Nkena nu mondo ni bôda ba makénd iba

Ngandak nwii i mbus le a bi éga litén li Yéhôva, Yôsua a bi wo a banga 110 li nwii. Niñ yé yosôna, Lôk Israel i bé bégés Yéhôva. Ndi, i mbus nyemb Yôsua ba bôdôl bégés bisat, nlélém kiki bon ba Kanaan. Hala kiki Lôk Israel i bi waa nôgôl nye, Yéhôva a nwas le kiñe Kanaan le Yabin a nôgha bo ndutu. Litén li kahal bat Yéhôva nwéhél. Jon, Yéhôva a bi ti bo nkena nu mondo le Barak. Nu a bé lama hôla bo i témb yak Yéhôva.

Yéhôva a bi om Débôra, mpôdôl nu muda yak Barak i legel nye le: ‘Yoñ 10 000 di bôlôm, ni ke i boma ntôn gwét u Yabin, i lép Kison. Nyoo nyen u ga bép Siséra, nkena ntôñ gwét u Yabin.’ Barak a kal Débôra le: ‘Me ga ke, ndik ibale u nlo ni me.’ Débôra a timbhe le: ‘Me ga ke ni we. Ndi, yi le we bé nyen u ga nol Siséra. Yéhôva a nkal le muda nyen a ga nol nye.’

Débôra a ke lôñni Barak ni ntôñ wé gwét ikepam i ngii Hikôa Tabor, inyu bôñha gwét. Kiki Siséra a bi nok ndik jam li, a kot bikak gwé lôñni mintôñ nwé mi gwét ikété nsôsôgô. Débôra a kal Barak le: ‘I len ini i yé kel Yéhôva a ga ti bé yémbél.’ Barak ni 10 000 tjé di bôlôm, ba sôs hikôa ngwéé ni ngwéé i boma mpémba ntôñ gwét u Siséra.

Yéhôva a boñ le lép Kison u hôl. Bikak bi gwét bi Siséra bi bôdôl sôôbe ikété liboo. Siséra a tjôô bikak gwé, a ke ngwéé. Barak ni bisônda gwé bi bép ntôñ gwét u Siséra, ndi Siséra nye a so! A ôt ngwéé, a solop i ndap libadô i muda wada le Yael. Yael a ti nye milik, a nyo, a hô ki nye ni lañgat. Nwaak sônda u kahal ke ’ilo. Ha nyen Yael a jôp mbeñee, a yoñ mpomok kék u ndap libadô, a ôm nye wo i ño, Siséra a wo.

I ngéda Barak a bi lo i yéñ Siséra. Yael a pam ndap yé, a kal nye le: ‘Jôp, me ga unda we mut u nyéñ.’ Barak a jôp i ndap libadô, a tehe Siséra a niñi mim. Barak bo Débôra ba bôdôl bégés Yéhôva ni hiémbi, inyule a bi boñ le Lôk Israel i bép baoo bap. Lôk Israel i bi yiga niñ ikété nsañ 40 ma nwii ma bi noñ.