HÔSÉA
1 Lipôdôl li Yéhôva li bi lôl Hôséa* man Bééri i dilo di Ôsiya,+ Yôtam,+ Ahas+ ni Hézékia,+ bikiñe bi Yuda;+ ni i dilo di Yérôbôam+ man Yôas,+ kiñe Israel. 2 I ngéda Yéhôva a bi bôdôl pot ni njel Hôséa, Yéhôva a bi kal Hôséa le: “Kenek, bii muda libambe,* u gwal ki bon ba libambe, inyule loñ i nkôm Yéhôva mbus ni njel libambe.”+
3 Ha nyen a bi ke a bii Gômer ngond Diblaim, Gômer a nembee, a gwal man munlôm.
4 I mbus Yéhôva a kal nye le: “O i man nu jôl le Yézréel,* inyule ndék ngéda, m’a kogse ndap i Yéhu+ inyu matjél ma bi kuba i Yézréel, m’a mélés ki ane i bikiñe bi Israel.+ 5 I hilo hi, m’a bôk mpihlôñgô u Israel i tegep mbok* i Yézréel.”
6 Gômer a bi témb a nembee, a gwal man muda. Nyambe a kal Hôséa le: “O nye jôl le Lô-Ruhama,* inyule m’a kônôl ha bé litén li Israel ngoo,+ ibabé set m’a luhul bo.+ 7 Ndi m’a kônôl litén li Yuda ngoo,+ me Yéhôva Nyambe wap, men m’a tohol bo;+ m’a tohol bé bo ni mpihlôñgô, to ni pansoñ, to ni gwét, to ni bihosi, to ni balukhosi.”+
8 Kiki a ntjilis Lô-Ruhama méé, a témb a nembee, a gwal ki man munlôm. 9 Ha nyen Nyambe a bi kal le: “O nye jôl le Lô-Ami,* inyule ni ta bé litén jem, to me m’a ba bé Nyambe nan.
10 “Ndi to hala, nsoñgi u bôt* ba Israel u ga ba kiki lisege li tuye, le mut a nla bé hégda, to soñgol.+ I homa i bi kéla bo le: ‘Ni ta bé litén jem,’+ i ga kéla bo le: ‘Bon ba Nyambe nu a niñ.’+ 11 Bôt ba litén li Yuda ni li Israel ba ga kodba ikété adna,+ bomede ba ga pohol ñane wada, ba nyodi ki mu i loñ i, inyule hala a ga ba hilo hikeñi inyu Yézréel.+
2 “Sébél bilôk binyuñ bi bôlôm le: ‘A litén jem!’*+
Ni bilôk binyuñ bi bôda le: ‘A muda nu ba nkônôl ngoo!’*+
2 Ôma nyuñ nan nsohi, ôma nye nsohi,
inyule a ta ha bé nwaa wem,+ to me, me ta ha bé nlôm.
A nlama nwas libambe,*
a nlama ki héya ndéñg ipôla méé mé,
3 tiga le me héya nye mambot, a yégle nso kiki nyañ a bi gwal nye,
me yilha nye kiki ñoñ,
kiki hisi hi gwé bé malép,
me nol ki nye ni nyus malép.
4 M’a kon bé to bon bé ngoo,
inyule ba yé bon ba libambe.*
5 Inyule nyañ wap a bi ke i libambe.*+
Nu a bi gwal bo, a bi boñ mam ma nwéhna nyuu,+ inyule a bi kal le:
‘M’a noñ mimbok nwem,+
bon ba nti me bret yem ni malép mem,
mambot mem ma mahuu ma mintômba, ni mambot mem ma loñge bôñgô,* môô mem ni wai yem.’*
6 Inyu hala nyen m’a kéñ nye njel ni lipénd li biloo;
m’a bédés ki libap li ngok inyu sék nye njel,
le ndi a léba bañ njel yé.
7 A ga noñ mimbok nwé, ndi a ga koba bé nwo;+
a ga yéñ nwo, ndi a ga tehe bé nwo.
Ha nyen a ga kal le: ‘M’a témb yak nlô wem nu bisu,+
inyule me bé niñ loñge i ngéda me bé lôñni nye iloo kiki me niñ nano.’+
8 Ndi i muda nunu a bi yi bé le men me bé ti nye bijek,+ ni wai yondo ni môô,
men me bé ti nye ngandak silba,
ni gôl a bi gwélél inyu bégés Baal.+
9 ‘Jon, m’a témb me yoñ bijek gwem ngéda i ma kola,
ni wai yem yondo i ngéda libumbul,+
m’a kadal mambot mem ma mahuu ma mintômba ni mambot ma loñge bôñgô* me bi ti nye inyu hô nso wé.
10 M’a boñ le nso* wé u nene i mbamba, mimbok nwé mi tehge,
mut to wada a ga la bé tohol nye i woo wem.+
11 M’a mélés maséé mé momasôna,
yak ni mangand mé,+ sôñ yé mondo, dilo tjé di sabat ni mangéda mé momasôna ma mangand.
12 M’a ôbôs minkôô nwé mi wai ni bie gwé bi faigé, gwon a bé kélél le:
“Nsaa wem unu, won mimbok nwem mi bi ti me;”
ndi m’a yilha gwo put lipan,
binuga bi bikai bi ga je gwo.
13 M’a kogse nye inyu dilo a bé sémél biôñgba bi Baal bisesema,+
i ngéda a bé a haba dilonde tjé ni bieñg gwé inyu noñ mimbok nwé,
ndi men a bé a hôya,’+ hala nyen Yéhôva a mpot.
14 ‘Jon m’a tinde nye i hek pék,
m’a kena nye i ñoñ,
m’a pôdôs ki nye inyu tihba ñem wé.
15 Ibôdôl ha ngéda i, m’a timbhe nye nwom nwé mi minkôô mi wai,+
tegep mbok* i Akôr+ y’a yible nye njel i jôp i loñ i botñem;
a ga timbhe me kiki ngéda a bé ngond muda,
kiki kel a bi nyodi i Égiptô.+
16 I kel i,’ hala nyen Yéhôva a mpot,
‘w’a sébél me le: “A lôm,” w’a sébél ha bé me le: “A nwet wem.”’*
18 I kel i, m’a boñ malômbla inyu litén jem lôñni binuga bi bikai,+
ni dinuni di ngii, ni binuga bi bi ñôdba ’isi;+
m’a héya mpihlôñgô ni pansoñ ni gwét ikété loñ,+
19 M’a yegna libii ni we i boga ni boga;
m’a yegna libii ni we ikété telepsép ni mbagi sép,
20 M’a yegna libii ni we ikété maliga,
ibabé set, w’a yi Yéhôva.’+
21 ‘I kel i, me ga timbhe,’ hala nyen Yéhôva a mpot,
‘me ga timbhe ngii,
yak ngii i ga timbhe hisi;+
22 hisi hi ga timbhe bijek, wai yondo ni môô;
23 M’a nwes nye inyu yem hana ’isi kiki ba nwes mbôô,+
i muda ba bé kônôl bé ngoo,* me ga kônôl nye ngoo;
yak bo b’a kal le: “U yé Nyambe wés.”’”+
3 I mbus, Yéhôva a kal me le: “Tiimba gwés muda nu a yé le munlôm numpe a ngwés, muda ndéñg,+ nlélém kiki Yéhôva a ngwés litén li Israel+ to hala kiki ba noñ banyambe bape,+ ba gwéhék bikoga bi matam ma nkôô wai.”*
2 Ha nyen me bi somb nye 15 batjañtjañ ba silba ni hômer* yada i kôn* ni pes. 3 I mbus, me kal nye le: “W’a ba nwaa wem inyu ngandak dilo. U nlama bé ke i libambe,* u nlama bé lal ni munlôm numpe, to me m’a lal bé ni we.”
4 Inyule litén li Israel li ga yén jôga li ngéda* ngi kiñe,+ ngi ñane, ngi bisesema, ngi mél mapubhaga, ngi éfôd*+ ni ngi bitérafim.*+ 5 I mbus mam mana, litén li Israel li ga témb li yéñ Yéhôva Nyambe wap+ ni David kiñe yap,+ ba ga témb yak Yéhôva, ba sehlaga inyu boñ le a unda bo loñgeñem i dilo di nsôk.+
4 Emblana lipôdôl li Yéhôva, a litén li Israel,
inyule Yéhôva a gwé hop ni bôt ba nyééne mu loñ,+
inyule maliga ma ta bé ikété loñ, to gwéha,* to yi i Nyambe.+
2 Likum soñ bitembee, malôga+ ni manola,+
wip ni ndéñg+ bi yé homa nyensôna,
ñ, yak kôp matjél ni kôp matjél.+
3 Inyu hala nyen maéya m’a ba ikété loñ,+
bôt bobasôna ba nyééne mu b’a tjiba;
binuga bi bikai ni dinuni di ngii,
yak tjobi di tuye di ga wo.
4 “Ndi mut nye ki nye a kodol bañ bôt ba litén, to kolba bo,+
inyule litén li yé kiki bôt ba ba nkolba prisi.+
5 Jon w’a baage njamuha,
yak mpôdôl a ga baage lôñni we, wengoñle u u yé nsudge.
M’a tjé* nyuñ.
6 Litén jem li ga tjiba* inyule li gwé bé yi.
Hala kiki u ntjél bana yi,+
yak me m’a tjél le u ba prisi yem;
hala kiki u nhôya mbén* Nyambe woñ,+
yak me m’a hôya bon boñ.
7 Kiki ba mbôl, hala nyen ba mboñ béba ikolba me.+
M’a yilha lipém jap wonyuu.*
8 Ba njél mu bibéba bi litén jem,
ba ngwés le bôt ba kônde boñ béba.
9 Nlélém jam won w’a ba inyu litén ni inyu prisi;
m’a kéés bo inyu manjel map,
m’a boñ le bikuu bi maboñok map bi kwél bo.+
10 B’a je ndi b’a nuu bé.+
12 Litén jem li mbat bisat gwap bi bikék mam,
li boñok mam mintoñgo nwap mi ngambi mi nkal bo;
ngôñ i ke i libambe* i nyumus bo,
libambe* jap li ñunda le ba ntjél suhus bomede isi Nyambe wap.
13 Ba nsem bisesema i ngii dikôa,+
ba boñok le hiida hi bisesema gwap hi tu i ngii dikôa,
isi basimngañ, bie bi stirax ni hiki e ikeñi,+
inyule yiye i bie i yé loñge.
Inyu hala nyen bingond binan bi nke libambe,*
bakiya banan ba kenek i ndéñg.
14 M’a kogse bé bingond binan inyu libambe* jap,
to bakiya banan inyu ndéñg yap.
Inyule bôlôm ba nsolop ni bôda ba libambe,
ba semek ki bisesema ni bôda ba libambe ba témpel;
i nya litén ini i gwé bé yi,+ i ga tjiba.
16 Inyule kiki nyaga i ndogop, hala nyen Israel a nyila ndok.+
Nano, baa Yéhôva a ga tééda bo kiki ba ntééda man nlôm ntômba i homa bikai bi yé?*
17 Éfraim a tiñi ni bisat.+
Nwaha nye!
Yak baane bap ba nlôôha gwés mbolo.+
19 Bipapai bi mbebi bi ga kena* nye,
b’a wo nyuu ni bisesema gwap.”
5 “Emblana jam lini a biprisi,+
sédna maôô a litén li Israel,
emblana a bôt ba ndap kiñe,
inyule mbagi nôgôs i mbéñge bé;
inyule ni yé hiandi inyu Mizpa,
ni nleñ Tabor+ mbunja.
3 Me nyi Éfraim,
to Israel a sôli bé i mis mem.
4 Maboñok map ma nwas bé bo le ba témb yak Nyambe wap,
inyule ngôñ i ke i libambe* i yé ikété yap;+
ba mbigda bé Yéhôva.
5 Ngôk u Israel u mbok mbôgi le a yé béba;*+
Israel bo Éfraim ba bi baage inyu bibéba gwap,
yak Yuda a bi baage ni bo.+
6 Ba bi ke i yéñ Yéhôva ni bibémba gwap bi mintômba ni nyaga yap,
ndi ba bi la bé léba nye.
Inyule a bi ke bo haa.+
Nano, ba ga tjiba* lôñni disi tjap* sôñ yada.
8 Hema hioñ+ i Gibéa, hema sép i Rama!+
Leña nlondok u gwét i Bét-Aven,+ di yé i mbus yoñ, a Benyamin!
9 A Éfraim, w’a yila yom bilim i kel kogse.+
Me nyis matén ma Israel i jam li ga pémél mo.
10 Baane ba Yuda ba yé kiki bôt ba ntiigaha nwaa nkoñ.+
Me ga kôp bo hiun hiem kiki malép.
11 Éfraim a yé ikété njiiha, mbagi nôgôs i ntét nye,
inyule a nai le a nkiha ni ñoo wé.+
12 Inyule me bi ba kiki masek inyu Éfraim,
ni kiki yom i mbol inyu litén li Yuda.
13 I ngéda Éfraim a bi tehe le a nkon, yak Yuda a tehe le a gwé poo,
Éfraim a bi ke i Asiria,+ a ep bakenwin yak kiñe ikeñi.
Ndi i kiñe i, i bi la bé mbuubaha bé,
i bi la bé to mélés poo nan.
14 Inyule me ga ba kiki man mbondo njéé inyu Éfraim,
kiki mpémba mbondo njéé* inyu litén li Yuda.
15 Me ga ke, me témb ki meeni letee bikuu bi béba yap bi kwél bo,
I ngéda ba ga ba ikété njiiha, ba ga yéñ me.”+
6 “Loga, di témb yak Yéhôva,
inyule a bi was bés bikét bikét,+ ndi a ga mbuubaha bés.
A bi bép bés, ndi a ga tibil mambabaa més.
2 A ga ti bés ngui i mbus dilo diba.
I hilo hi nyônôs aa, a ga téé bés,
di ga niñ i bisu gwé.
3 D’a yi, d’a nyamnda yaga ni ngôñ i yi Yéhôva.
Malo mé ma yé kiki maye ma kel, ma nset bé;
a ga lo i béhni kiki nop biôôm,
kiki nop nu a nyôôs hisi.”
4 “Kii m’a boñ ni we, a Éfraim?
Kii m’a boñ ni we, a Yuda?
Inyule gwéha* nan i yé kiki ond i bikegla,
kiki manwee ma ma mpala nyoi.
Yak mbagi nôgôs me mpémhene bé i ga bai kiki mapubi.+
6 Inyule i jam li nlémél me li yé gwéha,* he bisesema bé;
li yé le mut a yi Nyambe iloole a ti bisesema bi tul hié.+
7 Ndi ba bi bôk malômbla+ kiki bôt ba binam bobasôna,
ha nyen ba bi ndogbene me.
9 Ntôñ biprisi u yé kiki ntôñ mintonba u u nsolop inyu amb mut.
Ba nol mut bebee ni Sikem,+
inyule maboñok map ma nwéhna nyuu.
10 Me bi tehe jam li bilim ikété litén li Israel.
11 A Yuda, jam lipe li yé le, i ngéda libumbul i yé ntéak inyu yoñ,
me ga kot bôt ba litén jem ba ba yé i minkôm.”+
7 “Hiki ngéda le me ngwés mélés makon ma Israel,
béba i Éfraim i nyeli,+
yak maboñok mabe ma Samaria.+
2 Ndi ba nhégda bé ikété ñem wap le me mbigda bibéba gwap gwobisôna.+
Nano, maboñok map momasôna ma nkéña bo;
ma yé i bisu gwem.
3 Ba nkônha kiñe maséé ni bibéba gwap,
yak baane ni bitembee gwap.
4 Bobasôna ba yé bôt ba ndéñg,
ngôñ yap i boñ mam mabe i nlék kiki juu le mbôm-koga a nkuye,
a mpep ha bé jo i ngéda a mbôô flawa, a mbem letee i hôl.
5 I hilo hi kiñe yés, baane ba bi kwo kon,
wai i mboñ le hiun hiap hi loñ.+
Kiñe i yé liwanda ni bôt ba minjôha.
6 Miñem nwap mi nlék kiki juu li mbôm-koga.*
Mbôm-koga a niñi u wonsôna;
ndi bikegla, juu jé li nlék wengoñle a mpep hié.
7 Bobasôna ba nlék kiki juu li mbôm-koga,
ba nol baane* bap.
8 Éfraim a mpôdna lôñni matén mape.+
Éfraim a yé kiki koga i i yé ngiiña le ba nhiel bé.
9 Bakén ba bôt ba mélés ngui yé,+ ndi a nyi bé hala.
A bi bana ño mbu, ndi a bi yimbe bé hala.
10 Ngôk u Israel u mbok mbôgi le a yé béba,+
ndi ba bi témb bé yak Yéhôva Nyambe wap,+
ba bi yéñ bé to nye, to hala kiki mam mana momasôna ma bi pémél bo.
11 Éfraim a yé kiki hibeñ hi hi gwé bé yi, hi gwé bé to pék.*+
Ba bi sébél loñ Égiptô le i hôla bo,+ ba ke ki i bat loñ Asiria mahôla.+
12 To hee ba nke, m’a leñ bo mbunja yem.
M’a sôhna bo hana ’isi kiki dinuni di ngii.
M’a kodol bo inoñnaga ni mabéhna me bi ti likoda jap.+
13 Ngoo ni bo, inyule ba nke me ngwéé!
Ba ga tjiba inyule ba bi bôk mambén mem!
Me bak bebee i kobol bo, ndi ba ñôbôs me jôl.+
14 Ba bi bat bé me mahôla ni ñem wap wonsôna+
to hala kiki ba mbégél i ngii binañi gwap.
Ba kegbaga inyu bat bijek ni wai yondo;
ndi ba nkôm me mbus.
15 To hala kiki me niiga bo, me lédhak moo map,
ba nkolba me, ba nhégél ki me bipék bibe.
16 Ba nhéñha bihiumul gwap, ndi ha inyu bégés Nyambe bé;
mut a nla bé bôdôl bo ñem inyule ba yé kiki mpihlôñgô u u nke bé loñge.+
Baane bap ba ga kwo ni pansoñ inyu nyo wap u ngôk.
Inyu hala nyen b’a ba yom minjôha i lôñ Égiptô.”+
Mut a nlo kiki nyôgôl inyu jôs litén li Yéhôva,+
2 Ba nlôndôl me le: ‘A Nyambe wés, bés Lôk Israel di nyi we!’+
3 Israel a ntjél boñ loñge.+
Me nsômbôl le ñoo wé a noñ nye.
4 Ba bi téé bikiñe, ndi ni kunde yem bé.
Ba bi téé baane, ndi me bi neebe bé bo.
5 Me ntjél man nyaga woñ, a Samaria.+
Me ñunbene bo ngandak.+
Letee ni ngéda mbe ba ga tjél ba nginsohi?*
6 Inyule i yom ini i nlôl ni Israel.
Mut likeñge nyen a mbañ yo, i ta bé Nyambe;
man nyaga nu Samaria a ga bugi ngéñ ngéñ.
7 Inyule ba bi sal mbebi,
ndi mbuk mbebi nyen b’a bumbul.+
Tén to yada i nti bé minhôôlak mi mis ma blé;+
ndi to i nti mis ma blé, i mboñ bé le ba kôhna flawa.
Ndi to ba nkôhna flawa, bakén ba bôt* bon ba nje yo.+
8 Ñoo a ga mil Israel.+
Nano, b’a sanda ikété biloñ,+
a ga léña kiki séya i i gwé bé nseñ.
9 Inyule ba bi ke i Asiria+ kiki jagas li bikai li li niñ jotama.
Éfraim a bi ke i yéñ mimbok.+
10 To hala kiki mimbok nwé mi nlôl ikété biloñ,
me ga kot nwo;
ba ga bôdôl nok ndutu+ inyu mambegee bikiñe ni baane bi ga bééga bo.
11 Inyule Éfraim a bi bulus muu ma bisesema inyu boñ béba.+
Ba ngwélél i muu ma inyu boñ béba.+
13 Ba bi ti me bisesema kiki makébla, ba je ki minsôn mi binuga,
ndi Yéhôva a nkônôl bé bo maséé.+
Nano, a ga bigda mahôha map, a kogse ki bo inyu bibéba gwap.+
Ndi me ga om hié mu bitison gwé,
hi ga ligis minkum mi mandap mi hiki tison.”+
9 “U kon bañ maséé, a Israel,+
u kon bañ maséé kiki matén mape.
Inyule libambe* li bi boñ le u ke haa ni Nyambe woñ.+
U bi gwés nsaa u libambe u bé kôhna i matidil.+
2 Ndi litidil ni waa wai bi ga ti bé we bijek,
yak wai yondo y’a héñél we.+
3 Bôt ba Israel b’a kônde ha bé yén i loñ Yéhôva;+
ndi Éfraim a ga témb i Égiptô,
ba ga je gwom bi nyega i Asiria.+
Bi yé kiki bijek bi maéya;
i bôt bobasôna ba nje gwo, bi ga yilha bo nyega.
Inyule bijek gwap bi yé ndigi inyu yap botama;
bi ga jôp bé i ndap Yéhôva.
5 Kii n’a boñ i kel likoda,*
i kel ngand Yéhôva?
6 Inyule nuna-ki! Ba ga ke tjiba ngwéé.+
Égiptô a ga kot bo,+ Memfis a ga jô bo.+
Disañla* di ga yon i homa tik yap gwom bi silba bi yé,
nkôô biloo u ga yon ikété mandap map ma mabadô.
Mpôdôl wap a ga yila jôñ, yak mut a nkadba le bipôdôl gwé bi nlôl ni Nyambe a ga kônd njék;
inyule mahôha moñ ma mbôl, jon ôa inyu yoñ i yé ikeñi ngandak.”
8 Mut faa*+ nu Éfraim a bé lôñni Nyambe wem.+
Ndi nano, maboñok momasôna ma bapôdôl bé+ ma yé kiki tjandi di mut a nol dinuni;
yak ôa i yé ikété ndap Nyambe wé.
9 Ba yé sum sum ikété béba, kiki i dilo di Gibéa.+
Nyambe a ga bigda mahôha map, a kogse ki bo inyu bibéba gwap.+
10 “I ngéda me bi léba Israel, a bé kiki matam ma nkôô wai ikété ñoñ.+
I ngéda me bi tehe basôgôlsôgôl boñ, ba bé kiki matam ma bisu ma faigé.
Ndi ba bi ke i bégés Baal nu Péor;+
ba bi ti bomede nkikip i jam li nwéhna nyuu,*+
ba bi yila nyega kiki i nyambe ba ngwés.
11 Lipém li Éfraim li mpuue kiki hinuni;
gwal u ta ha bé, to mém, to nembee.+
13 I ngéda Éfraim a bé mbelek i wom, a bé i mis mem kiki Tir;+
nano, Éfraim a nlama lona bon bé inyu boñ le ba nôla.”
14 A Yéhôva, ti bo jam u nlama ti bo;
mabum ma ma nsôh mém, méé ma ma mpam bé milik.*
15 “Béba yap yosôna i bé i Gilgal,+ inyule nyoo nyen me bi bôdôl oo bo.
M’a luhul bo i ndap yem inyu maboñok map mabe.+
M’a gwés ha bé bo;+
baane bap bobasôna ba nai ni ndok.
16 Éfraim a ga kéga kiki ba nkek e.+
Nkañ wap u ga kôt, ba ga ti ha bé matam.
To ibale ba ngwal, m’a nol mbôda yap i i yé tik i mis map.”
10 “Israel a yé nkôô wai u u gwé kon,* u tinak matam.+
Kiki matam mé ma mbôl, hala nyen a mbulus muu mé ma bisesema;+
kiki hisi hi nti bijek, hala nyen a nlémés mél mé mapubhaga.+
2 Ba yé bôt ba bihéñba* ikété miñem nwap;
nano, ba ga ôm bo nsohi.
Mut a ga bôk muu map ma bisesema, a tjé yak mél map mapubhaga.
3 Nano, ba ga pot le: ‘Di gwé bé kiñe,+ inyule di bi kon bé Yéhôva woñi.
Kii kiñe i nla bôñôl bés?’
4 Ba mpot biyôglô bi mam, ba nkum soñ bitembee,+ ba boñok malômbla;
jon mbagi i mpam i yé kiki kai i i gwé mbôñ, i ño i ngii dikuu le ba nsal i wom.+
5 I bôt ba nyééne i Samaria ba ga kon woñi inyu sat i man nyaga i Bét-Aven.+
Bôt ba ga ee i sat i,
yak biprisi bi bakén ba banyambe bi bi bé kon maséé ni sat i, yak ni lipém i bééna,
inyule i ga ke i minkôm, haa ni bo.
6 Ba ga kena yo i Asiria, ba kébél yo kiñe ikeñi.+
Éfraim a ga wo nyuu,
yak Israel a ga wo nyuu inyu maéba a bi noñ.+
8 Bahoma ba nyôgi ba Bét-Aven+ ni béba Israel+ bi ga tjiba.+
Nkôô biloo ni kai biloo* bi ga o i ngii muu map ma bisesema.+
Bôt ba ga kal dikôa le: ‘Kwona i ngii yés!’
Ba kalak bon ba dikôa le: ‘Hôna bés!’+
9 Ibôdôl i dilo di Gibéa, u bi boñ béba+ a Israel.
Nyoo, ba bi nai ni béba.
Gwét bi bi koba* bé bon ba ngitelepsép i Gibéa.
10 M’a kogse bo i ngéda i ga lémél me.
Matén ma ga kodba inyu jôs bo,
i ngéda bibéba gwap gwo biba bi mba bi kéhi ngii yap.*
11 Éfraim a bé ñin hosi le ba niiga loñge, u u bé gwés u ntét blé,*
jon me bi nwas joo jé nwee.
Ndi nano, m’a boñ le mut a luk Éfraim.*+
Yuda a ga sal hisi; Yakôb a ga kwas biték.
12 Nweha mbôô inyu nan ikété telepsép, ndi n’a bumbul gwéha.*
13 Ndi ni bi sal béba,
ni bumbul ngitelepsép,+
ni bi je matam ma malôga;
inyule ni bi bôdôl bébomede ñem,
ni bôdôl ki ngandak bajogwét ñem.
14 Nlondok gwét w’a nôga i weeni,
bitison gwoñ bi bi gwé mapénd ma ngui bi ga tjiba gwobisôna,+
kiki ngéda Salman a bi tjé ndap Arbel,
i hilo hi gwét hi, ba bi kit bôda ngéñ ngéñ lôñni bon bap.
15 Hala nyen ba ga boñ we a Bétel,+ inyu béba yoñ ikeñi.
I ngéda kel i nye, kiñe Israel i ga ba ha bé.”*+
3 Ndi men me bi niiga Éfraim liké,+ me lelek nye i moo mem;+
ndi ba bi neebe bé le men me bi mbuubaha bo.
4 Me bé ôt bo ni minkôô ba ñudul bôt ba binam,* ñ, minkôô mi gwéha;+
me bi yilna bo kiki mut nu a nhéya bo kop nson i mañg,
ni loñgeñem, me bé ti hiki wada wap bijek.
6 Pansoñ i ga kiiña inyu tjé bitison gwap,+
inyu ôbôs bihimbil gwap bi makôga ni inyu nol bo inyule ba gwé bipék bibe.+
7 Litén jem li nai le li ndogbene me.+
Ba* bi sébél bo inyu bégés Nyambe, ndi to wada a ntelep bé.
8 Lelaa me nla tjôô we, a Éfraim?+
Lelaa me nla ti we i moo ma baoo boñ, a Israel?
Lelaa me nla boñ we kiki Adma?
Lelaa me nla yilha we kiki Zébôim?+
9 Hiun hiem hi ga kala bé.
M’a tiimba ha bé tjé Éfraim.+
Inyule me yé Nyambe, he mut binam bé,
me yé Numpubi ipôla nan;
m’a unbene ha bé bé.
10 Ba ga noñ Yéhôva mbus, a ga kônd kiki mbondo njéé;+
i ngéda a ga kônd, bon bé ba ga lôl i pes hiôñg, ba sehlaga.+
11 Ba ga sehla kiki hinuni, i ngéda ba ga nyodi i Égiptô,
kiki hibeñ, i ngéda ba ga nyodi i loñ Asiria;+
m’a boñ le ba yééne ikété mandap map,” hala nyen Yéhôva a mpot.+
12 “Éfraim a nkéña me ni bitembee,
litén li Israel li nkéña me ni malôga.+
12 “Éfraim a mbôdôl mbebi ñem.*
Kel yosôna, a noñ mbebi i nlôl i pes likôl.
A mbulus bitembee ni bisañ.
Ba mboñ malômbla ni Asiria,+ ba tinak Égiptô môô.+
2 Yéhôva a gwé hop ni Yuda;+
a ga kéés Yakôb inoñnaga ni bihiumul gwé,
a ga timbhe nye inoñnaga ni maboñok mé.+
4 A bi jo ni añgel ntandaa ngéda, a sôk a yémbél.
A bi ee, a soohe le añgel i sayap nye.”+
6 “Jon, témb yak Nyambe woñ,+
kee ni bisu i bana gwéha* ni telepsép,+
u bôdlak ki Nyambe woñ ñem ngéda yosôna.
7 Ndi mut nyuñga a gwé kilô malôga i woo;
a ngwés a nlôk bôt.+
Mut a nla bé léba liboñok libe, to nsohi wo ki wo ikété minson nwem nwominsôna.’
9 Ndi me Yéhôva, men me yé Nyambe woñ ibôdôl i loñ Égiptô.+
M’a boñ we le u témb u yééne ikété mandap ma mabadô,
kiki i dilo di ngand.*
11 Malôga* ni bitembee bi bé i Giléad.+
Ba bi ti bisesema bi balôm ba nyaga i Gilgal,+
muu map ma bisesema ma yé kiki nwind mi ngok ipôla dikuu le ba nsal i wom.+
12 Yakôb a bi ke ngwéé i loñ* Aram;*+
Israel+ a bi sal nyoo inyu bana muda,+
inyu kôhna muda, a bi tééda mintômba.+
14 Éfraim a bi unbaha Nyambe ngandak;+
matjél a bi kôp ma kéhi nye ngii;
Nwet wé a ga kogse nye inyule a bi wéha nye nyuu.”+
13 “I ngéda Éfraim a bé pot, bôt ba bé sehla;
a bééna ngui ikété Israel.+
Ndi a bi kôhna kogse inyule a bi bégés Baal;+ i mbus, a wo.
2 Ndi i len ini, ba nkônde boñ béba,
ba ngwélél ki silba yap inyu ôô biôñgba;*+
ba gwé likeñge i boñ bisat, gwobisôna bi yé nson u bôt ba ñôô gwom.
ba nkal le: ‘I bôt ba nsem bisesema ba nlama sambla bon ba nyaga.’+
3 Jon, ba ga yila kiki ond i kegla,
kiki manwee ma ma mpule nyoi,
kiki bikôgôô le mbuk mbebi i héya i litidil, i kena,
kiki hiida hi hi mpémél i lituba li nyôl.
4 Ndi me Yéhôva, men me yé Nyambe woñ ibôdôl i loñ Égiptô,+
u bi yi bé Nyambe numpe ndik me,
handugi me, ntohol numpe a ta bé.+
5 Me bi yi we i ñoñ,+ i homa sép i nlôôha.
6 Ba bi je, ba nuu i bahoma bap ba bikai,+
ba bi nuu, miñem nwap mi yila ngôk.
Jon ba bi hôya me.+
7 M’a yilna bo kiki mbondo njéé,+
kiki njéé i i nhes ipañ njel.
8 M’a kwél bo kiki ours i i nimis bon bé,
m’a was tôl* yap.
M’a je bo kiki mbondo njéé;
nuga bikai i ga was bo bikét bikét.
9 M’a tjé we, a Israel,
inyule u bi tonbana me, u tonbana nhôla woñ.
10 Kiñe yoñ i yé hee, le i tohol we ikété bitison gwoñ gwobisôna?+
Yak baane* boñ ba yé hee? Inyu yap nyen u bé kal le:
‘Ti me kiñe ni baane.’+
12 Hihôha hi Éfraim hi yé nkôhlege;
béba yé i yé ntéédaga.
13 Njôghe i nkôôga y’a gwel nye.
Ndi i man nu a gwé bé pék;
i ngéda gwal i nkola, ndi man a mpam bé.
A Nyemb, ngui yoñ i yé hee?+
A Soñ, ngui yoñ i tjé i yé hee?+
Mis mem ma ga bana bé konangoo.
15 To ibale a ntoo wengoñle likai,
mbebi i likôl y’a lo, mbebi i Yéhôva,
i nlôl i ñoñ, inyu boñ le bee yé malép i num, yak lingen jé li sa.
Mut a’ kadal nkus wé ni gwom gwé gwobisôna bi bi yé tik.+
16 Samaria a ga kôhna kogse+ inyule a nkolba Nyambe wé.+
14 “Témb yak Yéhôva Nyambe woñ, a Israel,+
inyule u mbaage inyu béba yoñ.
2 Témba yak Yéhôva lôñni bibañga bini,
kala nye le: ‘Soho, nwéhél béba yés,+ u neebe jam lilam di mboñ,
d’a ti we bisesema bi bibép gwés,+ wengoñle bon ba balôm ba nyaga bon di yé i ti we.*
3 Loñ Asiria i ga tohol bé bés.+
D’a luk bé bihosi,+
d’a kal ha bé nson u moo més le: “A Nyambe wés!”
Inyule wen u nkônôl man nyuu ngoo.’+
4 M’a mélés ndok yap.+
5 M’a yila kiki manwee inyu Israel;
a’ ti bisem kiki mbônji,
minkañ nwé mi ga ke haa ’isi kiki bie bi Libañ.
7 Ba ga yééne ki isi yiye i Nyambe.
Ba ga sal blé, ba ti bisem kiki nkôô wai.+
Jôl* jé li ga ke ngan kiki wai i Libañ.
8 Éfraim a ga kal le: ‘Me mboñ ki kii ni bisat?’+
M’a timbhe nye, me tat ki nye.+
M’a ba kiki e junipa* ikeñi.
Men m’a ti nye matam mé.”
9 Njee a gwé pék? Nyen a nlama tibil yi i mam mana.
Njee a gwé yi? Nyen a nlama nok mo.
Hôséa a yé lihubhak li jôl lini le Hôsaya, li li nkobla le: “Ntohlak ni Yah; Yah a ntohol.”
Tole “malal ma nyega; ndéñg.”
Hala a nkobla le “Nyambe a’ nwes mbôô.”
Tole “tegep mbok i i yé nyoo isi nsôsôgô.”
Hala a nkobla le “Nu ba nkônôl bé ngoo.”
Hala a nkobla le “Ni ta bé litén jem.”
Ni hop Lôk Héber, “bon bôlôm.”
Ni hop Lôk Héber, “ami.” Béñge buk isi lipep i Hôs 1:9.
Ni hop Lôk Héber, “ruhama.” Béñge buk isi lipep i Hôs 1:6.
Tole “malal ma nyega; ndéñg.”
Tole “malal ma nyega; ndéñg.”
Tole “ke i ndéñg.”
I bôñgô ini yon ba nsébél ni hop Pulasi le lin.
Ni hop Lôk Héber, “binyonyo gwem.”
I bôñgô ini yon ba nsébél ni hop Pulasi le lin.
Tole “mayel.”
Tole “tegep mbok i i yé nyoo isi nsôsôgô.”
Tole “a Baal wem.”
Tole “ba niñ.”
Ni hop Lôk Héber, “ndéñbe i gwés.”
Hala a nkobla le “Nyambe a ga nwes mbôô.”
Béñge buk isi lipep Hôs 1:6.
Béñge buk isi lipep Hôs 1:9.
Hala wee, bikoga ba bé gwélél i kwéha base.
Hômer yada i yé jam kiki bo 220 ma lita. Béñge Apendis B14.
Unu ntén kôn won ba nsébél ni hop Pulasi le orge.
Tole “ke i ndéñg.”
Ni hop Lôk Héber, “ngandak dilo.”
Béñge Ndoñi bibuk.
Tole “banyambe; bisat.”
Ni hop Lôk Héber, “ndéñbe i gwés.”
Tole “M’a yip nyo u.”
Tole “yip nyo.”
Tole “biniigana.”
I nla ki ba, “Ba nhéñha lipém jem ni wonyuu.”
Tole “B’a boñ malal ma nyega ibabé waa; ke i libambe.”
Tole “Malal ma nyega; Ndéñg.”
Ni hop Lôk Héber, “bi nhéya ñem.”
Tole “malal ma nyega; ndéñg.”
Tole “malal ma nyega; ndéñg.”
Tole “malal ma nyega; ndéñg.”
Tole “malal ma nyega; ndéñg.”
Tole “malal ma nyega; ndéñg.”
Ni hop Lôk Héber, “homa a néhi?”
Tole “biye ba mboñ ni blé.”
Tole “ba mbôdôl boñ malal ma nyega ibabé waa; ke i libambe.”
Tole “sas.”
Tole “Bôt ba ño mbe.”
Tole “ba yé sum sum ikété manola.”
Tole “nkodol.”
Tole “u mboñ malal ma nyega ibabé waa; ke i libambe.”
Tole “malal ma nyega; ndéñg.”
Ni hop Lôk Héber, “mbôgi ikolba su wé.”
Tole “ba ngwal bon ni bakén ba bôda.”
Tole “sôñ yada y’a tjé bo.”
Tole “nwom nwap.”
Tole “man mbondo njéé nu a gwé liyéé.”
Ni hop Lôk Héber, “ba ga yéñ su wem.”
Ni hop Lôk Héber, “ndéñbe i gwés.”
Ni hop Lôk Héber, “kit.”
Tole “konangoo.”
I nla ki ba, “Inyule miñem nwap mi yé kiki juu li mbôm-koga i ngéda ba nlo ni mandon map.”
Ni hop Lôk Héber, “bakéés.”
Ni hop Lôk Héber, “ñem.”
Ni hop Lôk Héber, “Ha hioñ i nyo!”
Tole “ba ga waa tjél pubhana?”
Tole “biyoyo.”
Tole “biniigana.”
I nla ki ba, “Ba ga témb.”
Tole “malal ma nyega; ndéñg.”
Tole “kel mintéak minan mi mangand.”
Hala a yé ngim bikai i i nyaña.
Béñge Ndoñi bibuk.
Tole “nyambe nu a nwéhna nyuu.”
Tole “ma ma ntoi bé.”
I nla ki ba, “u u ñandal.”
Tole “malôga.”
Ni hop Lôk Héber, “ba ga mom nwee.”
Tole “Miñéndi ni njôm.”
Tole “tjé.”
Hala wee, i ngéda kogse y’a ba i ngii yap kiki kop nson.
Tole, i kôn ba nsébél ni hop Pulasi le orge.
Tole “a ha Éfraim kop nson.”
Ni hop Lôk Héber, “ndéñbe i gwés.”
Ni hop Lôk Héber, “i ga mom nwee.”
Hala wee, bapôdôl ni bôt bape ba ba bi ôma inyu niiga Israel.
Tole “minkôô mi loñgeñem,” kiki mi bagwal.
Hala wee, bapôdôl ni bôt bape Nyambe a bi om i niiga Israel.
Ni hop Lôk Héber, “i lék.”
Tole “hiômôk.”
Ni hop Lôk Héber, “Éfraim a nje mbebi.”
Tole “jôl bôt ba nlama hoñlene nye li yé le.”
Ni hop Lôk Héber, “ndéñge i gwés.”
Ni hop Lôk Héber, “dilo di ntéak ngéda.”
Tole “Mam ma bilim; Makañ.”
Ni hop Lôk Héber, “nkoñ.”
Tole “Siria.”
Tole “biôñgba ba mboñ ni kei le ba nyimbi.”
Ni hop Lôk Héber, “yom i nhô ñem.”
Ni hop Lôk Héber, “bakéés.”
Tole “Séôl.” Béñge Ndoñi bibuk.
Ni hop Lôk Héber, “d’a ti we bon ba nyaga ba bibép gwés.”
Hala wee, mintjep mi mondo.
Ni hop Lôk Héber, “Mbigda.”
I e ini yon ba nsébél ni hop Pulasi le génévrier.