Éba bôt le u ngwés bo
Hee ndutu i nla lôl
I ngéda mut a mbéna todol bôt, i lem i i nhoo bé ke. Kiki i mbéda ngandak biliya ni ngandak ngéda inyu mélés kon ikété nyuu, hala yak nyen i mbéda ngandak biliya ni ngandak ngéda inyu héya lem i todol bôt ikété ñem. Kii u nla boñ inyu boñ le u todol ha bañ bôt?
Maéba ma Bibel
“Ni haba gwéha inyule yon i ñat toi bôt bobasôna i nya i yôni.” —KÔLÔSÉ 3:14.
Kii hala a nkobla? I ngéda u mbôñôl bôt mam malam, ba nkôôge we bebee. Kiki u mba u nke ni bisu i unda bôt le u ngwés bo, hala nyen ngôñ yoñ i todol bo y’a sôs. Ibale u nigil i gwés bôt bape, hala a ga hôla we i héya mahoñol mabe u gwééne bo mukété ñem woñ.
Kii u nla boñ
Ibale u gwééne bôt ba ngim litén mahoñol mabe, yéñ manjel ma tôbôtôbô inyu éba bo le u ngwés bo. U gwé bé le u boñ mam makeñi. Mu maéba ma noñ ha, noode le boñ jada:
Hiki liboñok li gwéha u mboñ li nhôla we i héya lem i todol bôt ikété ñem woñ
U nla ba liyômba ni bôt ba litén li. Kii hihéga u nla yibil bo likôga le li yipba bañ, u nla ti bo yééne yoñ ngéda ni yé litôwa.
Ba mut bisu i bôdôl nkwel ni bo to ibale ba mpot bé hop woñ loñge.
U pala bañ unup téntén ibale u nok bé inyuki ba mboñ ngim jam.
Ibale ba ñañle we mandutu map, yoñ ngéda i emble bo.