Manjel maa inyu bôdôl yéhôva ñem

David a bi yémbél Gôliat inyule a bi bôdôl Yéhôva ñem. (1 Samuel 17:45) Yéhôva a ngwés unda ngui yé inyu hôla bet ba ngwélél nye ni ñem wonsôna. (2 Miñañ 16:9) Lelaa di nla éba le di mbôdôl Yéhôva ñem, he yi yés ni ngap yés bé? Di béñge manjel maa mana:

• Bana lem i soohe. Di soohe ndik bañ inyu bat nwéhél ngéda di mboñ béba jam, ndi di soohe yak inyu bana ngui ngéda di mboma manoodana. (Matéô 6:12, 13) Di soohe ndik bañ inyu boñ le Yéhôva a sayap makidik di mal yoñ, ndi di soohe yak inyu boñ le Yéhôva a ti bés pék ­ilole di nyoñ makidik.—Yakôbô 1:5

• Añ, u nigil ki Bibel hiki ngéda. Añ Bibel hiki kel. (Tjémbi 1:2) Yoñ ngéda i ôt pék i mam u ñañ, u bii ki biniigana bi i bisélél. (Yakôbô 1:23-25) Kôôba ilole u nke likalô. U bôdôl bañ wemede ñem inyule u ntéé likalô ibôdôl behee. Tibil kôôba makoda inyu boñ le u ôt nseñ ni mo

• Noñ bitelbene bi ntôñ. Yéñ yi biniigana ntôñ u ntip pémés, i mbus u pala nôgôl gwo. (Ñañga bôt 9:17) Embe biniigana ni maéba mimañ mi nti.—Lôk Héber 13:17

BÉÑGE VIDÉÔ I GWÉ ÑO LE DI KON BAÑ NGOLBA WOÑI, I MBUS TIMBHE MAMBADGA MANA:

• Mambe mam ma bé kôhna i lôk kéé i bôda ni i bôlôm ini woñi?

• Kii i bi hôla bo i yémbél woñi wap?