DI NIÑIK KIKI BIKRISTEN

Jam li mondo inyu likoda jés li ñem sonde

Ibôdôl i sôñ Kondoñ u nwii 2018, likoda li ñem sonde li ga bôdôl bana biniigana inyu yigil, bititii ni biliñgeliñge. Bi mba bi mpémél ikété ngobol i Bibel i yigil ini le Les Saintes Écritures—Traduction du monde nouveau (nwtsty), to ibale ngobol i Bibel yigil i i yé ngi ba ni hilémb hinan! Ibabé nkaa, biniigana bi, bi ga lémés ngôôba nan i makoda. Ndi, jam li nlôôha ba nseñ li yé le biniigana bi, bi ga hôla bé i kônde tiige bebee ni Isañ wés nu gwéha le Yéhôva!

BINIIGANA INYU YIGIL

Biniigana bi, bi ga kéñbaha yi di gwé inyu ngandak minlôñ mi Bibel, kiki bo dilémb ni mam mape ma ngim mambok.

Matéô 12:20

Nsiñga u nloñ limha: Lambe ba bé gwélél mandap i bé man séa biték nyonok ni môô ma ôlivé. Nsiñga u bé ôt môô inyu lôñôs hié. Bini bibañga ni hop Grikia le “nsiñga u nloñ limha” bi nla pôdôl nsiñga u u mpémés hida, inyule likalak li ngi yii mu, ndi hié hi lém. Mbañ i Yésaya 42:3 i bi pôdôl konangoo i Yésu. Kekikel a’ lém bé njajat i botñem i bôt ba suhulnyu ni ba ba nson njonok.

Matéô 26:13

Hodo: Ini buk ni hop Grikia le a·menʹ, i yé nlélém buk ni hop Lôk Héber ʼa·menʹ, i nkobla le “i ba hala,” tole “ntiik.” Yésu a bé béna gwélél buk i, i bibôdle bi ngim mbônga tole ngim mbañ, inyu unda le i yom a yé pot i yé toi maliga, ni le ba nla bôdôl yo ñem. Bôt ba nkal le ligwéélak li Yésu li buk ini le “hodo” tole amen, li yé tôbôtôbô ikété bitilna bipubi. Ngéda i nlo ngélé iba (a·menʹ a·menʹ) kiki i mbéna ba ikété kaat Yôhanes, bibuk bi Yésu bi nkoblana le “hodo hodo.”—Yôhanes 1:51.

BITITII NI BILIÑGELIÑGE

Bifôtô, bititii, biliñgeliñge bi nhôla i nok ngim biniigana ikété minlôñ mi Bibel.

Bétfagé, Hikôa hi Ôlivé, ni Yérusalem

I man vidéô ini, i noñ njel i nke i Yérusalem u lôlak i pes likôl. I mbôdôl i mbai yada ba nsébél i len ini le et-Tur ikepam ngim homa i nlôôha ba ngii i Hikôa hi Ôlivé. Bebek et-Tur nyen a yé i mbai Bibel i nsébél le Bétfagé. Bétania a yé i pes waé i Bétfagé, i pes i makuli i Hikôa hi Ôlivé. Ngéda a bé i Yérusalem, Yésu ni banigil bé ba bééna lem i nañal i Bétania. I len ini ba nsébél nye le el-ʽAzariyeh (El ʽEizariya), jôl li Arabik li, li nkobla le “Tison i Lasarô.” Ibabé nkaa Yésu a bé yén i ndap Marta, Maria, ni Lasarô. (Matéô 21:17; Markô 11:11; Lukas 21:37; Yôhanes 11:1) Ngéda a bé ke i Yérusalem, bebek le Yésu a bé kil njel yada i mpôôna njel vidéô i unda. I hilo 9 hi sôñ Nisañ, i nwii 33 N.Y., ngéda Yésu a bi bet ngii man jakas i nyodi Hikôa hi Ôlivé ikepam i Yérusalem, i mpôôna le a bé lôl i Bétfagé, a noñok njel i nke.

Njel i nlôl i Bétania i kenek i Bétfagé
Bétfagé
Hikôa hi Ôlivé
Nsôsôgô u Kidrôn
Hikôa hi témpel

Tone ikété hés i tindi

I titii ini i ñunda tindi i mut binam i ba ntôp ni tone. Mu ntjok ôñgba unu, tone a gwé 11.5 cm. I nwii 1968, ngéda bôt ba njôôñ yi ba bé hun hisi mu ñombok u Yérusalem, ba bi léba nlômbi hés i tindi ntôbôk ni tone. I tindi ba bi léba ni tone wé, bi bé ha ibôdôl ngéda Lôk Rôma. I titii ini, i ñéba bés le ba bé tômôl bôt i kék ni batone inyu nol bôt. Bebek i tone nunu a mpôôna batone Lôk Rôma i bi gwélél inyu tômôl Yésu Kristô i kék. Ba bi léba hés i tindi ntôbôk ni tone ikété nkuu ngok het ba bé tééda bihés bi mut nu a nwo i mbus le minsôn mi mbol. Hala a ñunda le mut nu a bi nola i kék a bé le a juba.—Matéô 27:35.