Bikiñe bi njo sañ masuk ma ngéda
Ngim mbañ i yé munu bititii bini, i mpôdôl mam ma mbôña i nlélém ngéda. Ngandak mam mu, i ñunda le di yé “masuk ma ngéda.”—Daniel 12:4.
Minlôñ mi Bibel Masoola 11:7; 12:13, 17; 13:1-8, 12
Mbañ “Nuga bikai” i ñane nkoñ ’isi hala a nloo 3 000 nwii. I masuk ma ngéda, ño u nyônôs isaambok u mbabaa. I mbus ngéda, i mbabaa i i bi mal, “nkoñ ’isi wonsôna” u nkahal noñ nuga bikai. Satan a ngwélél nuga bikai inyu “jôs i bet ba nyégle.”
Biyônôl I mbus Ntida malép, biane bi bi nkolba Yéhôva, bi bi kahal ane nkoñ ’isi. I mbus ngandak nwii, i Gwét bi ntôla I, ane i Britania Nkeñi i bi sôs ngui ngandak. I bi témbna ngui yé i ngéda i bi adba ni Amérika. Iloo mangéda momasôna, Satan a ngwélél biane bi nkoñ ’isi masuk ma ngéda mana, inyu tééñga bagwélél ba Djob.
Minlôñ mi Bibel Daniel 11:25-45
Mbañ Sañ ipôla kiñe ñombok ni kiñe nwelmbok i masuk ma ngéda.
Biyônôl Jaman ni ane i Britania ni i Amérika bi bi jo gwét. I nwii 1945, Union Sôviétik ni biloñ bi bé nit nye bi bi yila kiñe ñombok. I nwii 1991, Union Sôviétik i bi kwo, i mbus ngéda, Ruslan ni biloñ bi bé nit nye bi yila kiñe ñombok.
Minlôñ mi Bibel Yésaya 61:1; Malaki 3:1; Lukas 4:18
Mbañ Yéhôva a bi om “nlegelnwin” wé i “tibil njel” ilole Ane i Mésia i ntééba. I bôt ba, ba bi kahal “añle batehe-bikuu miñañ minlam.”
Biyônôl Ibôdôl i nwii 1870, C. T. Russell ni mawanda mé ba bi sal ni ngui inyu léba maliga. I nwii 1881, ba bi kahal yigye le nson u likalô u yé nseñ ngandak. Ba bi pémés gwigil kiki bo “Di nyéñ 1 000 batéé likalô” ni “Nhook inyu añal ñañ nlam.”
Minlôñ mi Bibel Matéô 13:24-30, 36-43
Mbañ Ñoo a mbel kai ibe ikété blé, ba nwas le i nañ, i hô blé letee ni ngéda libumbul.
Biyônôl Ibôdôl i nwii 1870, maselna ipôla bañga bikristen ni base bitembee ma bi kônde nene. I masuk ma ngéda, bañga bikristen i bi kahal kodba, i bagla ki ni base bitembee.
Minlôñ mi Bibel Daniel 2:31-33, 41-43
Mbañ Makôô ma ma yé ni kei ni ték lima, ma yé pes yada i ôñgba ikeñi mbañak ni ngandak mintén mi bisélél.
Biyônôl Ték lima i yé yimbne i bôt ba yé ’isi énél i Britania ni Amérika, ba kolbaga bo. I bôt ba, ba nkéñ biane bini i gwélél ngui yap i nya i yôni.
Minlôñ mi Bibel Matéô 13:30; 24:14, 45; 28:19, 20
Mbañ Ba nkot “blé” ikété “ndugi,” Yésu a ntéé “nkol u maliga ni u pék” inyu jés “bôt bé ba ndap.” “Ñañ nlam” u mbôdôl añlana “ni nkoñ ’isi wonsôna.”
Biyônôl I nwii 1919, Yésu a ntéé nkol u maliga ni u pék. Ibôdôl ha ngéda i, nson u likalô u bi kônde hol. I len ini, Mbôgi Yéhôva i ñañal ñañ nlam ikété iloo 200 biloñ, i mpémés ki bikaat ikété iloo 1 000 dilémb.
Minlôñ mi Bibel Daniel 12:11; Masoola 13:11, 14, 15
Mbañ Nuga bikai i i gwé bitoñ biba, i nkot bôt ba nkoñ ’isi inyu yila “ôñgba i nuga bikai,” i nti ki “ôñgba i nuga bikai nhébék.”
Biyônôl Britania ni Amérika ba bi bot Likoda li matén (SDN). Ngandak biloñ i bi jôp mu likoda li. Ibôdôl i nwii 1926 ikepam i nwii 1933, kiñe ñombok i bé mu i Likoda li matén (SDN) i. Kiki Likoda li matén, ONU i nkal le i nla lona nsañ i nkoñ ’isi, ki le ndik Ane i Djob yon i nla boñ hala.
Minlôñ mi Bibel Daniel 8:23, 24
Mbañ Kiñe i i nkônha woñi i ‘nlona tjiba i nya i mbuma ñañ.’
Biyônôl Britania ni Amérika ba bi nol ngandak bôt, ba ôbôs ki ngandak gwom. Kiki hihéga, i Gwét bi ntôla II, Amérika a bi leñ loñ yada i i bé kolba nye ni Britania bomb atômik iba, ba nol bôt kiki banjemnje. Bôt ba bé ngi nôla hala i nkoñ ’isi.
Minlôñ mi Bibel Daniel 11:31; Masoola 17:3, 7-11
Mbañ Nuga bikai i i “nkôyôp tjôôm,” i nlôl i soñkum, i yé kiñe i nyônôs juem. Kaat Daniel i nsébél i kiñe i le ‘yom nyega i i nlona tjiba.’
Biyônôl Likoda li matén (SDN) li bi mal i Gwét bi ntôla II. I mbus gwét bi, ‘ba bi téé’ ONU. Kiki SDN, ONU i nkadba le i nla lona nsañ i nkoñ ’isi. I dilo di nlo, ONU i ga tjé bibase.
Minlôñ mi Bibel 1 Tésalônika 5:3; Masoola 17:16
Mbañ Biloñ bi nlegel le “nsañ u yé, woñi u ta ha bé,” i mbus, “jôm li bitoñ” ni “nuga bikai” bi ntjé “muda libambe.” Ha nyen tjiba y’a kwél biloñ.
Biyônôl Biloñ bi nkadba le bi nlona nsañ, bi mélés ki woñi i nkoñ ’isi. I mbus, biloñ bi bi nit ONU bi ntjé kwéha base. Ha nyen njiiha ikeñi i mbôdôl. I njiiha i, i ga mal ngéda Yésu a ga tjé nkoñ ’isi u Satan wonsôna i Armagédôn.
Minlôñ mi Bibel Ézékiel 38:11, 14-17; Matéô 24:31
Mbañ Gôg a njôp hisi hi bagwélél ba Djob. I mbus, biañgel bi nkot “mimpohlak.”
Biyônôl Kiñe i ñombok, ni biane bi nkoñ ’isi bipe ba nkolba bagwélél ba Djob. I mbus ndék ngéda, minhook mi yii hana ’isi mi nke i ngii.
Minlôñ mi Bibel Ézékiel 38:18-23; Daniel 2:34, 35, 44, 45; Masoola 6:2; 16:14, 16; 17:14; 19:20
Mbañ ‘Nu a yii’ i “puba hosi” a mélés “yémbél yé” ni njel le a ntjé Gôg ni mintôñ nwé mi gwét. “Nuga bikai” i nléña “i titimba i hié,” mbus ôñgba ikeñi i yiinda i Daniel i ntjiba.
Biyônôl Yésu, Kiñe Ane i Djob a nlo i tohol bôt ba binam. Nye ni 144 000, ni biañgel, ba ga tjé biloñ bi bi ga kodba inyu jôs litén li Djob, ni minlôñ mi m’bô nwominsôna mi nkoñ ’isi u Satan.