Ngim jôl i Bibel, ntilga i ngii nlômbi himbôga

I ñwii 2012, ba bi hulul bipes bi himbôga hi biték hi 3 000 ñwii. Ngandak bayi mam i bi wan jam li. Kii i mboñ le jam li li bé tôbôtôbô? He bipes bi himbôga gwomede bé gwon bi bé tôbôtôbô, ndi i yom i bé ntilga mu ngii.

Ngéda bôt ba njôôñ yi ba ba nhun hisi ba bi sôk ba at bipes bi gwobisôna, ba bi léba le matila ma hop i Lôk Kanaan ma bé ntilga mu i ngii. I bé ntilga le: “Eshba’al Ben [man] Beda’.” Hala a yé ngélé bisu le bôt ba njôôñ yi ba ba nhun hisi ba bi léba i jôl li, ntilga i ngii ngwom bi kôba.

I yé maliga le Bibel i mpôdôl Eshbaal (Isbaal) numpe nu a bé man Kiñe Saulô. (1 Miñañ 8:33; 9:39) Malét nkeñi wada le Yôsef Garfinkel, nu a bi yoñ ngaba i hulul bipes bi himbôga hi, a nkal le: “Jam lilam li yé le, i jôl lini le Eshba’al li nene ikété Bibel. Nano li yé yak ikété mam ma kôba ma kék i Kiñe David ma bôt ba njôôñ yi ba ba nhun hisi ba ma léba.” Bahogi ba nhoñol le ndik ha ngéda i nyen bôt ba bééna jôl li. Ngélé ipe ini le mam ma njôôñ yi ma nit ngim jam Bibel i nkal.

Bahoma bape ikété Bibel, i jôl lini le Eshbaal (Isbaal) li yé ntilga le Isbôset, ba nhéñha buk le “baal” ni ini le “bôset.” (2 Samuel 2:10) Inyuki ba mboñ hala? Bayi mam ba ntimbhe le: “I nene le ikété kaat 2 Samuel, ngôñ i bé le ba gwélél ha bañ jôl le Eshbaal (Isbaal) inyule li bé hôñlaha bôt “Baal” djob li nop li Lôk Kanaan, ndi litilga li bisu . . . li bi yégle ikété kaat Miñañ.”