Yôsia a bi gwés Mbén Nyambe

Yôsia a bi yila kiñe Yuda a ban-ga nwii juem. Dilo di, bôt ba bé boñ makañ, ba béghak ki bisat. Ndi ngéda Yôsia a bi pamna 16 nwii, a bi boñ biliya i nigil lelaa a nla bégés Yéhôva i nya i téé sép. Ngéda a bi pamna 20 ma nwii, a bi bôdôl bôk bisat ni muu ma bisesema ikété loñ yosôna. Ndi ngéda a bi pamna 26 ma nwii, a bi tjek mam inyu boñ le témpel Yéhôva i tiblana.

Ikété témpel, prisi keñi le Hilkia, a bi léba kaat Mbén Yéhôva​—bebek le kaat Môsé nyemede a bi tila. Mut matila nu kiñe, le Safan, a bi kena i kaat Mbén yak Yôsia, a añ ki yo makeñi. Kiki a bé emble, Yôsia a léba le bôt ba bi ndogbene Yéhôva ngandak nwii. Kiñe Yôsia a kal Hilkia le: ‘Yéhôva a ñunbene bés ngandak. Ken-gana ni kwel ni nye. Yéhôva a ga kal bés kii di nlama boñ.’ Yéhôva a bi timbhe bo ni njel Hulda, mpôdôl nu muda; a kal le: ‘Bôt ba Yuda ba bi tjôô me. Ba ga kôhna kogse, ndi i si éñel i Yôsia bé, inyule a bi suhus nyemede.’

I ngéda Kiñe Yôsia a bi nok nwin, a ke i témpel, a naña bôt ba Yuda bobasôna. Ndi a añ Mbén Yéhôva ni kiñ keñi bisu bi loñ yosôna. Yôsia ni bôt bobasôna ba bi bôn le ba ga nôgôl Yéhôva ni ñem wap wonsôna.

Litén li Yuda li bi tégbaha ngandak nwii le li lôôs bé ngand Pasa. Ngéda Yôsia a bi añ ikété Mbén Yéhôva le ba nlama tégbaha Pasa hiki nwii, a kal litén le: ‘D’a lôôhene Yéhôva ngand Pasa.’ Jon Yôsia a bi bôñha ngandak bisesema, a yoñ bitelbene inyu boñ le ntôñ batôp tjémbi u ba i témpel. Litén li bi lôôs Pasa, li lôôs ki ngand Koga i ngi-séñha, i i bé noñ Pasa, i nomok dilo disaambok. I nya Pasa i, i ba ngi lôôhana ibôdôl yaga i dilo di Samuel. Yôsia a bé gwés toi Mbén Nyambe. Baa u nkon maséé i nigil njee a yé Yéhôva?