Yigil 3
Njee a yé Yésu Kristô?
Inyuki Yésu a nsébla le Man Djob “nu bisu”? (1)
Inyuki a nsébla le “Bañga”? (1)
Inyuki Yésu a loo nkoñ isi kii mut binam? (2-4)
Inyuki a boñ mam ma hélha? (5)
Kinje mam Yésu a ga boñ ndég ngéda? (6)
1. Yésu a ba niñig i ngii kiki hégél mbuu ilole a ba lo hana isi. Nyen a ba hégél i Djob i bisu, jon a nsébla le Man Djob “nu bisu”. (Kôlôsé 1:15; Masoola 3:14) Yésu a yé mpom Man Djob a heg ni moo mé nyemede. Ilole Yésu a ngwéé kii mut binam, Yéhôva a gwélél nye kii “nwet ngwelnson” inyu heg mam momasô ma yé i ngii ni isi. (Bingéngén 8:22-31; Kôlôsé 1:16, 17) Djob a gwélél ki nye kii mpôdôl Wé nu bisu, inyu hala nyen Yésu a nséblana le “Bañga”.—Yôhanes 1:1-3; Masoola 19:13.
2. Djob a om Man Wé isi, a boñ le a lôô libum li Maria. Inyu hala nyen Yésu a bana bé isañ nu a yé mut binam. Jon a kôdôl bé béba yo kii yo, to ngi telepsép. Djob a om Yésu isi inyu manjom maa: (1) Le a niiga bés maliga inyu Djob (Yôhanes 18:37), (2) le a niñ niñ i telepsép ni ti bés ndémbél i di nlama nôñôl (1 Pétrô 2:21), ni (3) le a ti niñ yéé kii sesema inyu héya bés i mog mi béba ni nyemb. Inyuki i ba sômbla le i sesema ini i tina?—Matéô 20:28.
3. Kiki a tjél nôgôl mbén Djob, mut nu bisu, Adam, a boñ yom Bibel i nsébél le “béba.” Jon Djob a ti nye kogse i nyemb. (Bibôdle 3:17-19) A ba ha bé a kôli ni lihéga li bitééne bi Djob, to peles a ba ha bé. Ndég ni ndég a bôdôl un, i mbus a wo. Adam a lôôhe bon bé bobasô béba yé. Inyu hala nyen yak bés di ñun, di nkon, di nwo. Lelaa ni bôt ba binam ba bé lama tohlana?—Rôma 3:23; 5:12.
4. Yésu a bé peles kiki Adam a ba bibôdle. Ndi mahéñha ni Adam, Yésu a bi nôgôl Djob i ba bé nwaa, letee ni hikala hi ndutu hi nsôk. Jon a bi la ti niñ yé i peles kii sesema inyu saa béba i Adam. I yom i yon Bibel i nsébél le “binoñ.” I bôdôl ha nyen bon ba Adam ba nla pam i mog mi nyemb. Bôt bobasô ba nhémle Yésu, bibéba gwab bi nla nwéhlana le ndi ba kôs niñ boga.—1 Timôtéô 2:5, 6; Yôhanes 3:16; Rôma 5:18, 19.
5. I ngéda Yésu a ba hana isi, a mélés bakokon, a jés bôt njal i ba i gwé, a mômôs bambuk mbebi, a tugul yak bawoga. Inyuki a ba boñ mam ma hélha mana? (1) A ba kon bôt ba nson ndjonog ngoo, a gwéhég le a hôla bo. (2) Mam ma hélha ma a ba boñ ma ba éba le a yé man Djob. (3) Ma ba éba kii a ga bôñôl bôt ba manôgla ngéda a’ yoñ énél isi kii Kiñe.—Matéô 14:14; Markô 2:10-12; Yôhanes 5:28, 29.
6. Kii Yésu a nwo, Djob a tugul nye kii hégél i mbuu, ni nye a témb i ngii. (1 Pétrô 3:18) I bôdôl ha, Djob a bi téé nye Kiñe. Ndég ngéda, Yésu a nhéya bibéba bi mam ni mandutu momasô munu isi.—Tjémbi 37:9-11; Bingéngén 2:21, 22.
[Bititii i mapep 7]
Mam Yésu a bé lama boñ ikété nson wé ma bé le a niiga bôt, a boñ bihélha bi mam, a ti ki niñ yé kiki sesema inyu yés