DI NIÑIK KIKI BIKRISTEN

Maboñok malam ni njôôñ lipém bi nyoña miñem

Ngim mangéda i bôda ba ba neebe maliga ba ntinde balôm bap i boñ nlélém ni njel mabonok map malam. Ndi, ba yé ba hônba mandutu makeñi ngandak nwii. (1 Pétrô 2:21-23; 3:1, 2) Ibale u mboma ngitelepsép, kee ni bisu i yémbél béba ni njel loñge. (Rôma 12:21) Loñge yoñ ndémbél i nla bana ngui iloo i ngui bibuk bi nla bana.

Noode béñge mam kiki sobiina woñ a ntehe mo. (Filipi 2:3, 4) Unda nye ñem ngôô ni loñgeñem, u boñ kii yosôna u nla inyu yônôs mbegee yoñ ikété ndap lihaa, nlélém ngéda, u tinak nlô woñ njôôñ lipém. Bana lem i tibil emble. (Yakôbô 1:19) Bana wongut, u bana ki lem i kal sobiina woñ le u ngwés nye. To ibale sobiina woñ a ñunda bé le a ndiihe we nlélém kiki we u ndiihe nye, ba nkwoog nkaa le ndéñbe yoñ i nlémél Yéhôva.—1 Pétrô 2:19, 20.

BÉÑGE VIDÉÔ I GWÉ ÑO LE YÉHÔVA A BI TI BÉS NGUI I BEGEE MBEGEE YÉS, I MBUS TIMBHE MAMBADGA MANA:

Niñ i Grace Li i bé lelaa i bibôdle bi libii jé?
Kii i bi tinde nye i neebe maliga?
I mbus sôble yé, lelaa sita Li a bi hônba mandutu a bi boma?
Inyu mambe mam ma ma bé béñge nlô wé sita Li a bé soohene?
Bimbe bisai sita Li a bi kôhna inyule a bi bana njôôñ lipém ni maboñok malam?

Bipes ba ñat: Bititii bi vidéô le, ‘Yéhôva a bi ti bés ngui i begee mbegee yés,’ i i ñunda mahol ma Grace Li. 1. Grace a yé ee i hipagda lijubul. 2. Mankéé nu muda a yé nigil Bibel ni Grace. 3. Grace ni bon bé ba yé nyodi homa wap nyuñga bijek i ke likoda. 4. Grace ni bôt bôô ba lihaa jé i Ndap Ane. — Maboñok malam ni njôôñ lipém bi gwé ngui!