“Nyonok ni makénd, ni gwéha miñem nwés iloo ngéda bisu”

HALA a bé kekela yada i ngwa koo i sôñ Dipos u nwii 1922, lék i bôdôl bet ngandak yokela, yom kiki bo 8 000 di bôt di bé di kôdi i soso ndap likoda. Ngwélél likoda a bi legel le mu kekela i, bôt ba bé kunde i pam, ndi mut to wada a bé lama bé bana kunde i témb jôb i ndap likoda likeñi.

Tjémbi di bi tuba i bibôdle bi “bibégés,” mbus mankéé Joseph F. Rutherford a bet hikôma. Libim li baemble li bé li yii, li nyamndaga ni ngôñ i yi jam li bé lama tagbe hanano. Ndék lôk kéé i bé i ngi kiiñaga isi hiañgaa. Nti nkwel a bi naña bo i pala yén inyu emble. Ngéda nkwel u bi bôdôl, baa mut a bi yimbe nhôdôk libadô li li bé téñék i ngii hikôma?

Mankéé Rutherford a bi ti nkwel le: “Ane ngii i gwé ni moo.” Yom kiki bo ngeñ yada ni pes, kiñ yé i bé nôga ni ndap yosôna kiki a bé toñol lelaa bapôdôl ba kôba ba bi añal malo ma Ane, ibabé i kon woñi. Ngéda a bi pam nlôm jam, a bat le: “Baa ni nhémle le Kiñe lipém a bi bôdôl énél?” Baemble ba timbhe ni kiñ ngii le: “Ééô!”

Mankéé Rutherford a kal ni kiñ ngii le: “A bon ba Djob Nungingii, ni témb i wom likalô! Nuna ki, Kiñe i yii i yééne Ane! Bé bon ni yé balegel nwin wé. Jon, añlana, añlana, añlana.”

Ha ngéda i, ba bi hohol nhôdôk libadô, ndi mana matila ma nene: “Añlana Kiñe ni Ane yé.”

Mankéé Ray Bop a ngi hoñlak: “A bé ndik wee, nyuu i nkôp baemble disuhuu.” Sita Anna Garner a toñol le: “Soso mbimba i bi nôga mu kii ba bé bamb moo.” Fred Twarosh a kal le: “Baemble bobasôna ba ba bé ha, ba bi telep kiki mut wada.” Mankéé Evangelos Scouffas a kal le: “Hala a bé wengoñle ngim ngui i tôbôtôbô i bi paa bés biyééne gwés, di telep bés bobasôna, mis nyonok ni gwiiha.”

Ngandak lôk kéé mu likoda likeñi li, li bé li ma bôdôl añal ñañ nlam u Ane. Ndi hanano ba bé wengoñle ba bi kôs ngui i tôbôtôbô i ke ni bisu i boñ hala. Ethel Bénnékof a nkal le, Banigil Bibel ba bi huu “nyonok ni makénd, ni gwéha miñem nwap iloo ngéda bisu.” Sita Odessa Tuck, nu a bééna 18 nwii ha ngéda i, a huu likoda li ndôn li, ni makidik le a’ timbhe nsébla unu le: “Njee a’ kee?” A nkal le: “Me bé yi bé hee, lelaa, ni kii. Jam me bé yi li bé le, me bé sômbôl nigle Yésaya, nu a kal le: ‘Me nunu! Om me!’” (Yésaya 6:8) Mankéé Ralf Leffler a nkal le: “Hilo hi tôbôtôbô hi, hi bé bibôdle bi hônd ikeñi u ñañ nlam u Ane, u u nyon ni hisi hiosôna i len ini.”

Mankéé George Gangas a kal le: “Hala a ta bé hélha jam le likoda li ndôn li nwii 1922 i Sédar Point, i Ôhiô, li bi jôp ikété ñañ u Mbôgi Yéhôva kiki jam li tôbôtôbô. Likoda li ndôn li, li bi tinde me i yoñ makidik le me tôlôk bañ lipe kekikel.” To hala kiki a yoñ makidik ma behee behee, a bi tôl bé to jada. Julia Wilcox a tila le: “Me nla bé me toñol i jam me nôgda hiki ngéda me mboma Sédar Point nwii 1922 ikété bikaat gwés. Me gwé ndigi ngôñ i kal le, ‘me nyéga, a Yéhôva, inyule u bi hôla me i ba ha.’”

Nlélém jam i len ini, ngandak ikété yés i ngi hoñlak likoda li ndôn li, li li bi yônôs miñem nwés ni maséé, ni makénd, ni gwéha inyu Djob jés likeñi ni Kiñe yé. Mu kii di mbigda nya mam i, hala a ntinde yak bés i kal le: “Di nyéga a Yéhôva, le u nhôla bés i ba ha.”