Yigil 10

Maboñok ma Djob a ñoo

Lelaa u nlama hoñol inyu mam Djob a nkal le ma yé mabe? (1)

Mambe maada ma minsôn ma yé béba i mis ma Djob? (2)

Lelaa kristen i nlama tehe bitembee? (3) mintug mi moni? (3) wip? (3) mindañ? (4) i gwélél mimbuu mimbe? (5) lihiua? (6)

Lelaa mut a nla nwas maboñok mabe? (7)

1. Bagwélél ba Djob ba ngwés mam ma yé malam. Ndi ba nlama ki nigil i oo mam ma yé mabe. (Tjémbi 97:10) Hala a nkobla le ba nlama keñgle maboñok Djob a ñoo. Ma maboñok mahogi mon ma yé bo kii?

2. Ndéñg: Liyén ni mut ilole ni biiba, liyén ni mut nu a ta bé nlôô woñ to nwaa woñ, liyén ni nuga kiki ba yén ni mut, liyén munlôm ni munlôm to mudaa ni mudaa, bi yé bibéba bikeñi i mis ma Djob. (Lôk Lévi 18:6; Rôma 1:26, 27; 1 Korintô 6:9, 10) Ibale munlôm ni muda ba niñ ngi biiba, ba nlama bagla tole ba biiba kiki mbén i mbat.—Lôk Héber 13:4.

3. Bitembee, mintug mi moni, wip: Yéhôva Djob a nla bé tembee. (Titô 1:2) I bôt ba ngwés lémél Nye ba nlama tjél bitembee. (Bingéngén 6:16-19; Kôlôsé 3:9, 10) Mintug mi moni nwo minsô mi yé ni hébék. Jon bikristen bi nyoñ bé ngaba inyu mintug mi moni nwo ki nwo kii bo lôtéri, pémsan bihosi, to hibia. (Efésô 5:3-5) Bikristen bi nip bé. Ba nsomb bé gwom ba nyi le bi yé gwom bi wip, ndi to bada gwom ngi kunde.—Manyodi 20:15; Efésô 4:28.

4. Hiun, Mindañ: Hiun hi hi ngwéla bé hi nla kena mut i mindañ. (Bibôdle 4:​5-8) Mut mindañ a nla bé ba liwanda li Djob. (Tjémbi 11:5; Bingéngén 22:24, 25) Mapuna ma yé béba, yag i timbhe béba i i yé le bôt ba nla mboñ bés.—Bingéngén 24:29; Rôma 12:17-21.

5. I ôm bôt makañ ni i gwélél mimbuu mimbe: Ngim bôt i nsébél mimbuu mimbe inyu noode mélés makon. Bape ba ñôm baoo bab gwom bi makañ inyu kônôs bo to nol bo. Ngui i yé i mbus mana mam momasô i yé i Satan. Inyu hala nyen bikristen bi nlama bé yoñ ngaba mu gwom bi. (Ndimba Mbén 18:9-13) Liyén bebee ni Yéhôva jon li yé mpom lisolbene i kolba makañ bôt ba yé le ba ôm bés.—Bingéngén 18:10.

6. Lihiua: I ta bé béba i nyo ndég wai, biye, to nya maog ipe. (Tjémbi 104:15; 1 Timôtéô 5:23) Ndi ngandag nyôba ni lihiua bi yé béba i mis ma Djob. (1 Korintô 5:11-13; 1 Timôtéô 3:8) Ngandak nyôba i nla kônôs we to ôbôs lihaa joñ. I nla ki hoo kwéha we manoodana mape.—Bingéngén 23:20, 21, 29-35.

7. I bôt ba mboñ i mam Djob a nkal le ma yé mabe ba ga “kôdôl bé ane Djob.” (Galatia 5:19-21) Ibale u ngwés toi Djob, u gwéhég ki le u lémél nye, u nla nwas mana maboñok momasô. (1 Yôhanes 5:3) Nigil i oo yom Djob a nkal le i yé be. (Rôma 12:9) Bôdôl kiha ni bôt ba gwé bilem bi Djob. (Bingéngén 13:20) Minhôôlak mi bikristen mi nla hôla we ngandak ibale u nkiha lôñ ni bo. (Yakôbô 5:14) Ngii momasôna, biine bot yoñ ñem yag Djob ni njel masoohe.—Filipi 4:6, 7, 13.

[Bititii i mapep 20, 21]

Djob a ñoo lihiua, wip, mintug mi moni, ni mindañ