4. Baa Djob a bi hek bés inyu boñ le di nok ndutu?

Inyuki bôt ba mbat mbadga i?

Ndimbhe i mbadga i i ntihba litehge jés li niñ.

Hégda le

Baa hala a nôôga le Djob a bi hek hisi ni bilama gwé inyu boñ le i bôt ba binam ba nyééne mu ba nok ndutu?

I bôt ba nhémle bé Djob ba ntehe le mandutu ma yé njom yada i i ñéba le Djob a ta bé. Ba nhoñol le mandutu més ma ñéba le (1) Djob a gwé bé ngui i mélés mo, (2) Djob a gwé bé ngôñ i mélés mo, tole (3) Djob a ta bé.

Baa manjom mape ma ma mboñ le bôt ba nok ndutu ma yé?

I yom Bibel i niiga

Djob a bi hek bé bés le di nok ndutu.

A gwé ngôñ le di nok lingoñoo li niñ.

“Loñge jam i ta bé inyu [bôt] iloo le ba hagak, ba niñik loñge ntel ba yii nom. Ni ki le likébla li Nyambe li yé le hiki mut a jek, a nyok, a nôgdaga loñge ikété ndumbba yé yosôna.”​—ÑAÑAL 3:12, 13.

I bibôdle, Djob a bi ti bôt ba binam kii yosôna ba bé ba gwé ngôñ inyu boñ le ba nok bañ ndutu.

A bi hek bé bôt ba binam le ba nok ndutu.

“Nyambe a kal bo le: ‘Gwala, ni bôl, ni yônôs hisi, ni suhus ki hio.’”​—BIBÔDLE 1:28.

Adam bo Éva ba bi tjél nôgôl Djob.

Hala a bi sôk a lona mandutu inyu yap ni inyu mbôda yap.

“Kiki béba i bi jôp i nkoñ ’isi ni njel mut wada, yak nyemb i jôp ni njel béba, hala nyen nyemb i bi tjama ni bôt bobasôna inyule bobasôna ba bi boñ béba.”​—RÔMA 5:12.a

Djob a bi hek bé bôt ba binam le ba éga bomede.

Kiki mut binam a nla bé niñ ikété malép, hala ki nyen a nla bé éga nyemede.

“Mut a ntéé bé makôô mé ni nyemede ngéda a nke.”​—YÉRÉMIA 10:23.

Djob a gwé bé ngôñ le di nok ndutu.

A gwé ngôñ le di niñ kayéle di keñgle mandutu ikété manjel momasôna.

“Éé, ki u bi léglak to matiñ mem maôô. Ha nyen nsañ woñ u bak le u yila kiki lom.”​—YÉSAYA 48:18.