DI NIÑIK KIKI BIKRISTEN
Diihe matiñ ma Yéhôva ma loñge ni béba
Yéhôva Djob a bi mal téé kii i yé loñge ni kii i yé béba inyu bôt ba binam. Kiki héga, a bi kal le, libii li yé jam li nlama nom ipôla munlôm wada, ni muda wada. (Matéô 19:4-6, 9) A neebe bé nyega ndéñg yo ki yo. (1 Korintô 6:9, 10) A bi ti yak matiñ ma ma mbéñge bienk ni mahabga, ma ma mboñ le litén jé li ba maselna ni matén mape.—Ndiimba Mbén 22:5; 1 Timôtéô 2:9, 10.
I len ini, ngandak bôt i ntjél noñ matiñ ma Yéhôva ma loñge ni béba. (Rôma 1:18-32) Ba neebe mahoñol ma nkoñ isi ngéda ba nyoñ makidik inyu haba wap, ni maboñok map. Ngandak i nkadba ni béba yap niñ, ba yanak bet ba yé mahéñha ni bo.—1 Pétrô 4:3, 4.
Mu kiki di yé Mbôgi Yéhôva, di nlama bana makénd i nit matiñ ma Djob ma loñge ni béba. (Rôma 12:9) Lelaa di nla boñ hala? Ibabé i babaa mut nye ki nye, di nlama yis bôt mam Yéhôva a neebe. Yak niñ yés i nlama tibil unda le di neebe, di diihege ki matiñ ma Yéhôva inyu loñge ni béba. Kiki héga, ngéda di mpohol mambot més, ni gwom gwés bi nyañga, di nlama badba le: ‘Baa gwom me mpohol, bi ñunda le me ndiihe matiñ ma Yéhôva tole ma nkoñ isi? Baa mambot mem, ni nyañga yem, bi nla yis bôt le me yé kristen i i nkon Djob woñi?’ Tole, ngéda di mpohol biliñgeliñge di ga béñge, di badba le: ‘Baa Yéhôva a ga neebe biliñgeliñge bini? Bimbe bihiumul bi ntinde bôt i bana? Baa mintuk me mpohol mi nla hôyôs ngui i makidik me gwé i boñ loñge? (Tjémbi 101:3) Baa mi nla ba ngok baagene inyu lihaa jem tole inyu bôt bape?’—1 Korintô 10:31-33.
Inyuki hala a yé nseñ le di sôñ matiñ ma Yéhôva ma loñge ni béba? Inyule ndék ngéda Yésu a ga tjé biloñ, a héa ki ndôñ béba yosôna. (Ezékiel 9:4-7) Ndik bôt ba mboñ sômbôl i Djob bon ba ga pei. (1 Yôhanes 2:15-17) Jon, bés bobasôna di yoñ makidik i sôñ matiñ ma Yéhôva ma loñge ni béba, kayéle bet ba ntehe bihiumul gwés bilam, ba la ti Djob lipém.—1 Pétrô 2:11, 12.
Kii mambot mem, ni nyañga yem, bi nyelel inyu litehge jem li loñge ni béba?
BÉÑGE VIDÉÔ INI LE YILA LIWANDA LI YÉHÔVA—MUNLÔM WADA, MUDA WADA, I MBUS WAN MAMBADGA MANA:
Inyuki njel pék i yé le di niñ inoñnaga ni matiñ ma Yéhôva ma loñge ni béba?
Inyuki bagwal ba nlama bôdôl niiga bon bap matiñ ma Yéhôva ma loñge ni béba ngéda ba ngi yii batitigi?
Lelaa boñge ni mimañ mi bôt, mi nla hôla bôt i nôgda loñgeñem i Djob?