ [Tsade]
52 Baoo bem ba ñamb me ngi njom kiki ba ñamb hinuni.
53 Ba bi noode ôbôs niñ yem, ba leñ me ikété bee; ba nwaa bé ôm me ngok.
54 Malép ma bi bet, ma hô me, me kal le: “Me nwo!”
ק [Qoph]
55 A Yéhôva, me bi sébél jôl joñ, me bak ikétékété bee.+
56 Emble kiñ yem, u yip bañ maôô moñ i ngéda me nlôndôl we le u hôla me, le u sôñ me.
57 I kel me bi sébél we, u bi kôôge me bebee. U kal le: “U kon bañ woñi.”
ר [Resh]
58 U bi kaa inyu yem a Yéhôva, u sôñ ki niñ yem.+
59 A Yéhôva, u bi tehe i béba ba bi boñ me; soho pémhene me mbagi sép.+
60 U bi tehe mapuna map momasôna, ni bipék bibe gwobisôna ba nhégél me.
ש [Sin] tole [Shin]
61 A Yéhôva, u bi nok kiki ba nsol me, ni bipék bibe gwobisôna ba nhégél me,+
62 mam baoo bem* ba mpot, yak mam ba nsooga inyu yem kel yosôna.
63 Béñge bo; to ba yii, to ba téé, ba ntubul me tjémbi di nyumba!
ת [Taw]
64 A Yéhôva, w’a timbhe bo inoñnaga ni maboñok map.
65 W’a ti bo minledek mi miñem, hala nyen ndiihe yap y’a ba.
66 A Yéhôva, w’a noñ bo ikété hiun hioñ, u tjé ki bo hana ’isi.
א [Aleph]
4 Béñge kiki gôl, bañga gôl i i bé bai,+ i mbai ha bé!
Béñge kiki ngok+ i témpel i niñi i makanda ma minloñ!*+
ב [Beth]
2 Inyu tik bon bôlôm ba Siôn ba ba bé mahee kiki bañga gôl,
béñge kiki ba nene wengoñle dibee di biték,
le mma dibee a mboñ ni moo mé!
ג [Gimel]
3 Yak dibaa di njéé di nyuñus bon bap méé,
ד [Daleth]
4 Dilémb di minkéñéé mi bon di ñadbe manyo map inyu nyus.
Boñge ba nyagal koga,+ ndi to mut a nti bé bo yo.+
ה [He]
5 I bôt ba meya ba nje biloñge bi bijek, ba bé ba niñi minsee minsee i minloñ inyu njal.+
I bôt ba bé haba bañga mambot,*+ ba nhun makund.
ו [Waw]
6 Kogse* i ngond litén jem i yé ikeñi iloo kogse Sôdôm a bi kôhna inyu béba yé,+
nu a bi tjiba ngélé yada, mut a bé bé le a hôla nye.+
ז [Zayin]
7 Bôt ba Nazir+ ba bé bapubhaga kiki libu li lisuni,* ba pôbôk kiki milik.
Ba bé kôyôp kiki tik ngok i tuye;* ba bé bai kiki ngok i safirô.
ח [Heth]
8 Ba nkahal hénd kiki sipkalak;*
mut a nyimbe ha bé bo mu minloñ.
Koo nyuu i ñadbe bo i bihés;+ i nyila kiki kék le i nkôt.
ט [Teth]
9 I bôt ba nwo ni pansoñ ba yé loñge iloo ba ba nwo inyu njal,+
ba gwé ha bé ngui wengoñle pansoñ yon i ntôp bo, inyule bijek bi ta bé i wom.
י [Yod]
10 Bôda ba ba gwé konangoo ba bi lamb bon bap bomede.+
Bon bap ba bi yilna bo bijek bi maéya i ngéda ngond litén jem i bé tjiba.+
כ [Kaph]
11 Yéhôva a bi unup ngandak;
a kôp hiun hié hikeñi.+
A kuye ki hié hi hi nligis dikuu di Siôn.+
ל [Lamed]
12 Bikiñe bi hisi, to bôt ba nyééne hana nkoñ ’isi ba bi hégda bé
le nkolba bona ñoo ba nla jôp i Yérusalem.+
מ [Mem]
13 Hala a bi bôña inyu maboñok mabe ma bapôdôl bé, inyu béba i biprisi gwé;+
ikété tison, ba bi kôp matjél ma bôt ba téé sép.+
נ [Nun]
14 Ba ntômnde kiki bôt ba ndim+ mu minloñ.
ba yé nyook ni matjél,+
kayéle mut nye ki nye a nla bé tihba mambot map.
ס [Samekh]
15 Bôt ba bé lond le: “Kena! Ni yé nyega! Kena! Kena! Ni tihba bañ bés!”
Inyule ba gwé bé liyééne, ba mbet ba nsôs mu mbégdé.
Yak ikété biloñ bipe, bôt ba nkal bo le: “Ni nla bé yén hana ni bés.”*+
פ [Pe]
16 Yéhôva nyemede nyen a nsand bo;+
ba ga lémél ha bé nye.
Bôt ba ga ti ha bé biprisi lipém,+ ba ga yan yak mimañ mi litén.”+
ע [Ayin]
17 Letee ni nano, mis més ma ntomb i bem mahôla ma ma nlo bé.+
Di bi béñge, di bemek mahôla, ndi i loñ di bé hoñol le i nhôla bés, i bé bé le i tohol bés.+
צ [Tsade]
18 Ba ñamb bés hiki ngéda di ntéé kôô ’isi,+ kayéle di nla bé hiôm i mbamba.
Lisuk jés li yé bebee; dilo tjés di mal, lisuk jés li nkôôge bebee.
ק [Qoph]
19 I bôt ba bé noñ bés ba bé hoo iloo minyôgôl mi ngii.+
Ba bi noñ bés letee ni i dikôa; ba bi amb bés i ñoñ.
ר [Resh]
20 Nhook u Yéhôva+ u u bé inyu yés kiki nhébék u mpémél i mben môl, u ngwiya* ikété bee yap ikeñi,+
i nwet di bé kal le: “D’a yééne isi yiye yé ipôla biloñ bipe.”
ש [Sin]
21 A ngond Édôm,+ a we nu u nyééne i loñ Us, konok maséé, hagak.
Ndi yak we w’a nyo libôndô li,+ u hiôô, nso woñ u nene.+
ת [Taw]
22 A ngond Siôn, u mal kôhna kogse inyu bibéba gwoñ.
A’ kena ha bé we i minkôm.+
Ndi we a ngond Édôm, a’ yoñ ngéda ni béba yoñ.
A’ yelel mahôha moñ.+
5 A Yéhôva, hoñol i jam li bi pémél bés.
Béñge, u tehe ki hison hiés.+
2 Bakén ba bôt ba nyoñ ngababum yés, bôt ba biloñ bipe ba nyoñ mandap més.+
3 Di nyila bon ba nyuu, di gwé ha bé isañ; banyañ bés ba nyila kiki biyik bi bôda.+
4 Malép ma yé més, ndi di nlama saa inyu nyo mo;+ yak tjéé di yé tjés ndi di nlama somb tjo.
5 I bôt ba noñ bés ba yé bebee ni koba bés;
di yé nwaak, ndi ba nti bé bés noi.+
6 Di nlek Égiptô+ ni Asiria+ woo inyu yagal bo koga le di je.
7 Basôgôlsôgôl bés ba ba bi boñ béba ba ta ha bé, ndi bés bon di nok ndutu inyu bibéba gwap.
8 Minkol nwon mi ñane bés nano; to mut a ta bé le a péyés bés i moo map.
9 I bôt ba gwé pansoñ i ñoñ, ba yé le ba nol bés i ngéda di nke i yéñ bijek.+
10 Koo yés i nyuu i nlék kiki hié hi hi gwé mbimba inyule njal i nai.+
11 Ba nwéha bôda ba Siôn nyuu,* yak dingonda di ngi yi munlôm di bitison bi Yuda.+
12 Ba bi kañ woo u hiki ñane, ba péni nye;+ ba bi ti bé mimañ mi litén lipém.+
13 Boñge bôlôm ba bééga ngok kôgôl, yak diloga di bééga mbañg tjéé, di kenek, di kwok.
14 Mimañ mi litén mi ta ha bé i nwemel u tison;+ boñge ba wanda ba nkôt ha bé nsik.+
15 Miñem nwés mi ta ha bé maséé, yak masak més ma nyila maéya.+
16 Ntut u ane u nyodi i ño wés, u kwo. Ngoo ni bés, inyule di bi boñ béba!
17 Inyu hala nyen di nok njôghe i ñem,+
inyu mam ma nyen mis més ma ntehna ha bé loñge,+
18 kiki mut a ta ha bé i hikôa Siôn,+ ndon yon i yé nyoo nano.
19 Ndi we, a Yéhôva, u ñane i boga ni boga.
Yééne yoñ ane i nom mba ni mba.+
20 Inyuki u nhôya bés i boga ni boga; u tjôô ki bés i ntandaa ngéda?+
21 A Yéhôva, témbna bés i weeni, ndi d’a témb i weeni ni ñem wés wonsôna.+
Boñ le mam ma témb kiki i ngéda kôba.+
22 Ndi u ntjél bés, tjél yosôna.
U ngi unbenege bés ngandak.+
Bipes 1-4 bi yé njelel, hiki liben mu li mbôdôl ni bañga yada i alfabet i hop Lôk Héber.
Tole “bipes bi loñ.”
Tole “bingond bi bôda.”
Ni hop Lôk Héber, “ba nyila nye ño.”
Tole “kôñgô.”
Tole “kon maséé.”
Yérusalem nyen ba nhégha ni muda.
Tole “a nlek moo mé.”
Hana ba mpôdôl Yakôb kiki munlôm.
Ni hop Lôk Héber, “nyo.”
Tole “Bingond bi bôda.”
Ni hop Lôk Héber, “Minla.”
Ni hop Lôk Héber, “bôk hiki toñ.”
Ni hop Lôk Héber, “telbe.”
Tole “tjé.”
Ni hop Lôk Héber, “le u mil bañ.”
Tole “Biniigana.”
Tole “Minla mi ngooña me.”
Ni hop Lôk Héber, “Libaa jem li nkôba ’isi.”
Konangoo ni ngôô gwon bi ntinde nye i sébél litén jé le “ngond litén jem.”
Ni hop Lôk Héber, “kôn ni wai bi yé hee?”
Ni hop Lôk Héber, “toñ.”
Ni hop Lôk Héber, “ngond i jis joñ.”
Ni hop Lôk Héber, “Pa moo moñ yak Nyambe inyu biniñ bi bon boñ.”
Ni hop Lôk Héber, “i miño mi minloñ nwominsôna.”
Tole “litam.”
Tole “bingond bi bôda.”
Tole “woñi nkeñi.”
Tole “me bi gwal, ba bak mbôô.”
Tole “sék njel.”
I yé soso nuga bikai.
Ni hop Lôk Héber, “a telbe me.”
Ni hop Lôk Héber, “telbe.”
A yé gwom bi bi yé ikété bôbôk.
Ni hop Lôk Héber, “bon bôlôm.”
Tole “Ndéñbe i gwés.”
Tole “hônba.”
Ni hop Lôk Héber, “a begee kop nson.”
Ni hop Lôk Héber, “ndéñbe i gwés.”
Ni hop Lôk Héber, “Di pa miñem nwés yak.”
Tole, “bibép bi baoo bem.”
Ni hop Lôk Héber, “i miño mi minloñ nwominsôna!”
Ni hop Lôk Héber, “bikôyôp bi mambot.”
Ni hop Lôk Héber, “Hihôha.”
Jon ba nsébél ni hop Pulasi le neige.
Yon ba nsébél ni hop Pulasi le Corail. Béñge Ndoñi bibuk.
Ni hop Lôk Héber, “hinda.”
Tole “Ni nla bé yééne hana kiki bakén ba bôt.”
Tole “ngwéya.”
Tole “Ba nyégsa bôda ba Siôn malal.”