Yésu a naña Matéô

Ndék ngéda i mbus le a mbuubaha ñambge mut, Yésu a nyén i Kapernaum tison i yé i mbaa tuye Galiléa. Yak nyoo, limut li nlo i yéñ nye, a mbôdôl niiga bo. Mu kii a yé ke, a ntehe Matéô nu ba nsébél ki le Lévi, a yii i yééne bakottas. Yésu a nleñ nye loñge nsébla, a nkal nye le: “Noñ me.”​—Matéô 9:9.

Ibabé pééna, Matéô a ma nok ngan i biniigana bi Yésu ni bihélha bi mam a mboñ mu nkoñ u, nlélém kiki Pétrô, Andréa, Yakôbô ni Yôhanes. Kiki bo, Matéô a mpala neebe. Matéô a ntoñol jam li mu kaat i gwé jôl jé, a nkal le: “Ha nyen [Matéô nyemede] a telep, a noñ nye.” (Matéô 9:9) Matéô a ntjôô bôlô yé i nkottas inyu yila nnigil Yésu.

I mbus, bebek inyu unda le a ndiihe nsébla u tôbôtôbô u Yésu, Matéô a naña soso ngand i mbai yé. U héya Yésu ni banigil bé, bonjee ba bi lo? Mawanda ma bôlô ma Matéô ma yé ha. Ba nkot tas inyu baane ba Lôk Rôma ba bôt ba ñoo. Ba nyoñ tas i ngii bisitima bi nlo libôñ, ni ipañ bôt ba nyuñga ba nkil minloñ ni kamél, ni i ngii gwom bi nyuñga bi njôp i nkoñ. Lelaa Lôk Yuda i ntehe bakottas? Ba nyan bo inyule ba gwé lem i bat moni iloo ndamba i mbéda. Yak ‘baboñbéba’ ba yé mu ngand Matéô a naña, bôt ba gwé jôl libe inyu maboñok map mabe.​—Lukas 7:37-39.

I ngéda ba ntehe le Yésu a nje ni mintén mi bôt mi, Farisai i i gwé lem i unda le ba nlôôha ba bôt ba téé sép, ba mbat banigil ba Yésu le: “Inyuki malét nan a nje lôñni bakottas yak ni baboñbéba?” (Matéô 9:11) Mu kii a ñemble yom ba nkal, Yésu a ntimbhe le: “Bôt ba yé mbôô ba gwé bé ngôñ ni dokta, ndik bôt ba nkon.” (Matéô 9:12, 13; Hôséa 6:6) I ngéda Farisai i nsébél Yésu le “malét,” hala a nlôl bé bo ñem, ba gwé bé ngôñ le Yésu a niiga bo, jon ba nimis pôla i yé bo bisu i nigil telepsép.

I nene le Matéô a naña bakottas ni baboñbéba i mbai yé inyu boñ le yak bo ba emble Yésu, ni inyu kôhna mbôô i pes mbuu ‘inyule ngandak mukété yap i bé noñ Yésu.’ (Markô 2:15) Yésu a gwé ngôñ i hôla bo i bana maada malam ni Djob. Maselna ni Farisai, i i nhoñol le i nlôôha ba bôt ba telepsép, Yésu, nye a nyan bé bôt bana. A nkon bo ngoo, a nsômbôl ba dokta li ba bobasôna ba nkon i pes mbuu.

Ibale Yésu a ñunda bakottas ni baboñbéba konangoo, i ta bé inyule a yé maséé ni bibéba gwap, ndi i yé inyule a gwé minlélém mi mahoñol ni ma a gwé ipañ bet a ntibil i pes minsôn. Kiki hihéga, di hôya bañ le ikété konangoo yé, a bi tihba mut lô, a kal nye le: “Me ngwés! Kon woñ u mal.” (Matéô 8:3) Baa yak bés di nlama bé sal inyu bana nya konangoo i? Baa di yé le di hôla bôt ba gwé mandutu, téntén ba ba gwé ngôñ ni mahôla i pes mbuu?