Yésu a nkôôba Pasa yé i nsôk

Yésu a mal niiga baôma ba-na Hikôa Ôlivé, a ntimbhe mbadga yap inyu ngéda a mba ha ni inyu mamélél ma hiai hini.

Yésu ni baôma bé ba bak ba pégi ngandak mu hilo 11 hi sôñ Nisan. Bebek i ngéda ba yé témb i Bétania inyu tégbaha u nyen Yésu a nkal baôma le: “Ni nyi le ngand Pasa i yé noma, ni le b’a gwélha Man mut inyu nol nye i ngii kék.”​—Matéô 26:2.

I kel i noñ, i Ngwa ngéé, Yésu ni baôma bé ba nyén ngim homa i yé nwee. I Ngwa um, a bi pôdôs baéga bibase, a yelel yak béba yap ñem, jon ba yé toñ njel i nol nye. Inyu hala nyen Yésu a mpam bé mbamba hilo 12 hi sôñ Nisan inyu boñ le yom yo ki yo i tuga bañ nye i tégbaha Pasa ni baôma bé i kôkôa i manañle ma hiañgaa ma noñ, hala wee i bibôdle bi hilo 14 hi sôñ Nisan.

Ndi baéga biprisi ni mimañ mi bôt ba ta bé nwee. Ilole Pasa i mbôdôl, ba nkodba i yale i prisi keñi le Kaifa. Inyuki? Ba yé ñunbak inyule Yésu a nyelel bihéñba gwap i mbamba. Nano, ba ñôô jimb “inyu gwel Yésu ni mandon ni inyu nol nye.” Lelaa ni ngéda mbe ba ga boñ hala? Ba nkal le: “I ngéda ngand bé, inyu boñ le hala a lona bañ yubda ikété limut.” (Matéô 26:4, 5) Ba nkon woñi inyule ngandak bôt i ngwés Yésu.

Mu ngéda i, baéga bibase ba kôhna mayuuga ma mut wada. Hélha jam i yé le, Yuda Iskariôt, wada ikété baôma ba Yésu nyen a nlo tehe bo. Satan a nha nye mahoñol le a liibana Nwet wé! Yuda a mbat bo le: “Ibale me mboñ le ni gwel nye, n’a ti kii me?” (Matéô 26:15) Ni maséé, ba “nôgla le ba nti nye moni silba.” (Lukas 22:5) Moni nwañen? 30 ma moni silba. I yé loñge i yi le, 30 ma sékel i silba ma yé ndamba ba mbéna ti inyu somb nkol. (Manyodi 21:32) Ni njel i, baéga bibase ba ñunda le ba nyan Yésu, inyu yap a gwé bé nseñ. Ibôdôl ha ngéda i, Yuda a ‘nyéñ loñge njel inyu hôla bo i gwel nye ngéda limut li ta bé.’​—Lukas 22:6.

Hilo 13 hi sôñ Nisan hi mbôdôl manañle ma hiañgaa ma Ngwa ngéé. Hala a yé u u nyônôs isamal ni u u nsôk u Yésu i Bétania. I kel i noñ nyen bôt ba mbéna mal ngôôba yap i ngand Pasa. Ba nlama nol man ntômba inyu lamb nye ngim i hilo 14 hi sôñ Nisan. Hee Yésu ni banigil bé ba ga tégbaha Pasa? Njee a ga kôôba yo? Yésu a nkal bé to yom. Inyu hala nyen Yuda a nla bé ti baéga biprisi mandimbhe inyu mambadga ma.

I nene le i bibôdle bi kosi bi Ngwa mbok, Yésu a ñom Pétrô ni Yôhanes i kôôba Pasa, a nkal bo le: “Kena, kôôbana Pasa inyu yés le di je.” Ba mbat nye le: “Numbe homa u ngwés le di kôôbana yo?” A kal bo le: “Nuna-ki! I ngéda ni njôp ikété tison, mut a bééga hibee hi biték hi hi gwé malép a’ boma bé. Noña nye, ni jôp ikété ndap a njôp. Ni kal nwet ndap le: ‘Malét a nkal le: “Hee tuñ i bakén i yéne, i het me nla jél Pasa lôñni banigil bem?”’ Nwet ndap a’ unda bé tuñ ikeñi i i yé i ndap ngii, i yé mbôñglak. Kôôbana Pasa mu.”​—Lukas 22:8-12.

Ibabé pééna, nwet ndap a nlama ba nnigil Yésu. Bebek a yé bem le Yésu a bat nye ndap yé inyu lôôs Pasa. Kiki baôma ba mpam i Yérusalem, ba nkoba le mam momasôna ma yé kiki Yésu a bi kal bo. Ba ntehe le man ntômba ni gwom bipe bi yé nkôôbaga inyu boñ le Yésu ni baôma bé 12 ba tégbaha Pasa.