I Yérusalem inyu ngand Bilap

I mbus nwii mi noñ sôble yé, ngandak bôt i nyi Yésu. Dikôô di Lôk Yuda di ntehe bihélha gwé bi mam, i bôt ba ba ntjam ñañ u ni loñ yosôna. Nano Yésu a yé ngand Bilap i Yérusalem, ngandak bôt i nyi nye.

Bôt ba gwé mahoñol nya di nya inyu Yésu. Inyu bahogi, “a yé loñge mut;” bape bo: “A ta bé loñge mut. A nyumus limut.” (Yôhanes 7:12) Ndi mut nye ki nye a gwé bé makénd i sima jôl li Yésu i mbamba inyule ba nkon baéga bibase bi Lôk Yuda woñi.

I ñemkété i ngand Bilap, Yésu a njôp i témpel. Likeñge jé inyu niiga li nhélés ngandak bôt. Kiki a bé bé bisuklu bikeñi, Lôk Yuda i nhel, i kalak le: “Hee i mut nunu a nyôñôl nya yi i Bitilna ini, ki le a bi ke bé i suklu?”​—Yôhanes 7:15.

Yésu a ntoñol le: “I jam me niiga li ta bé jem ndi li yé li nu a bi ep me. Ibale mut a ngwés boñ sômbôl Yé, a’ yi too i mam me niiga ma nlôl yak Nyambe tole me mpot ni memede.” (Yôhanes 7:16, 17) Biniigana bi Yésu bi nkiha ni Mbén Djob, jon i yé maliga le a nyéñ lipém li Djob he jé bé.

I mbus, Yésu a nkal le: “Môsi a bi ti bé Mbén, hala bé? Ndi mut to wada ikété nan a nôgôl bé Mbén. Inyuki ni nyéñ nol me?” Bahogi mu limut ba yé bakén, bebek ba nlôl bok ipe, ba nyi bé jam li ntagbe. I nla ba ndutu i hémle le ba nsômbôl nol ntén malét u. Jon ba nsôk ba kal le ngim jam i nkile bé yak Yésu, ba nkal nye le: “U gwé mbuu mbe. Njee a nyéñ nol we?” ​—Yôhanes 7:19, 20.

Hala a yé nwii wada ni pes nano le baéga bibase bi Lôk Yuda ba bé sômbôl nol Yésu inyule a bi mbuubaha mut wada i kel Sabat, nano Yésu a ngwélél bibañga bini inyu yelel mahoñol map mabe. A mbigdaha bo le ba nlama kwee man munlôm i hilo hi yônôs juem to ibale i kel i i yé kel Sabat. I mbus, a mbat le: “Ibale ni nkwee mut i kel sabat kayéle ni bôk bañ mbén Môsi, inyuki ni nlôôha unbene me inyule me mélés mut kon wé wonsôna i kel sabat? Ni waa kéés inoñnaga ni yom i nene i mis, ndi ni kéés lôñni telepsép.”​—Yôhanes 7:23, 24.

I bôt ba Yérusalem ba nyi jam li bi tagbe, ba mbat le: “Baa i mut nunu bé nyen ba nyéñ nol? Ndi nuna-ki! A yé i pot i mbamba, ndi ba nkal bé nye to jam. Baa i nla ba le baéga ba nsôk yi le nyen a yé toi Kristô?” Inyuki bôt ba nhémle bé le Yésu a yé Kristô? Ba nkal le: “Di nyi hee i mut nunu a nlôl; ndi ngéda Kristô a’ lo, mut to wada a’ yi bé hee a nlôl.”​—Yôhanes 7:25-27.

Ha i témpel, Yésu a ntimbhe le: “Ni nyi me, ni nyi ki homa me nlôl. Me bi lo bé ni memede, ndi Nu a bi ep me a niñ toi, ndi bé ni nyi bé nye. Me nyi nye inyule me yé nu a nlôl i jôl jé, a lôlak i nyeni, nye ki nyen a bi ep me.” (Yôhanes 7:28, 29) Kiki a mpahal bibañga bini, bahogi ba nsômbôl gwel nye i ha nye i mok, bape ba nsômbôl nol nye. Ndi ba nla bé inyule ngéda i nyemb Yésu i yé ngi kola.

Ndi nlélém ngéda, ngandak bôt i nhémle Yésu. Inyule a bi ke i ngii malép, a mômôs mbebi, a gwélél hélha njel inyu jés dikôô di bôt ni ndék tjôbi ni bret, a mbuubaha bibôk bi bôt, bôt ba ndim, bôt ba lô ni makon mape, a bi tugul yak bawoga. Ñ, ba kôli toi bat le: “I ngéda Kristô a’ lo, baa a’ boñ biyimbne iloo kiki mut nunu a mboñ?”​—Yôhanes 7:31.

Ngéda Farisai i nok bôt ba nkal hala, bo ni baéga biprisi ba ñep bisônda i gwel Yésu.