Yigil 7
Tiige Djob bebee ni njel masoohe
Inyuki i yé nseñ i soohe hikii ngéda? (1)
Nje di nlama soohe, ni lelaa? (2, 3)
Inyu mambe mam di nlama soohene? (4)
Imbe ngéda u nlama soohe? (5, 6)
Baa Djob a ñemble masoohe momasô? (7)
1. Masoohe ma yé i kwélés Djob ni suhul nyu. U nlama soohe Djob hi ngéda. Hala nyen u nla nôgda le u yé bebee ni nye, kii ni bañga liwanda. Yéhôva a yé mpémba ni ngui ngandak, ndi to hala a ñemble masoohe més! Baa u nsoohe Djob hikii ngéda?—Tjémbi 65:2; 1 Tésalônika 5:17.
2. Masoohe ma yé njel yada di mbéghene Djob. Jon di nlama ndik soohe mpom Djob, le Yéhôva. Ngéda Yésu a ba munu isi, a ba soohe Isañ hi ngéda, ha mut numpe bé. Yag bés di nlama boñ nlélém kii nye. (Matéô 4:10; 6:9) Ndi masoohe més momasô ma nlama lôô i jôl li Yésu. Hala a ñéba le di ndiihe tel i Yésu ni le di nhémle sesema yé a bi ti kii binoñ.—Yôhanes 14:6; 1 Yôhanes 2:1, 2.
3. Ngéda di nsoohe, di nlama kal Djob mam ma nlôl bés ñem. Di nlama bé tiimba minlélém mi bibuk mi di bi bôk nigil ndi to soñgol mo i kaat mayagal. (Matéô 6:7, 8) Di nla soohe ni suhul nyu, to ni limbe libag, to imbe ngéda, to he homa. Djob a nla nog masoohe di nsoohe nye to ikété yés ñem. (1 Samuel 1:12, 13) Ndi i yé loñge i yéñ homa nwee i het bôt ba ta bé inyu mam ma mbéñge bés bomede.—Markô 1:35.
4. Mambe mam u nla bat ngéda u nsoohe? To kinje jam li nla tihba maada moñ ni Djob. (Filipi 4:6, 7) Ndémbél masoohe Yésu a bi ti i ñéba le di nlama soohe inyu jôl li Yéhôva ni bitééne gwé. Di nla ki bat mahôla inyu mam ma niñ yés i minsôn, tole inyu nwéhél i bibéba gwés, ni mahôla inyu kolba manoodana. (Matéô 6:9-13) Di nlama bé soohe ndik inyu bés botama. Di nlama ndik soohe inyu mam ma nkiha ni sômbôl Djob.—1 Yôhanes 5:14.
5. U nla soohe to mbe ngéda ñem woñ u ntinde we le u ti Djob mayéga tole u bégés nye. (1 Miñañ 29:10-13) U nlama soohe ngéda u gwé mandutu ni ngéda hémle yoñ i noodana. (Tjémbi 55:22; 120:1) I yé loñge i soohe ilole u nje. (Matéô 14:19) Yéhôva a mbat bés le di soohege nye “ngéda yosôna.”—Efésô 6:18.
6. Di nlama soohe tén tén ngéda di boñ béba keñi. I nya mangéda i di nlama soohe yaga Djob le a nwéhél bés ni kona yé ngoo. Ibale di mpahle nye bibéba gwés ni le di nti bilia gwés gwobisô le di tiimba ha bañ ki boñ hala, Djob a “nyégi i nwéhél bés.”—Tjémbi 86:5; Bingéngén 28:13.
7. Yéhôva a ñemble ndik masoohe ma bôt ba téé sép. Ibale u ngwés le Djob a nog masoohe moñ, u nlama ti bilia gwoñ gwobisô i tééda mambén mé ikété niñ yoñ. (Bingéngén 15:29; 28:9) U nlama soohe ni suhul nyu. (Lukas 18:9-14) U nlama jo le niñ yoñ i kiha ni masoohe moñ. Hala nyen u ga éba le u gwé hémle ni le jam u mpot jon li yé toi we ñem. Ndik ha nyen Yéhôva a’ timbhe masoohe moñ.—Lôk Héber 11:6.