Yésu a ntep jôm li baôma ni iba

Hala a yé bebee le nwii wada ni pes le Yésu a ntéé likalô, ndi hanano a gwé makidik makeñi i yoñ. Bonjee a ga pohol le ba ba nye ipañ, inyu sal ni nye? Bonjee a ga uñgus inyu éga ntôñ bikristen? Inyu yoñ mana makidik, Yésu a bééna ngôñ ni mahôla ma Yéhôva. Jon a bi bet i ngii hikôa hiada inyu ba nyetama, a soohe nyoo u wonsôna. Maye ma kel, Yésu a sébél bahogi ikété banigil bé, ni nye a tep baôma bé, 12. Mambe môl u nla bigda? Môl map ma bé le: Pétrô, Andréa, Yakôbô, Yôhanes, Filipô, Bartôlôméô, Tômas, Matéô, Yakôbô man Alféô, Tadéô, Simôn, ni Yuda Iskariôt.

I jôm ni iba ini yon i bé lama hiôm ni Yésu. Kiki a bi mal uñgus bo, Yésu a om bo i téé likalô ni bomede. Yéhôva a ti bo ngui i pémés mimbuu mimbe ni mélés bakokon.

Yésu a bé sébél ini jôm ni iba le mawanda mé, a bé bôdôl ki bo ñem. Farisai i bé yan bo, i hoñlak le ba bi ke bé i bisuklu ni le ba bé gwañga bi bôt. Ndi Yésu a bi niiga bo lelaa ba nlama yônôs nson wap. Bon ba bé lama ba ni Yésu mu mangéda ma tôbôtôbô ma niñ yé, kii hihéga ilole a nwo, ni mbus bitugne gwé. Libim ikété ini jôm ni iba i bé lôl i Galiléa, kiki Yésu. Bahogi ba bé mbiibaga.

Baôma ba bé bikwéha bi bôt, ba boñok mahôha. Ngim mangéda, ba bé pala yoñ hop, ni makidik mabe. Mangéda mape, ba bééna bé wongut (tole hônba). Ba bé kaa bo ni bo inyu yi njee a yé nunkeñi. Ndi to hala, ba bé biloñge bi bôt, bi bi bé gwés Yéhôva. Bon ba bé lama ba hikuu hi ntôñ bikristen i mbus maké ma Yésu.