I si énél i Ane Djob “nsañ w’a ba”

Ndék ngéda, énél Djob a bi téé i i yé Ane Djob di mbem ibôdôl behee, i ga lona nsañ ni adna ikété hisi hiosôna. Kaat tjémbi 72:7 i mbôn bés le: “Ngandak nsañ y’a ba.” Ndi kekii Ane Djob i ga yoñ mam i moo? Lelaa i ga boñ inyu héñha mam? Ni umbe nseñ di ga kôs i ba i si énél i Ane Djob?

KEKII ANE DJOB I GA YOÑ MAM I MOO?

Bibel i bi ti bés ngandak mam ma ma ñunda le Ane Djob i yé bebee. Mam ma, mon ma yé “yimbne” i i gwé gwom kiki bo gwét ipôla biloñ, njal, makon, nyeñg i disi, ni yubda i i mbet ndigi bet ni bet.​—Matéô 24:3, 7, 12; Lukas 21:11; Masoola 6:2-8.

Mbañ i Bibel ipe i nkal le: “Ndi u nlama yi jam lini le dilo di nsôk ngéda y’a ba nledek kiyaga. Inyule bôt b’a tôñ ndigi bomede, ba gwéhék moni, . . . ni bandogbene bagwal bap, ba ba nti bé mayéga, ni bapungul mam ma Nyambe, bôt ba dingônôk, ni ba mandinga, bôt ba minsohi, ni ba biyôgda, bôt ba nyai, baoo mam malam, . . . ni ba ngôk u nkwés ndim, b’a gwés maséé ma nkoñ ’isi iloo ki ba ngwés Nyambe.” (2 Timôtéô 3:1-4) Maboñog ma, ma yé yaga ibôdôl behee. Ndi i len ini, ma nyamb mayoo.

I mbañ i, i bi bôdôl yon i nwii 1914. Ni ki le bôt ma miñañ, bôt ba m’bô, ni batila bikaat ba bi pôdôl lelaa nkoñ isi u bi héñha ibôdôl ha nwii u. Kiki hihéga, mut miñañ i loñ Danmark le Peter Munch a bi tila le: “Bibôdle bi gwét bi ntôla i nwii 1914 gwon bi bi héñha niñ i bôt ba binam hana isi. Di bi nyodi i kég i bôt ba bé niñ loñge, mam map ma kenek ni bisu, . . . di jôp i kég mandutu, i manola, ni ôa, lôñni woñi homa nyensôna.”

Ndi jam lilam li yé le i mam ma, ma bé unda le bisu bi ga ba bilam. Ma bé unda le Ane Djob i gwé ni moo. Yak Yésu a bi pôdôl mam ma kiki yimbne i masuk ma ngéda i ngeñ a bi kal le: “Yak unu ñañ nlam u Ane w’a añlana ni nkoñ ’isi wonsôna, i ba biloñ gwobisôna mbôgi, ndi to le lisuk li nlo.”​—Matéô 24:14, MN.

I ñañ nlam u, won u yé ño nkwel u likalô li Mbôgi Yéhôva. Ndi i ba ki le mbamble wap u tôbôtôbô u gwé ño le: Nkum Ntat, u ñañal Ane Yéhôva. U Nkum Ntat u, mpémhak ikété 338 dilémb, u ntoñol hiki ngéda mam malam Ane Djob i ga boñ inyu bôt ba binam hana isi.

LELAA ANE DJOB I GA BOÑ INYU HÉÑHA MAM?

Ndimbhe i niñne ngii mam ma-na:

1. Bôt ba m’bô ba nkoñ isi unu, bo bé bon ba ga éga i Ane i.

2. Baéga ba m’bô ba nkoñ isi unu, ba ga noode kolba Ane Djob inyule ba ngwés le botama bon ba énél.​—Tjémbi 2:2-9.

3. Ane Djob i ga tjé biénél bi m’bô bi bi nyéñ ke ni bisu i tét bôt ba binam. (Daniel 2:44; Masoola 19:17-21) I gwét bi ntôla bi nsôk bini, gwon ba nsébél le Armagédôn.​—Masoola 16:14, 16.

4. Ba bobasôna ba ba nsuhul bomede i si énél i Djob, ba ga pei i Armagédôn, ba jôp ki i mbok yondo het nsañ u ga ba. Bon ba ga ba i bet Bibel i nsébél le “limut li bôt likeñi,” li nomba yap i ga ba ngandak didun.​—Masoola 7:9, 10, 13, 14.

UMBE NSEÑ DI GA KÔS I BA I SI ÉNÉL I ANE DJOB?

Jam li bisu di nlama boñ inyu ba i si énél i Ane Djob li yé yigil. Yésu a bi kal ikété masoohe le: “I jam lini jon li nkena i niñ boga, le ba pam i yi we, bañga mpom Nyambe, ni nu u bi ep le Yésu Kristô.”​—Yôhanes 17:3, MN.

Ngéda bôt ba ntehe Yéhôva kiki mut nu a yé toi, hala a nlona bo bisai ikété ngandak manjel. Di wan le manjel ima: I bisu i yé le hémle yap inyu Djob i nkônde let. I hémle i, i niñne i ngii mam ma yé ntiik, ma ma nkwés bo nkaa le Ane Djob i yé toi ni ki le i gwé ni moo. (Lôk Héber 11:1) I yônôs iba, i yé le gwéha yap inyu Djob ni inyu mut wap libôk i nkônde nañ. Gwéha yap inyu Djob i ntinde bo i nôgôl nye ni ñem wap woñsôna. Ndi gwéha yap inyu mut wap libôk i ntinde bo i bii Litiñ li Gôl Yésu a bi ti i bisélél. Litiñ li, li nkal le: “Kikii ni nsômbôl le bôt ba bôñôl bé, yak bé ki bôñlana bo hala.”​—Lukas 6:31.

Kiki isañ nu gwéha, Nhek wés a nsômbôl le di bana loñge niñ. A nsômbôl le di pam i niñ i yom Bibel i nsébél le “bañga niñ.” (1 Timôtéô 6:19) Niñ i len i ta bé “bañga niñ.” Inyu didun di bôt i len ini, hala a ta ha bé to niñ​—ba njoba ndigi inyu niñ. Inyu ti bés dinyo malép di “bañga niñ,” di wan le ndék biloñge bi mam Ane Djob i ga bôñôl bôt ba ga ba i si énél yé.