Soho, témb yak “Ntééda ni Mbénge nom nan”

BA NKWOOG nkaa le Yéhôva a ga hôla we i témb ikété bémba yé. A ga hôyôs nduña yoñ, a sayap ki biliya gwoñ i nwéhél bôt ba bi unbaha we. A ga hôla ki we i kôs ñem nwee ni kiñ ñem i mpôp. Hala a ga ti we makénd i témb gwélél Yéhôva ni bilôk biké. Ha ngéda i, w’a ba kiki bikristen bi bisu Pétrô a tilna le: “Ni bé yôm wengoñle mintômba, ndi hanano ni mal témp yak Ntééda ni Mbénge nom nan.”​—1 Pétrô 2:25.

Yom ipe i ta bé nseñ kiki témb yak Yéhôva. Inyuki di nkal hala? Inyule u ga kônha Yéhôva maséé. (Bingéngén 27:11) Kii u nyi, Yéhôva a gwé bé ñem ngok. Maboñog més ma nla kônha nye maséé tole unbaha nye. Ndi hala nkobla bé le Yéhôva a nyégsa bés i gwés tole i gwélél nye. (Ndiimba Mbén 30:19, 20) Ntoñol Bibel wada a bi kal le: “Mut nye kii nye a nla bé yibil ñem woñ inyu yoñ. Wemede nyen u gwé le u boñ hala.” U ga unda Yéhôva le u nyible nye ñem woñ ibale u ngwélél nye ni ngui yoñ yosôna. Ibale di mboñ hala, di ga ti Yéhôva lini likébla likeñi le ñem maliga. Hala a ga kônha ki nye maséé ngandak. Mbale i yé le, jam jo ki jo li nla bé kônha bés maséé kiki ti Yéhôva bibégés bi kôli ni nye.​—Minson mi baôma 20:35; Masoola 4:11.

Ndi iloo hala, ngéda u ga bôdôl ki yoñ ngaba i mam ma mbuu, u ga yônôs ngôñ yoñ i bégés Djob. (Matéô 5:3) Lelaa w’a yônôs ngôñ i? Bôt ba mbadba ni nkoñ isi wonsôna le: “Baa inyuki di yé hana isi?” Ba yé ki njal i pes i mbuu inyule ba gwé bé mandimbhe inyu mambadga makeñi ma niñ. Yéhôva nyen a bi heg bôt ba binam ni ngôñ i gwélél nye. A bi hég ki bés ni yom i nsômbla inyu yônôs ngôñ i. Di nlama gwélél Yéhôva ni gwéha. Jam lipe li nlôôha ti bés maséé hala, li ta bé.​—Tjémbi 63:2-6.

Soho, yi le Yéhôva a gwé ngôñ le u témb nyeni. Kii nla kwés we nkaa le sômbôl yé i? Béñge ki: Di bi yoñ ngéda i kôôba man kaat nunu ikété ngandak masoohe. Bebeg le mañ u likoda tole manké numpe nyen a bi lona we yo. Mbus hala, wemede u nyoñ ngéda i añ yo. Bebeg ki le, u nyoñ makidik i boñ inoñnaga ni yom u ñañ. Baa mam mana momasôna, ma ñunda bé le Yéhôva a ngi hoñlak we? Ntiik, hala ñunda le a yé ôt we mbeñel mbeñel i pañ yé.—Yôhanes 6:44.

Di nla ba maséé i yi le, Yéhôva a mah hôya bé mintômba nwé, mi mi nimil. Sista ba nsébél le Dôna, a bi sôk a léba le hala a yé mbale. A bi kal le: “Me bi bôdôl bagba ndég ni ndég ni maliga. Ndi ngim mangéda, me bé hoñol yom kaat Tjémbi 139:23, 24, i nkal: ‘Wan me, a Nyambe, u yi ñem wem; noode me, u yi ki mahoñol mem; béñge ki me too njel be yo ki yo i yé ikété yem, u éga ki me njel i boga.” Me bé yi le me ta bé mut matén, inyule niñ i mbégdé i mah lémél bé me. Me bé yi ki le ntôñ Yéhôva won u yé lihaa jem. Me bi sôk me tehe le Yéhôva a mah hôya bé me. Me nyen me bé lama boñ biliya i kôôge nye bebee. Jon me yé maséé i len ini, le me bi boñ hala!”

Di nsoohe ni ñem wés wonsôna le, yak we u témb u nôgda “maséé ma Yéhôva.” (Néhémia 8:10) U ga tam bé kekikel le u ntémb yak Yéhôva.