Kiñe David a mboñ béba

I ngéda Saulô a bi wo, David a yila kiñe. A bééna 30 ma nwii. U wada, i ngéda a bé hiôm i ngii nyôl u yale yé, a tehe nlam muda. David a bi sôk yi le jôl jé le Batséba, ni le a bé nwaa sônda yé yada le Uria. David a bat Batséba le a loo i yale yé. Ba lal ntôñ, Batséba a ba jém. David a bi yéñ sôô i jam a bi boñ. A kal nkena ntôñ gwét le a bii Uria i bisu i het gwét bi nlôôha ngui ndi bo ba telep i mbus. I mbus nyemb Uria, David a bii Batséba.

Ndi Yéhôva a bi tehe mam mabe momasôna ma bi bôña. A boñ kii? Yéhôva a bi om mpôdôl wé Natan yak David. Natan a kal nye le: ‘Ngwañ mut wada u bééna ngandak mintômba, ndi hiyeyeba hi mut hi bééna mpom man ntômba, nu a bé gwés ngandak. Ngwañ mut u bi yoñ mpom man ntômba u hiyeyeba.’ David a unup, a kal le: ‘Ngwañ mut unu u kôli ni nyemb!’ Ni Natan a kal David le: ‘Wen u yé u ngwañ mut u!’ Ñem u yodop David, a pahal le: ‘Me mboñ béba bisu bi Yéhôva.’ I béba i, i bi lona David ni lihaa jé ngandak mandutu. Yéhôva a bi kogse David, ndi a bi nwas nye i niñ inyule a bé mut maliga ni suhulnyuu.

David a bé sômbôl oñ témpel inyu Yéhôva, ndi Yéhôva a bi pohol man wé Salômô inyu oñ yo. David a bôdôl kôôba gwom inyu Salômô, a kal ki le: ‘Témpel i Yéhôva i nlama ba ilam kiyaga. Salômô a yii mañge wanda, ndi me ga hôla nye i kôôba gwom.’ David a ti ngandak moni inyu bôlô maoñ. A léba ki bagwelnson ba makeñge. A bi kot gôl ni silba, a somb ki bikék bi Sidar bi bi bé lôl i Tir ni i Sidôn. I ngéda a bé bebee ni nyemb, David a ti Salômô mapep ma maoñ ma témpel. A kal nye le: ‘Yéhôva nyen a bi kal le me tila i mam mana inyu yoñ. Yéhôva a ga hôla we. U kon bañ woñi. Bana ngui, jôb i bôlô.’