Pék i nlôl ni Djob i éga niñ yés

BAA Yéhôva a yé Ñane nu a gwé pék? Bañga njel inyu timbhe mbadga ini i yé le di wan maéba Yéhôva a nti. Baa maéba mé ma téé? Ibale di nôgôl mo, baa ma nla boñ le niñ yés i lama, i bana ki nseñ? Mpépék Kiñe Salômô a tila bibôgôl bi bingéngén bi ntihba manjel ma niñ mut momasô. Di wan le ndég dihéga.

I nsômbla bôdôl Djob ñem. Bôdôl Yéhôva ñem li yé hiliba hi maada malam ni nye. Salômô a tila le: “Bôdôl Yéhôva ñem ni ñem woñ wonsôna, u nigbene bañ banga yoñ yi wemede. Neebe nye manjel moñ momasôna, ndi a’ téé dinjela tjoñ.” (Bingéngén 3:5, 6) Ngéda di mbôdôl Djob ñem, di nti niñ yés ngandak nseñ. Ibale di nwas Djôb le a unda bés njel, yak bés ki di nôglak nye, di ga kônha ñem wé masé. Di nit ki Yéhôva i timbhe Satan, mbala wé ni nyahal nye.​—Bingéngén 27:11.

Gwélél pék i niñ loñge ni bôt bape. Maéba Djob a bi ti babiina ni bon bap ma yé nseñ len ini iloo ngéda kwañ. Djob a nkal munlôm le: “Hagak ni nwaa nu binéñél gwoñ,” hala a nkobla le munlôm a ke bañ ndéñg. (Bingéngén 5:18-20) Kaat Bingéngén i nti bôdaa ba yé mbiibaga loñge ndémbél i bañga mudaa wada nu a kôhna bibégés bi nlôm ni bon bé. (Bingéngén, pes 31) Yak boñge ki ba nkôhna maéba le ba nôgôl bagwal bap. (Bingéngén 6:20) Kaat ini i ñunda ki le mawanda ma yé nseñ i niñ, inyule mut nu a nkeñgle bôt a nyéñ ndik yéñe yé nyemede. (Bingéngén 18:1) Ndi kiki mawanda ma nla tinde bés i boñ loñge to béba, di nlama pohol mo ni pék.​—Bingéngén 13:20; 17:17.

Pék i nhôla we i tat wemede. Kaat Bingéngén i gwé maéba ma yé nseñ ngandak i keñgle lihiua. I nti maként i bana mahoñol ma nhôla bés i tééda mbôô i minsôn, ni i jôs mahoñol mabe. I nhég ki bés le di ba bañ bôt ba yeñgi. (Bingéngén 6:6; 14:30; 20:1) Kaat Bingéngén i mbéhe bés le di bôdôl bañ njel i bôt ba biman ñem ngéda i yé mahéñha ni maéba ma Djob inyule hala a nkena tjiba. (Bingéngén 14:12) I nkal bés le di tat mahoñol més ni ñem wés, le u hielba bañ i nyuge bés i boñ béba, inyule “mu [ñem] nyen mam ma niñ ma nlôl.”​—Bingéngén 4:23.

Didun di bôt i nkoñ isi wonsôna ba nléba le nu ni nu a noñ maéba mana a yé kimasoda i niñ yé. Inyu hala nyen ba ntehe le ba leege Yéhôva kiki Ñane wap.

​—Biniigana bini bi nyôñna i kaat Bingéngén.