Hélha jam i Tuye Nkôibaga

Kiki Faraô a nok ndigi le bon ba Israel ba nyodi Égiptô, a tam inyuki a bi nwas bo le ba kee. Ha nyen a bi ti bisônda gwé oda le: ‘Ni kôôba bikak gwem bi gwét gwobisôna, di noñ bo! Di bé lama bé nwas bo le ba kee.’ Nye ni bôt bé ba kahal noñ bon ba Israel.

Yéhôva a bé éga litén jé, ni ond njamuha, ndi ni hié ni juu. A bi éga bo letee ni i Tuye Nkôibaga, a kal bo le ba yén ndugi ha.

Ha nyen bon ba Israel ba bi tehe le Faraô ni ntôñ wé gwét ba yé noñ bo. Ba bé nhégék ipôla tuye ni ntôñ gwét u Égiptô. Ba lôndôl Môsi le: ‘Ngo di nwo! Ki u nwas bés i loñ Égiptô.’ Ndi Môsi a timbhe le: ‘Ni kon bañ woñi. Telbana hana, ni tehe lelaa Yéhôva a ntohol bés.’ Môsi a bé toi a mbôdôl Yéhôva ñem, hala nga?

Yéhôva a bi kal bon ba Israel le ba jôp njel. I u u, Yéhôva a bi bii ond ipôla bon ba Égiptô ni bon ba Israel. Jiibe li bé i pes i bon ba Égiptô. Ndi i pes i bon ba Israel, mapubi ma bé.

Yéhôva a kal Môsi le a sambal woo wé ngii tuye. I mbus, Yéhôva a boñ le mbebi ikeñi i hôñ u wonsôna. Mbebi i bagal tuye ngélé iba, i kan njel i ñem tuye. Didun di bon ba Israel di kil mu numuk hisi, letee ni uu ngwañ tuye, ipôla mabap ma malép.

Ntôñ gwét u Faraô u noñ bon ba Israel i ñemkété tuye. Ndi Yéhôva a yumus ntôñ gwét u Faraô. Makôô ma bikak gwap ma kahal nyodi. Bisônda bi kahal lond le: ‘Di ôt ngwéé! Yéhôva a yé jo inyu yap.’

Yéhôva a kal Môsi le: ‘Sambal woo woñ ngii tuye.’ Kunda yada mabap ma malép ma kwél ntôñ gwét u Égiptô. Faraô ni bôt bé bobasôna ba wo. Mut to wada a bi pei bé.

Ndi ii pes i tuye, limut likeñi li bé bégés Djob ni hiémbi, ba tôbôk le: “Tublana Yéhôva tjémbi, inyule a ñunda le a kôli ni bibégés. Hosi ni i nwet a bédi yo ngii, Yéhôva a bi leñ bo ikété tuye.” Kiki bôt ba bé tôp hiémbi, bôda ba bé sak, ba kôdôk dingoma. Bôt bobasôna ba bé maséé le, nano ba nkôs toi kunde.