Kaat i Juu li bakena ntôñ

A lôk kéé i gwéha:

Gwéha inyu Nyambe ni inyu bôt ba binam i ntinde bés i ‘ke . . . ni i yilha bôt ba biloñ gwobisôna banigil, di sôblege bo.’ (Matéô 28:19, 20; Markô 12:28-31) Gwéha i gwé ngui ngandak. I nla ôt bôt ba gwé “libak lilam inyu kôhna niñ boga.”—Minson mi baôma 13:48.

I ngéda kôba, inyu ti mut kaat, di bé tééda dihéga di minkwel i boña. I len ini, di nlama lémés likeñge jés inyu kwel ni bôt. Di nlama unda bôt bape le di ngwés bo mu kiki di ñañle bo minkwel mi nlémél bo. Inyu pam i boñ hala, di nlama bé ba ndéñ ndéñ, ndi di yoñ ngéda i yi mahoñol ma hiki mut ni i yom i ntééñga nye. Lelaa i man kaat nunu a ga hôla bés i boñ hala?

I man kaat nunu a gwé 12 gwigil bi bi mpôdôl bilem di nlama hôlôs inyu unda bôt gwéha ni yilha bo banigil. Hiki yigil mu i umne i ñañ u Bibel wada u u mpôdôl lem yada Yésu tole nnigil wé wada a bi unda nson likalô. Hana njômbi i ta bé i tééda dihéga di minkwel i ño, ndi i yéñ manjel i unda bôt gwéha. To ibale hiki lem mu i yé nseñ ikété makas momasôna ma nson wés u likalô, di ga wan inyuki ngim bilem mu i nlôôha ba nseñ i ngéda di mbôdôl minkwel, i ngéda di mboñ mapeple, tole di ntégbaha gwigil bi Bibel.

Kiki u mba u nwan hiki yigil munu i man kaat nunu, béñge lelaa u nla unda i lem i, i ngéda u mba u nkwel ni bôt i libôga joñ. Boñ biliya i kéñbaha gwéha yoñ inyu Yéhôva ni bôt. I gwéha i yon i ga hôla we i yilha bôt banigil iloo makeñge momasôna.

Di nlôôha ba maséé i sal lôñ yada ni bé. (Sôfônia 3:9) Yéhôva a umbe bé bisai kiki ni nkônde gwés bôt ni i yilha bo banigil!