Hélha jam i yônôs iba i Yésu i Kana

I mbus le a ntégbaha dilo diba i Samaria, Yésu a ntémb i homa a nyééne. A ntéé likalô ngandak i Yudéa, ndi a ntémb bé i Galiléa inyu noi. Maselna ni hala, a mbôdôl nson u u nlôôha keñi mu nkoñ het a bi néñél. Kiki nyemede a bi kal, bebek a nhégda bé le a’ kôhna maleege malam nyoo, inoñnaga ni bibuk gwé: “Mpôdôl a gwé bé lipém i loñ yé nyemede.” (Yôhanes 4:44) Iloole ba yégle ni nye, banigil bé ba ntémb mambai map ni bibôlô gwap.

Umbe nwin Yésu a ñañal? Wo unu le: “Ntéak ngéda u nkola, yak Ane i Nyambe i nkôôge bebee. Tama bibéba binan, ni hémle ki ñañ nlam.” (Markô 1:15) Lelaa bôt ba Galiléa ba ntimbhe? Ngandak i nleege Yésu loñge, i tinak nye lipém. Ba mboñ ndigi bé hala inyu nwin wé. Ngandak sôñ i bisu bi ngéda, bahogi ikété yap ba bé i ngand Pasa i Yérusalem, het ba bi tehe mam ma hélha Yésu a bi boñ.​—Yôhanes 2:23.

I Galiléa, hee Yésu a mbôdôl nson wé? I nene le i Kana, het a bi bôk a hiel malép wai i ngand libii. Hala kiki a yé nyoo inyu ngélé i yônôs iba, Yésu a nok le mañge munlôm a nkon ngandak, ni le a yé bebee ni nyemb. A yé man ñane bisônda i ndap Hérôdé Antipas, kiñe i i ga kit Yôhanes Nsôble ño mbus ngéda. Ñane bisônda nu, a nok le Yésu a nyodi i Yudéa inyu ke i Kana. Jon, i sônda i, i nyodne i Kapernaum, mbai yé, inyu ke i Kana i yéñ Yésu. Ikété ndutu, sônda i nsoohe nye le: “A Nwet, sôs ilole man wem a nwo.”​—Yôhanes 4:49.

Ndimbhe i Yésu i nhélés mut nu, a nkal nye le: “Kenek; man woñ a yé i niñ.” (Yôhanes 4:50) Sônda i Hérôdé i nhémle Yésu, i kahal témb i mbai yé. I njel, minkol nwé mi mboma nye, mi yé maséé i legel nye loñge nwin. Ñ, man wé a yé niñ a yé ki mbôô! Inyu noode yi lelaa mam ma ntagbe, a mbat le: ‘Imbe ngéda a mbôôp?’

Ba ntimbhe le: “Lihep jé li bi mal yani i ngeñ yada i mbus kosi.”​—Yôhanes 4:52.

Sônda i mbidga le i ngéda i nyen Yésu a bi kal nye le: “Man woñ a yé i niñ.” I mbus hala, mut nunu, nu a nlama ba ngwañ mu kii a gwé ngandak minkol, a nyila nnigil Yésu, nye ni bôt ba ndap yé bobasôna.

Kana a yé tison het Yésu a mboñ bihélha bi mam ngélé iba, a nyilha malép wai, i mbus a mbuubaha mañge, a bak haa bebee le 26 kilôméta. I yé mbale le a bi boñ mam ma hélha mape, ndi, mbôô u mañge u nlôôha ba nseñ inyule u yé yimbne i matémb mé i Galiléa kiki mpôdôl Djob. Ntiik, a yé toi mpôdôl nu a nlémél Djob. Baa mpôdôl nunu a ga kôhna lipém i loñ yé?

Di ga yi i jam li, inyule Yésu a yé témb i mbai yé, i Nasaret. Kii i mbem nye nyoo?