Daniel ikété bee mbondo njéé

Kiñe ipe i Babilôn i bé le Darius, mut Média. Darius a bi yimbe le Daniel a bé tôbôtôbô. A téé Daniel i ngii bôt bakeñi ba loñ. Ndi bana bôt ba bé kil Daniel njôñ, ba sômblak ki nol nye. Ba bé yi le Daniel a mbéna soohe Yéhôva hiki kel ngélé aa, jon ba kal Darius le: ‘A kiñe, pémés mbén le wetama nyen ba nlama ndik soohe. Tonjee a mbôk ini mbén a nlama léña ikété bee i mbondo njéé.’ Darius a tehe le jam lilam li, a sane mbén.

Kiki a nok ndik ini mbén mondo, nlélém ngéda, Daniel a jôp i ndap yé. Su wé u nunuk winda i bé i néhi, a ôm maboñ isi, a kahal soohe Yéhôva. Bôt ba njôñ ba tihil, ba ada nye masoohe. Ba ôt ngwéé i kal Darius le: ‘Daniel a ndogbene we. A nsoohe Djob jé hiki kel ngélé aa.’ Ndi Darius a bé gwés Daniel, a bé sômbôl bé le a wo. A bi tégbaha ngim kel yosôna inyu yéñ njel i sôñ Daniel. Ndi kiñe yomede i bééna bé kunde i héñha mbén i nyemede a mal sane. Jon a bé nyégsaga i kal le ba leñ Daniel ikété bee i mbondo njéé i nyai.

U wonsôna, Darius a bi la bé ke ’ilo, a lal péé inyule a bé hoñol Daniel. Kiki kel i nye ndigi, a pala ke i bee, a sébél Daniel, a kal le: ‘Baa Nyambe woñ a ntohol we?’

Darius a nok kiñ. Kiñ i Daniel i! A timbhe Darius le: ‘Añgel Yéhôva i nyip manyo ma mbondo njéé. I mboñ bé me béba.’ Darius a kon maséé ngandak! A ti oda le ba pémés Daniel mukété bee. Daniel a bi bana bé mbabaa to yada. Ha nyen kiñe i ti oda le: ‘Leña i bôt ba bi soman Daniel ikété bee.’ Ngéda ba bi léña ikété bee, mbondo njéé i je bo.

Darius a pémés ngim mbén inyu litén jé, nye: ‘Hiki mut a nlama kon Nyambe nu Daniel woñi. Inyule a bi tat Daniel ikété bee i mbondo njéé.’

Baa u nsoohe Yéhôva hiki kel, nlélém kiki Daniel?