Hulda a bi yônôs njômbi yé
I NWII mi bi tagbe, ibale ni yuuga man ônd nu Sangir Besar i loñ Indônésia, bebek ki ni bi boma i bisita bini biaa mu i ngwañ u tuye. Bi nyiba ngandak mu ônd i inyu nson wap u likalô—ba nhôla bôt i nok Bibel. Ndi lini lisañga, ba bé sal bôlô ipe.
Ônd i Sangir Besar i ñombok u Indônésia
Jam li bisu li bé le, ba bé ba jôp ikété tuye ba yéñ ngok, ba nyuge yo letee ni ngwañ u tuye, ngok ihogi mu i bééna bikeñi bi bol. I mbus, ba bé ba yén i beñgi mbañak ni bikék, ba yoñ hama inyu bol i ngok i, ba bé ba nyugut yo kayéle ipe i bé i yila isiina kiki bo litjee li kôp. I mbus ha, ba bé ba ha disiina di ngok di ikété minlônga mi ndamb, ba begee yo ba bedna yo likala ikepam i homa ba bé yééne. I mbus ba bé ba ha i ngok i i mbôm bibot i ba bé le ba begee inyu ha yo i camion, ba bé gwéélak i ngok i inyu boñ minloñ mi matôa.
Hulda, a yé kot ngok i ngwañ lép
Wada mu ikété bôda ba, jôl jé le Hulda. A bi tégbaha ngandak ngéda i sal bôlô i iloo bini bisita bipe. I yé maliga le, i moni a bé lama kôhna mu nson u, mi bé lama hôla nye i somb gwom bi mbéda lihaa jé. Ndi lini lisañga a bé sal a ban-ga ngim njômbi ipe i yônôs. A bééna ngôñ ni tafel inyu pam i jôp i JW Library®. Hulda a bé yik le, bividéô ni mam mape ma yé mu ikété JW Library® ma ga kônde hôlôs likeñge jé i nson likalô, hala a hôla ki nye i tibil nok Bibel.
Hulda a bé sal ngeñ iba hiki kegla tutu, a bi sal hala sôñ yada ni pes, a bolok jôga li ngok inyu yônôs man camion. Nsôk i sôk a bi bana jôga li moni inyu somb tafel.
Hulda ni tafel yé
Hulda a nkal le: “To hala kiki i bôlô i i bé wéés me ngandak, yak bipes bi ngok bi bé bi babaa me. Me bi pala hôya i ndutu i ni mambabaa ma. Tafel yem i mondo i bi hôla me i tibil téé likalô ni i tibil kôôba makoda ibabé le me lôôha nok ndutu.” A bi kônde ki le, i tafel i, i bi hôla ki nye i bibôdle bi himala hi kon unu le COVID-19, inyule minson mi likoda nwominsôna mi bé bôña ni njel internet tole téléfôn. Di nkon maséé lôñ yada ni Hulda inyule a bi yônôs njômbi yé.