Litina lipém li yé jam li nlôôha ba nseñ inyu lédés maada ma ndap libii
INYU BABIINA
3 I tina lipém
KII HALA A NKOBLA
Babiina ba ba ntina lipém ba ntôñna bo ni bo, to ibale ngimanôgla i mpam. Kaat ni hop Ngisi le Ten Lessons to Transform Your Marriage, i nkal le: “Hiki sobiina, a nlama ndigi bé yééne i makidik mé motama; maselna ni hala, bo iba ba nlama yoñ ngéda inyu kwélél i mam ma nlona bo ngimanôgla. Hiki sobiina a nlama diihe mahoñol ma nuu numpe, ni yoñ makidik ma ma ntinde bo iba i nôgla.”
LITIÑ LI BIBEL: “Gwéha . . . i nyiñil bé ndigi yomede.”—1 Korintô 13:4, 5.
“Ibale me nti nwaa wem lipém, hala a nkobla le me nyi le a gwé mahee, ni le me nlama bé boñ yom yo ki yo y’a unbaha nye, ndi to ôbôs libii jés.”—Mika.
INYUKI HALA A YÉ NSEÑ
Ibale babiina ba ntina bé lipém bo ni bo, ba mba ba nyahlana, ba solnaga, ba mba ki ba nyana bo ni bo—ngandak bayimam i nkal le bilem bibe bi, bi nla tinde bôt i bos libii jap.
“Bipôdôl bibe, i bébe nwaa woñ jam, ni minjôha mimbe, bi nla boñ le a nôgda le a gwé ha bé nseñ wo ki wo, yak botñem yé inyu yoñ i ga mal, hala a ga ôbôs libii linan.”—Brian.
JAM U NLA BOÑ
TIBIL WANBA
Tibil wan bipôdôl ni maboñok moñ ikété ngim sonde. Mbus badba le:
‘Me nsol sobiina wem, tole me nti nye bibégés ngélé yañen inyu ngim kel?’
‘Bimbe bilem bilam bi sobiina wem bi ntinde me i ti nye lipém?’
KWEL NI SOBIINA WOÑ
Mambe maboñok tole bipôdôl bi nla boñ le u nôgda le sobiina woñ a nti we lipém?
Mambe maboñok tole bipôdôl bi mboñ le u nôgda le sobiina woñ a nti bé we lipém?
NDÉK MAÉBA
Tila i lipep mam maa u nla boñ inyu unda sobiina woñ le u nti nye lipém. Hôla yak sobiina woñ le yak nye a boñ nlélém. Hiki mut a unda sobiina wé i yom a bi tila, i mbus ni bii i bisélél i yom hiki wada nan a mbôn le a ga boñ.
Tila bilem bilam bi sobiina woñ, bi u ngwés ngandak. Kal ki nye inyuki u ndiihe bilem bi.
“Inyu boñ le me laa ti nlô wem lipém, hala a nsômbôl kobla le me nlama unda nye ikété maboñok mem le a gwé mahee ni le me gwé ngôñ le a ba maséé. I mbéda bé mam makeñi; ngim mangéda i mbéda bon ba mam inyu unda le u nti toi nlô woñ lipém.”—Mégan.
U nlama nok le i yéñ kôhna lipém bé jon li yé nseñ, ndi i yéñ yi too sobiina woñ a nôgda le u nti nye lipém.
LITIÑ LI BIBEL: “Eñgbana ni ñem yôni ni konangoo, ni loñgeñem, ni suhulnyu, ni ñem lima, ni wongut.”—Kôlôsé 3:12.