Manoodana i ngii Hikôa Karmel

Jôm li matén li Israel li bi bana ngandak bibéba bi bikiñe, ndi Ahab a bé ikété bi bi bi lôôha béba. A bii Yézabel, nu a bé bégés Baal, a ban-ga ki béba ñem kiyaga. Ahab bo Yézabel ba bi yônôs loñ ni base Baal, ba nol yak bapôdôl ba Yéhôva. Kii Yéhôva a bi boñ? A bi ep mpôdôl wé Élia inyu legel Ahab nwin.

Élia a kal Kiñe Ahab le, inyu bibéba gwoñ bikeñi, nop a ga no bé i loñ Israel. Hala a bi loo nwii maa le bibebela bi bé nañ bé, bôt ba kahal wo njal. I mbus ngim ngéda Yéhôva a ep Élia yak Ahab. Kiñe i kal le: ‘Wen u mboñ le bikuu bi kwél Israel! Mam mana momasôna ma yé njom yoñ.’ Élia a timbhe le: ‘Me bé nyen me bi lona sép keñi ini. Bé bon ni yé njom inyule ni mbégés Baal. Di ga boñ manoodana. Kot bon ba Israel ni bapôdôl ba Baal i ngii Hikôa Karmel.’

Litén li kodba i ngii hikôa. Élia a kal le: ‘Pahlana mahoñol manan. Ibale Yéhôva nyen a yé bañga Djob, noña nye. Ibale Baal, noña nye. Me mboñ mana manoodana. Bapôdôl ba Baal, 450, ba ga kôôba likébla jap, ba sébél ki djob jap. Yak me m’a kôôba likébla jem, me sébél ki Yéhôva. I nwet a ntimbhe ni hié nyen a yé bañga Djob.’ Bôt ba neebe.

Bapôdôl ba Baal ba kôôba likébla jap. Ngim kel yosôna ba bi sébél djob jap: ‘A Baal, timbhe bés!’ Kiki Baal a bé kôble bé, Élia a kahal nol bo hiol: ‘Ni sébél makeñi kiki ni nla. Bebek le a nke ’ilo, i mbéda le mut a tôdôl nye.’ Kôkôa i kwo, bapôdôl ba Baal ba séblak ndigi. Ndi, ndimhe yo ki yo i bé bé.

Élia a yoñ likébla jé, a bi bii jo ngii juu li bisesema, a kôp jo malép. Ndi a kahal soohe: ‘A Yéhôva, soho nwas le bôt bana ba yi le wen u yé bañga Djob.’ Kunda yada, Yéhôva a ep hié, hi ligis sesema. Bôt ba lond: ‘Yéhôva nyen a yé bañga Djob!’ Élia a kal le: ‘Ni nwas bañ bapôdôl ba Baal le ba ke ngwéé!’ Hilo hi, bapôdôl ba Baal ba bi nôla, bo 450.

Ngéda man ond a bi nene i ngii tuye, Élia a kal Ahab le: ‘Soso nop a yé njel. Kôôba kak yoñ, u huu ndap.’ Ngii i hénd ni ond, mbebi i ka hôñ, ndi soso nop a bôdôl no. Hala nyen sép keñi i bi mal. Ahab a bi luk kak yé ngwéé ni ngwéé ni ngui yé yosôna. Ni mahôla ma Yéhôva, Élia a bi ke ngwéé iloo kak Ahab! Ndi baa mandutu ma Élia momasôna ma bi mal ha? Di béñge.